CIJIJO 55

Beseranyi Ungano Yenyu

RIJANYI

Kutenderera nyika yese, mamiriyau wo vandhu vari kushandira Jehovha ku ungano jakawanda. Vandhu ava vanoreremeja maningi ndhungamiriro javanopuwa no kuda kubesera ungano. Ndiwonavo mazwiro enyu ngo ungano yenyu?

1. Ngojapi njira jimweni jamungashandisa nguva yenyu no simba kuti mubesere ungano?

Tese tingabesera mu ungano. Inga muezaniso, kuno vasharuka mu ungano mwenyu kana vanohwaja? Mungakwanisa kuvabesera kuenda kumusongano? Mungakwanisa kuvabesera ngo kootenga zviro zvovanoda kana kuvabesera kucenesa muzi wavo here? (Verenganyi Jakobo 1:27.) Tingajipirazve kuti ticenese no kunasirira nasirira Nyumba yo Umambo. Rudo wedu kuna Mwari no kuno hama jedu, ndiwona unoita kuti tijipire ngo ‘mwoyo unoda.’—Nduyo 110:3.

Zvapupu zva Jehovha zvakabhabhatijwa, zvingabeseravo ungano ngo njira jimweni. Hama jingavangisira kuti jibesere ungano, inga mubeseri wo ungano kana mukuru. Kusiyapo izvo, vacumaeri vese vangabeseravo basa rokucumaera ngo kushanda inga mapiyona. Zvapupu zvimweni zvingabesera pa kuvaka nyumba jo kunamatira kana ngo kuthutha kuenda ku ungano imweni inoda besero.

2. Tingashandisa kudini zvatinazvo kuti tibesere ungano?

Itusu tingareremeja ‘Jehovha Mwari ngo upfumi hwedu.’ (Mazwi Akangwara 3:9) Kwatiri i makomborero kuita mupiro kuti tibesere ungano, no kubesera basa ro kucumaera ro nyika yese. (Verenganyi 2 Vakorinte 9:7.) Mupiro jedu jinobesera basa ro vaya vawihwa ngo ngozi jinoitika jega. Vazinji vanokheta kuviga ciri cese sumana jese kuti vaite mupiro. (Verenganyi 1 Vakorinte 16:2.) Tingaita izvi, ngo kudira mu bhokiso ro mupiro riri mu Nyumba yo Umambo kana kuita ngo kushandisa saiti jw.org. Jehovha anotipa mukana wo kukhombija rudo hwedu kwaari, ngo kutipa mukana wo kupa zvatinazvo.

NASANYI KUPSAKISISA

Vonanyi njira jimweni jamungabesera ndijona ungano yenyu.

3. Beseranyi ungano yenyu ngo mupiro jenyu

Jehovha na Jesu vanodakarira maningi vaya vanopa ngo mwoyo wese. Inga muezaniso, Jesu wakasimba mupiro wo noni woyakapira ngo mwoyo wese. Verenganyi Ruka 21:1-4, perapo bhuisananyi ngo muvhunjo iji:

Kureva kuti tinodikana kupira mare yakawanda kuti tidakajise Jehovha?
Jehovha na Jesu vanojizwa kudini ngo mupiro jatinoita ngo mwoyo wese?

Kuti muzive kuti mupiro jinoshandiswa kudini, Rijanyi VHIDHIYO. Perapo, bhuisananyi ngo muvhunjo unotevera.

VHIDHIYO: ‘Cipo Ciri mu Nyara Kuitira Jehovha’ (4:47)

Mupiro jinoshandiswa kudini kuitira kubesera ungano mu nyika yese?

4. Tingajipira kuitira kubesera

Vashandiri va Jehovha vo kare, vaidakarira kutaja ndau javaishandisa kuitira kunamata. Asi izvo zvaibatanija zvizinji kupinda mupiro jo mare. Verenganyi 2 Kronike 34:9-11, perapo bhuisananyi ngo muvhunjo unotevera:

Vaiziraeri vaitisa kudini kuti vataje nyumba yavainamatira?

Kuitira kuvona kuti Zvapupu zva Jehovha zvinotevejeresa kudini muezaniso uwu wo mu Bhaibheri, rijanyi VHIDHIYO. Perapo bhuisananyi ngo muvhunjo unotevera.

VHIDHIYO: Kutaja Ushoni Ndau Jedu jo Kunamatira (3:31)

Ngenyi zvinosisira kuti Nyumba yo Umambo igare yakacena no mugariro wakanaka?
Imwimwi mungabeseravo mu njira japi?

5. Hama jingavangisira kuti jipuwe mabasa amweni mu ungano

Bhaibheri rinovangisa vanarume vo Cikristu kuti vavangisire pa kubesera ungano. Kuti muvone muezaniso, rijanyi VHIDHIYO. Perapo bhuisananyi ngo muvhunjo unotevera.

VHIDHIYO: Hama Itanyi Zvizinji Kuna Jehovha (5:19)

Muvhidhiyo, ngozvapi zvakabesera Ryan kuti aite zvizinji mu ungano?

Bhaibheri rinonanga zvikwaniriso zvinodikana kuti hama ishande inga mubeseri wo ungano kana mukuru. Verenganyi 1 Timoti 3:1-13, perapo bhuisananyi ngo muvhunjo iji:

Hama jinoda kuva mubeseri wo ungano kana mukuru jinodikana kuva no zvikwaniriso zvapi?
Mbhuri javo jinodikana kuva no mugariro wakadini? —Vonanyi mavhesi 4 na 11.
Kudari hama jikavangisira kuti jive no mugariro jakadari, vese mu ungano vangabesereka kudini ndijona?