1, 2. Inyambo yapi yakashandiswa ndi Bharama kuti aitire zvakashata vandhu va Mwari?

MUVEJI anoenda ku ndau yaanoziva kuti kuno hove yaanodakarira maningi. Iyena anonasa kukheta nyambo zve wokhandira civejo mu kumwa. Ngo kusengerera kwese anovetera kuti hove itange kuhira, kudari ikahira muveji anokweva civejo perapo wobata hove.

² Nguva jimweni, zviro zvondhozvo zvinoitikavo no vandhu. Inga muezaniso, Vaiziraeri pavainga phedo no kungwina mu Nyika yo Cipikihwa, ivona vakagara mukuvo wakati kuti phedo no Moabhi. Mambo wo Moabhi wakagondisa mare yakawanda maningi kuno mwanarume umweni waidanijwa Bharama kuti aitire zvakashata kuno Vaiziraeri. Ngo kuti aazivi kuzvikwanisa Bharama, wakawana manera amweni kuti Vaiziraeri vazviitire vega zviro zvakashata. Iyena wakanasa kukheta nyambo. Wakashandisa vasikane vo Moabhi kuti vanghwine mu akampamento jo Vaiziraeri zve vaite kuti vanarume vade kuvatana navo.—Bziverengo 22:1-7; 31:15, 16; Apokalipsi 2:14.

3. Vaiziraeri vakava no muviyo wapi ngo nyambo ya Bharama?

³ Kureva kuti nyambo yakashandiswa ndi Bharama yakashanda  here? Hina. Zviuru no zviuru zvo Vaiziraeri zvakaamba “kuhura no vanakaji vo vaMoabi.” Ivona vakatanga kunamata zvimwari zvokunyepa, kubatanija bhaari wo Peori, mwari wo vatano. Inga muviyo, Vaiziraeri vanokwana 24.000 vakafa pavainga vari phedo no kuguma mu Nyika yo Cipikihwa.—Bziverengo 25:1-9.

4. Ngenyi Vaiziraeri vazinji vakaita uhure?

⁴ Ngenyi Vaiziraeri vese ava vakashaisha? Ngo kuti vakarangarira zvido zvavo basi zve vokanganwa zvese zvavainga vakaitihwa ndi Jehovha. Vaiziraeri vainga no mathangwe mazinji o kuti varambe vakagondeka kuna Mwari. Jehovha ndiyena wainga akavabudisa mu uranda mu Ejipita, avazivi kumbova no njara mu zvipare zve vainga vaaphedo no Nyika yo Cipikihwa. (Vaheberi 3:12) Pikija no zvese izvi, vakatendera kukweviwa kuti vaite uhure. Mupostori Pauro wakatara kuti: “Ticajiregera tecipombora [kana uhure], inga bzo vakaita vamweni vavo. Ngo ndaveyo vakafa makumaviri na bzitatu o bziuru bzo vandhu.”—1 VaKorinto 10:8.

5, 6. Tingajijenyi ngo zvakaitika no Vaiziraeri mu zvipare?

⁵ Kudari inga Vaiziraeri vainga vari phedo no Nyika yo Cipikihwa, itusuvo tiri phedo no nyika imbza. (1 VaKorinto 10:11) Nyamasi uno tiri kupona munyika yakazara maningi ngo zvouhure kupinda vandhu vo Moabhi. Izvi zvingakwevejeravo vashandiri va Jehovha. Zvokadi kamare, uhure inyambo iri kushandiswa maningi ndi Dhiyabho kuitira kuti vandhu vashaishe.—Bziverengo 25:6, 14; 2 VaKorinto 2:11; Juda 4.

⁶ Jivhunjisenyi kudari, ‘Ndinotendera kuruza upenyu hucikaperi mu nyika imbza, ngo kuda kudakajihwa ko cimukuvo cidoko here?’ Zvinosisira maningi kuzwira  ngwajo ya Jehovha yo kuti: ‘Tizanyi uhure’ amutenderani nazvo here?—1 VaKorinto 6:18.

7, 8. Icinyi uhure? Ngenyi kuita uhure i cishaishi cikuru maningi?

