Jesu wari woenda ka njikazi akasota ku Garireya. Mainga mu cirimo, mumunda makazara ngo musoso. Zvecivoneka kuti vari kufa ngo njara, vajiji vanopurura musonjoti munganani voha. Asi mainga musabudu, vaFarisi vecizvivona zvaiithwari ngo vajiji.

Asipi kare maningi vaJudha pavakada kuuraya Jesu mu Jerusarema, ngo kuti waphwanya Sabudu. Wari vaFarisi vonanga kuti: “Vonai kuti vajiji vako vari kuita bzicikatendehwi mu njiku yo Sabudu.”—Mateu 12:2.

Vafarisi vonanga kuti kupurura musonjoti kakupukuta munyara zvakatojana no kuceka perepo kakupura. (Exodo 34:21) Maomesere avanoita revo yo kushanda basa inoitisa kuti Sabudu itame kudakajisa. Kasike njiku iyi yainga yo kudakara no kuvangisa kumujimu. Jesu wovatatija kuti mazwiro avo akapeyama, ecishandisa muezaniso jinovonesa kuti Jehovha Mwari aazivi kumbokumbira kuti mutemo wo Sabudu ucengethwe ngo njira yakadaro.

Muezaniso wokutanga waanopekeja Jesu ngo wo ciitiko ca Dhavhidhi no vandhu vake. Pavainga no njara, vakaima pa taberinake voha pau jinopihwaya. Pau iji kazinji jaisiihwa vapiri, asi ijona jainga japera kubviswa pamberi pa Jehovha jocinjwa ngo jimweni jainga jicapisa. Ngo kudaro Dhavhidhi no vandhu vake aavazivi kutongwa ngo kuha paujo.—VaLevi 24:5-9; 1 Samueli 21:1-6.

Muezaniso wo cipiri, Jesu anoti: “Amuzivi kujija mu Mupango kuti pa njiku yo Sabudu vapiri vanoposa kuzorora ko Sabudu mu Nyumba ya Mwari, kaveta avaxaixi?” Iyena ari kuda kunanga kuti pikija mu Sabudu, vapiri vanouraya  zvinyama kuti zvipihwe no kuithwa mabasa amweni muthemberimo. Ngo kudaro Jesu wakaengejera eciti: “Wiya ari pano wari, anopinda Nyumba ya Mwari.”—Mateu 12:5, 6; Bziverengo 28:9.

Jesu anoshandisazve matahwa kuti anase kujekesa kuti mazwire avo akaposeka, eciti: “Kudari nomakazwisa bzo bzinonanga: ‘Ndinoda unyaxa, kuciripi mbhamba,’ amucaidepi kutongera nyatwa vandhu vacina ndava.” Iyena anopejisa eciti: “Ngokuti Mwana wo mundhu ndi Tenji wo Sabudu.” Jesu ari kunangira Sabudu ro kutonga ko runyararo ko Umambo hwo ciuru co makore.—Mateu 12:7, 8; Hoseya 6:6.

Kubvira kare vandhu vari kutambujwa ndi Sathana, zve vari kutambujwa ngo hondo no uphanga. Asi muutongi hwa Kristu zviro zvinozonga zvakasiana kamare! Ngo kuti utongi uhu hunozova inga Sabudu guru rinozoviisa zororo ratiri kuveterari no cido cese.