Jesu Kristu wakati ku vateveri vake: “Ruveneko hwenyu ruveneke pa meso po vandhu vese, kuti vavone mabasa enyu auxoni, vakuje Baba wenyu vari mugore.” (Mateu 5:16) Kuti zviitike, itusu tinoshandisa zvakanaka uzivi hwa wari, pamwe no Interneti. Mu saite yedu, www.dan124.com/ndc, ndimona munobva masoko mazinji ngo pa musoro po zvinotendhwa zve no mabasa o Zvapupu zva Jehovha. Icinyi cinowanikemo?

Mupinguro jo Bhaibheri ku mubvunjo jinoizwa kazinji. Mungawana mupinguro jo mubvunjo jinosisira maningi jinoizwa ngo vandhu. Inga muezaniso, tratado Kutambujika Kucazombopera Hako Here? no yokuti Vafaka Vangazoraramazve Kamare Here? jinowanika mu interneti ngo ndimi jinodarika 600. Mungawanazve Shanduro yeNyika Itsva mu ndima jinodarika 130 no mutengo muzinji wo besero yo kujija Bhaibheri, kubatanijavo bhuku Bhaibheri Ringatijijisenyi? zve no mujeura jipsa jo Murindiri pomwe no Mukai! Uzinji wo mabhuku aya angaverengwa kana kupurutanwa mu interneti kana kubhashari mugariro jakadari inga MP3, PDF, kana EPUB. Mungakwanisa kudhindha zvimatsamba zvinganani kuti mukovane no vandhu vanodakarira mu ndumi yavo kamare! Mabhuku akaithwa vhidhio anowanika mu ndumi jo kuvereketa ngo nyara. Mungakhopazve kuverengwa ko Bhaibheri kwakaizwa inga drama, madrama o Bhaibheri zve mumbo jinodakajisa kujizwa pa nguva yo kuzorora.

Masoko o zvakaitika ku Zvapupu zva Jehovha. Anowanikazve masoko okupejisira no mavhidhio anovoneka ngo pa musoro po basa redu ro nyika ese, zviitiko zvinopsasa Zvapupu zva Jehovha, zve simba ratinoita mu kubeserana. Mungawana masoko ngo pa musoro po magungano ari kuza zve njira jo mungaita kuti mudavijane no hofisi jo macine edu.

Ngo njira iji, itusu tiri kusia ruvheneko hwo zvokadi hucibveneka kugumira ndau jo ndhambo jo pasi pano. Vandhu kubva pasi pese kubatanija Antartida, vari kubesereka. Tinokumbira kuti ‘Izwi ra [Jehovha] riende mberi’ pasi pese, kuti Mwari akujwe.—2 VaTesalònika 3:1.

• Saite yedu www.dan124.com/ndc inobeseresa kudini vandhu vazinji kuti vajije Bhaibheri?

• Icinyi co maizoda kuziva mu saite yedu?