⁷ Vandhu vazinji nyamasi uno avareremeji ndhungamiriro ya Jehovha ngo pamusoro po vatano. Mu Bhaibheri, upombo kana uhure zvinoda kunanga kuvatana ko mwanarume no mwanakaji vacizivi kucadha ngo manera anotendehwa ndi Mwari. Izvo zvinobatanijazve kuvatana ko mwanarume no mwanarume, mwanakaji no mwanakaji zve kuvatana no zvinyama. Uhure hunobatanija upombo, kuvatana ngo mukanwa, kuvatana ngo kunobudisa svina zve kubata-bata zvirehwa kana ndhengo jo vatano jo mundhu umweni.—Vonanyi Masoko o Kupejisira n.° 23.

⁸ Bhaibheri rinojekesa kuti kudari mundhu akaramba eciita zvo uhure, anodikana kujingwa mu ungano. (1 VaKorinto 6:9; Apokalipsi 22:15) Mundhu anoita zvo uhure aajireremeji pacake zve aathembwi ngo vamweni. Nguva jese uhure unoviisa zvineso. Unoita kuti mundhu ave no hana inorema, mimba icikavetehwi, zvineso pa mucadho, ndhendha pikija no rufu. (Verenganyi VaGalàsia 6:7, 8.) Kudari mundhu akaima zve worangarira ngo zvineso zvinovepo ngo kuita uhure, zvaizomunesera maningi kuti azviite. Zvicinyi zvinoita kuti mundhu agare ecirangarira kudakajisa zvido zvake zve woguma pa kuita uhure? Mudanyu wo kutanga i kuvona zvoumitu-mitu.

9. Ngenyi kuvona zvoumitu-mitu i ngozi?

⁹ Kuvona zvoumitu-mitu zvinoita kuti mundhu agare  no cido co kuda kuita zvo vatano. Nyamasi uno, zvoumitu-mitu kana pornografia zvinowanika mu ndau jese, mu marevhista, mabhuku, mumbo, mu terevhizau no mu interneti. Vazinji vanorangarira kuti kuvona zvoumitu-mitu akuzivi kushata, asi zvokadi i ngozi yakakura maningi. Ngo ndava yazvo, vandhu vanozvirovejeso zvo kuvona zvo umitu-mitu vangaguma pa kuva no cidaka-daka cakakura maningi co kuda kuita ruvatano. Pornografia kana zvoumitu-mitu zvingaita kuti mundhu ave no cirovejeso cokuita cinyamundundu, zvineso mu mucadho kana kutorambana kamare.—VaRoma 1:24-27; VaEfeso 4:19; Vonanyi Masoko o Kupejisira n° 24.

10. Ndhungamiriro jiri pana Jakobo 1:14, 15 jingatibesera kudini kuti titize uhure?

¹⁰ Zvinosisira maningi kuzwisisa kuti icinyi cinoita kuti mundhu agume pa kuita uhure. Vonanyi ngwajo inowanika pana Jakobo 1:14, 15 inoti: “Mundhu anoejwa ngo maemuriro ake, anomucengeja no kumukweva. Maemuriro ondhoo anomita no kubara uxaixi. Uxaixi hukaibva, hunobara rufu.” Kudari murangariro jakashata jikaza, rangariranyi zvimweni ngo kukasika. Kudari mukavona mufoto unovonesa zvoumitu, ngo kukasika ringisanyi kumweni! Cinjanyi kanari kana funganyi mucini wenyu. Mucatendera kuti zvido zvakashata zvinghwine mu mwoyo mwenyu. Kudari zvido zvondhozvo zvikava zvakavanga maningi zvinozonesa kuzvingwarira.—Verenganyi Mateu 5:29, 30.

