Jesu wakambobvunja vajiji vake muezaniso unovonesa kuti kuramba wecikumbira kunosisira maningi. (Luka 11:5-13) Wari zvinoita inga kuti ari muSamaria kana kuti Mugarireya, ari kugogomejerazve ngo pamusoro po kutama kuremba kuita mukumbiro. Ngo kudaro anoita muezaniso umweni.

Iyena anoti: “Kwainga no mutongi wo ndava, aacaithyepi Mwari no kureremeja vandhu. Kwaingavo no noni yakaza kovereketa nayena yeciti: ‘Nditongerenyi ndava yangu no mukorore wangu.’ Mukuvo muzinji yena aazivi kuda. Kuperapo wakati ngo mu hana make kuti: ‘Pikija inini andithyi Mwari no kureremeja vandhu, ngokuti mwanakaji uu anondinesa, ndinomutongera, kuti atame kuza kondinesa kucingaperi.’”—Luka 18:2-5.

Jesu anoshandisa muezaniso uwu eciti: “Mazwa bzaakananga mutongi uwo wakaxata. Mwari aazotongi ngo ururami, kani, vasanwi vake vanomima kwaari usiku no masikati, nokuti anozononoka kuvabesa?” (Luka 18:6, 7) Jesu waida kunangenyi ngo pamusoro pa Babake?

Jesu aaripi kunanga kuti Jehovha wakaezana no mutongi wakashata. Asi zvaari kuda kujijisa ngo zvokuti: kudari mutongi acizivi kururama anopejisira azwa mundhu anoramba ecikumbira ciro, tingati kudinivo na Mwari? Mwari wakarurama zve wakanaka, ngo kudaro, anozodavira kudari vandhu vake vakatama kuremba kumukumbira. Tinonasa kuzwisisa fundo iri ngo pamusoro po zvinozoengejera Jesu kuti: “[Mwari] anovatonga ngo ururami, acinganonoki.”—Luka 18:8.

Ndhango jo varombo no vandhu vakaderera kazinji ajitongwi ngo njira yakarurama. Kasike vakakhupuka no vanonduma maningi kazinji vanoinikihwa. Asi Mwari aaiti kudaro. Nguva ikakwana, anozotonga ngo njira yakarurama wopanica vakashata, asi anozopekeja upenyu ucikaperi kuno vashandiri vake.

Ndiani ano rutendo hwakatojana no hwo noni iyi? Zve vangana vanotenda kuti Mwari “anovatonga ngo ururami, acinganonoki”? Ngo kudaro Jesu wapera kuita muezaniso wo kuti atidikani kuremba kuita mukumbiro. Kuti agogomejere simba ro mukumbiro, iyena anobvunjisa kuti: “Mwana wo mundhu akazovia, anozowana kutenda mu nyika, kani?” (Luka 18:8) Jesu ari kuda kureva kuti rutendo hwakadaro hungathuka hwatama kuwanika ku vandhu vakawanda pa kuviya kwa Kristu.

Vamweni vari kupurutana Jesu vanorangarira kuti kutenda kwavari nako kunotokwana. Vanojithemba vecitorangarira kuti vakarurama maningi kupinda vamweni. Jesu anovaitira muezaniso umweni.

Iyena anoti: “Vandhu vaviri vakaenda ku Nyumba ya Mwari konamata. Umwe wainga muFarisi, umweni muxabisi. MuFarisi, naaima, wainamata kudari mu mwoyo make: ‘Mwari, ndinomubonga, ngokuti inini andiripi inga vandhu vamweni: mambava, vacizivi kururama, vanyaupombo, nokutibze andiripi kudari inga muxabisi uwo. Ndinozira ruviri pa sumana, ndinoxabisa ngo bziro bzangu bzese.’”—Luka 18:10-12.

 VaFarisi vanozivika maningi ngo kuda zvo kuvonehwa pano vandhu kuti vavoneke inga vakarurama. Vanojipekeja mutemo wo kuzira ngo Muciposa no Mucina. Ivona vanoziva kuti mu njiku iji, vandhu vanonga vakazara mu mabazari. Vanodavo maningi zvokupira cogumi co zvirimwa zvavo kubatanija zvidoko kamare. (Luka 11:42) Mweji munganani yapera, vakakhombija kuzonda kwavaiita vandhu vakaderera vecivabvunja kuti: “Vandhu ava Vacikazivi Mupango, vakatukwa!”—Johani 7:49.

Jesu anoenderera mberi no muezaniso wake eciti: “Kaveta muxabisi waigara ngo ndhambo, aacaiejepi kusota mu gore. Waijirova pa diti eciti: ‘Mwari wangu! Ndikungurirenyi, ngokuti ndiri muxaixi.’” Mushabisi anojidodokesa ecinanga ega kuti ndiri mushaishi. Jesu anopejisa eciti: “Inini ndinomubvunja kuti mundhu uu wakahwirira kanyi kwake naakakungurihwa; uciripi muFarisi. Ngokuti ndiani anojikuja, anozododokeswa, ndiani anojidodokesa anozokujwa.”—Luka 18:13, 14.

Waro Jesu anobudisa pambhene fundo guru ngo pamusoro po kujidodokesa. Zano iri, rinobesera vajiji vake, ngo kuti ivona vakakurira mu zvirovejeso zvo kuti vaFarisi vaijivona inga vakarurama maningi zve vanoreremeja maningi zvigaro no nduma. Iri i zano raushoni kamare kuvateveri vese va Jesu.