1, 2. (a) Zvicinyi zvinovetehwa ngo vandhu vavha kucadha? (b) Ngojapi muvhunjo jinozodavihwa pa cipauko ici?

AMBORANGARIRANYI mujaha no musikane vovaviri vari pa njiku yo mucadho wavo. Ivona vakadakara maningi ngo kumbeji kwavo zve ngo kuda kugara vese. Vovari vano zviro zvizinji zvovari kurangarira kuita zve vanovetera kuti mucadho wavo uve unodakajisa zve ugare no kucingaperi.

² Mucadho jakawanda jinotanga ushoni, asi ajirambi jakadaro. Kuti mucadho ugare no kucingaperi zve uve unodakajisa, varovorani vanoda ndhungamiriro jinovha ka Mwari. Waro ngativone mupinguro jo Bhaibheri ngo pamusoro po muvhunjo iji: Ngoapi makomborero o mucadho? Kudari munoda kurovora no kurovohwa, mungakhetesa kudini ushoni mundhu wo kucadha naye? Mungaitenyi kuti muve mwamuna kana mukaji waushoni? Zvicinyi zvingabesera kuti mucadho ugare no kucingaperi?—Verenganyi Mazwi Akangwara 3:5, 6.

3. Kureva kuti mundhu anodikana kucadha kuti adakare here? Sananguranyi.

³ Vamweni vanorangarira kuti mundhu angava akadakara  kudari akacadha. Asi izvi andizvopi. Jesu wakananga kuti kutama kucadha icipo. (Mateu 19:11, 12) Asi mupostori Pauro wakananga kuti kutama kucadha zvinoviisavo makomborero. (1 VaKorinto 7:32-38) Mucatendera kuti shamwari jenyu, ukama pomwe no zvirovejeso zvo mundharaundha zvimundundire kuti murovore kana kurovohwa. Munodikana kukheta mwega.

4. Ngoapi makomborero o mucadho wakanaka?

⁴ Bhaibheri rinonanga kuti mucadho i cipo cinovha kuna Mwari zve uno makomborerovo awo. Jehovha wakananga kudari ngo pamusoro pa Adhamu: “Abzidiki kuti mundhu agare ega. Ndinomuitira mubeseri wakaezana naye.” (Genesi 2:18) Jehovha paakasika Evha kuti aite mukaji wa Adhamu, ivona vakava mbhuri yokutanga. Ngo kudaro kudari varovorani vakava no vana, mucadho wavo ungabesera vana kuti vakure vakadakara. Asi kuva no vana andicopi cega cinangwa co mucadho.—Nduyo 127:3; VaEfeso 6:1-4.

5, 6. Mucadho ungaitisa kudini inga “bote rakapetwa rutatu”?

⁵ Mambo Soromona wakatara kuti: “Vari nane vaviri, kupinda umwe, ngokuti vanozowana mupocero wo basa ravo. Ngokuti, vakawa, umwe anomusa umweni. Asi bzinozodini, umweni akawa, acina mudoni kuti amumuse? . . . Bote rakapetwa rutatu arikasi kudajuka.”—Mucumaeri 4:9-12.

⁶ Mucadho waushoni i kubatana ko vandhu vaviri vari shamwari jokadi zve vanobesana no kuembejerana umwe no umweni. Icokwadi kuti rudo ungaita kuti mucadho uvange. Asi mucadho unovanga maningi kudari vo vaviri vakabatana pa kunamata Jehovha. Pondhopo mucadho unozova inga “bote rakapetwa rutatu,” kana bote rakanasa kupombehwa pondhopo. Bote rakadaro  ngo raushoni maningi kupinda mapote maviri. Kudari Jehovha akaita divi ro mucadho uwo, iwona unovanga.

7, 8. Ngoyapi ngwajo yakapa Pauro ngo pamusoro po mucadho?

⁷ Pakupera kucadha mwamuna no mukaji vangagutisa zvido zvavo zvo kuita ruvatano. (Mazwi Akangwara 5:18) Asi kudari mundhu akacadha ngo kuda kuita ruvatano basi, angaguma pakutama kukheta ushoni. Ndizvona zvakaita kuti Pauro anange kuti mundhuwo anodikana kucadha basi akapindirija mukuvo wo ‘kuaruka.’ (1 VaKorinto 7:36, Shanduro yeNyika Itsva) Zviri nane kuvetera kuti zvido zvokuda kuita vatano, zvipunguke kuti muzocadhe. Ngokudaro mundhu anozokwanisa kurangarira ushoni zve anozokheta ushoni.—1 VaKorinto 7:9; Jakobo 1:15.

