1-3. (a) Ngocapi cipo cinosisira maningi cotakapuwa ndi Jehovha? Kuitisa kudini taizoposa kucishandisa? (b) Tinodikana kushandisa kudini cipo ici co kuvereketa?

BABA vanopa bhasikoro kuno mwana wavo. Ivona vanodakara maningi ngo kupa cipo ici cinosisira. Asi kudari mwana akatama kubhasopa paanofambisa bhasikoro zve woguma pa kukhuvaza mundhu keni? Baba ava vaizojizwa kudini?

² Jehovha i Mupi wo “bzipuwo bzauxoni bzese no bzakanaka.” (Jakobo 1:17) Cipo cinosisira maningi catakapuwa ndi Jehovha, i cipo cokuvereketa. Cipo cokuvereketa cinotibesera kuti tibhuye zvatinorangarira no mazwiro edu ku vamweni. Tinokwanisa kuvereketa zviro zvinobesera vamweni zve zvinovaita kuti vajizwe ushoni. Asi zvatinovereketa zvingakhuvaza no kuhwajisa vamweni.

³ Jehovha anoziva simba rino magama, ngo kudaro iyena anotijijisa kuti tingamashandisa kudini. Iyena anoti: “Pa muromo penyu ngapatame kubuda izwi ririrese rakaposeka. Kaveta, pa ngari yokudikana, izwi rinonakira kuvaka, ngaripe unyaxa vaya vanorizwa.” (VaEfeso 4:29) Ngatende tivone kuti tingashandisa kudini cipo  ici cinovha kuna Mwari kuti timudakajise no kuvangisa vamweni.

4, 5. Mazwi akangwara o mu Bhaibheri anosanangura kudini ngo pamusoro po simba ro magama?

⁴ Magama ano simba, ngo kudaro tinodikana kungwarira zvatinovereketa no manera atinozvibhuya. Mazwi Akangwara 15:4 inoti: “Mazwi anonyaraja mwoyo ndiwona muti wo uhomi, mazwi akaxata anogura mwoyo.” Kudari inga muti wakanaka ungapa munvuriri unodakajisa, magama akapfava anodakajisa zve anovangisa. Ngo divi rimweni, magama akashata anokhuvaza zve anoita kuti vamweni vatame kujizwa ushoni.—Mazwi Akangwara 15:4.

⁵ Pana Mazwi Akangwara 12:18 panoti: “Variyo vano rurimi hunoceka inga banga.” Magama acikazivi kurangarihwa anohwaja zve anoparaja ushamwari. Kangaije makambohwajihwa ngo zviro zvakanangwa ngo umweni. Mazwi Akangwara ondhowo anoenderera mberi eciti: “Rurimi hwo Vazivi hunorapa.” Magama akanasa kurangarihwa angarapa mwoyo wakhuvazwa zve angaviisijira ushamwari wakakhuvazika. (Verenganyi Mazwi Akangwara 16:24.) Ngo kuziva kuti magama atinovereketa ano simba, tinoda kunasa kumashandisa.

6. Ngenyi azvizivi kureruka kungwarira zvatinovereketa?

⁶ Thangwe rimweni rinotiita kuti tingwarire zvatinovereketa ngo ro kuti itusu tese atizivi kukwana. Bhaibheri rinoti: “Murangariro yo mwoyo yo vandhu, yakaxata,” magama aya anotatija zvatiri ngo mukati. (Genesi 8:21; Luka 6:45) Ngo ndava yazvo, kungwarira zvatinovereketa azvizivi kureruka. (Verenganyi Jakobo 3:2-4.)  Tinodikana kuvangisira kuti tiitise nane manera atinovereketa no vamweni.

7, 8. Magama edu anopsasisa kudini ushamwari hwedu na Jehovha?

⁷ Tinodikanavo kungwarira zvatinobhuya no manera otinozvibhuya ngokuti izvi zvinopsasa manamatire edu kuna Jehovha. Jakobe 1:26 inoti: “Ndiyani anoti anotenda Mwari, kaveta aabati rurimi hwake, anojicengeja kamare. Rutendo hwake hwabiresi.” Gama ro ciGiriki rakasandujwa kuti “hwabiresi” ringarevazve ciro cicikasisiri kana cicikashandi. (1 VaKorinto 15:17) Kudari tikatama kungwarira zvatinovereketa, tingaguma pakuphwanya kana kuruza ushamwari hwedu na Jehovha.—Jakobo 3:8-10.

