1, 2. I basa rapi ro kuvaka ro makabatanijwavo zve ngenyi mavakiro enyu anosisiravo?

IMWIMWI muri kushanda ngo simba pa basa ro kuvaka. Kuvaka uku kwava kweciithwa ko mukuvo wakati kuti zve kuri kuenderera mberi mbhera kumbeji. Mbhera wari, basa iri riri kunesa asi riri kukwanisika. Caviya-caviya, imwimwi makasunga kuti narini amuzoregeri kana kuthuruja, mavakiro enyu anozopsasa upenyu hwenyu, pikija no kumbeji kwenyu. Ngenyi? Ngokuti ari kuvakwaro ndimwi!

² Mujiji Judha wakakohomejera basa ro kuvaka ko tinozviita toga. Paakavangisa maKristu kuti arambe ari ‘mu rudo hwa Mwari,’ iyena wakakhombijazve maitiro otingazviita ndiona, ngo kunanga kuti: ‘Jivakenyi pakutenda kwenyu kwakacenesesa.’ (Juda 20, 21, BMAA) Ngojapi njira jimweni jo mungajivaka ndijona, kuitira kuti kutenda kwenyu kuve kwakavanga kuti murambe muri mu rudo hwa Mwari? Ngatende tivone mativi matatu o basa ro kuzvivaka uku ko kumujimu.

3-5. (a) Sathana anoda kumucengeja ngo kumuita kuti muvone kudini mutemo ja Jehovha? (b) Tinodikana kujivona kudini mutemo ja Mwari zve jingapsasisa kudini mazwiro edu? Fananijanyi.

³ Pakutanga, tinodikana kuvangisa gonda redu mu mutemo jo umwari. Mu kujija kwenyu bhuku iri, makajija mutemo muzinji jinoda Jehovha ngo pamusoro po mufambiro.  Munojivona kudini? Sathana anoda kumucengeja kuti muvone mutemo, zviambi no ndhungamiriro ja Jehovha inga jinomubzinyirira no kumutambuja. Iyena ari kushandisa zano iri kubvira porakabudirira mu munda wo Edheni. (Genesi 3:1-6) Zano iri rinoshandavo komuri here? Zvinofira maningi mu mavonero enyu.

⁴ Inga mufananijo: Ngatiti imwimwi muri kufamba mu parki, movona fenzi yakavanga yoreba kutenderera parkiyo. Mukati mo parki iyi makaseja maningi. Pakutanga, mungavona fenzi iyi inga iri kuphinga rusujunuko hwenyu. Pomunosota mukati mo fenzi, munovona mbhondoro inothyisa yakanasirira kuti imuhwise! Waro mavona kuti ngenyi pana fenzi—kuitira kumujivirira. Aripovo munyangi anothyisa wakanasirira kuitira kumuhwisa here? Soko ra Mwari rinotingwaja kuti: ‘Jibatenyi no kungwara; ngokuti Sathana, mukorore wenyu inga mbhondoro inofamba-famba yecibhonga, yecipsanga mundhu kuti imuhe.’—1 Pedru 5:8.

⁵ Sathana ndi munyangi wakashata. Jehovha aadi kuti tive nyama ja Sathana, Iyena wakadira mutemo jo kutivhikirira ku “bziejo” zvo mushati uu. (VaEfeso 6:11) Ngo kudaro, tinodikana kurangarijisisa mutemo ja Mwari, tinodikana kujivona inga matatijiro o rudo a Baba wedu vo mugore. Jikavoniwa ngo mavonero aya, mutemo ja Mwari jinova cine ro kugarisika no mudakaro. Mujiji Jakobo wakatara kuti: “Ndiani anopurukisisa Mutemo wakaperera wo rusujunuko, wouteveja . . . ndiyena ano mucena mu bzaanoita.”—Jakobo 1:25.

6. Ngoyapi njira yakanaka yo kuvaka ndiyona gonda ku zviambi zvakarurama no mutemo ja Mwari? Ipanyi muezaniso.

⁶ Kurarama ngo mupango ja Mwari i njira yakanaka yo kuvaka ndiyona rutendo hwedu ku Mupi wo mutemo no ku ungwaru hwo mutemo jake. Inga muezaniso, “Mupango wa Kristu” unobatanija mupango wa Jesu wo kujijisa vamweni ‘bzese bzaakatuma.’ (VaGalàsia 6:2; Mateu 28:19, 20) MaKristu anozwirazve ngo mwoyo wese mupango wo kuramba ticisonganira pa kunamata no kuva no ushamwari hunovaka. (Vaheberi 10:24, 25) Mupango ja Mwari jinobatanijavo  ngwajo yo kuita mukumbiro kuna Jehovha nguva jese zvicivha ngo mu mwoyo. (Mateu 6:5-8; 1 VaTesalònika 5:17) Potinorarama ngo mupango iji, tinovona zvakajeka kuti i ndhungamiriro jo rudo kamare. Kujizwira jinotiviisira mudakaro no kukwaniriswa koticaizowanepi mu nyika ino yakazarari ngo matambujiko. Po munorangarijisisa ngo mabesekero o makaita ngo kuzwira mutemo ja Mwari, amuripi kuzwa kuti gonda renyu riri kuvanga here?