⁸ Kudari muri kurangarira kucadha, zvaushoni kuziva kuti mucadho wese unozvineso zvawo. Pauro wakananga kuti vaya vanocadha “vanozowana nyatwa yo muviri.” (1 VaKorinto 7:28) Pikija mucadho waushoni maningi, uno zvineso zvawo. Kudari mukada kucadha kamare, sananyi ushoni wamunoda kurovorana naye.

9, 10. Ngozvapi zvaizoitika kudari tikacadha no mundhu acikanamati Jehovha?

⁹ Mucito makheta mwamuna kana mukaji, zvinosisira maningi kuceukija ndhungamiriro iyi yo mu Bhaibheri: “Mucabatana no vacikatendi, pa kanga yondhoyo.” (2 VaKorinto 6:14) Kanga rainga riri ndimbu ro zimbuti raidihwa mumusipa mo zvinyama zviviri kuti zviite basa ro kurima maminda. Kudari zvinyama zvo zviviri zvino simba rakasiyana kana zvakasiyana mu kukura, azvicaizodihwa  pa kanga yondhoyo kuti zvishande mu maminda. Izvo azvicaizobesera zvinyama zvese zvo zviviri ngokuti zvaizotambujika. Ngo maitiro ondhowo, mucadho wo mundhu anonamata Jehovha no umweni acikanamati, ungaviisa zvineso zvakakura maningi. Ngo iyo ndava, Bhaibheri rinopa mazano o kucadha “mwa Tenji” basi.—1 VaKorinto 7:39.

¹⁰ Nguva jimweni, Makristu amweni anorangarira kuti zvaizova zvaushoni kucadha no mundhu acikanamati Jehovha kuciripi kugara vega. Asi kutama kuita zvinonanga Bhaibheri, zvinoita kuti mundhu asuruvare no kuhwajihwa. Inga vanamati va Jehovha, kumushandira iciro cinosisira maningi mu upenyu hwedu. Maizojizwa kudini kudari mukatama kukovana no mwamuna wenyu kana mukaji pa ciro cinosisira maningi mu upenyu hwenyu? Kusiyapo kurovora kana kurovohwa ngo mundhu acikadi Jehovha, vazinji vakakheta kutama kucadha.—Verenganyi Nduyo 32:8.

11. Mungakhetesa kudini mwamuna kana mukaji waushoni?

¹¹ Asi azvirevi kuti ariwese anoshandira Jehovha anozova mwamuna kana mukaji waushoni kwamuri. Kudari muri kurangarira kucadha, psakanyi wiya anomufanera zve wamunonasa kuda. Imiranyi mbhera kuwana mundhu waushoni, ano zvido zvakatojana no zvenyu mu upenyu zve anodira pakutanga zviro zvo kunamata. Wananyi mukuvo wo kuverenga no kurangarijisisa ngo mazano anobhuya ngo pamusoro po mucadho, anopuwa ngo muranda wakagondeka.—Verenganyi Nduyo 119:105.

12. Ngozvapi zvatingajija pa muezaniso wa Abhirahama paakasanira mukaji Izaki?

¹² Mundharaundha jimweni, kuno zvirovejeso  zvokuti vabari vanosanira mwana wavo waanodikana kurovorana nae. Mu mugariro jakadaro, vandhu vanorangarira kuti vabari vanoziva zviro zvaushoni kuno vana vavo. Zvirovejeso zvakadaro zvaiitwavo mu nguva jo Bhaibheri. Kudari mbhuri yenyu ikada kuteverera zvirovejeso izvi, Bhaibheri ringabesera kuti vazive, kuti mundhu wo mushovonyi wo vangakheta. Inga muezaniso, Abhirahama paakasanira Izaki mukaji, ciro caisisira maningi caipsakwa ndiyena akucaigepi kugarika kana kuva wakajija maningi, musikanewo waidikana kuda Jehovha basi.—Genesi 24:3, 67; Vonanyi Masoko o Kupejisira n.° 25.

13-15. (a) Mwanarume anganasirira kudini kuti ave mwamuna waushoni? (b) Mwanakaji anganasiririsa kudini kuti ave mukaji waushoni?

¹³ Muri kurangarira kurovora kana kurovohwa here? Ngo kudaro zvaizova zvaushoni kujivhunjisa kuti: ‘Ndakanasiririka here?’ Kangaije mungazvivona makanasiririka, asi ngativone kuti zvinorevenyi kamare kuva wakanasiririka kuti ucadhe. Mupinguro wakona ungamushamaisa.

