Jesu no vapostori voda kubuda mu nyumba mavahiraya Phasika. Pasure po kuvapekeja mazano anosisira maningi, Jesu anoti: “Ndamubvunja ibzi kuti mukazoejwa mutame kuwa.” Iyena anojekesa kuti ngenyi mazano aapekejaya anosisira maningi eciti: “Vanozomumbhirimbija mu masinagoga. Unozoza mukuvo wokuti ariwese anomuuraya anozorangarira kuti ari kudira . . . Mwari.”—Johani 16:1, 2.

Kangaije magama aya akasia vapostori vecithimwa-thimwa. Jesu wainga akambovabvunja kuti nyika yaizovazonda, asi iyena aazivi kuvajekesera pambhene kuti ivona vaizourawa. Ngenyi? Iyena anoti: “Andizivi kubzinanga pakutungamira, ngokuti ndainga nemwi.” (Johani 16:4) Wari iyena ari kuvangwaja acito apinda. Kangaije zvaizovabesera kuti vatame kukhugunyika.

Jesu anoenderera mberi eciti: “Ndinoenda kuna wiya wakandituma. Apana na umwe wenyu anondibvunjisa kuti: ‘Munoenda kwapi?’” Mu usiku hwondhohwo kamare, ivona vainga vakabvunjisa Jesu kuti iyena wainga ecida kuenda kwapi. (Johani 13:36; 14:5; 16:5) Asi wari, vecithimwa-thimwa ngo pamusoro po zvainga zvanangwa ndi Jesu ivona vari kugara vecithya basi. Ngo kuthya uku, ivona avakwanisi kubvunjisa ngo pamusoro po kukujwa kuri kuvetehwa ndi Jesu zve vanokonehwa kubvunjisa ngo pamusoro po mabesere akunozoita vanamati vokadi-kadi. Jesu anoti: “Ngo ndava yo kumubvunja ibzi, makacamwisisa mu mwoyo menyu.”—Johani 16:6.

Perepo, Jesu anozodurujira kuti: “Bziri nane komuri kuti ndipinde. Ngokuti ndikatama kupinda, muembezeri aazozi komuri. Kaveta, ndikapinda ndinozoutumira komuri.” (Johani 16:7) Vajiji va Jesu vaizoashira mujimu mucena, basi kudari Jesu akafa oenda kudenga. Ari kondhoyo, Jesu angazoutumira kuti ubesere vandhu vake pa ndau iri yese yo pasi pano.

Mujimu mucena unozotongera “nyatwa nyika yo pasi ngo ndava yo uxaixi, ngo ndava yo urungami no yo kutonga.” (Johani 16:8) Zvinozobuda pambhene kuti nyika aina rutendo kuno Mwana wa Mwari. Kuenda ka Jesu kudenga kunozovonesa kurungama kwake zve zvinozovonesa kuti Sathana, “mambo wo nyika yo pasi” anodikana kupanicwa.—Johani 16:11.

Jesu anoti: “Ndicinabzo bziro bzizinji bzo kumubvunja. Kaveta wari amukwanisi kubzizwisa.” Paanozodurura mujimu mucena, iwona unozovatungamirira kuti vazwisise “bzokadi bzese,” zve ivona vanozokwanisa kurarama mukuzwirana no zvokadi iyi.—Johani 16:12, 13.

Vapostori vanokahamara ngo masoko a Jesu o kuti: “Ngo nguva xomani, amuzondivoni; ngo nguva xomani munozondivonabze.” Ivona vanobvunjisana ngocavo revo yo masoko aya. Jesu ecivona kuti vari kuda kumubvunjisa, iyena anotanga kuvadurujira eciti: “Ndinomubvunja bzokadi kuti: Munozocema mecigomera; nyika yo pasi inozodakara. Munozopsipa mwoyo, kaveta kupsipa mwoyo kwenyu kunozopinduka kuita kudakara.” (Johani 16:16, 20) Jesu akaurawa mu madeko anotevera, vatungamiriri vo zviara vanozodakara, asi vajiji vanozosuruvara. Asi paanozomuswa, kusuruvara ko vajiji kunocinja kova mudakaro. Kunja kwa izvi, ivona vanozodakarazve Jesu paanozovadururira mujimu mucena wa Mwari.

Eciezanisiria mugariro wainga no vajiji inga mugariro wo mwanakaji ari kusurungumwa, Jesu anoti: “Mwanakaji nowoda kubara anopsipa mwoyo, ngokuti yaguma ngari yake. Kaveta naapera kubara mwana, aazorangariribze kupsipa mwoyo. Anodakara ngo kubara mwana mu nyika.” Jesu anovangisa vapostori vake eciti: “Imwimwi munopsipa mwoyo wari. Kaveta inini ndinozoviabze komuvona. Apo mwoyo yenyu inozodakara. Akunabze anozomutorera kudakara kwenyu.”—Johani 16:21, 22.

 Mbhera wari uno, vapostori avacaiitepi mukumbiro vecishandisa zina ra Jesu. Asi wari iyena anoti: “Njikuyo munozokumbira ngo zina rangu.” Ngenyi vaizodikana kurishandisa? Asipi kuti Baba avadi kudavira. Jesu anoti: “Baba ambhwine vanomuda ngo ndava yokuti imwimwi mandidavo no kutenda kuti ndinobva ka Mwari.”—Johani 16:26, 27.

Magama anonyaraja a Jesu ku vapostori vake, kangaije anovavangisa zvokuti vagume pakunanga kuti: “Ngo njiyo yondhoyo tinotenda kuti makabva ka Mwari.” Asi rutendo uhu, hwaizodihwa pa muejo ngo kukasika. Jesu anosanangura zvinozoitika eciti: “Zivanyi kuti iri kuguma nguva, yatoguma, yokuti munozoparajana umwe na umwe, mondisia ndega.” Asi iyena anovavangisa eciti: “Ndamubvunja ibzi kuti mudakare ngo ndava yangu. Munozotambujika pasi pano. Kaveta, gondanyi: Inini ndakanyisa nyika yo pasi.” (Johani 16:30-33) Jesu aaripi kuvasiya vega. Iyena anogwinyiso kuti, kudari inga ndiyena, vapostori vangakwanisa kunyisa nyika. Kuitisa kudini? Ngo kuramba veciita kuda ka Mwari pikija no muejo ja Sathana no nyika yake inoda kuti vasiye kutendeseka kwavo.