CIJIJO 34

Tingakhombijisa Kudini Kuti Tinoda Jehovha?

RIJANYI

Imwimwi muri kujizwa muri phedo na Mwari kuvhira pa makatanga kujija Bhaibheri? Maidakarira kuenderera mberi mecivangisa ushamwari hwenyu naye? Kudari zviri izvona, ceukijanyi kuti Jehovha paanovona kuti rudo hwenyu kwaari uri kuengejeka, iyena anozoengejera kumuda no kumungwarira. Asi mungakhombijisa kudini kuti munoda Jehovha?

1. Mungakhombijisa kudini kuti munoda Jehovha?

Tinokhombija kuti tinoda Jehovha patinomuzwira. (Verenganyi 1 Johani 5:3.) Jehovha aativangiriji kuti timuzwire. Iyena anopekeja mukana umwe nga umwe wedu kuti asane kumuzwira nokuramba kumuzwira. Ngenyi? Ngokuti Jehovha anoda kuti timuzwire “ngo mwoyo wese.” (Varoma 6:17) Ngo mavereketero amweni, Jehovha anoda kuti mumuzwire ngo mwoyo wese, kuciripi ngo kuvangirijwa. Pa Divi ro citatu no rocirongomuna ro bhuku iri, tinozovona zviro zvinozomubesera kuti mukhombije rudo hwenyu kuna Jehovha, ngokuita zviro zvinomudakajisa no kutama kuita zviro zvinomunyangajisa.

2. Ngenyi nguva jimweni zvinganesa kukhombija kuti tinoda Jehovha?

Bhaibheri rinoti “Varurami vano matambujiko akawanda.” (Nduyo 34:20) Tese tinohwisana no kutama kukwana kwedu. Nguva jimweni tinosongana no zvineso zvokutama mare, kutamika ko ururami no zvineso zvimwenivo. Patinosongana no zvineso, zvinganesa maningi kuda kuita zvinotikumbira Jehovha kuti tiite. Izvo zvinoitika ngokuti kuita zvakashata zvingavoneka inga zvakareruka. Asi kudari mukaita zvese zvinoda Jehovha kuti muite pikija zvecinesa, munonga mecikhombija kuti munomuda kupinda zviro zvimwenivo hazvo. Munongazve mecikhombija kuti makagondeka kwaari. Ndiyo ndava, Jehovha anozovavo akagondeka kwamuri. Iyena narini aazomusiyi.—Verenganyi Nduyo 4:4.

NASANYI KUPSAKISISA

Vonanyi kuti ngenyi Jehovha anoreremeja maningi kuzwira kwenyu, no zvingamubesera kuti muenderere mberi makagondeka kwaari.

3. Shwiro yamunodikana kukhombija kwamuri

Mu Bhaibheri mu bhuku ra Jobe, tinoverenga kuti Sathana wakanyepera Jobe. Na nyamasi uno, Sathana ari kunyeperavo vandhu vese vanoda kushandira Jehovha. Verenganyi Jobe 1:1, 6–2:10, tevere bhuisananyi ngo muvhunjo jinotevera:

Sathana wakananga kuti Jobe waizwira Jehovha ngokuti wainga nenyi?—Vonanyi Jobe 1:9-11.
Sathana wakanangenyi ngo pamusoro po vandhu vese, kubatanijavo na imwimwi?—Vonanyi Jobe 2:4.

Verenganyi Jobe 27:5b Sandujo yo Nyika Imbza, tevere bhuisananyi ngo muvhunjo unotevera:

Jobe wakakhombijisa kudini kuti waidadi kamare Jehovha?

Jobe wakakhombija kuti waida Jehovha ngo kuramba akagondeka kwaari

Tingakhombija kuti tinoda Jehovha ngo kuenderera mberi takagondeka kwaari

4. Dakajisanyi mwoyo wa Jehovha

Verenganyi Mazwi Akangwara 27:11, tevere bhuisananyi ngo muvhunjo jinotevera:

Jehovha anojizwa kudini pamunoita zviro zvakanaka no kumuzwira? Ngenyi muri kunanga kudaro?

5. Imwimwi mungava makagondeka kuna Jehovha

Kuda kwatinoita Jehovha kunotiita kuti tivhunjevo vamweni ngo pamusoro pake. Ngo kuva kwedu takagondeka kuna Jehovha, tinomuzwira pikija pazvinonga zvecinesa. Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Jiviriranyi Rutendo Hwenyu Pikija Mecishohwa (5:09)

Munorangarira kuti zvinonesa kubhuya no vamweni ngo pamusoro pa Jehovha?
Mu vhidhiyo, ngo zvapi zvakabesera hama iyi kuti inyise kuthya?

Zvakareruka kuva takagondeka kuna Jehovha kudari tikada zvaanoda no kunyenya zvaanonyenya. Verenganyi Nduyo 97:10, perapo bhuisananyi ngo muvhunjo jinotevera:

Imwimwi makajija zviro zvakawanda maningi, waro ngozvapi zviro zvimweni zvinoda Jehovha? Ngo zvapi zviro zvimweni Jehovha zvaanonyenya?
Mungaitisa kudini kuti mujijire kuda zvakanaka no kunyenya zvakashata?

6. Kuzwira Jehovha nguva jese kunotibesera

Kuzwira Jehovha nguva jese iciro cakanaka catingaita. Verenganyi Isaia 48:17, 18, tevere bhuisananyi ngo muvhunjo jinotevera:

Imwimwi munorangarira kuti Jehovha nguva jese anoziva zvakanaka kwatiri? Ngenyi muri kunanga kudaro?
Mbhera wari, ngo zvapi zviro zvamakajija mu Bhaibheri ngo pamusoro pa Jehovha zvakamubesera?

VANDHU VAMWENI VANOTI: “Mwari aana basa no zviro zvandinoita kana zviro zvandicikaiti.”