Kuno Vadiwa Vese Vano Rudo na Jehovha:

Jesu wakananga kudari: “Munozoziva bzokadi, no bzokadi bzinozomusujunura.” (Johani 8:32) Kuvangisa kwakadini kunoita magama aya! Hina zvinoitika kuziva cokwadi, pikija mu “njiku jokupejisira” jino jinonesa jokuti manyepo akawanda. (2 Timoti 3:1) Munoceukija here pomwakatanga kuziva cokwadi inga cinosananguhwa mu Soko ra Mwari? Mudakaro wakadini womwakava nao!

Asi, zvinodikana maningi kuwana zivo yo cokwadi, zve no kuibhuira vamweni nguva jese. Kuti tifambe mukuzwirana no cokwadi, itusu pacedu tinodikana kuramba tiri mu rudo hwa Mwari. Izvo zvinobatanijenyi? Magama akananga Jesu, pa usiku hwaaida kufa, anodavira mubvunjo uwu. Iyena wakabvunja vateveri vokugondeka kudari: “Mukateveja mupango yangu, munozogara mu rudo hwangu. Kudari inga inini ndakateveja mupango ya Baba wangu no kuva mu rudo hwavo.”—Johani 15:10.

Vonanyi kuti Jesu wakaramba ari mu rudo hwa Mwari ngo kuteveja mupango wa Baba wake. Ndizvonavo zvondhozvo kwatiri nyamasi uno. Kuti tirambe tiri mu rudo hwa Mwari tinodikana kushandisa cokwadi mu upenyu hwedu hwo njiku ngo njiku. Pa usiku hwondhohwo, Jesu wakati: ‘Kudari meciziva izvi, munodakara kudari mecizviita.’—Johani 13:17, Shanduro yeNyika Itsva.

Ngo mwoyo wese tinovetera kuti bhuku iri ricamubesera kuramba mecishandisa cokwadi mu upenyu hwenyu, ngo kudaro moramba pacenyu muri “mu rudo hwa Mwari” mucirangarira ngo pamusoro po upenyu hucingaperi.—Juda 1: 21.