Jesu anopejisa kujijisa vapostori varongomuna pa Dundhu ro Maorivhe, ecidavira mubvunjo wavo ngo pamusoro po kuzoviya kwake no kupera ko nyika.

Wavirihwa akabatikana mu dhiya 11 ya Nisani. Kangaije povanonga vacihwirira Bhetania, kovanovata, Jesu anobvunja vapostori vake kudari: “Munoziva kuti jasara njiku mbiri mbhera njiku yo Paskwa, no kuti Mwana wo mundhu anozopuwa kuti akohomehwe” pa danda ro kutambujikira.—Mateu 26:2.

Zvinoita inga kuti pa dhiya inotevera, Mucitatu, Jesu anopeja dhiya yese ari ega no vajiji vake. Ngo Mucipiri, wakavereketera vatungamiriri vo zvokunamata wovaphetura pambhene. Ivona vari kupsaka kumuuraya. Ngokudaro, aadi kubudira vandhu mu dhiya 12 ya Nisani, kuitira kuti patame kuva no ciro cinozomuphinga kuceukijira Phasika no vapostori vake. Kuceukija uku kunozoitika pasure po kuvira ko zuva ko usiku hwo dhiya inotevera, pa kundotanga ko dhiya 14 ya Nisani.

Asi vapiri vakuru no madhodha avagajani. Phasika icito yaguma, vanoungana paruvanje po mupiri mukuru anozwi Kaifasi. Vanounganirenyi? Ivona vakanyangajwa ngokuti Jesu wakavaphetura. Wari ivona vanozwirana “kusunga Jesu ngo urimbhwi, kuti vamuuraye.” Vanozozviita rini zve vanozviitisa kudini? Ivona vanoti: “Bzicadoitika pa rudakaro, ngokuti vandhu vangazoita bope.” (Mateu 26:4, 5) Ivona vari kuthya ngokuti Jesu anodakarihwa maningi ngo vandhu vazinji.

Asi zvicito zvaitika, vatungamiriri vo zvokunamata vanoashira mufambi. Zvinovashamaisa ngo zvokuti ndi umwe wo vajiji va Jesu, Judha Iskariote. Sathana wakamupa murangariro wo kutengesa Tenji wake. Judha anovabvunjisa kudari: “Munondipa  cinyi kudari inini ndikamupa komuri?” (Mateu 26:14, 15) Vecidakara ndizvona, ‘vanozwirana kumupa mare.’ (Luka 22:5) Mutengonyi wakona? Ivona vanodakara ngo kumupa 30 o macereni o sirivha. Zvinodakajisa kuziva kuti 30 o macereni i mutengo wo muranda. (Exodo 21:32) Ngo kuita kudaro, vatungamiriri vo zviara vanokhombija kuti Jesu ano mutengo mudoko maningi. Wari Judha anotanga ‘kupsanga mukuvo wo kukwanisa kumupira, vandhu vacikabzizivi.’—Luka 22:6.

Dhiya 13 ya Nisani inotanga pa kuvira ko zuva ko Mucitatu, zve uhu i usiku hwocitandhatu no hwokupejisira hwa Jesu kuva mu Bhetania. Pa dhiya inotevera, kunodikana kuitwa nasiriro jo kupejisira kuitira Phasika. Kunodikana bvuta rorume kuti vazoriuraye pasure po kutanga ko dhiya 14 ya Nisani. Waro vanozohira kwapi Phasika zve ndiani anozovanasiririra? Jesu aato wazvinanga. Ngokudaro, Judha aakwanisi kubvunja vapiri vakuru masoko ariese.

Kangaije pa kutanga ko madeko o Mucina, Jesu anotuma Pedhru na Johani kubva Bhetania kuenda Jerusarema, eciti: “Endanyi motinasirira Paskwa, tizohe.” Ivona vanodavira kudari: “Munoda kuti tiinasirire kwapi?” Jesu anodurujira kudari: “Pakunghwina mu guta, munozosongana no mundhu akathwara juvi ro kumwa. Muteverenyi mbhera ku nyumba yaanonghwina, mobvunja muno wo nyumba kuti: ‘Mujijisi wakatituma komubvunjisa kuti, ngoyapi nyumba yo ndinozohira Paskwa no vajiji vangu?’ Yena anozomutatija nyumba huru ino bzese, iri panyezuru. Nasiriranyi bzese pondhopo.”—Luka 22:8-12.

Zviri pambhene kuti mune wo nyumba iyi i mujiji wa Jesu. Kangaije waitovetera kuti Jesu anozokumbira nyumba yake kuitira ciitiko ici. Vajiji vaviri ava povanoguma Jerusarema, vanokhanda zvese inga zvovakabvunjwa ndi Jesu. Ngokudaro, vanovona kuti bvuta riripo zve nasiriro jimweni kuitira Phasika jiri kuitwa kutira vandhu 13—Jesu no vapostori vake 12.