Mufananijo wabva kunangawa ndi Jesu ngo pamusoro po mwana wainga wakasvejeka, waita kuti vashabisi, vatari no vaFarisi vaimupurukira, vavone kuti Mwari wakanasiririka kuti aregerere vashaishi vanokhauya. (Luka 15:1-7, 11) Wari, Jesu anobhuya no vajiji ecishandisa mufananijo umweni. Mufananijowo unobhuya ngo pamusoro po mukhupuki anozwa kuti mutungamiriri kana kuti muvonereri wake, aacaishanda ushoni.

Jesu anonanga kuti muvonereri uu anorevehwa kuti ari kuparaja upfumi hwa tenji wake. Ngokudaro, tenji vanonanga kuti muvonereri uu anozobudiswa basa. Muvonereri anorangarira mu mwoyo make kudari: “Ndinozoitenyi wari? Ngokuti tenji anondibudisa basa. Andikwanisi kurima; ndino nyoa yo kupembha pa gwanja.” Iyena anorangarira zano ricazomubesera, eciti: “Ndabziziva bzo ndinoita, kuti, ndikazobviswa basa, ndiaxihwe ngo vandhu mu nyumba mavo.” Iyena anodanija ngo kukasina vano magava, wovabvujisa kuti: “Uno gava renyi na tenji?”—Luka 16:3-5.

Wokutanga anodavira kudari: “Zana ro mbende jo mafuta.” I mutengo o ritru jinokwana kuita 2.200 jo mafuta o kubika. Zvingaita kuti wakaitari zigava iri wainga no minda wakakura wo mumaorivhe kana kuti waitengesa mafuta o kubika. Muvonereri anomubvunja kuti: “Torai tsamba yako, garai pasi, utare makumaxanu [ritru jinokwana 1.100].”—Luka 16:6.

Muvonereri anobvunjisa umweni eciti: “Iwewevo uno gava renyi?” Iyena anoti: “Zana ro masaku o mbeu.” I mutengo wo kiru jinokwana kuita 17.000. Muvonereri anobvunja nyamagava uu kudari: “Torai tsamba yako, utare makumasere.” Ngo kuita kudaro, wapungura magava mbhera pa mutengo wakati wandire.—Luka 16:7.

Muvonereri uu anokwanisa kupungura mutengo wo zviro zvakafiari vandhu ngokuti ndiena aciri kuvonerera upfumi hwa tenji wake. Muvonereri uu ari kupsaka shamwari ngo kupungura mutengo wo zviro zvakafiahwi ngo vangazomuitira unyasha akazobudiswepo basa.

Pa kufamba ko nguva, tenji vanozozvizwa zvaitwaro. Pikija kuti zvaitwaro zvinomuruzisa, tenji uu anokahamara ndizvona no kumusimba ngokuti pikija aazivi kururama, iyena “wakaita hwiru.” Jesu anoengejera aciti: “Vana vo nyika ino vari vakangwara kuzwirana no vadoni, kupinda vana vo ruveneko.”—Luka 16:8.

Jesu aaripi kunanga kuti zvaitari mutungamiriri uu zvakanaka zve aaripi kunanga kuti vandhu ngavabirane pa kuita nyagoso. Waro ari kujijisenyi? Iyena anovangisa vajiji vake aciti: “Psanganyi xamwari ngo upfumi hucizivi kunaka, kuti, njiku imweni, kudari hukatamika, jinozomuaxira mu muzi ucingaperi.” (Luka 16:9) Apa wari, Jesu ari kujijisa ngo pamusoro po kuva no ungwaru no kushandisa hwiru. Vashandiri va Mwari, kana kuti “vana vo ruveneko,” vanodikana kushandisa zviro zvavo zvo kunyama ngo ungwaru, vacirangarira upenyu hucikaperi.

 Jehovha Mwari basi no Mwana wake ngo vanokwanisa kuashiva vandhu mu Umambo hwo kumatenga kana mu Paradhiso pasi pano, pecitongwa ngo Umambo. Tinodikana kuvangisira pa kupsaka ushamwari navo ngo kushandisa upfumi hwo kunyama kuitira kubesera zvinodiwa zvo Umambo. Tikaita kudaro, tinothemba kuti tinozova no kumbeji kucikaperi pamukuvo wokuti goridhi, sirivha no upfumi humweni hwo kunyama zvinozombhwera kana kupera.

Jesu anonangazve kuti vanogondeka pa kukorondha no kushandisa upfumi kana zvirizvese zvo kunyama zvovanazvo, vanozogondekazve pa zviro zvinosisira maningi. Jesu anoti: “Ndiani anozomugondera uthende hwokadi-kadi [hwakadari inga zvinodiwa zvo Umambo], mukatama kugondeka mu uthende hucizivi kunaka?”—Luka 16:11.

Jesu ari kukhombija kuti pano zvakawanda zvovanodikana kuita kudari vacida kuzoashihwa “mu muzi ucingaperi.” Apana anokwanisa kuva mushandiri wokadi-kadi wa Mwari, wovazve muranda wo zviro zvo kunyama zvicizivi kururama, pa mukuvo umwewo. Jesu anopejisa ngo kunanga kudari: “Apana muranda angabatira majitenji maviri, ngokuti anozonyenya umwe wova no rudo ku umweni, dangani anozozwanana no wokutanga, wonyenya wocipiri. lmwimwi amukwanisi kubatira Mwari pamwepo no upfumi.”—Luka 16:9, 13.