1, 2. Jehovha anozwa kudini paanotivona tecishanda ngo simba kuti tive takagondeka?

NJIKU imweni, cimujaha cimweni pacainga cecivha ku cikora, cakaboja cikhwama caizara ngo mare. Ngozvapi zvacaizoita? Kangaije iyena waizocitora wociviga. Asi kunja kwaizvo, iyena wakahwirija cikhwameco kumunewaco. Mai vo cimujaha ici povakazvizwa, vakadakara maningi ngozvaaingaro aita.

² Vabari vazinji vanodakara maningi vana vavo pavanovangisira kuti vave vakagondeka. Baba vedu vo kudenga, Jehovha, ndi “Mwari wokadikadi” zve iyena anodakara patinova takagondeka. (Nduyo 31:6) Tinoda kudakajisa Jehovha pomwe no ‘kugara takagondeka pa zvese.’ (Vaheberi 13:18 BMAA) Ngativone mativi marongomuna o upenyu anokhombija kuti kuva takagondeka azvizivi kureruka. Perapo tinoda kuvonazve kuti makomborero api anowanika ngo kuva takagondeka.

3-5. (a) Tingagumisa kudini pakujicengeja? (b) Zvicinyi zvinozotibesera kuti tive takagondeka pacedu?

³ Kuti tive takagondeka kuno vamweni, cokutanga  tinodikana kuva takagondeka pacedu. Izvi azvizivi kureruka. Munguva jo Makristu okutanga, hama jo ku ungano yo Raodisea vaijicengeja pacavo vecirangarira kuti vainga vecidakajisa Mwari, kuveni vainga vacikamudakajisi. (Apokalipsi 3:17) Itisu tingagumavo pakujicengeja ngo pamusoro po zvatiri kamare.

⁴ Mujiji Jakobo wakatara kudari: “Ndiani anoti anotenda Mwari, kaveta aabati rurimi hwake, anojicengeja kamare. Rutendo hwake hwabiresi.” (Jakobo 1:26) Vamweni vanorangarira kuti: ‘Azvizivi kushata kuva no hasha, makiriyado pomwe no kunyepa. Mwari aana ndava no zvandinoita, pikija zvakanaka.’ Kudari tinomurangariro uwu, tiri kujicengeja. Zvicinyi zvingatibesera kuti titame kurangarira izvi?

⁵ Kudari tikasota pa supeya, tinokwanisa kuvona zvatiri ngo kunja. Kudari tikaverenga Bhaibheri, tinokwanisa kuvona kuti takadini ngo mukati. Bhabheri rinotibesera kuziva mugariro wedu kuti ngo papi patakavangira no patakarembera. Irona rinotijijisa kuti ngo zvapi zvatinodikana kuitisa nane ngo pamusoro po marangaririre, mabhuire no zviito. (Verenganyi Jakobo 1:23-25.) Asi kudari tikagara tecirangarira kuti atina no pari pese pakaposeka, atizoiti cinjo iri yese. Ngo kudaro, tinodikana kushandisa Bhaibheri kuti tivone zvatiri kamare. (Macumbiro 3:40; Hagayo 1:5) Kuita mukumbiro kunotibeserazve kuvona zvatiri kamare. Tingakumbira Jehovha kuti atibesere kuvona kuti ngo papi patinodikana kuitisa nane. (Nduyo 139:23, 24) Ceukijanyi kuti “Tenji Mwari anonyangajihwa ngo wakaxata mwoyo, anoda ngo mwoyo wese varurami.”—Mazwi Akangwara 3:32.