⁸ Zvakajeka kuti, tino mathangwe akanaka okuti tingwarire zvatinovereketa no manera atinozvivereketa. Zviripo zvingatibesera kuti tishandise cipo ici cokuvereketa ngo njira inodakajisa Jehovha, tinodikana kuziva  kuti mavereketero o mukhaindinyi atinodikana kunyenya.

9, 10. (a) Magama api ari kubhuiwa kwese-kwese nyamasi uno? (b) Ngenyi tinodikana kunyenya mabhuyo anonyoweja?

⁹ Magama okutuka, anonyoweja, no o kupseruja ari kushandiswa kwese-kwese nyamasi. Vandhu vazinji vanorangarira kuti vanozopurukihwa kudari vakashandisa magama okutuka kana acikasisiri. Vaya vanoita mutambo jo kusekesa vanodakarira kushandisa magama anopseruja no anonyoweja kuti vasekese vandhu. Asi mupostori Pauro wakati: “Regeranyi bzese ibzi: Runya, kuceneka, uxaixi, kuxora Mwari no mavereketero okunyoeja.” (VaKolosi 3:8) Iyena wakanangazve kuti: “Ngabzitame kunangwa pakati” po Makristu okadi “mazwi okunyoeja”—VaEfeso 5:3, 4.

¹⁰ Kubhuya zviro zvinonyoweja zvinoita kuti Jehovha acamwe. Zvinonyangajisavo vashandiri va Jehovha. I zviro zvicikazivi kucena. Bhaibheri rinoti: ‘kutama kucena’ ndi “mabasa o nyama.” (VaGalàsia 5:19-21) Zvishaishi zvakasiana-siana zvinganangwa kuti kutama kucena, cirovejeso cicikazivi kucena cingabara cimweni. Kudari mundhu anocirovejeso co kubhuya zviro zvinonyoweja zve acikadi kuzvisiya, angaguma pakujingwa mu ungano.—2 VaKorinto 12:21; VaEfeso 4:19; Vonanyi Masoko o Kupejisira n.° 23.

11, 12. (a) Mabhuyo angagumisa kudini pa kuita magumbu? (b) Ngenyi kuita magumbu kwakashata?

¹¹ Tinoda kutiza magumbu kana mabhuyo acikadakajisi ngo pamusoro po upenyu wo vamweni. Ngo zvocibarihwe kwatiri kuda kuziva ngo zvovamweni no kukovana masoko mapsa ngo pamusoro po shamwari no  ukama. Pikija mu nguva jo vapostori, Makristu aida kuziva kuti hama no hambzaji jainga jakadini zve ngozvapi zvovaidikana kuita kuti vavabesere. (VaEfeso 6:21, 22; VaKolosi 4:8, 9) Asi kugara kuri kundobhuya ngo zvovamweni zvakareruka kucinja zvova magumbu. Patinobhuya ngo mundhu kuphinda no kuphinda, tingava tecibhuya zviro zviciripi izvona kana kubhuya zvakafishika zvo umweni. Kudari tikatama kungwarira, mabhuyo akadari angatiita kuti tigume pa kunanga zvicikaripi izvona kana kutonyepa. Vafarisi vakaitavo kudaro pavakanyepera Jesu ngo zviro zvaacizivi kuita. (Mateu 9:32-34; 12:22-24) Magumbu anosvipisa kana kushatisa zina ro umweni, anomusa kuvereketesana, kuhwajisa zve anophwanya ushamwari.—Mazwi Akangwara 26:20.

¹² Jehovha anoda kuti tishandise magama edu kuti tivangise vamweni, kuciripi kuita kuti shamwari jizondane. Jehovha anonyenya vese vanomusa “haxa pakati po hama.” (Mazwi Akangwara 6:16-19) Magumbu okutanga akanangwa ndi Sathana Dhiyabho, iyena wakavereketa manyepo ngo pamusoro pa Mwari. (Apokalipsi 12:9, 10) Nyamasi uno, i cirovejeso vandhu kuvereketa manyepo ngo pamusoro po vamweni. Asi izvo, azvidikani kuitika no Makristu okadi. (VaGalàsia 5:19-21) Ngo kudaro, tinodikana kubhasopa ngo zvatinovereketa zve ticito tavereketa tinodikana kurangarira. Mucito mavereketa zviro zvamazwa ngo pamusoro po mundhu zvivhunjisenyi kudari: ‘Ndizvonadi kamare? Kureva kuti izvi zvaushoni here? Zvinobesera? Ndinozonyowejeka kudari mundhuwo akaziva zvondavereketa? Inini ndaizojizwa kudini kudari mundhu akananga zvakadari ngo pamusoro pangu?’—Verenganyi 1 VaTesalònika 4:11.

