1-3. (a) Vandhu vazinji vanovona kudini basa ravo? (b) Ngojapi muvhunjo jaticadavira pa jijo ino?

MU NYIKA yese, vandhu vano bata basa kuti vajikorondhe pomwe no kukorondha mbhuri yavo. Vandhu vazinji avadakariri basa ravo. Vamweni avadakariri kushanda njiku jese. Kudari munojizwavo kudaro, mungaitenyi kuti munase kudakajihwa ngo basa renyu?

² Jehovha wakati: “Kuti mundhu ahe no kumwira, ecidakara ngo kunaka ko muxando wake, ndicona cipuo ca Mwari.” (Mucumaeri 3:13) Jehovha wakatisika no cido co kuda kushanda. Iyena anoda kuti tijizwe ushoni no mabasa atinoita.—Verenganyi Mucumaeri 2:24; 5:18.

³ Waro, zvicinyi zvingatibesera kuti tidakajihwe ngo basa redu? Mushovo wapi wo mabasa anodikana kunyenywa ngo Makristu? Tingaitisa kudini kuti tive pakati no pakati ngo pamusoro po basa redu no kunamata Jehovha? Ngo rapi basa guru ratinodikana kuita?

4, 5. Ngo api mavonero a Jehovha ngo pamusoro po basa?

⁴ Jehovha anoda maningi kushanda. Genesi 1:1 inoti:  “Pakutungamira, Mwari wakarura nyezuru no pasi.” Mwari paakapeja kusika nyika no zvese, iyena wakananga kuti zvese “bzainga bzakanaka.” (Genesi 1:31) Musiki wedu wakadakara ngo zvese zvaainga apera kuita.—1 Timoti 1:11.

⁵ Jehovha aazivi kumbozorora kushanda. Jesu wakati: “Baba wangu vanobata basa njiku jese.” (Johani 5:17) Atizivi mabasa ese ari kuitwa ndi Jehovha. Asi, amweni akona, tinomaziva. Iyena ari kukheta vandhu kuti vazotonge no mwana wake, Jesu Kristu, ku matenga. (2 VaKorinto 5:17) Nguva jese, Jehovha ari kutungamirira no kutaja vandhu. Inga muezaniso, ngo ndava yo kucumaera masoko akanaka, vandhu vazinji vari kujija ngo pamusoro pa Jehovha. Zvondhozvo zviri kuita kuti vave no vetero yo kupona kwenda no kwenda.—Johani 6:44; VaRoma 6:23.

6, 7. Jesu wainga mushandi wo mukhaindinyi?

⁶ Mukuezana na Baba wake, Jesu anodavo maningi kushanda. Acito aviya pasi pano, Jesu wainga “mujijisi wo mabasa.” Wakashanda pamwepo na Mwari pakusika zviro zvese zviri mugore no pasi pano. (Mazwi Akangwara 8:22-31; VaKolosi 1:15-17) Paainga pasi pano, Jesu wakashandazve maningi. Paainga mujaha, iyena wakajija basa ro kuveza, kangaije wakavaka nyumba no zviro zvimweni. Iyena wakashanda maningi ngo simba, zvokuti wakazoguma pakuzivika inga “muvezi.”—Marco 6:3.

⁷ Basa guru raiita Jesu pasi pano, rainga ro kucumaera masoko akanaka no kujijisa vandhu ngo pamusoro pa Jehovha. Iyena wakapeja makore matatu no meya eciita basa rondhoro, waitakatira ecishanda  kuvha mangwanani mbhera usiku. (Luka 21:37, 38; Johani 3:2) Iyena wakafamba mazana o makiromita, muzvitaka zvakazara ngo mabukuta, ecicumaera masoko akanaka ku vandhu vazinji vaaiwana.—Luka 8:1.

8, 9. Tinozvizivisa kudini kuti Jesu waidakarira basa rake?

⁸ Kuna Jesu, kuita basa ra Mwari, zvaidari inga zvokuha. Basa rondhoro raimuvangisa maningi no kumupa simba. Njiku jimweni, Jesu waishanda maningi zvokuti waitokonehwa no nguva yo kuha. (Johani 4:31-38) Iyena wakashandisa mukana jese kuti abesere vamweni kuti vajijire ngo pamusoro pa Babake. Ngokudaro, iyena wakavhunja Jehovha kuti: “Ndakamukoja pasi pano, ndecipeja basa ro makandituma kuriita.”—Johani 17:4.

⁹ Zvakajeka kuti Jehovha na Jesu, vanoshanda maningi ngo simba zve vanodakajihwa maningi ngo basa ravo. Tinoda kuva “vaejaeji va Mwari,” teciteveja “gwanja” ra Jesu. (VaEfeso 5:1; 1 Pedru 2:21) Ngokudaro, tinoshanda maningi, tecieja kuita zvese zvatinokwanisa kuita.

10, 11. Zvicinyi zvingatibesera kuti tive no mavonero akanaka ngo pamusoro po basa redu?

