Phasika yo mu gore ro 33 N.V.Y. poinokhwedera, Jesu anonga wakabatikana ngo kujijisa mu Garireya. Kangaije perepo anoenda Jerusarema ku Phasika inga zvinonangwa ngo Mutemo wa Mwari. Asi, Jesu anoita hwendo ngo kungwarira ngokuti vaJudha vari kupsaka kumuuraya. (Johani 7:1) Pa kupera ko Pasika, Jesu anohwirirazve ku Garireya.

Kangaije Jesu anonga ari ku Kafarnaume vaFarisi no vatari povanoza kwaari vecibva Jerusarema. Ngenyi vanoita hwendu uhu? Ivona vari kupsaka ndava yo kupumbha Jesu kuti ari kushora zviara. Ivona vanomubvunjisa kudari: “Vajiji vako avateveji ngenyi maitiro o vokare? Ngokuti avasambi nyara pakuda kuha.” (Mateu 15:2) Mwari aazivi kubvunja vandhu vake kuti vateveje mutango-mutango wo ‘kusamba ushoni nyara,’ kubvira mu nyara mbhera ku zvikokora. (Marco 7:3) Asi kuna vaFarisi kusiya kuita kudaro i cituko cakakura.

Kusiapo kudavira zvovari kumupumbharo, Jesu anovakhombija maphwanyiro ovanoita Mutemo wa Mwari ngo cakwenye kana ngo cabomo. Iyena anovabvunjisa kudari: “Imwimwi amutevejivo ngenyi mupango ya Mwari, meciteveja maitiro enyu o kare? Ngokuti Mwari wakati: ‘Kojai baba na mai. Ndiani anotuka baba dangani mai ngaaurawe.’ Kaveta imwimwi munoti: ‘Ndiani anobvunja baba nokuti mai kuti: Bzomwaida kuaxira ndini, bzakacenesehwa Mwari, mundhu wiya aadikanibze kubesa baba wake nokuti mai.’”—Mateu 15:3-6; Exodo 20:12; 21:17.

VaFarisi vanonanga kuti mare, zviro zvo kunyama kana ciricese haco cakapiwa inga mupiro kuna Mwari, ngo co pathemberi basi, acidikani kushandiswa pa kuita zvimweni. Asi, vandhu vanaco ciro cakaitwa mupiro. Inga muezaniso, mwana angaita kuti mare yake kana zviro zvaanazvo zvive “Korban,” cipo cakapekejwa Mwari kana themberi, zvoita inga kuti themberi ngo rinotendehwa kucishandisa kuciripi vabari vake. Mareyo kana kuti ciroco njake mwanewo, asi anonanga kuti acidikani kushandiswa kuitira kubesera utami hwo vabari vake vaavasharuka. Ngo kuita kudaro, anosiya mutoro wake wo kusapota vabari.—Marco 7:11.

Jesu ano razau yokuti anyangajwe ngokuti vari kupeamisa Mutemo wa Mwari. Iyena anoti: “Mafujura mupango wa Mwari ngo majijisiro enyu. Vanyepi! Isaia wakaporofeta uxoni, acinanga kuti: Bvumbo iri rinondireremeja ngo muromo, kaveta mwoyo waro uri ndhambo na inini. Vanondipira biresi muphaxo, vacijijisa mazwi o vandhu.” VaFarisi avawani co kudaviri pa kushohwa kovanoitari ndi Jesu. Ngokudaro, Jesu anodanija mbungano kuti imukhwederere. Iyena anoti: “Izwanyi no kupurukira. Cinonghwina mu muromo acingoresi mundhu. Kaveta cinobva pa muromo ngo cinomungoresa.”—Mateu 15:6-11; Isaia 29:13.

Jesu paanonghwina mu nyumba imweni pa mukuvo unotevera, vajiji vanobvunjisa kudari: “Munoziva kuti vaFarisi vakapsipa mwoyo ngo kuzwa mazwi enyu?” Iyena anodavira kuti: “Muti wese ucikazivi kusimwa ndi Baba wangu vo mugore, unozobvitwa. Varegerenyi! Mapofu anoperekeja mapofudoni. Bofu, rikaseseja bofudoni, ese anowira mu rindi.”—Mateu 15:12-14.

Zvinovoneka inga kuti Jesu anokahamara Pedhru paanokumbira ngo zina ro vajiji, kuti adurujire kuti icinyi cinosvipisa mundhu. Jesu anodavira eciti: “Amubzizivi kuti bzese bzinonghwina ngo pa muromo bzinoterera mu ndani, bzozopsejwa mu sora? Kaveta, bzinobuda pa muromo bzinobva mu mwoyo, ngo bzinopsipisa mundhu. Ngokuti mu mwoyo ndimona munobuda mirangariro yakaxata, kuuraya, upombo, kutamba no muviri, kuba, ufakazi hwokunyepa no madama. Ndibzona bzinopsipisa mundhu. Kaveta kuha mucakasamba nyara akupsipisi mundhu.”—Mateu 15:17-20.

 Jesu aaripi kunanga kuti mundhu aadikani kuva no zvirovejo zvaushoni zvo ukhirini, zve aaripi kunanga kuti mundhu aadikani kusamba nyara acito wanasirira zvokuha kana acito waha. Kusiyapo izvo, ari kuvereketera ujiitisi hwo vatungamiriri vo zviara, vanosiya weya kutevera mutemo jakarurama ja Mwari ngokuda kuteveja zvirovejeso zvo vandhu. Zvokadi ngo zvokuti zviito zvakashata zvinobva mu mwoyo ngo zvinosvipisa mundhu.