CIJIJO 43
Kureva Kuti Makristu Anodikana Kumwa Doro?
Kutenderera nyika yese, vandhu vano mavonero akasiyana ngo pamusoro po doro. Vamweni vanodakarira kumwa doro pavanonga vano shamwari javo. Kuveni vamweni avatodi kutomwa. Vamwenizve vanomwa mbhera kudhakwa. Waro, Bhaibheri rinonangenyi ngo pamusoro po doro?
1. Zvakashata kumwa doro?
Bhaibheri arinangi kuti zvakashata kumwa doro. Kusiyapo izvo, irona rinonanga kuti: “Doro rinodakaja mwoyo yo vandhu.” Doro rinobatanijwavo pa zvipo zvizinji zvatakapuwa ndi Mwari. (Nduyo 104:14, 15) Vanarume no vanakaji vakagondeka vanonangwa mu Bhaibheri, vaimwavo padoko doro.—1 Timoti 5:23.
2. Ngoyapi ngwajo inowanika mu Bhaibheri kuna vaya vanosana kumwa doro?
Jehovha anonanga kuti zvakashata kumwa maningi doro no kudhakwa. (Vagaratiya 5:21) Bhaibheri rinonanga kuti: “Ucabatana na vaya vanomwa doro.” (Mazwi Akangwara 23:20) Ngo kudaro, kudari tikasana kumwa doro, tinodikana kurimwa ngo njira yakaezanana pikija patinonga tiri tega. Kumwisa maningi doro kunoita kuti mundhu atame kurangarira ushoni, kutama kurangarira zvaanoda kuvereketa no kuita. Kusiyapo izvo, irona ringakhuvaza uhomi hwedu. Kudari ticikakwanisi kumwa padoko, tinodikana kutosiya kamare kumwa doro.
3. Tingaitisa kudini kuti tireremeje zvisungo zvo vamweni ngo pamusoro po doro?
Mundhu umwe nga umwe, anosana ega kuti anoda kumwa doro kana kuti haiwa. Atidikani kutonga mundhu anoda kumwa doro acikapindiriji mudida. Nee atidikanizve kuvangirija mundhu kuti amwe. (Varoma 14:10) Tingasana kutama kumwa kudari tikakhugunya vamweni. (Verenganyi Varoma 14:21.) Itusu ‘tinopsaka zvinobesera vamweni,’ kuciripi zvinotibesera basi.—Verenganyi 1 Vakorinte 10:23, 24.
NASANYI KUPSAKISISA
Vonanyi ndhungamiriro jo Bhaibheri jingamubesera kuti musane kumwa doro no kutama kumwa. Vonanyizve zvamungaita kudari muno cineso cokumwa maningi doro.
4. Khetanyi kuti munoda kumwa doro kana kuti amudi
Jesu waivona kudini ngo kumwa doro? Mushamaiso wokutanga wa Jesu unotibesera kuwana mupinguro. Verenganyi Johani 2:1-11, perapo bhuisananyi ngo muvhunjo jinotevera:
-
Mushamaiso uwu, unotibesera kudini kuvona mavonero a Jesu ngo pamusoro po doro no anodaro kumwa?
-
Pikija Jesu acizivi kunanga kuti kumwa kwakashata, Mukristu anodikana kurangarirenyi ngo pamusoro mundhu anosana kumwa?
Ngokuti Mukristu anodikana kumwa doro, izvi azvinangi kuti iyena anodikana kundomwa basi. Verenganyi Mazwi Akangwara 22:3, perapo bhuisananyi kuti civaringo co mundhu ngo pamusoro po kumwa doro cinobatana papi no mafundo ari kutevera:
-
Mucada kufambisa karu kana kushanda no mucini unomukhuvaza.
-
Imwimwi muno mimba.
-
Medhiko anomuvhunja kuti mutamezve kumwa doro.
-
Muno cineso cokutama kuvonerera mudida wamunoda kumwa doro.
-
Mutemo aumutenderi kuti mumwe doro.
-
Muno mundhu anosana kutama kumwa doro ngokuti wakambowanana no zvineso ngo pamusoro po doro kareko.
Kureva kuti munodikana koperekera doro pamucadho kana pa mabungaijo amweni? Ngozvapi zvingamubesera kuti muteme civaringo? Rijanyi VHIDHIYO.
