Pasure po Phasika yo mu gore ro 30 N.V.Y., Jesu no vajiji vake vanobuda mu Jerusarema. Asi ivona avaendi ku muzi kwavo ku Garireya. Vanoenda ku nyika yo Judheya, kovanobhabhatija vandhu vakawanda. Johani Mubhabhatiji woda kuita gore naari kondhoyo acibhabhatijavo, zve vajiji vake vanganani vacindori nae, kangaije mu muterero mo Murambo Jordhani.

Jesu ambhwine aabhabhatiji mundhu ariwese, asi anotungamirira vajiji vake kuti vabhabhatije. Pa mukuvo uu wo mushando wa Jesu, iyena na Johani vaijijisa vandhu vainga vakhauya pa kushaishira kwavo citenderano co Mutemo wa Mwari.—Maitiro o Vapostori 19:4.

Asi vajiji va Johani vanova no ushanje zve vanon’gun’guta ngo pamusoro pa Jesu, veciti: ‘[Jesu] wiya wainga na imwimwi . . . ari kubhabhatija, zvino vandhu vese vomutevera.’ (Johani 3:26) Asi, Johani aana ushanje. Anodakara ngo muviyo wo basa ra Jesu zve anoda kuti vajiji vake vadakarevo. Johani anovaceuja kudari: “Imwimwivo munobziziva kuti ndakati: ‘Inini andiripi Kristu, kaveta ndakatumwa kuti ndiende pambeji pake.’” Iyena anofananijira ngo njira inokwanisika kuzwisiswa ngo vese, paanoti: “Ana nyamurovohwa, ndiyena mukwambo. Kaveta xamwari yo mukwambo, inogara no mukwambo no kumuzwa, anodakara kukuru ngo kuzwa izwi ro mukwambo. Bzino, kudakara kwangu kwazarisika nyamasi.”—Johani 3:28, 29.

Mukufanana no shamwari yo mukwambo, Johani waidakara pa mweji jakakhirira paakaitaya kuti vajiji vake vazivane na Jesu. Vamweni vavo vakatevera Jesu zve vaizozojwa ngo mujimu mucena pa kufamba ko mukuvo. Johani anoda kuti vajiji vaanavo wari vateverezve Jesu. Zvokadi kamare, cidisiso ca Johani ngo cokunasirira gwanja ro mushando wa Kristu. Johani anodurujira kudari: “Yena ngaanodika kukura, ininivo kudodoka.”—Johani 3:30.

Johani umweni, wakatangaya kare kutevera Jesu, wakazotara ngo pamusoro po kwakabva Jesu no basa rake rinosisira pa kuita kuti vandhu vapone, eciti: “Ndiani anobva mugore ari panyezuru po vese. . . . Baba vanodisa Mwana, vodira bzese mu nyara make. Ndiani anotenda Mwana ano uhomi hucingaperi; kaveta ndiani acikapurukiri Mwana aazowani uhomi: uxungu hwa Mwari unozomuwira.” (Johani 3:31, 35, 36) Ici ndi cokwadi cinosisira maningi cinodika kuziviwa ngo vandhu.

Nopapera mukuvo mushomani Johani Mubhabhatiji naapera kunanga kuti basa rake rinodikana kudodoka, anosungwa ndi Mambo Herodhi. Herodhi wainga atora Herodhia, mukaji wa nyavanji wake Firipi, wocadha nae. Johani paakabudisa pambhene ciito co upombo hwa Herodhi, iyena wakadihwa mu kadheya ndi Herodhi. Paakazwa kuti Johani wadihwa mu kadheya, Jesu anobuda mu Judheya no vajiji vake, ‘woenda Galileya.’—Mateu 4:12; Marco 1:14.