¹⁰ Inga vanamati va Jehovha, tinoshanda maningi kuti tijikorondhe pomwe no kukorondha mbhuri jedu. Tinoda kudakajiwa ngo basa redu. Asi, azvizivi kureruka. Kudari amudakariri basa renyu, zvicinyi zvamunodikana kuita?

¹¹ Ivanyi no mavonero akanaka. Kangaije zvinganesa kucinja basa ratinoita no nguva yatinopeja teciriita. Zvatinokwanisa kuita, i kucinja mavonero atinoriita.  Kuzwisisa zvaanovetera Jehovha kwatiri zvingatibesera maningi. Inga muezaniso, Jehovha anovetera kuti musoro wo mbhuri aite zvese zvaanokwanisa kuti akorondhe mbhuri yake. Zvokadi, Bhaibheri rinonanga kuti mundhu acikakorondhi mbhuri yake “wakaxata mwoyo kupinda vacikatendi.” (1 Timoti 5:8) Kudari muri musoro wo mbhuri, muri kushanda maningi kuti musapote mbhuri yenyu. Kangaije amudakariri basa renyu. Asi zivanyi kuti pamunonga mecikorondha mbhuri yenyu, munongavo mecidakajisa Jehovha.

12. Ngenyi zvinosisira kushanda ngo simba pomwe no kuva makagondeka?

¹² Shandanyi ngo simba zve ivanyi makagondeka. Kudari mukaita izvi, zvinozova zvakareruka kuti mudakarire basa renyu. (Mazwi Akangwara 12:24; 22:29) Majipatarawe anodakarira maningi vashandi vakagondeka ngokuti vandhu vakadaro, avabi mare, nguva pomwe no zviro zvimweni. Mukaita kudaro, patarawe wenyu anozomugonda. (VaEfeso 4:28) Cinosisira maningi, i kuziva kuti Jehovha anovona pamunonga mecishanda ngo simba no kuva makagondeka. Imwimwi mungava ‘vakacena mwoyo’ ngokuziva kuti muri kudakajisa Mwari.—Vaheberi 13:18; VaKolosi 3:22-24.

13. Zvicinyi zvinoitikazve kudari mukava makagondeka pa basa?

¹³ Ceujanyi kuti zvamunoita pa basa renyu, zvingadakajisa Jehovha. Iri i thangwe rimweni rinotiita kuti tive no mudakaro pa basa. (Tito 2:9, 10) Muezaniso wenyu ungaita kuti wamunoshanda naye, adakarire kujija Bhaibheri.—Verenganyi Mazwi Akangwara 27:11; 1 Pedru 2:12.

14-16. Ngozvapi zvatinodikana kubhasopa patinokheta basa rokushanda?

¹⁴ Mu Bhaibheri amuna rista yo mabasa anotendehwa no acikatendehwi kuti Makristu aite. Asi, irona rinotipa ndhungamiriro jingatibesera kuti tisane mabasa aushoni. (Mazwi Akangwara 2:6) Tecishandisa ndhungamiriro jo Bhaibheri, ngatirangarire ngo pamusoro po muvhunjo jinotevera.

¹⁵ Pa basa iri, ndinozoita zviro zvokuti Jehovha anozvivona kuti zvakashata here? Tapeja kujija zviro  zvinganani zvinonenywa ndi Jehovha zvakadari inga kuba no kunyepa. (Exodo 20:4; Maitiro o Vapostori 15:29; VaEfeso 4:28; Apokalipsi 21:8) Tinodikana kubhasopa kuti titame kutendera basa rinohwisana no zvinoda Jehovha.—Verenganyi 1 Johani 5:3.

¹⁶ Basa iri rinobesera zviro zvinonyenywa ndi Jehovha? Inga muezaniso, rangariranyi kuti mawana basa ro kutengesa kana kuthwara foha. Azvizivi kushata kuita basa ro kuthwara zviro kana kutengesa. Asi tinozviziva zvinorangarira Jehovha ngo pamusoro po zviro zvinosvipisa. I zvokadi kuti kuthwara kana kutengesa foha, zvakasiana no kuibhema kana kuishandisa. Asi kutengesa kana kuthwara foha asipi kubesera zviro zvinonyenywa ndi Jehovha here?—2 VaKorinto 7:1.

17. Zvicinyi zvingatibesera kuti titeme zvivaringo zvinodakajisa Mwari?

¹⁷ Kudari tikanasa kushandisa mazano o Bhaibheri, tinova inga vandhu vanonangwa pana Vaheberi 5:14, ‘vakaroveja kuziva no kukheta bzauxoni nokuti bzakaxata. Bzokuha bzakavanga bzinohiwa ngo madoda, akaroveja kuziva no kukheta bzauxoni nokuti bzakaxata.’ (Vaheberi 5:14) Jivhunjisenyi kudari: ‘Kudari ndikatendera basa iri, kureva kuti rinozorembesa rutendo wo vamweni here? Kureva kuti basa iri, rinozoita kuti ndiende koshandira ku nyika imweni ndecisiya mbhuri yangu here? Ndikaenda, mbhuri yangu inozosara yakadini?’