13, 14. (a) Ngozvapi zvinoitika kudari vandhu vakashandisa magama anokhugunya? (b) Icinyi kutuka? Ngenyi Makristu anodikana kunyenya kutuka vamweni?

 ¹³ Nguva jimweni, tese tinovereketa zviro zvokuti tinozozvidemba. Asi atidi kuva no cirovejeso co kushora vamweni kana kunanga zviro zvakashata. Magama anopseruja aadikani kuita divi ro upenyu hwedu. Pauro wakati: “Kupsipa mwoyo kwese, kunyangajwa no runya, izwi rese rakarema nokuti ro kuxora, . . . ngabzibude momuri.” (VaEfeso 4:31) MaBhaibheri amweni akasanduja gama rokuti “kuxora ” eciti “kubhuya zvinopseruja” zve no “kubhuya masoko akashata.” Kunanga magama anotuka kunoita kuti vandhu vamweni vajizwe vacikasisiri. Tinodikanazve kungwarira patinovereketa no vana vadoko, ngokuti ivona avanesi kucamwa kana kupsaswa ngo zvatinonanga.—VaKolosi 3:21.

¹⁴ Bhaibheri rinonanga kuti maitiro amweni anonyangajisa maningi ngo okushandisa magama—okutuka. Kutuka i kugara mecihwisa vamweni ngo magama anokhugunya. Zvaizonyangajisa maningi kudari ari wese waizotaja mwamuna, mukaji kana vana ngo jira yakadaro! Zvokadi kamare, kudari mundhu akatama kukama kutuka vamweni anodikana kujingwa mu ungano. (1 VaKorinto 5:11-13; 6:9, 10) Inga zvatavona, kubhuya magama anonyoweja, okunyepa kana anokhugunya zvinokhuvaza ushamwari hwedu na Jehovha pomwe no vamweni.

15. Magama api atingashandisa kuti tidakajise vamweni?

¹⁵ Tingashandisa kudini cipo cokuvereketa ngo njira inodakajisa Jehovha? Ngozvokadi kuti Bhaibheri arinangi kamare kuti ngozvapi zvoticikadikani no zvatinodikana kubhuya. Asi irona rinotivangisa kuti  tibhuye masoko ‘anonakira kuvaka.’ (VaEfeso 4:29) Magama anovaka akacena, akapfava zve ngo okadi. Jehovha anoda kuti tishandise magama edu kuitira kuvangisa no kubesera vamweni. Izvi zvingava cineso, ngokuti zvakareruka kuvereketa magama anokhugunya kupinda kunanga magama anodakajisa. (Tito 2:8) Ngativone njira jimweni jatingadakajisa vamweni ngo magama edu.

16, 17. (a) Ngenyi tinodikana kusimba vamweni? (b) Ndiyani watingasimba?

¹⁶ Jehovha na Jesu vanodakarira kusimba. Itisu tinodikanavo kuvatevejera. (Mateu 3:17; 25:19-23; Johani 1:47) Kusimba vamweni ngo njira inovavangisa zvinobatanija kutanga tarangarira ngo pamusoro pavo zve no kutatija kuti tinovada. Mazwi Akangwara 15:23 inoti: “Mupinguro wauxoni kunaka kwawo!” Tinodakara maningi kudari mundhu akatisimbha zvecivha mu mwoyo kana akatibonga ngo zviro zvese zvataita.—Verenganyi Mateu 7:12; Vonanyi Masoko o Kupejisira n.° 27.