11. Jehovha angatibesera kudini kudari tikava no murangariro wakashata?

¹¹ Jehovha anonasa kutiziva kupinda ari wese. Iyena anozviziva kuti atizivi kukwana. Asi iyena anozivazve kuti tingakwanisa kunyisa zvido zvakashata. Jehovha wakati: “Ngokudaro, pejisanyi muyemuro yenyu yo  pasi pano: Upombo, psina, haxa bzakaxata, kuda bzakaxata, ruyemuro no umbata: ibzi ndibzona kuromberera bzithombe.” (VaKolosi 3:5) Izvi azvizivi kureruka, asi Jehovha anosengerera zve anozotibesera. (Nduyo 68:20) Vonanyi muezaniso wo mujaha umweni wakawira pa murau wo kuvona zvoumitu-mitu zve no kuita cinyamundundu. Shamwari jake jo kucikora jainanga kuti zvainga zvicizivi kushata kuita zvondhozvo, asi iyena wakati: “Zvondhozvo zvakakhuvaza hana yangu zve ndakaguma pa kuita uhure.” Iyena wakavona kuti waidikana kuvonerera zvido zvake zve ngo besero ra Jehovha wakakwanisa kuima kuita zvondhozvo. Kudari murangariro wo uhure ukaguma mu murangariro wenyu, kumbiranyi Jehovha kuti amupe “simba rakakura” kuti muve no murangariro wakacena.—2 VaKorinto 4:7; 1 VaKorinto 9:27.

12. Ngenyi tinodikana ‘kungwarira mwoyo wedu’?

 ¹² Soromona wakatara kuti: “Rindirisisai uxoni mwoyo wako, ngokuti mawo hunobva uhomi.” (Mazwi 4:23) ‘Mwoyo’ i undhu watiri ngo mukati, ciro cinovoniwa ndi Jehovha. Tinodikana kungwarira mwoyo wedu ngo kuti iwona unokwevejehwa ngo zviro zvatinovona. Mugondeki Jobe wakati: “Ndakaita citenderano no majiso angu kuti: Andizoringisi mbhandwe.” (Jobe 31:1) Inga ndi Jobe, tinodikana kungwarira zvatinovona no zvatinorangarira. Tinoda kuita inga mutari wo Nduyo, iyena wakakumbira kuti: “Reesanyi majiso angu kuti atame kuvona bza biresi.”—Nduyo 119:37.

13. Dhaina wakasana shamwari jo mushovonyi?

¹³ Shamwari jedu jingatikwevejera maningi kuti tiite zvakanaka kana zvakashata. Kudari tikasana shamwari jinoreremeja Mwari jinozotibesera kuitavo zvondhozvo. (Mazwi Akangwara 13:20; verenganyi 1 VaKorinto 15:33.) Tinovona kuti zvinosisira maningi kunasa kukheta shamwari jedu ngo zvakaitika na Dhaina. Iyena wainga umwe wo vana va Jakobe, ngo kudaro wakarehwa pa mbhuri yainamata Jehovha. Dhaina aacaigepi mundhu wainga no mufambiro wakashata, asi iyena wakaita ushamwari no vasikane vo Vakanani vainga vacikanamati Jehovha. Asi Vakanani vainga vacina mavonero akafanana no vandhu va Mwari ngo pamusoro po vatano zve vandhu vese vaizviziva kuti ivona vainga no mufambiro wakashata. (VaLevi 18:6-25) Ngondava yo shamwari jake, Dhaina wakazivana na Shekemi. Mujaha uwu waingavo mu Kanani zve wakaemura Dhaina. Shekemi wainga mujaha “waireremejwa” maningi  pa vandhu vo pa mbhuri yake. Asi iyena wainga acikadi Jehovha.—Genesi 34:18, 19.

14. Zvicinyi zvakaitika kuna Dhaina?

¹⁴ Shekemi waidakarira maningi Dhaina zve wakaita zviro zvaaivona kuti zvainga zvakareruka kwaari. Ngokudaro “Wakamutora ngo haxa womujipa.” (Verenganyi Genesi 34:1-4.) Ushaishi uwu wakaviisa zvineso kuna Dhaina pomwe no mbhuri yake yese.—Genesi 34:7, 25-31; VaGalàsia 6:7, 8.

15, 16. Tingawanisa kudini uzivi?

¹⁵ Atidikani kuita inga zvakaita Dhaina kuti tizojija ndhungamiriro ja Jehovha kuti jakanaka kwatiri. “Ndiani anofamba no vazivi, anoita muzivi; ndiani anobatana no mapenji, anoita wakaxata.” (Mazwi Akangwara 13:20) Sunganyi kushandisa Bhaibheri kuti muzwisise “makwanja ese o kudakara.” Ngokuita kudaro munozozvivhikira mu kuhwajihwa no mu zvineso.—Mazwi Akangwara 2:6-9; Nduyo 1:1-3.

