VaJudha vakasiana-siana vanokhwederera Jesu paanonga aciri phedo no Jerusarema. Vamweni vanoda kujija ndiena, vamweni vanoda kumueja. Umwe muJudha anoziva maningi Mutemo, anobvunjisa kudari: “Mujijisi! Ndoitenyi kuti ndiwane uhomi ucingaperi?”—Luka 10:25.

Jesu anovona kuti mwanarume uu aaripi kubvunjisa ngo kuda kuziva. Kangaije ari kuda kuitisa kuti Jesu adavire ngo njira inocamwisa vaJudha. Asi Jesu anovona kuti anao mavonero ake pa shwiro iyi. Ngokudaro, anomudavira ngo ungwaru, mu njira inoita kuti anange zvaanorangarira.

Jesu anobvunjisa kudari: “Bzakatahwa kudini mu Mupango? Unojija kudini?” Mupinguro wo mwanarume uu unocijikira mu Mutemo wa Mwari ngokuti iyena wakaujija. Ngokudaro, anonokora Deuteronòmio 6:5 no VaLevi 19:18, jinoti: “Disai Tenji, Mwari wako, ngo mwoyo wako wese, ngo mwiha wako wese, ngo simba rako rese, ngo hwiru hwako hwese; no kudisa mudoni ngo mudiro wo unojiita.”(Luka 10:26, 27) Kunanga kuti ndiwona mupinguro here?

Jesu anomubvunja kudari: “Wapingura bzokadi. Itai kudaro unozorarama.” Waro izvo zvinoita kuti mabhuyo apere here? Manarume uu aadi mupinguro wo zvaabvunjisaro basi; anoda kujikhombhija kuti wakarurama, ngo kuvonesa kuti murangariro wake no matajiro aanoita vamweni ngo akanaka. Ngokudaro, iyena anobvunjisa kudari: “Kani, ndiani mudoni wangu?” (Luka 10:28, 29) Mubvunjo unovonekari kuti wakareruka, unoreva zvakawanda. Kuitisa kudini?

VaJudha vanotenda kuti gama rokuti “mudoni” rinoshanda kuna wiya anoteveja zvirovejeso zvo ciJudha zve zvingavoneka kuti VaLevi 19:18 inozvibeseravo. MuJudha angananga kuti “aatendehwi” kuita ushamwari no mundhu aciripi muJudha. (Maitiro o Vapostori 10:28) Ngokudaro, kangaije munarume uu no vajiji vamweni va Jesu, vanojivona kuti vakarurama kudari vakataja vaJudha doni ngo kunaka mwoyo. Asi ivona vangatotaja vaciripi vaJudha ngo maitiro akashata ngokuti asipi ‘vamudoni’ wavo.

Waro Jesu anganasiririsa kudini mavonero aya acingakhuguri mwarume uu no vaJudha vamweni? Anozviita ngo kunanga ndhorondho imwe, yokuti: “Mundhu wakatikuti waibva Jerusalema, ecienda Jeriko. Mu gwanja, wakawira mu nyara jo magandanga, naapera kumutorera bzese, no kumurova, akapinda, omusia oda kufa.” Jesu anoenderera mberi aciti: “Bzakaitika kuti mupiri waideruka ngo njireyo; naamuvona, wakamupindirija. Ngo maitiro ondhoo, muLevi wakakhiriravo ngo gwanja rondhoro; naamuvona, wakamupindirijavo. Kaveta muSamaria, waienda rwendo hwake, naaguma phedo pake, wakamuvona, womuitira uriji.”—Luka 10:30-33.

Mwanarume ari kubvunjwari ndhorondho iyi ndi Jesu, anozviziva ushoni kuti vapiri no vaRevhi vanobesera ku themberi vanogara Jeriko. Kuti vaviye kubva ku themberi, vanodikana kufamba makirometro anokwana 23. Gwanja rovanofamba ndirona rinothyisa, ngokuti mbabva jinofindarira vandhu mumbhiripiri maro. Kudari vapiri no vaJudha vakavona muJudha doni ari pa nyatwa avamubeseri kani? Pa ndhorondho iyi, Jesu anonanga kuti avacaizviita. Zvakatwa ngo muSamaria, mundhu anobva ku vandhu vanoshohwa ngo vaJudha.—Johani 8:48.

MuSamaria wakabesera kudini muJudha wo kukhuvazika uu? Jesu anoenderera mberi aciti: “Wakamukhwederera, womupombera mavonje ecimazoja ngo mafuta no doro, kuperapo wakamupakija pa mbongoyo yake, woenda naye ku nyumba yo vayeni, womuarika. Fumi co mangwana, wakabvisa makobiri maviri, womapa muno wo nyumba, woti: ‘Mungwarirenyi uxoni. Mare yo unobudisa pa musana pake, ndinozokuripira ndikazovia.’”—Luka 10:34, 35.

Mujijisi Mukuru, Jesu, paanopera kusumura ndhorondho iyi, anoita mubvunjo ku mwanarume uu, unomuita kuti arangarire, wokuti: “Ku vandhu ava vatatu, ngowapi wo unovona kuti wakaita mudoni na  wiya wakawira mu nyara jo magandanga?” Kangaije mwanarumewo anopseruka kuti anange kuti “muSamaria,” ngokudaro anoti: “Wiya wakamuitira uriji.” Perepo Jesu anojekesa cijijo caanoda kupa ngo kunanga kuti: “Endai, woitavo bzondhobzo.”—Luka 10:36, 37.

Apa wari, Jesu washandisa njira inobudirira maningi pa kujijisa. Kudari Jesu naabvunja mwanarume uu kuti vaciripi vaJudha i vadonizve vake, iyena no vaJudha vamweni vari kupurukiravo vaizozvitendera? Pamweni avacaizozvitendera. Asi, ngo kusumura ndhorondho yakareruka, acishandisa zviro zvinozwisisika ngo vapurukiri, mupinguro wo mubvunjo wokuti, “ndiani mudoni wangu?” wava pambhene. Mundhu anokhombija kuva mudoni wokadi-kadi ngo wiya anokhombija rudo no kunaka mwoyo, zvotinobvunjwa ngo Matahwa.