18. Ngenyi zvinganesa kudira zvokunamata pa ndau yokutanga?

¹⁸ Nyamasi uno, azvizivi kureruka kudira Jehovha pa ndau yokutanga ngokuti tiri kupona mu “njiku jokupejisira”  pa “mukuvo wokunesa.” (2 Timoti 3:1) Zvinonesa maningi kuwana basa no kushandepo makore akawanda. Izvokadi kuti tinoda kusapota mbhuri yedu. Asi kunamata Jehovha, kunodikana kuva pakutanga. Atidikani kusiya kuti zviro zvokunyama zvive zvinosisira maningi. (1 Timoti 6:9, 10) Tingaitisa kudini kuti tipsake ‘zviro zvakapinda kunaka,’ panguva yondhoyo tosapotazve mbhuri yedu?—VaFilipi 1:10.

19. Kuitisa kudini kuthembha Jehovha kunotibesera kuti titame kukaya-kaya maningi ngo basa?

¹⁹ Gondanyi Jehovha ngo mwoyo wese. (Verenganyi Mazwi Akangwara 3:5, 6.) Tinozviziva kuti Mwari anonasa kuziva zvatinoda zve anotitaja. (Nduyo 37:25; 1 Pedru 5:7) Bhaibheri rinoti: “Mucatenda kukweviwa mecidisisa upfumi. Dakaranyi ngo bzo munabzo, ngokuti Mwari wakatigondesa kuti: ‘Andicakuregeri wega nokuti kukusia.’”(Vaheberi 13:5) Jehovha aadi kuti tigare tecithya ngo ndava yokukorondha mbhuri yedu. Nguva no nguva, iyena anotatija kuti anotaja vandhu vake. (Mateu 6:25-32) Azvinenyi no mugariro wo basa redu, tinoda kuenderera mberi tecijija Bhaibheri, kucumaera no kwenda kumusongano.—Mateu 24:14; Vaheberi 10:24, 25.

20. Tingaitisa kudini kuti tipungure zvatinazvo mu upenyu?

²⁰ Rambanyi muno mavonero akanaka. (Verenganyi Mateu 6:22, 23.) Izvi zvinoreva kutama kuva no zviro zvizinji kuti tibatikane ngo kushandira Jehovha. Tinozviziva kuti azvibesi ciro kutendera kuti mare, kukhupuka no kuva no zviro zvavha kubuda wari, zvive zvinosisira maningi kupinda ushamwari hwedu na Mwari. Waro zvicinyi zvinozotibesejera kuti tidire zviro zvinosisira maningi pa ndau yokutanga? Vangisiranyi  kuti mutame kuva no magava. Kudari muno magava, itanyi zvese kuti mumapungure kana kutomapagari ese kamare. Kusiyapo kuneseka ngo zviro zvo kunyama, zviri nane kudakara ngo zvatinazvo, zvakadari inga “bzokuha no bzokusimira.” (1 Timoti 6:8) Cimwenizve, nguva jimweni zvaushoni kuvona mugariro wenyu kuti muite zvizinji mukushandira Jehovha.

21. Ngenyi tinodikana kungwarira pakushandisa nguva yedu?

²¹ Diranyi zviro zvinosisira pandau yokutanga. Tinodikana kungwarira patinoshandisa nguva yedu, simba  pomwe no zviro zvokunyama. Ngenyi? Tikatama kungwarira, zviro zvicikasisiri maningi, zvakadari inga jijo kana mare, zvingazotitorera nguva yedu. Jesu wakati: “Ambanyi kupsanga Umambo.” (Mateu 6:33) Zvatinokheta kuita, zvirovejeso zvedu, mabasa edu o njiku no njiku no zvido zvedu, zvinovonesa kuti ngozvapi zvatinodira pakutanga mu mwoyo.

22, 23. (a) Ngorapi basa guru ratingaita? (b) Zvicinyi zvinozotibesera kuti tidakare ngo basa redu?

²² Basa rinosisira maningi ratingaita, i kushandira Jehovha no kucumaera masoko akanaka. (Mateu 24:14; 28:19, 20) Kudari inga Jesu, tinoda kuita zvese zvatinokwanisa mu basa iri. Vamweni vakathuta kuti vaende kunodiwa maningi vacumaeri. Vamweni vari kujijira ndumi imbza kuti vacumaere vandhu vo ndumi yondhoyo. Bhuyanyi no vandhu vakamboita izvi. Ivona vacazomuverengera kuti vakawanisa kudini mudakaro pomwe no cinangwa mu upenyu.—Verenganyi Mazwi Akangwara 10:22.

²³ Nyamasi uno, vandhu vazinji vanodikana kushanda nguva jakawanda kana kutova no mabasa akawanda kuti vakorondhe mbhuri javo. Jehovha anovona simba ramunoita zve anodakara ngo kumuvona mecikorondha mbhuri yenyu. Ngo kudaro, azvinenyi kuti basa renyu ngorapi, endereranyi mberi mecitevejera Jehovha na Jesu ngo kushanda ngo simba. Ceujanyi kuti basa guru rinosisira maningi, ngo rokushandira Jehovha pomwe no kucumaera masoko akanaka o Umambo hwa Mwari. Izvi, ndizvona zvinoviisa mudakaro wokadi.