¹⁶ Asi tingava no uzivi ngo kujija Soko ra Mwari, kuita mukumbiro kwaari ticito taita zvisungo, zve no kuteverera ndhungamiriro jatinopuwa ngo muranda wakagondeka no wakangwara. (Mateu 24:45; Jakobo 1:5) Ngo kudaro tinoziva kuti atina simba zve atizivi kukwana. (Jeremia 17:9) Waro taizoitenyi, kudari mundhu ari wese akativhunja kuti zvatiri kuita zvinozopejisira ngo kuita zvouhure? Taizonyangajwa kana taizoashira besero rondhoro ngo kujidodokesa?—2 Majimambo 22:18, 19.

17. Ipanyi muezaniso unotatija kuti mazano o Mukristu doni anotibesera.

¹⁷ Inga muezaniso, rangariranyi mugariro uwu. Hambzaji Ana vanotanga kutajwa ngo manera anosisira maningi ngo mwanarume umweni wo kubasa kwavo,  mwanarumewo anovavhunja kuti vasongane ku ndau imweni kuti vambobhuye. Mwanarumewo aashandiri Jehovha, asi anoita inga wakanaka maningi. Hambzaji imweni inovona hambzaji Ana no mwanarumewo vari vese, ngokudaro inoeja kungwaja hambzaji Ana. Hambzaji Ana vaizoitenyi? Kureva kuti vaizoeja kujidavirira, kana vaizoashira mbhangiroyo. Hambzaji Ana vanonanga kuti vanoda Jehovha zve vanoda kuita zvaushoni. Asi vanoenderera mberi vacisongana no mwanarumewo, kureva kuti vari kutiza uhure here? Kana vari kujithemba maningi?—Mazwi Akangwara 22:3; 28:26; Mateu 6:13; 26:41.

18, 19. Sananguranyi kuti Josefa wakatizisa kudini uhure.

¹⁸ Paainga mujaha, Josefa wakava muranda mu  Ejipita. Mazuva ese mukaji wa tenji wake, waindomuvangirija kuti avatane naye, asi iyena waiziva kuti kuita zvondhozvo kwakashata. Zvokadi Josefa wainga muranda zve wainga acina maitire amweni okuti apinde kumweni kusiya tenji wake. Asi Josefa waida Jehovha zve waida kumudakajisa. Ngo kudaro mukuvo wese mukaji wa tenji wake waindomuvhunjirira asi Josefa wairamba. Paakazomuvangirija kuti avatane naye Josefa wakaramba “wobuda kunja, wotiza.”—Verenganyi Genesi 39:7-12.

¹⁹ Kudari Josefa waigara ecirangarira zvo uhure kana kuva no mazvi-zvii o kuvatana no mukaji wa tenji wake, zvaizomunesera maningi kuti arambe akagondeka kuna Jehovha. Asi ushamwari hwake na Jehovha ndihwona hwaisisira maningi kupinda ciri cese haco. Iyena wakati ku mukaji wa tenji wake: “Tenji wangu . . . apana ciri cese caakandirambisa, kuciripi imwimwi basi, ngokuti muri mukaji wake. Ndingabziitisa kudini kuita bzakaxata no kuxaixira Mwari?”—Genesi 39:8, 9.

20. Tinozvizivisa kudini kuti Josefa wakaita kuti Jehovha adakare?

²⁰ Josefa wainga ndhambo no ukama hwake, asi wakaramba akagondeka kuna Mwari, zve Jehovha wakamukomborera. (Genesi 41:39-49) Jehovha wakadakara maningi ngo kugondeka ka Josefa. (Mazwi Akangwara 27:11) Ngozvokadi kuti zvingava zvinonesa kutiza kuita uhure. Asi mucadokanganwa izvi: “[Jehovha] Mwari anoda vaya vanoramba bzakaxata, yena anongwarira uhomi hwo vanomutenda, anovasujunura mu nyara jo vakaxata.”—Nduyo 97:10.

