Jehovha anoda kuti tive “vakagondeka” (Nduyo 18:26) Izvi zvinodiwa maningi mu mucadho wenyu ngo kuti pacina ugondeki, apana kuthembana. Kugondana kunodikana maningi kuti rudo hubare mucero.

Nyamasi uno, kugondeka mu mucadho kuri kuhwiswa. Kuitira kujivirira mucadho wenyu, munodikana kusunga kuita zviro zviviri.

BHAIBHERI RINOTI KUDINI: ‘Mukwanisevo kudaro kusana izvo zvinodikana.’ (VaFilipi 1:10) Mucadho wenyu i ciro cimwe cinodikana maningi mu upenyu hwenyu. Unofanea kamare kuva pakutanga.

Jehovha anoda kuti imwimwi mubatikane ku mudoni wenyu zve ‘kubusa’ upenyu pamwepo. (Mucumaeri 9:9) Iyena wakajekesa kuti imwimwi amudikani kureja-reja mudoni wenyu wo mu mucadho asi, kunja kwa izvi, mese mo vaviri munodikana kusota njira jo kudakajisa mudoni. (1 VaKorinto 10:24) Itanyi kuti mudoni wenyu azwe ecidiwa zve anoreremejwa.

ZVAMUNGAITA:

• Ivanyi no cokwadi co kuti nguva jese munopeja nguva pamwepo, mopa mudoni wenyu ngwariro inofanea iyena basi

• Rangarijanyi kuti “zvedu” haiwa kuti “zvangu”

BHAIBERI RINOTI KUDINI: “Ariwese anoringisa mwanakaji ngo meso o kumuemura, wapombora na yena ngo mu mwoyo make.” (Mateu 5:28) Kudari ari wese anoramba ecirangarija ngo pamusoro po zviro zvo uhure, mu mazwiro, aaripi kuva wakagondeka ku mudoni wake.

Jehovha anoti munodikana ‘kurindirisisa uxoni mwoyo wenyu.’ (Mazwi Akangwara 4:23; Jeremia 17:9) Kuti muite kudaro, munodikana kungwarira majiso enyu. (Mateu 5:29, 30) Teveranyi muezaniso wa baba Jobe, wakaita citenderano no majiso ake kuti atame kusota mwanakaji umweni no jiso ro kuemura. (Jobe 31:1) Temanyi civaringo co kutama kuvona zvo umitu-umitu. Ivanyi makasunga kutiza mutambiro wese wo rudo no mundhu umweni aciripi mukaji kana mwamuna wenyu.

ZVAMUNGAITA:

• Zvijekesenyi ku vamweni kuti imwimwi makajipira kamare ku mudoni wenyu

• Rangariranyi mazwiro o mudoni wenyu, zve ngo kukasika pejanyi ushamwari hungakhugunya mukaji kana mwamuna wenyu