Jesu naamuswa, anoita nasiriro kuti vapostori vake vanokwana 11, vasongane nae ku dundhu rimweni mu Garireya. Vajiji vamweni vanokwana kuita 500 vari kondhoyo, zve vamweni vavo vari kukana-kana kuti wamuswadi kana kuti haiwa. (Mateu 28:17; 1 VaKorinto 15:6) Asi zvinonanga Jesu wari, zvinokhohwesa vese kuti ari kuponadi.

Jesu anodurujira kuti wapuwa simba rese ndi Mwari, mugore no pasi pano. Jesu anovavangisa eciti: “Endanyi, jijisanyi vandhu vese no kuvabapatiza mu zina ra Baba no ro Mwana no ro mujimu mucena, no kuvajijisa kuteveja bzese bzo ndakamutuma.” (Mateu 28:18-20) Jesu ari kupona zve acandoda kuti masoko akanaka acumaihwe.

Vateveri vese va Jesu—vanarume, vanakaji no vana—vanopuwavo basa iri ro kuita vajiji. Vandhu vanozoeja kuvaphinga kuti vacacumaira no kujijisa, asi Jesu anovathembesa kuti: “Ndapuwa simba rese mugore no pasi pano.” Waro izvo zvinorevenyi ku vateveri vake? Iyena anoti: “Zivanyivo kuti ndinemwi njiku jese mbhera kupejisira ko nyika.” Jesu aanangi kuti vese vanotora rutivi mu basa ro kucumaira vanozoita mabasa anoshamaisa. Pikija zvakadaro, ivona vanozobesehwa ngo mujimu mucena.

Vajiji va Jesu vakamuvona kazinji mukati mo “makumarongomuna o njiku” pasure po kumuswa kwake. Anojitatija kovari ngo muviri yakasiyana-siyana, ecivonesa kuti ari penye ngo ucapupu hwakawanda, ecivajijisa ngo pamusoro po “Umambo hwa Mwari.”—Maitiro o Vapostori 1:3; 1 VaKorinto 15:7.

Zvinovoneka kuti vapostori vaciri mu Garireya zve Jesu anovatungamirira kuti vahwirire Jerusarema. Paanosongana navo mu dhorobha, anovabvunja kuti “vatame kubuda Jerusalema, kaveta kuti vagarire cigondiso ca Baba, eciti: ‘Nga ico co makazwa ndecinanga; ngokuti Johani wakabapatiza ngo kumwa, kaveta imwimwi munozobapatizwa ngo mujimu mucena sure ko mazuva maxomani.’”—Maitiro o Vapostori 1:4, 5.

Jesu anozosonganazve no vapostori vake. Iyena anovatungamirira kuenda “phedo no Betania,” kunowanika kumabvazuva ko Dundhu ro Maorivhe. (Luka 24:50) Pikija no zviro zvese zvaakavabvunja ngo pamusoro po kubuda kwake, vacandokhohwa kuti Umambo hucazova panyika pano.—Luka 22:16, 18, 30; Johani 14:2, 3.

Vapostori vanobvunjisa Jesu kudari: “Tenji, nga ii nguva yo munozomusa ngo papsa umambo hwo vaIsraeli, kani?” Iyena anodavira basi kuti asipi “imwimwi munotendehwa kuziva nguva no mukuvo bzakasanwa ndi Baba, mu simba ravo.” Perepo anovakohomejazve basa rovanodikana kuita eciti: “Mukazoaxira mujimu mucena munozowana simba mozoita vafakazi vangu, mu Jerusalema, mu Judeya mwese, mu Samaria, mbhera ku magumo o nyika.”—Maitiro o Vapostori 1:6-8.

Jesu ari pa Dundhu ro Maorivhe no vapostori vake. Iyena anotanga kukhwira kumatenga, zve makore anotanga kumufukija, vapostori votama kumuvonazve. Jesu naapera kumuswa, waisimira muviri jo kunyama. Asi wari, Jesu wabvisa wosimira muviri wo kumujimu zve wokhwira kumatenga inga cisikwa co kumujimu. (1 VaKorinto 15:44, 50; 1 Pedru 3:18) Vapostori vake vakagondeka povanondomusota, phedo pavo panovoneka “vandhu vaviri vakasimira bzakacena.” Ivona i ngirozi jakasimira muviri wo kunyama. Ijona jinoti: “Vandhu vo Galileya, munoringisisa ngenyi mugore? Jesu wondhowo watohwari pakati penyu kuenda mugore, anozovia ngo maitiro ondhoo o munovonari ecikhwira ndiwona.”—Maitiro o Vapostori 1:10, 11.

Jesu anobva panyika pano acikaziviki ngo vakawanda. Vanomuvona basi, i vateveri vake vakagondeka. Anozoviyazve “ngo maitiro ondhoo”—acikaziviki ngo vakawanda, vateveri vake basi vakagondeka ndivona vanozozwisisa kuvepo kwake mu simba ro Umambo.

 Vapostori vanohwirira Jerusarema. Mukati mo dhiya jinotevera, vanoungana no vajiji vamweni, kubatanijavo “Maria mai wa Jesu, no hama jake.” (Maitiro o Vapostori 1:14) Cikwata ici cinovangirira kuita mukumbiro. Cinangwa co mukumbiro iji ngo cokukheta mujiji umwe kuti afakeye Judha Iskariote no kumusijira civerengo co vapostori, co 12. (Mateu 19:28) Ivona vanoda mujiji wakavona mabasa a Jesu no kumuswa kwake. Uhu i hwendo hwo kupejisira hwo Bhaibheri kunanga ngo pamusoro po kuringijira zembe kuitira kuziva kuda ka Mwari. (Nduyo 109:8; Mazwi Akangwara 16:33) Matia, angava umwe wo 70 o vandhu vakatumwaya ndi Jesu. Iyena anokhetwa zve anoverengwa “pa vapostori vogumi na vaviri.”—Maitiro o Vapostori 1:26.

Gumi ro dhiya pasure po kukhwira ka Jesu kumatenga, inotanga Pentekoste yo ciJudha yo mu gore ro 33 N.V.Y. Vajiji vanokwana kuita 120 vanoungana mu nyumba yo nyezuru mu Jerusarema. Ngo cibvumbu, mu nyumba iyi munozika musindo wakaezana no wombhepo huru. Rurimi jakawanda, jakaezana no murazvu wo muriro jinovoneka pa musoro po umwe na umwe wo varipo waro. Vajiji vese vanotanga kuvereketa ndimi jakasiyana-siyana. Uku i kuduruhwa ko mujimu mucena wakagondeswaya ndi Jesu.—Johani 14:26.