6. Ngenyi mukaji no mwamuna vanodikana kugondana ngo cavo?

⁶ Kugondeka pa mbhuri kunosisira maningi. Kudari mukaji no mwamuna vakava vakasujunuka ku umwe no umweni, ivona vanozwa vakangwaririka no kugondana ngo cavo. Kutama kugondeka pa mucadho kungaizwa ngo njira jakawanda. Inga muezaniso, mundhu wakacadha angatanga kudakarira kana kuvona zvoumitu-mitu, kuvhunjirira mundhu umweni kana kutanga kuda mundhu umweni ngo cifise-fise. Mutari wo nduyo wakati: “Andigari pasi pamwepo no vanyepi, andifambi no vacengeji.” (Nduyo 26:4) Kudari mukatama kuva  makagondeka kuno womakarovorana naye pikija mu murangariro, munozophwanya mucadho wenyu.

7, 8. Mungashandisisa kudini Bhaibheri kuti mujijise vana venyu kuti kugondeka kunosisira maningi?

⁷ Vana vanodikanavo kujijira kuti kuva wakagondeka kunosisira maningi. Vabari vangashandisa Bhaibheri kuti vajijise vana kuti vave vakagondeka. Irona rinosangura muezaniso jo vandhu vacizivi kuva vakagondeka: Akani, wakava mbavha; Gehazi, wakanyepa kuti awane mare; Judha, waiba mare zve pakupejisira wakatengesa Jesu ngo makumatatu o macereni o sirivha.—Joxwa 6:17-19; 7:11-25; 2 Majimambo 5:14-16, 20-27; Mateu 26:14, 15; Johani 12:6.

⁸ Bhaibheri rinobhuyazve muezaniso jakawanda jakanaka jo vandhu vakagondeka: Jakobe, wakavhunja vana vake kuti vahwirije mare yavainga vawana; Jefita no mwana wake wokaji, vakakwanirisa zvavainga vakagondesa Mwari; zve Jesu, wakagondeka pikija pa mugariro wainga wecinesa. (Genesi 43:12; Vatongi 11:30-40; Johani 18:3-11) Muezaniso iji jinobesera vana kuti vanase kuzwisisa kusisira ko kuva wakagondeka.

9. Kuitisa kudini muezaniso wo vabari ungabesera vana kuti vave vakagondeka?

⁹ Vabari vangajija zviro zvinosisira maningi kuvha pa vhesi iyi: “Unoitisa kudini kujijisa vamweni, wotama kujijijisa wega? Iwewe, unojijisa kuti akudikani kuba, unoba!” (VaRoma 2:21) Vabari pavanonanga ciro perapo voita zvimweni, vana vanozviziva. Kudari vabari vakavhunja vana kuti vanodikana kugondeka asi ivona vacikagaji muezaniso wokugondeka, vana vanozogara vacikazivi zvokuita. Vana vakaziva kuti vabari vanonyepa, pikija pa zviro zvidoko, kangaije ivona vangaitavo zvondhozvo.  (Verenganyi Luka 16:10.) Ngo divi rimweni, vana vakavona kuti vabari vavo vakagondeka, kangaije ivona vangavavo vakagondeka pavanokura zve pavanozovavo no vana vavo.—Mazwi Akangwara 22:6; VaEfeso 6:4.

10. Ngenyi tinodikana kungwarira zvatinobhuya njiku ngo njiku?

¹⁰ Tinodikana kugondeka kuno hama jedu jo mu ungano. Zvakareruka kuti mabhuyo edu o njiku no njiku, acinje kuita magumbu kana magumba, kana kuguma pakutoreva. Kudari tikandobhuya masoko aticikazivi kuti ngo okadi, tinoguma pakundhandhanisa manyepo. Zvinosisira maningi ‘kungwarira muromo’ wedu. (Mazwi Akangwara 10:19) Kuva takagondeka azvirevi kuti tinodikana kubhuya zvese zvatinorangarira, zvatinoziva kana zvatinozwa. Pikija zvatinoda kubhuya zviri zvokadi, zvakanaka kuzvivhunjisa kuti: Zvandinodari kubhuya zvinotatija rudo here? Zvinondibesa here? Ndinodikana kuzvinangadi kamare here? (1 VaTesalònika 4:11) Vandhu vamweni vanobhuya ngo hasha perapo vojiinikira veciti: “Ndiri kukuvhunja basi zvokadi.” Tiri vashandiri va Jehovha. Ngo kudaro magama edu mukuvo wese anodikana kuva akanaka zve akapfava. —Verenganyi VaKolosi 4:6.

