Ngo kubhuya kuti Jesu aagogomeri madhimoni ngo simba ra Mwari, vatari no vaFarisi vaituka mujimu mucena. Waro vanogara ku divi raani? Ra Mwari kana kuti ra Sathana? Jesu anoti: “Mukasima muti wakanaka, mucero wawo unonakavo. Mukasima muti wakaxata, mucero wawo unoxatavo. Ngokuti muti unozivika ngo mucero wawo.”—Mateu 12:33.

Ngo zvoupenji kunanga kuti Jesu anogogomera madhimoni ngo kuti anoshandira Sathana. Mukuzwirana no zvakadurujira Jesu mu Hurukuro yo pa Dundhu, kudari mucero wakanaka, muti wawo wakanakavo, auzivi kushata. Waro mucero wo vaFarisi, kunyepera kwavaiitaya Jesu, kunovonesenyi? Kunovonesa kuti ivona vakashata. Jesu anoti: “Vana vo nyoka! Mungazovereketesa kudini bzauxoni nomuri vakaxata? Ngokuti muromo unovereketa bziri mu mwoyo.”—Mateu 7:16, 17; 12:34.

Zvatinovereketa zvinovonesa mugariro wo mwoyo wedu, zve ndiwona unozotitongesa. Ngo zvakaitisa kuti Jesu anange kudari: “Ndinomubvunja kuti vandhu vanozodavira, pa njiku yo kutongwa, ngo ndava yo mazwi ese abiresi o vanovereketa. Ngokuti unozotongehwa nyatwa dangani kukungurihwa ngo mazwi ako.”—Mateu 12:36, 37.

Pikija hazvo kuti Jesu wainga aita mabasa anoshamisa, vatari no vaFarisi vaciri kundoda kuti Jesu aite mabasa amweni anoshamisa. Ivona vanoti: “Mujijisi! Tinoda kumuvona meciita muxamaiso.” Nee no kwainga kuti avazivi kuvona ngo meso avo Jesu eciita mushamaiso, asi vandhu vazinji vakavona zvakaithwa ndi Jesu. Ngo kudaro Jesu wakabvunja vatungamiriri vo zviara zvo ciJudha kuti: “Bvumbo rakaxata no ro upombo rinopsanga muxamaiso. Kaveta arizopui civoniso ciciripi ca Jona muporofeti.”—Mateu 12:38, 39.

Ciriporipoco Jesu wakajekesa zvaaida kureva eciti: “Kudari ndi Jona wakagara mu ndani mo [hove huru] mazuva matatu no usiku hutatu, Mwana wo mundhu anozogaravo pasi po mabvu mazuva matatu no usiku hutatu.” Jona wakamijwa ngo hove huru, perepo wozobudemo inga mundhu ari kumuswa. Ngo kudaro, Jesu wainga ecitonanga kuti waizofa perepo womuswa pa njiku yo citatu. Tevere pazvinozoitika izvi, vatungamiriri vo ciJudha vanoramba “civoniso . . . ca Jona,” voramba kukhauya no kucinja mufambiro wavo. (Mateu 27:63-66; 28:12-15) Asi “VaNinive” vakakhauya pavakacumaehwa ndi Jona. Ngo kudaro vandhu ava vanozoshora mubarihwana uwu. Jesu wakanangavo kuti mambokaji wo Sabhaa anozovashoravo. Iyena waida kuzwa ngo pamusoro po uzivi hwa Soromona zve wakashamaiswa  ndihwona. Wari Jesu anonanga kuti: “Ari wari pano anopinda Soromona.”—Mateu 12:40-42.

Jesu anoezanisa mubarihwana wakashata uwu no mwanarume wakabudaya mujimu wakashata. (Mateu 12:45) Zvecivoneka kuti mwanarume uwu aazaji murangariro wake ngo zviro zvakanaka, mujimu wakashata wiya wakaviyazve no imweni inokwana kuita munomwe, yakashata maningi kupinda mujimu wokutanga wiya, yese inowira mwanarumewo. Ngo njira yakafananavo, jinja ro vaIziraeri rakaceneswa roithwa ibza, inga mwanarume wabvisihwa mujimu wakashata. Asi vaIziraeri vakaramba vaporofeti va Mwari vopejisira ngo kunyenya Jesu, wainga no mujimu wa Mwari. Izvi zvinovonesa kuti mugariro wavo wari wainga washatisisa kupinda zvavainga pa kutanga.

Jesu paainga ecivereketa, make no hama jake vanoguma vogara phedo no mbungano. Vamweni vanonga vakagara phedo na Jesu vanonanga kuti: “Mai no hama jako vari kunja, kuda kukuvona.” Jesu anotatija kuti ano ushamwari maningi no vajiji vake vanoita inga mai, hama no hambzaji jake kamare. Ecikhombija vajiji vake, Jesu anonanga kuti: “Mai wangu no hama jangu nga vaya vanozwa mazwi a Mwari no kumaxandisa.” (Luka 8:20, 21) Ngo kudaro, iyena anovonesa kuti, pikija ukama hwake huno mutengo mukuru, ushamwari hwake no vajiji ngo hunosisira maningi. Zvinodakajisa maningi kuva no ushamwari hwakavanga ku hama jedu jo ciKristu, maningi-ningi kudari vamweni vecitishora ngo basa rakanaka ratinoita.