Wari ari kupera madeko o Mucishanu dhiya 14 ya Nisani. Pa kuvira ko zuva, Sabudu ro dhiya 15 ya Nisani rinotanga. Jesu wafa kare, asi mbabva jiri mu mativi make ajito jafa. Mukuzwirana no Mutemo, mutembo “aubviri kugara pa muti,” unodikana kuvigwa ngo “njiku” yondhoyo.—Deuteronòmio 21:22, 23.

Kusiyapo izvo, Mucishanu co madeko munodanijwa kuti Runasiriro, ngokuti vandhu vanonasirira zvokuha zve vanopejisa mabasa amweni acikadikani kuvetera mbhera kupera ko Sabudu. Pa kubira ko zuva, rinozotanga Sabudu rakapetwa kana kuti Sabudu guru. (Johani 19:31) Zvinoitika kudaro ngokuti dhiya 15 ya Nisani inozova dhiya yo kutanga yo dhiya nomwe jo Dhiri ro Mukate Icina Mumera kana mbijo. Mukuvo wese dhiya iyi inotanga ngo Musabudu. (VaLevi 23:5, 6) Hwendo huno dhiya iyi yakwanavo ngo Musabudu ro sumana, dhiya yocinomwe.

Ngokudaro, vaJudha vanokumbira Pirato kuti Jesu no mbabva mbiri jiya vauraiswe. Kuitisa kudini? Ngo kugura mukumbo javo. Vakaita kudaro, vakakohomehwaya avazokwanisi kushandisa mukumbo kuitira kumusa muviri javo, kuti vafeme. Masoca anoviya kogura mukumbo jo mbabva mbiri jiya. Asi avaguri mukumbo ja Jesu ngokuti ari kuvoneka kuti wafa. Izvo zvinokwanirisa Nduyo 34:21 inoti: “Mwari anongwarira mafupa ake ese: na rimwe rao arizoguhwi.”

 Kuitira vatame kukana-kana kuti Jesu wafadi, musoca umwe anomubaya pamutivi ngo mukhondo, womubovora ndharaundha yo mwoyo, “yobuda ngazi no kumwa.” (Johani 19:34) Izvo zvinokwanirisa matahwa amweni anoti: “Majiso avo anozosota wiya wo vakabaya.”—Zakaria 12:10.

Jasefa anobva ku dhorobha ro Arimateya, mumwe wo vanotonga mu Sinedriyo, ari “mukhupuki,” aripovo panourawari vandhu ava. (Mateu 27:57) Iyena anonangwa kuti i mundhu “wakanaka mwoyo no kururama.” Kunasa kunanga, iyena i “mujiji wa Jesu ngo kufisika, ngo ndava yo vaJuda,” zve aazivi kubesera banje iri paaitongwa Jesu. (Luka 23:50; Marco 15:43; Johani 19:38) Jasefa anova no cicunge co kokumbira mutembo wa Jesu ka Pirato. Pirato anodanija mukuru wo masoca ari kuvonerera anange kuti Jesu wafadi kana kuti haiwa. Perepo anozokwanisa kudavira cikumbiro ca Jasefa.

Jasefa anotenga nguvo yakacena, yakanaka, wobvisa mutembo wa Jesu pa zimiti. Iyena anopombera mutembo wa Jesu, eciunasirira kuti uende kovigwa. Nikodhemo, “wiya wainga akaenda kosongana na Jesu co usiku,” anobeseravo Jasefa. (Johani 19:39) Iyena anozisa kiru jinokwana kuita 33 jo mafuta anodhura o kunuhira anozwi mira, akabvengwa no areo. Muviri wa Jesu unopukutihwa ngo nguvo iji no mafuta aya, mukuzwirana no cirovejeso co njaumba jo vaJudha.

Jasefa ano guva ricito rashandiswa ro buwe rakaciwa ngo phedopo, zve ngomunovigwa mutembo wa Jesu. Perepo panomburumbujwa buwe guru rofunga pamusuvo po guvero. Izvi zvinoitwa ngo kukasika Sabudu ricito ratanga. Maria Madharena na Maria make Jakobo wo Mudoko kangaije vanobeseravo pa kunasirira muviri wa Jesu. Wari ivona vanokasikira kuenda kumuzi vanasirire “mutombo yokunuhira no mafuta okuzoja ndiwona” muviri wa Jesu pa kupera ko Sabudu.—Luka 23:56.

Pa dhiya inotevera, Sabudu, vapiri vakuru no vaFarisi vanoenda ka Pirato, voti: “Tinoceukija kuti munyepi wiya wakananga acapona kuti: ‘Ndinozomuka sure ko njiku ndhatu.’ Ngokudaro, tumanyi korindira guva mbhera njiku yocitatu; bzicazoitika kuti vaze vajiji vake komuba, no kubvunja vandhu kuti wamuka po vakafa. Bzakadaro, kunyepa kokupejisira kunozoxata kupinda kokutanga.” Pilato anoti: “Nga ava varindiri. Endanyi morindira ngo marindiro enyu.”—Mateu 27:63-65.

Co mangwanani o Mudimingu, Maria Madharena, Maria make Jakobo no vanakaji vamweni vanoza no mutombo yokunuhira kozoja muviri wa Jesu. Ivona vanobvunjisana ngocavo kuti: “Ndiani anozotimburumbujira buwe riri pa muromo wo guva?” (Marco 16:3) Asi kwabva kuitika kuzungunyika ko nyika. Kusiyapo izvo ngirozi ya Mwari yainga yamburumbuja buwe kubva pa guva, varindiri veya avacipo zve zvinovoneka inga kuti guva aricina ciro!