Zviro zvishoma zvingatihwaja maningi kupinda dambujiko ratinosongana naro panojingwa wo paukama hwedu kana shamwari yo pamwoyo icizivi kukhauya pa zvishaishi zvayo. Maitire atinoita ndiona pa ndhungamiro yo Bhaibheri pa shwiro iyi zvingavonesa pakacijikira rudo hwedu kuna Mwari no kubatisisa zvakaperera nasiriro iyi. * Vonanyi mubvunjo jimweni jinomuka pa shwiro iyi.

Tingatajisa kudini mundhu wakajingwa? Bhaibheri rinoti: “Mureerane na vaya vanodanwa hama, vova vapombori, vanyimi, varombereri vobiresi, vocirevo, varejeri, mbava: Mucaha na ivona na kamwe.” (1 VaKorinto 5:11) Ngo pamusoro po ariwese ‘anobuda pa majijisiro a Kristu’, tinoverenga kuti: “Mucamuaxira pa muzi penyu, nokuti kumucungamija. Ndiani anomucungamija anobatana nobziito bzake bzakaxata.” (2 Johani 9-11) Atibviri kuva no ushamwari hwo kumujimu kana hwo kunyama no mundhu wakajingwa. Murindiri wo njiku 15 ya Cikumiyana, 1981, pheji 25 (mu Ciputukezi), wakananga kudari: “Kunanga basi kuti ‘Haroo’ ku mundhu wakajingwa ungava mudanyu wokutanga kuitira kutangisa mabhuyo pikija ushamwari. Taizodakarira kuita dandho iri no mundhu wakajingwa here?”

Zvinodikana kamare kugura ushamwari huri hwese no wakajingwa? Hina, ngo mathangwe mazinji. Thangwe rokutanga, i shwiro yo kugondeka kuna Mwari no Soko rake. Tinozwira Jehovha haiwa basi pazvinongaya zvakareruka asi tinozviitavo pa shwiro inonesa kamare. Rudo kuna Mwari hunotindunda kuti tizwire mutemo jake jese, teciziva kuti ndiena ega basi, ana rudo zve mutemo jiripo kuti tigare ushoni. (Isaia 48:17; 1 Johani 5:3) Rocipiri, kuparajana no mushaishi acingakhaui zvinojivirira itusu zve zvinojivirirazve ungano yese kuti itame kushatiswa kumujimu no mu mugariro zve ungano inoramba ino zina rakanaka. (1 VaKorinto 5:6, 7) Rocitatu, kubatisisa  kwedu zviambi zvo Bhaibheri kungabeseravo mundhu wajingwaro. Ngo kubesera cisungo co cikwata cokutonga, tingabaya mwoyo wo mushaishi wokuti mbhera mukuvo wondhowo aazivi kuashira besero yo vakuru vaieja kumubesera. Kuruza ushamwari no rudo hwo vanamati doni kungamubesera kuti ‘arangarire,’ avone kukura ko cishaishi cake zve aite mudanyu jinodiwa kuti ahwirire kuna Jehovha.—Luka 15:17.

Kudari wajingwaro ngo wo paukama hwedu kere? Pa shwiro iyi, cisungo co ukama pakati po mbhuri cingaeja kugondeka kwedu. Tingatajisa kudini wo paukama wakajingwa? Pano, atingasananguri mugariro jese jingamuka, asi tinoda kubhuya ngo shwiro mbiri huru.

Mu shwiro jimweni, wo paukama wajingwa kangaije aciri kurarama pa muzi pondhopo inga divi ro ukama hwo phedo kamare. Zvecivoneka kuti kujingwa kwake akupeji cisungo co ukama, zviito zvo zuva ngo zuva no kuvonana zvingaramba zviripo. Asi, ngo mufambiro wake, mundhuwo wasana kugura cisungo co kumujimu pakati pake no vatendi vo paukama. Ngo kudaro ukama hwakagondeka ahucinazve ukama hwo kumujimu no mundhu wajingwaro. Inga muezaniso, kudari wajingwa aripo, aazodaviri panoungana mbhuri kuitira kunamata ko mbhuri. Asi, kudari wajingwa ari mwana mudoko, vabari vandori no mutoro wo kutungamirira no kumupangira. Ngo kudaro, vabari vana rudo vanganasirira kuti vajije nae Bhaibheri. *—Mazwi Akangwara 6:20-22; 29:17.

Ngo divi rimweni, wo paukama wakajingwa anonga waanomuzi wake ega. Zvinonga zvecida kupungura kamare kubhuisana kangaije kashoma kamare kuitira kutonga shwiro jo mbhuri, kubhuisana uku kunodikana kuva kwakafupika. MaKristu akagondeka aapsaki zvirazawe zvomahara kuti abhuisane no wo paukama wakajingwa ana muzi wakevo. Kunja kwa izvi, kugondeka kuna Jehovha no sangano rake zvinovandundira kuti vabatisise nasiriro yo Matahwa yo kujingwa.  Kugondeka kwavo kuna cinangwa cakanaka co kuda ngo mwoyo wese wakajingwa zve zvingamubesera kuti abesereke ngo mbhangiro. *—Vaheberi 12:11.