MU BHAIBHERI andimopi munobva kuceukijwa ko mafiriadho arikuizwa nyamasi uno mu mativi o nyika jese. Waro, kuceukija uku kwakatangira kwapi? Kudari mecikwanisa kupsakisisa mu bhibhirioteka, munozozvivona zvecidakajisa maningi ngo kuvona  kuvona zvinonanga mabhuku ngo pamusoro po mafiriadho kwamunogara imwimwi. Vonanyi muezaniso munganana.

Phasika. “The Encyclo pædia Britannica inoti: “Mu testamente impsa amuna cinotatija kuceukijwa ko Phasika”. Ngo kwapi kwakatangira Phasika? Yakabva mukunamata ko cihedheni. Pikija hazvo kuceukija uko kweciizihwa kuceukijira kumuswa ka Jesu, cirovejeso cakabatana mu mukuvo wo Phasika uwu, asipi co ciKristu. Muezaniso, ngo pamusoro po “cishuro co Phasika” The Catholic Encyclopedia rinoti: “Cishuro citatijo co cihedheni zve nguva jese, i cikhombiso co ndimo.”

Kuceukijwa ko Gore Ibza. Njiku no cirovejeso cakabatana pamwepo no kuceukijwa ko gore ibza, zvinosiana ngo nyika no nyika. Ngo pamusoro po kuceukija uko, The World Book Encyclopedia rinoti: “Mutongi wo Roma unozwi Julius Caesar wakagaja zuva rokutanga ro mweji wa Zvita inga Gore Ibza mu Njiku yo 46 N.V.Y. VaRoma vakajipira njiku iyi kuna Janus, mwari wo musuvo mukuru, musuvo no matangiro. Mweji wa Zvita wakapekejwa zina ra Janus, wainga no kumeso kuviri—kumwe kwainga kwakasota kumbeji zve kumweni kwaisota sure.” Ngo kudaro kuceukija Gore Ibza kunobva ku mutango jo cihedheni.

Halloween (Njiku yo Varoi). The Encyclopedia Americana rinoti: “Mativi o zvirovejeso zvakabatana no Njiku yo Varoi kana kutevera mukhuva wo Druid [mupiri wo kare wo Celti], waiizwa nguva yo ciKristu isato yaguma. VaCelt vaiitira njiku huru kuna majimwari vaviri—mwari o zuva zve mwari o vakafa . . . , ano mukhuva waiizwa pa zuva ro kutanga ro Mweji wa Cikowe, kutanga ko Gore Ibza ro vaCelt. Njiku huru yo kureremeja vakafa, yakazonghwiniswavo mukati mo mutango-mutango jo ciKristu padoko ngo padoko.”

Mafiriadho Amweni. Azvikwanisiki kubhuya ngo pamusoro po kuceukija kunoizwa mu mativi o nyika yese. Pikija zvakadaro, mafiriado anoreremeja vandhu nokuti zvikwata zvo vandhu, azvitendhehwi ndi Jehovha. (Jeremia 17:5-7; Maitiro o Vapostori 10:25, 26) Rambanyi no murangariro wo kuti, kuceukijira ko vanamati kunofira pa kudakajisa Mwari no kwazvinobva. (Isaia 52:11; Apokalipsi 18:4) Zviambi zvo Bhaibheri zvakatahwa mu Cipauko 16 co bhuku rino, cinozomubesa kuti muvone mavonero anoita Mwari ngo kuva pa mafiriadho o cibarihwe.