11, 12. (a) Kuitisa kudini mundhu washaisha angaengejera shwiro kudari akatama kugondeka? (b) Kudari tikaziva kuti shamwari yedu yaita cishaishi cakakura, zvicinyi zvaticikadini kurangarira? (c) Ngo japi njira jimweni jatingakhombija ndijona kuti takagondeka ku sangano ra Jehovha?

¹¹ Jehovha wakapa vakuru basa rokubesera ungano. Zvinozorerukira vakuru kuti vatibesere kudari tikava vakagondeka kwavari. Ngenyi? Kudari mecihwaja perapo  moenda ka medhiko kuti amubesere, maizoregera kumuvhunja zvimweni zvamuri kuzwa here? Mukaita izvi, iyena waizomubeseresa kudini? Ngo njira jakafanana, kudari tikaita cishaishi cakakura, atidikani kuciviga. Tinodikana kupsaka vakuru zve tovavhunja zvese zvakaitika. (Nduyo 12:3; Maitiro o Vapostori 5:1-11) Zvakadini mukaziva kuti shamwari yenyu yaita cishaishi cakakura? (VaLevi 5:1) Kunanga kuti maizorangarira kuti: ‘Shamwari yokadi, aitengesi mudoni’? Kana maizorangarira kuti vakuru vangabesera shamwari yenyu kuti ivangisezve ushamwari hwayo na Jehovha?—Vaheberi 13:17; Jakobo 5:14, 15.

¹² Tinodikanazve kugondeka ku sangano ra Jehovha patinoviisa ripoti jedu jo basa rokucumaera pomwe no ripoti jimweni jo umwari. Kunja kwa izvi, tinogondekazve patinotara petisao kuitira upiyona pomwe no petisao jimweni.—Verenganyi Mazwi Akangwara 6:16-19.

13. Tingaitisa kudini kuti tive takagondeka patinoita nyagoso no hama?

¹³ Inga Makristu, atidikani kubatanija zvonyagoso no zvokunamata kwedu. Inga muezaniso, atidikani kuita nyagoso mu Nyumba yo Umambo kana mu basa rokucumaera. Ngo pamusoro po nyagoso, atidikani kutakira musaku hama jedu. Kudari muno hama iri kumushandira, munodikana kuipoceresa mukuzwirana no mutengo no njiku yomakapanganaro kamare no kuipekeja zvese zvinotendehwa ngo mutemo. Izvi zvingabatanija kuitaja kudari ikahwaja kana kuipa njiku jokuzorora. (1 Timoti 5:18; Jakobo 5:1-4) Kudari tecishandira hama, atidikani kuvetera kutajwa ngo njira jakasiyana no vamweni. (VaEfeso 6:5-8) Munodikana kubatisisa  nguva yomakapangana no kuita basa romakavhunjwa kuti mupocehwe.—2 VaTesalònika 3:10.

14. Makristu anodikana kuitenyi paanoita nyagoso no hama?

¹⁴ Zvicinyi zvatinodikana kuita kudari teciita nyagoso no hama? Kangaije izvi zvinobatanija kushandisa mare kana kufiyarisi. Pano ndhungamiriro yo muBhaibheri inobesera maningi pa shwiro jakadari inga iji: Zvese itanyi ngo kuzvitara! Muporofita Jeremiya paakatenga ndau, iyena wakatara tsamba mbiri jo citenderano, okumbira zvapupu kuti zvisaine tsamba iji perapo oviga jese jo mbiri. (Jeremia 32:9-12; vonanyizve Genesi 23:16-20) Vamweni vanorangarira kuti kudari mukaita citenderano cokutarirana tsamba, zvinovoneka inga kuti amuthembi hama. Asi andizvopi, kutarirana tsamba kungajivirira pakutama kuzwana kunozovepo, kunesana kana kutukana. Patinonga teciita nyagoso, tinodikana kuceukija kuti runyararo mu ungano unosisira maningi kupinda nyagoso iri yese.—1 VaKorinto 6:1-8; Vonanyi Masoko o Kupejisira n.° 30.