¹⁴ Bhaibheri rinotatija kuti mwamuna no mukaji vano mutoro jakasiana pa mbhuri. Ngo kudaro kuva wakanasiririka kuti ucadhe zvinofira ku mwanarume no mwanakaji ave akanasiririka kuti akwanirise mutoro jake. Kudari mwanarume ari kurangarira kucadha, anodikana kujivhunjisa kuti wakanasiririka kuti ave musoro wo mbhuri. Jehovha anovetera kuti mwamuna ataje mazwiro o mukaji wake no zvinodiwa zvo vana vake. Zviro zvinosisira maningi, mwamuna anodikana kutungamirira mbhuri yake pa zvokunamata. Bhaibheri rinosanangura kuti mwanarume acikakorondhi mbhuri yake “wakaxata mwoyo kupinda vacikatendi.” (1 Timoti 5:8) Kudari uri mwanarume zve uri kurangarira kurovora kana kucadha, vonai kuti ndhungamiriro iyi yo mu Bhaibheri ingashandisa kudini: “Ukada kuvaka nyumba yako, ambai kubata basa kunja, tungamirai kunasirira munda wako.” Ngo magama amweni ucito wacadha, ivai no gwinyiso ro kuti unozova mwamuna waushoni inga zvinoda Jehovha.—Mazwi Akangwara 24:27.

¹⁵ Mwanakaji ari kurangarira kurovohwa anodikana  kujivhunjisa kuti wakanasiririka kuti akwanirise mutoro jinoitwa ngo mukaji kangaije no kuva mai. Bhaibheri rinobhuya ngo zviro zvimweni zvaushoni zvinoitwa ngo mukaji waushoni kuti ataje mwamunake no vana. (Mazwi Akangwara 31:10-31) Nyamasi uno, vanarume no vanakaji vakawanda vanorangarira maningi zvavanoda kuitihwa ngo umweni. Asi Jehovha anoda kuti tirangarire kuti zvicinyi zvatingaitira mukaji wedu kana mwamuna wedu.

16, 17. Kudari muri kurangarira kucadha, munodikana kurangarirenyi?

¹⁶ Ucito wacadha, rangariranyi ngo zvinonanga Jehovha ngo pamusoro po vakaji no mwajimwamuna. Kuva musoro wo mbhuri azvirevi kuti mwanarume anodikana kutuka kana kutaka vo pa mbhuri. Musoro wo mbhuri waushoni, anodikana kutevejera Jesu. (VaEfeso 5:23) Mukaji, anodikana kurangarira kuti zvinoda kurevenyi kubesera zvinosungwa ngo mwamuna no kumuzwira. (VaRoma 7:2) Anodikana kuzvivhunjisa kuti anozova wakadakara ngo kuzwira mundhu acizivi kukwana. Kudari mazano aya acikamudakajiri, zviri nane omboima kunja ko kunghwinira mu mucadho.

¹⁷ Vakacadha vanodikana kubatikana maningi kuti vadakajise mudoni wavo, kuciripi kuzvidakajisa. (VaFilipi 2:4.) Pauro wakatara kuti: “Ndibzo ariwese wenyu ngaadisise mukaji wake, inga madisiro aanojiita ega, mwanakaji ngaapurukirevo mwamuna wake.” (VaEfeso 5:21-33) Vese mwanakaji no mwanarume vanodikana kujizwa vecidiwa no kureremejwa. Asi kuti mucadho ubudirire, mwanarume anodikana kujizwa kuti mukaji wake anomureremeja, mwanakaji anodikana kujizwavo kuti anodiwa ngo mwamunake.

18. Ngenyi vanoda kurovorana vanodikana kubasopa pavanonga vecinamorari?

 ¹⁸ Mukuvo wo kunamorari unodikana kuva mukuvo unodakajisa kuti vanoda kurovorana vanase kuzivana. I mukuvozve wokuti vovaviri, vanodikana kutema zvivaringo zvo kuti vanodadi kamare kugara vese no kucingaperi. Pa mukuvo wo kunamorari, vovaviri vanojijira kubhuisana umwe no umweni zve vecieja kuziva kuti umweni ngwaushoni kamare kana kuti haiwa. Namoro yavo painonga yecivanga, ngo zvocibarihwe umwe wojizwa ecikwevejehwa ku umweni. Asi ivona vanodikana kuzvibata  kuti vatame kuita zvakashata. Rudo wokadi unozobesera vanodaro kurovorana kuti vajibate zve unozobeserazve kuti vatame kuita ciro cingaphwanya ushamwari hwavo pomwe no ushamwari hwavo na Jehovha.—1 VaTesalònika 4:6.