¹⁷ Kudari mukava no cirovejeso co kuvona zviro zvaushoni zvinoithwa ngo vamweni zvinozova zvakareruka kuvasimba. Inga muezaniso, kangaije munovona kuti ari wese mu ungano anonasa kunasirira ushoni hurukuro yake kana anovangisira maningi kuti apekeje mupinguro pa musongano. Umwe mujaha wakagondeka kuna Jehovha ku cikora kana musharuka ari wese ari kuvangisira kuti nguva jese aende mu basa ro kucumaera. Kuvasimba kungava ciro cinosisira maningi co vanoda. Zvinosisirazve maningi mwamuna kuvhunja mukaji wake kuti anomuda zve anobonga maningi ngo zvaanoita. (Mazwi Akangwara 31:10, 28) Kudari inga muti unoda zuva no kumwa, vandhu vanodavo kujizwa vecireremejwa. Izvi zvinoitika maningi no vana. Pese pamunova  no mukana, simbhanyi vana vadoko ngo zvaushoni zvavanoita. Izvo zvingavapa cicunge no gonda ravanoda, kuti vakwanise kuvangisira kuita zvaushoni.

18, 19. Ngenyi tinodikana kuita zvatinokwanisa kuti tivangise no kunyaraja vamweni? Tingazviitisa kudini?

¹⁸ Itusu patinovangisa no kunyaraja vamweni, tinotevejera muezaniso wa Jehovha. Iyena anoda maningi “vakathiva” no vano “mwoyo yakaremba.” (Isaia 57:15) Jehovha anoda kuti itusu tirambe ‘tecivangisana’ no ‘kuvangisa vano mwoyo,’ yakarembejeka. (1 VaTesalònika 5:11, 14) Patinovangisira kuti tiite izvonazvo Jehovha anodakara.

 ¹⁹ Zvingaita kuti muungano yenyu muno mundhu wapera simba kana wakanyangajwa. Mungaitenyi kuti mumubesere? Ngozvokadi kuti amungakwanisi kupeja zvineso zvake, asi mungakhombija kuti munoneseka ndiyena. Inga muezaniso, mungapeja nguva munaye. Mungatoverenga vhesi yo Bhaibheri inovangisa kana kutoita naye mukumbiro. (Nduyo 34:19; Mateu 10:29-31) Jekesanyi kuti hama no hambzaji jiri mu ungano jinovada maningi. (1 VaKorinto 12:12-26; Jakobo 5:14, 15) Bhuyanyi zvinokhombija kuti muri kunanga zvokadi zve munothemba zvamuri kunangaro.—Verenganyi Mazwi Akangwara 12:25.

20, 21. Ngoapi manera akanaka o kupa mbhangiro kana mazano?

 ²⁰ Tinovangisa vamweni patinovapa mazano aushoni. Ngokuti tiri vandhu vacizivi kukwana, nguva no nguva tinoda mazano kana kupangihwa. Mazwi Akangwara 19:20 inoti: “Izwai mupangiro, tenderai kujijiswa, kuti, sure kwa ibzo, uite wakangwara.” Asipi vakuru basi vanodikana kupangira. Vabari vanodikana kupa ndhungamiriro kuno vana vavo. (VaEfeso 6:4) Hambzaji jingapekejana mazano umwe kuno umweni. (Tito 2:3-5) Ngokuti tinoda hama no hambzaji jedu, tinoda kuita zvese zvatinokwanisa kuti tipe mazano acikavaiti kuti vatame kujizwa ushoni. Ngozvapi zvingatibesera?

²¹ Makambopuwa mbhangiro kana mazano akamurerukira kuashira? Zvicinyi zvakaita kuti ave akareruka kuashira? Kangaije ngokuti makavona kuti mundhuwo waimutaja. Kana wakabhuya ngo rudo no kupfava. (VaKolosi 4:6) Zvingaita kuti mundhuwo wakashandisa Bhaibheri kuti ape mazano ondhowo. (2 Timoti 3:16) Pikija ticikanangi vhesi yo mu Bhaibheri, mbhangiro jedu jinodikana kuzwirana no Soko ra Mwari. Atidikani kuvangirija mundhu kuti ave no mavonero ondhowo na itusu, nee kutocinja matahwa kuti azwirane no zvatinoda. Kurangarira ngo manera atinoda kupuwa mbhangiro, zvinotibesera kuziva kupa mbhangiro.

22. Munoda kushandisa kudini cipo cenyu co kuvereketa?

²² Kuvereketa icipo cinovha kuna Mwari. Rudo hwedu kwaari hunodikana kutindundira kuti tinase kushandisa cipo ici. Ceukijanyi kuti magama ano simba ro kukhuvaza no kuvangisa. Ngokudaro, ngatiite zvese zvatinokwanisa kuti tishandise magama edu kuti tivangise vamweni.