Jesu no vajiji vake vanoguma Bhetsaidha. Vandhu vanozisa mwanarume ari bofu, vodeketera kuti Jesu amupsase, kuti avone.

Jesu anomubata mukono, woenda nae kunja ko mutundhuwo. Jesu paanopera kupfirira mu majiso o mwanarume uu, anomubvunjisa kuti: “Uri kuvona ciricese?” Iyena anoti: “Ndiri kuvona vandhu. Ndiri kuvavona inga miti inofamba.” (Marco 8:23, 24) Jesu anodira nyara mu majiso ake zve wotangazve kuvona. Jesu anomupindisa kanyi acivona, zve anomubvunja kuti atame kungwinazve mu mutundhumo.

Tevere, Jesu no vajiji vake vanoenda kanjikazi, ku ndharaundha yo Sezareya yo Firipi. Ivona vanonga vacikhwija, pa mumango unoita 40 o makirometro. Mutundhu uu unowanika panyezuru po dundhu, ngo kanjikazi zvinokwanisika kuvona Dundhu ro Hermoni rakazara ngo mbhute. Kangaije mumango uu unotora dhiya mbiri.

Povanonga vari mu hwendo, Jesu anoreya ega koita mukumbiro. Kwasara basi mweji mupfumbamwe kana gumi kuti Jesu afe, zve ari kukaya-kaya ngo pamusoro po vajiji vake. Vazinji vakasiya kumutevera pa mukuvo waperari, zve zvinovoneka inga kuti vamweni vakatobararika musoro kana kucamwa. Kangaije vari kupsaka kuziva kuti ngenyi wakaramba kugajwa mambo ngo vandhu kana kuti ngenyi aacaizoita citatijo kuitira kuvonesa kuti iyena ndiani kamare.

Vajiji povanoviya paanoitira mukumbiro, Jesu anovabvunjisa kudari: “Vandhu vanonanga kuti Mwana wo mundhu ndiani?” Ivona vanodavira kuti: “Vamweni vanoti . . . ndi Johani Mubapatizi, vamweni vanoti ndi Elia, vamwenibze vanoti ndi Jeremia dangani umwe wo vaporofeti.” Ndizvonadi, vandhu vanorangarira kuti Jesu ndi umwe wo vandhu ava zve wamuswa ko vakafa. Kuti azive zvinorangarihwa ngo vajiji vake, Jesu anovabvunjisa kudari: “Kani imwimwi munoti inini ndiri ani?” Pedhru anodavira ngo kukasika kuti: “Imwimwi muri Kristu, Mwana wa Mwari anopona.”—Mateu 16:13-16.

Jesu anobvunja Pedhru kuti adakare ngokuti ndi Mwari wakamuvonesa zviro izvi. Anonangazve kuti: “Inini ndinokubvunja kuti iwewe uri Pedhru, no kuti panyezuru po buwe iri ndinozovakira Gungano rangu. No simba ra Sathana arizorinyisi.” Jesu ari kunanga kuti iyena kamare anozovaka ungano zve Sathana kana Guva, arizogari no simba ku vandhu vari mukati mo ungano iyi kudari vakagara vakagondeka pasi pano. Iyena anogondesa Pedhru kudari: “Ndinozomupa makhiya o Umambo hwo mugore.”—Mateu 16:18, 19.

Jesu aaripi kupa Pedhru ndau yo kutanga pakati po vapostori, zve aaripi kumuita maambo o ungano. Jesu wambhwine i Buwe rinozovakihwa ungano panyezuru paro. (1 VaKorinto 3:11; VaEfeso 2:20) Asi Pedhru anoashira makhiya matatu. Anozova no rudakajiso hwo kufunungura mukana kuitira kuti vandhu  vamweni vanghwinevo mu Umambo hwo mugore.

Pedhru anozoshandisa khiya yo kutanga pa Pentekoste yo mu gore ro 33 N.V.Y., ecikhombija vaJudha no vakatendeuka kuva vaJudha, vakakhauya, kuti ngozvapi zvovanodikana kuita kuti vaponeswe. Anozoshandisa khiya yocipiri kuitira kufunungurira vaSamaria vanotenda mukana wokuti vanghwine mu Umambo hwa Mwari. Perepo, mu ngore ro 36 N.V.Y., Pedhru anozoshandisa khiya yocitatu kuitira kupavo mukana uu ku Vomajinja vacizivi kusokwa, Kornerio no vamweni.—Maitiro o Vapostori 2:37, 38; 8:14-17; 10:44-48.

Pa mabhuyo aya, vajiji vanokaya-kaya Jesu paanonanga kuti, anozotambujika zve anozofa ngo kukasika paanoenda Jerusarema. Naacikazvibati kuti Jesu anozomusihwa ku upenyu hwo mugore, Pedhru anoenda nae pamutivi, womubvunja kudari: “Tenji, Mwari acatenda kuti ibzi bziitike.” Asi Jesu anomufuratira, womudaviri kudari: “Ibvai pambeji pangu, sathana. Iwewe uri cikhugu kondiri, ngokuti auna hwiru hwo bziro bza Mwari, uno hwiru hwo vandhu basi.”—Mateu 16:22, 23.

Wari Jesu anodanija vamweni kuciripi vapostori basi, wovadurujira kuti azvizovi zvakareruka kuva muteveri wake. Iyena anoti: ‘Kudari ariwese anoda kunditevera, ngaajirambe, athware danda rake ro kutambujikira, anditevere. Ngokuti ndiani anoda kuponesa uhomi hwake, anozohuruza; kaveta ndiani anoruza uhomi hwake ngo ndava yangu no yo vangeri, anozohuponesa.’—Marco 8:34, 35, Shanduro yeNyika Itsva.

Ndizvonadi, kuti vadakarihwe ndi Jesu, vajiji vake vanodikana kuva vakacunga zve vanodikana kujiramba. Jesu anonanga kudari: “Ndiani anonyoejeka ngo ndava yangu no yo mazwi angu panyasi po bvumbo iri ro upombo no rakaxata, Mwana wo mundhu anozonyoejekavo ndi yena akazovia pa goja ra Baba wake, pamwepo no ngirozi jokucena.” (Marco 8:38) Hina, Jesu paanozoviya, “anozopocera umwe nga umwe kudari ngo mabasa ake.”—Mateu 16:27.