15. Jehovha anorangarira kudini ngo pamusoro po kutama kugondeka mu zvonyagoso?

¹⁵ Tinodikana kuva takagondeka ku zvese, kubatanijavo no vaya vacikaripi zvapupu zva Jehovha. Kuna Jehovha, zvinosisira maningi kuva takagondeka. “Mipimo yokucengeja inonyangajisa Tenji Mwari; asi mipimo yokadi inomudakajisa.” (Mazwi Akangwara 11:1; 20:10, 23) Munguva jo kare, vaishandisa maningi mupimo pakuita nyagoso. Asi vatengesi vamweni vaibira vatengi, veciita kuti mutengi apagari mare yakawanda owana zvishoma kana kumudhurusira maningi kuveni  ivona vatenga ngo mare shoma. Kudari inga munguva jo kare, nyamasi uno kutama kugondeka mu zvonyagoso kwakazara kwese-kwese. Asi Jehovha aazivi kucinja, iyena aciri kunyenya kutama kugondeka.

16, 17. Mugariro japi jingaeja kugondeka kwedu?

¹⁶ Tese tinosongana no mugariro unoeja kugondeka kwedu—patinonasirira madhukumento okupsanga basa, patinotara mafomu kana ma formulário o utongi zve patinoita porovha ku cikora. Vazinji vanorangarira kuti azvizivi kushata kunyepa, kuengejera zviro kana kudavira zvokucengejera. Izvi azvitikahamaji. Bhaibheri rakananga kuti mu njiku jo kupejisira ‘vandhu vaizozvida, vaizodisisa upfumi . . . vecishora zvakanaka.’—2 Timoti 3:1-5.

¹⁷ Nguva jimweni zvinovoneka inga kuti vandhu vacizivi kugondeka vari kunasa kubudirira. (Nduyo 73:1-8) Ngo kuva akagondeka, Mukristu angaguma pakuruza mare, kushaisha kutajwa pa basa kana kutoruza basa. Pikija zvakadaro zvinosisira kuva takagondeka. Ngenyi?

18. Ngenyi zvakanaka kuzivika inga mundhu wakagondeka?

¹⁸ Kuzivika inga mundhu wakagondeka no anothembeka, izviro zvino mutengo wakakura maningi zve vandhu vakadaro avanyanyi kuwanika mazuva ano. Asi zvinokwanisika kuzivika inga vandhu vakagondeka. (MIKEYA 7:2) Ngozvokadi kuti vamweni vanozomuseka vecinanga kuti muri rethe rokupejisira. Asi vamweni vanozodakarira kugondeka kwenyu zve vanozomuthemba. Kutenderera nyika yese, Zvapupu zva Jehovha zvinozivika ngo kuva zvakagondeka. Ma empereza amweni anovona zviri nane kupsaka Zvapupu zva Jehovha ngokuti  anoziva kuti zvinozova zvakagondeka. Vamweni vanovhiswa pa basa ngo ndava yokutama kugondeka, asi Zvapupu zva Jehovha zvinoenderera mberi zvecishanda.

19. Jehovha anozwa kudini patinova takagondeka mu zvese?

¹⁹ Kuva takagondeka mu zvese, zvinozotisiya tino hana yakanaka no runyararo. Ngatiite inga Pauro, uwo wakatara kuti: ‘Tinoziva kuti tino mwoyo icina ndava.’ (Vaheberi 13:18 BMAA) Zvinosisira maningi ngo zvokuti, Baba vedu vano rudo, Jehovha, vanozozvivona zve vozodakara ngo kuva kwedu takagondeka mu zvese.—Verenganyi Nduyo 15:1, 2; Mazwi Akangwara 22:1.