19, 20. Ngoapi mavonero o Makristu ngo pamusoro po mucadho?

¹⁹ Mu mabhuku akawanda no mu mavhidhiyo, vanopejisira ngo kuita mabuso anodakajisa o mucadho. Asi zvokadi ngo zvokuti, mucadho i kutanga ko zviro. Jehovha anoda kuti mucadho ugare no kucingaperi.—Genesi 2:24.

²⁰ Vandhu vazinji nyamasi vanovona mucadho inga ciitiko co mukuvo mudoko. Kuna ivona zvakareruka kucadha zve zvakarerukazve kurambana. Vamweni vanorangarira kuti panomuka zvineso i nguva yokurambana. Asi ceukijanyi muezaniso wo mu Bhaibheri ngo pamusoro po mapote matatu akanasa kupombana. Bote rakadari inga iri rinonesa maningi kuridajura kamare pikija mecirikweva. Kudari tikapsaka besero ra Jehovha mucadho wedu unozogara uripo. Jesu wakati: “Mundhu acadoparaja bzakabatanijwa ndi Mwari.”—Mateu 19:6.

21. Zvicinyi zvingabesera kuti mwamuna no mukaji vadisane?

²¹ Tese tino potakavangira no potakarembera. Zvakareruka maningi kuvona kuposa ko mundhu umweni, maningi-ningi wiya watakacadha naye. Asi kudari tikaita kudaro, atizowani mudakaro. Ngo ndivi rimweni, kudari tikabatikana ngo mugariro jakanaka jo mukaji kana mwamuna wedu, tingava no mucadho unodakajisa. Zvinokwanisikadi kusotesesa zviro zvaushoni tecikaringisi  kutama kukwana here? Hina! Jehovha anozviziva kuti atizivi kukwana, asi iyena anosotesesa mugariro jaushoni kwatiri. Waro amborangariranyi kudari iyena waisotesesa zvakashata basi! Mutari wo nduyo wakati: “Mukaverenga bzixaixi, Tenji Mwari, Tenji, ndiani angararama?” (Nduyo 130:3) Mwamuna no mukaji vangatevejera Jehovha ngo kusotesesa zviro zvaushoni ku umwe no umwe zve vokasika kuregererana.—Verenganyi VaKolosi 3:13.

22, 23. Ngowapi muezaniso wakanaka wakapa Abhirahama na Sara kuno vakacadha?

 ²² Ngo kufamba ko nguva, mucadho ungava wakavanga. Abhirahama na Sara, vakava no mucadho wakadaro zve wakagara mukuvo wakareba. Jehovha paakavhunja Abhirahama kuti abude mu nyika yo Uri, mukaji wake Sara kangaije wainga no makore anokwana 60. Rangariranyi kuti zvainesa kudini kwaari kusiya nyumba yavo yaushoni zve kakwenda koogara mu matende. Asi Sara wainga no ushamwari waushoni no mwamunake zve waimureremeja maningi. Ngo kudaro wakabesera zvisungo zvakaita Abhirahama zve wakabeserazve kuti zvinase kubudirira.—Genesi 18:12; 1 Pedru 3:6.

²³ Kuva no mucadho waushoni azvirevi kuti munozozwana pa zviro zvese. Njiku imweni, Abhirahama aazivi kutendera zvainanga Sara, ngo kudaro Jehovha wakamuvhunja kuti: “Itai bzaanonanga.” Abhirahama wakaita kudaro zve wakava no muviyo jaushoni. (Genesi 21:9-13) Kudari nguva jimweni amuzwirani no mukaji kana mwamuna wenyu, mucapera simba. Zvinosisira, i kutajana ngo rudo no nderemejo, pikija mucikazwirani umwe no umweni.

24. Zvicinyi zvamunodikana kuita kuti mucadho wenyu upe rukujo kuna Jehovha?

²⁴ Mu sangano ra Jehovha, kuno zviuru no zviuru zvo varovorani vakadakara. Kudari mukada kucadha, ceukijanyi kuti kukheta mwamuna kana mukaji waushoni i cisungo cinosisira maningi mu upenyu. Zvinozopsasa upenyu wenyu wese, ngo kudaro psakanyi besero ra Jehovha. Mukaita kudaro munozokheta wo kurovorana naye ngo ungwaru, mozvinasirira kuitira mucadho zve movangisira kuti mucadho wenyu uve wakavanga zve unokuja Jehovha.