Jehovha * Mwari ngo wakaitisa mucadho wo kutanga. Bhaibheri rinotibvunja kuti iyena wakaita mwanakaji wokutanga “womuzisa ku mwanarume.” Adhamu wakadakara maningi paakati: “Uu kamare i godo ro godo rangu, no nyama yo nyama yangu!” (Genesi 2:22, 23) Jehovha aciri kuda kuti vandhu vakacadha vave no mudakaro.

Pamunocadha, mungarangarira kuti apana no cinozomboshata. Asi, kunasa kubhuya kamare, pikija mwamuna no mukaji vanonasa kudisana kamare vacazova no zvineso. (1 VaKorinto 7:28) Mu bhurushura iri, munozowana zviambi zvo Bhaibheri, zvokuti zvikambhera kushandiswa, zvicaita kuti mucadho no mbhuri yenyu zvive zvinodakara.—Nduyo 19:8-11.

BHAIBHERI RINOTI KUDINI: Mwamuna ndiyena musoro wo mbhuri.—VaEfeso 5:23.

Kudari muri mwamuna, Jehovha anovetera kuti mutaje mukaji wenyu no kupfava. (1 Pedru 3:7) Iyena wakaita mukaji inga divi renyu, zve anoda kuti mu mutaje no nderemejo pomwe no rudo. (Genesi 2:18) Munodikana kuda maningi mukaji wenyu inga kuzvida kwamunozviita, makasujunuka kudira zvaanoda pakutanga kupinda zvenyu.—VaEfeso 5:25-29.

Kudari muri mukaji, Jehovha anovetera kuti mureremeje mwamuna wenyu maningi zve kumubesera kuti akwanirise mutoro jake. (1 VaKorinto 11:3; VaEfeso 5:33) Beseranyi zvisungo zvake zve ngo mwoyo wese muzwirenyi. (VaKolosi 3:18) Mukaita kudaro, mucazova wakaseja kana kunyara mu kuvona ko mwamuna wenyu zve kuna Jehovha.—1 Pedru 3:1-6.

ZVAMUNGAITA:

• Bvunjisanyi mudoni wenyu zvamungaita kuti muve mwamuna kana mukaji waushoni. Nasanyi kupurutana, zve itanyi zvamunokwanisa kuti mucinje

• Ivanyi anosengerera. Zvicatora nguva kuti movaviri mujije zvamungaita kuitira kudakajisa mudoni

BHAIBHERI RINOTI KUDINI: Munodikana kusotesesa zvinodakajisa zvo mudoni wenyu. (VaFilipi 2:3, 4) Vonanyi wamakarovorana naye inga ciro co mutengo mukuru, meciceukija kuti Jehovha anoda kuti vashandiri vake vave ‘vakapfava ku vese.’ (2 Timoti 2:24) “Variyo vano rurimi hunoceka inga banga; asi rurimi hwo vazivi hunorapa.” Ngo kudaro, sananyi magama no kungwarira. (Mazwi Akangwara 12:18) Mujimu wa Jehovha ucazomubesera kuti muverekete no kunaka mwoyo zve rudo.—VaGalàsia 5:22, 23; VaKolosi 4:6.

ZVAMUNGAITA:

• Itanyi mukumbiro kuitira kubesehwa kuti murambe makathiva zve murambe muno ungwaru hwo kuvona shwiro huru inodikana kubhuisanua no mudoni

• Rangariranyi no kungwarira ngo pamusoro po zvamucananga pomwe no manangire amucazviita

BHAIBHERI RINOTI KUDINI: Pamunocadha, mava “muviri umwe” no mudoni wenyu. (Mateu 19:5) Asi mucindori vandhu vaviri zve kangaije mungava no mavonero akasiana. Ngo kudaro, munodikana kujija kuva vakabatana mu murangariro no mazwiro enyu. (VaFilipi 2:2) Kubatana kunodiwa maningi pamunoita zvisungo. Bhaibheri rinoti: ‘Zvirongwa zvinobudirira ushoni ngo kupanana mazano.’ (Mazwi Akangwara 20:18, Tradução do Novo Mundo) Sianyi kuti zviambi zvo Bhaibheri zvimutungamirire pamunonga meciita zvisungo zvikuru pamwepo.—Mazwi Akangwara 8:32, 33.

ZVAMUNGAITA:

• Kovananyi mazwiro no mudoni wenyu, kuciripi basi masoko kana mavonero

• Bhuisananyi no mudoni wenyu mucito maita cisungo