21. Hama imweni yo mujaha yakatevejeresa kudini Josefa?

²¹ Njiku jese vandhu va Jehovha vanotatija kuti vakacunga  ngo kunyenya “bzakaxata” zve no kudisa “bzakanaka.” (Amosi 5:15) Mungava wakagondeka kuna Jehovha azvinenyi kuti ngo wapi mupira wenyu. Ngativone kuti zvicinyi zvakaitika no mujaha umweni ku cikora. Musikane umweni wakamuvhunja kuti: kudari ukandibesera pa porovha yo matematika tinozovata tese. Hama iyi yaizoitenyi? Iyona yakatevejera Josefa. Iyona yakati: “Pondhopo kamare ndakamuvhunja kuti andidi. Ndakadada ngo kuva ndakagondeka kuna Jehovha pomwe no kuva no hana yakacena.” Kuita zvo uhure kungaviisa kudakajihwa ko “mazuva maxomani” asi pakupejisira kunoviisa zvineso zvizinji no kutambujika. (Vaheberi 11:25) Mukuvo wese, kuzwira Jehovha kunoviisa mudakaro.—Mazwi Akangwara 10:22.

22, 23. Kudari tikashaisha Jehovha anotibesera kudini?

²² Sathana anoshandisa uhure kuti titame kuzwira Jehovha zve zvondhozvo zvingava cineso cikuru. Nguva jimweni tingava no murangariro wakashata. (VaRoma 7:21-25) Jehovha anotizwisisa zve anoceukija kuti “tiri bukuta.” (Nduyo 103:14) Asi zvakadini Mukristu akaita cishaishi co uhure? Kureva kuti watoruza zvese kamare here? Haiwa. Kudari iyena akakhauya zvokadi, Jehovha anozomubesera. Mukuvo wese Mwari wakanasirira kuti ‘akungurire.’—Nduyo 86:5; Jakobo 5:16; verenganyi Mazwi Akangwara 28:13.

²³ Jehovha wakatipa ‘zvipo zviri vanarume’—vakuru vano rudo kuti vatibesere. (VaEfeso 4:8, 12; Jakobo 5:14, 15) Ivona vangatibesera kuti tivezve no ushamwari na Jehovha.—Mazwi Akangwara 15:32.

24, 25. “Hwiru” hwaushoni hungatibesera kudini kutiza uhure?

²⁴ Kuti titeme zvivaringo zvaushoni, tinodikana kuzwisisa kuti mutemo ja Jehovha jinotibesera kudini. Atidi kuva inga mujaha anonangwa pana Mazwi Akangwara 7:6-23. Iyena wainga acina “hwiru” ngo kudaro wakawira pa murau wo kuita uhure. Kuva no hwiru waushoni kuri nani kupinda kuva wakangwara. Kudari tino hwiru waushoni, tinoeja kuzwisisa manera anorangarira Mwari zve tozvishandisa mu upenyu hwedu. Ceukijanyi magama aya: “Ndiani ano hwiru anojida; ndiani ano uzivi anozowana kudakara.”—Mazwi Akangwara 19:8.

²⁵ Munokhohwa kuti ndhungamiriro ja Jehovha jakanaka here? Munokhohwadi kamare kuti kujishandisa kunozoita kuti mudakare here? (Nduyo 19:8-11; Isaia 48:17, 18) Kudari mucikana-kana, ceukijanyi zviro zvese zvakanaka zvamakaitihwa ndi Jehovha. Nduyo 34:9 inoti: “Ejanyi, munozovona unaki hwa Tenji Mwari.” Pamunonasa kuteverera ndhungamiriro iji, munozoramba mecida Mwari. Idanyi zvinoda Jehovha zve nyenyanyi zvaanonyenya. Zajanyi murangariro wenyu ngo zviro zvaushoni—zviri zvokadi, zvakarungama, zvakacena, zvinodiwa zve no zvinokujwa. (VaFilipi 4:8, 9) Tingaita inga ndi Josefa, wakatendera kutungamirihwa ngo uzivi hwa Mwari.—Isaia 64:8.

26. Tinozobhuya ngenyi pa zvipauko zvinotevera?

²⁶ Azvinenyi kuti takacadha kana haiwa, Jehovha anoda kuti tibuse upenyu zve tive takadakara. Pa zvipauko zviviri zvinotevera tinozobhuya ngo zviro zvinozotibesera kuti tive no mucadho unobudirira.