Verenganyi Varoma 13:13 na 1 Vakorinte 10:31, 32. Pasure po kuverenga vhesi imwe nga imwe, bhuisananyi ngo muvhunjo uwu:
-
Kushandisa ndhungamiriro iji kungamubesera kudini kuti muteme civaringo cinodakajisa Jehovha?
Mukristu umwe nga umwe anosana ega kuti anoda kumwa doro kana kuti aadi. Pikija nguva jimweni ecimbomwa, asi nguva jimweni angakheta kutama kumwa
5. Khetanyi kuti munozomwa mbhera papi
Kudari mukakheta kumwa, ceukijanyi kuti Jehovha aarambisi kumwa doro asi iyena anorambisa kumwa kunopindirija mudida. Ngenyi? Verenganyi Hoseya 4:11, 18 Shanduro yo Nyika Imbza, no kubhuisana ngo muvhunjo uwu:
-
Ngozvapi zvingaitika kudari mundhu akamwa kupindirija mudida?
Ngozvapi zvingatibesera kuti titame kumwa maningi doro? Tinodikana kuva vakaezanana. Verenganyi Mazwi Akangwara 11:2, no kubhuisana ngo muvhunjo uwu:
-
Ngozvapi zvinozoitika kudari tikamwa doro ticikazivi pokugumira?
6. Besero kuna vaya vanomwa maningi doro
Vonanyi kuti ngozvapi zvakabesera mwanarume umweni kuti asiye cirovejeso cokumwa. Rijanyi VHIDHIYO, perapo bhuisananyi ngo muvhunjo jinotevera.
-
Pa vhidhiyo, Dmitri waiitenyi paaipera kumwa doro?
-
Iyena wakakwanisa kuima kumwa doro pavhaza yokutanga yaakaeja kusiya?
-
Wakazoitenyi kuti asiye kamare kumwa doro?
Verenganyi 1 Vakorinte 6:10, 11, perapo bhuisananyi ngo muvhunjo jinotevera:
-
Waro kureva kuti kuva cidhakwa cingava cineso?
-
Ngozvapi zvinokhombija kuti ari wese anomwa doro kupindirija mudida angacinja?
Verenganyi Mateu 5:30, perapo bhuisananyi ngo muvhunjo unotevera:
-
Muezaniso wakanangaya Jesu wo kutema nyara, waida kunanga kuti tinodikana kuita zviri zvese kuti tidakajise Jehovha. Ngozvapi zvamunodikana kuita kuti musiye cirovejeso cokumwa doro? a
Verenganyi 1 Vakorinte 15:33, perapo bhuisananyi ngo muvhunjo uwu:
-
Ngozvapi zvamunodikana kuita kudari munoshamwari inomwa maningi doro?
VANDHU VAMWENI VANGAMUVHUNJISA KUDARI: “Zvakashata kumwa doro?”
-
Imwimwi maizodavirisa kudini?
ZVOTAJIJA
Doro rinobatanijwavo pa zvipo zvizinji zvatakapuwa ndi Jehovha, asi iyena anorambisa kumwa maningi doro no kudhakwa.
Kuhwirijira
-
Ngo zvapi zvinonangwa ngo Bhaibheri ngo pamusoro po doro?
-
Ngojapi ngozi jokumwa maningi doro?
-
Tingareremejesa kudini civaringo co vamweni ngo pamusoro po doro?
ZIVANYI ZVIMWENI
Vocidoko vangatemesa kudini civaringo caushoni ngo pamusoro po doro?
Vonanyi kuti ngo zvapi zvamungaita kuti munyise cineso co kumwa doro.
“Kunwa Doro Zvine Mwero” (Murindiri, No. 1 wa Janeiro wo 2010, Cishona)
Kureva kuti Mukristu anodikana kutakanisana kopo?
“Mibvunzo Inobva Kuvaverengi” (Murindiri, 15 wa Fevereiro wo 2007, Cishona)
Verenganyi zviitiko zvo mwanarume umweni pamusoro unoti “Ndaiva Dhiramu Risingazari,” kuitira kuvona kuti zvicinyi zvakamubesera kuti asiye kumwa maningi doro.
“Bhaibheri Rinochinja Upenyu” (Murindiri, No. 1 wa Maio wo 2012, Cishona)
a Vandhu vano cirovejeso co kumwa maningi doro, kangaije vangatoda kubeswa ngo vandhu vakajija ngo pamusoro po shwiroyo. Mamedhiko mazinji anonanga kuti vaya vano cirovejeso cakadaro vanodikana kutosiya kamare.