7, 8. Soko ra Mwari rinovangisa kudini vaya vanothya kuti avazokwanisi kuramba vakagondeka makore no makore?

⁷ Nguva jimweni, vamweni vanothya kuti zvinozovanesa maningi kubatisisa mutemo ja Mwari makore no makore. Vanothya kuti vangazoposa ngo maitiro ari ese. Kudari munozwavo kudaro, rangarijisisanyi magama okuti: “[Jehovha], muponesi wako, Mucena wo vaIsraeli, anoti: Ndini [Jehovha] Mwari wako, wiya anokujijisa kuti uwane bzakanaka, wiya anokuseseja ngo gwanja ro unodika kutevera. Iwewe, nokwainga kuti wakapurutana mupango yangu! Kunyarara kwako kwaizoita inga murambo, no ururami hwako inga mavimbi o bahari.” (Isaia 48:17, 18) Makamborangariravo kuti magama aya anotivangisisa kudini here?

⁸ Pa vhesi iji, Jehovha ari kuticeuja kuti tikamuzwira tinobesereka.  Ari kugondesa kuti tinozowana makomborero maviri ngo kumuzwira. Okutanga, runyararo hwedu hunozoita inga murambo—wakagajana, wakazara, unoenderera mberi. Ocipiri, ururami hwedu hunozoita inga mavimbi o mu jombe. Kudari makaima mu muserengende (mumbhiripiri mo jombe) zve muri kuvona mavimbi acitevererana rimwe sure ko rimweni, amukana-kani kuti anogara akandodaro. Munoziva kuti mavimbi anondoramba acindoviya, acipwanyikira mu muserengende ko makore no makore. Jehovha ari kunanga kuti ururami hwenyu—muitiro wenyu wakanaka—ungaita kudaro. Po munovangisira kuti muve makagondeka kwaari, aamuregeri muciposa! (Verenganyi Nduyo 55:23.) Zvigondiso izvi azvivaki gonda renyu kuna Jehovha no mutemo jake jakarurama here?

9, 10. (a) Ngenyi kukura i cido cinosisira maningi kuno maKristu? (b) Kuitisa kudini mavonero o kumujimu anobesera pa mudakaro wo mudhu?

⁹ Divi ro cipiri pa basa iri ro kuvaka rinokhombijwa pa masoko akafemehwa o kuti: ‘Ngatishande ngo simba kuti tive vakakura.’(Vaheberi 6:1, Shanduro yeNyika Itsva) Kukura i cido cinosisira maningi ku maKristu. Mukusiana no kuva takakwana, kuri ndhambo maningi kuti kukwanisike ngo vandhu, kukura i cido cinokwanisika ngo vese. Kusiapo izvo, maKristu ari kuwana mudakaro mukuru ngo kushandira Jehovha inga vandhu vakakura. Ngenyi tinonanga kudaro?

¹⁰ MuKristu wakakura ndi mundhu wo kumujimu. Iyena anovona zviro mu mavonero a Jehovha. (Johani 4:23) Pauro wakatara kudari: “Mbzakadi, vaya vanoteveja muviri, vanoda bziro bzo muviri. Vaya vanoteveja mujimu, vanobatira mujimu.” (VaRoma 8:5) Mavonero okunyama anoviisa mudakaro mushoma, ngokuti ana cinangwa co kuzvirangarira pacao, aavoni ndhambo zve anosotesesa zviro zvo upfumi. Mavonero o kumujimu anopa mudakaro, ngo kuti anosotesesa Jehovha, ‘Mwari anodakara.’ (1 Timoti 1:11, Shanduro yeNyika Itsva) Mundhu wo kumujimu anoda kudakajisa Jehovha  zve anodakara pikija wakawanana no cineso. Ngenyi? Patinowanana no zvineso tino mukana wo kutatija kuti Sathana ndi munyepi zve tovaka kugondeka kwedu tecidakajisa Baba wedu vo mugore.—Mazwi Akangwara 27:11; verenganyi Jakobo 1:2, 3.

11, 12. (a) Pauro wakanangenyi ngo pamusoro po ‘simba ro zwisiso,’ zve gama ro kuti ‘rakarovejwa’ rinoda kunangenyi? (b) Rovejo yapi inodiwa kuti mundhu ave no zvikwaniriso zvo mu muviri?

¹¹ Kuitira kuva mundhu wakakura zve ano umujimu, panodikana rovejo. Vonanyi vhesi iyi: ‘Zvokuha zvakavanga ngo zvo vandhu vakaibva, kuna vayani vokuti, ngo kushandisa, vano simba ravo ro zwisiso rakarovejwa kuitira kuziva zvakanaka no zvakashata.’ (Vaheberi 5:14, Shanduro yeNyika Itsva) Pauro paakananga kuti simba ravo ro zwisiso ‘rakarovejwa’ waishandisa gama ro ciGiriki raishandiswa kazinji pa nyumba jaiitihwa mutambo jo kuvangisa muviri (ginásios de esportes) ro muzana ro kutanga ro makore ku Gresia, ringakwanisa kudanijwavo inga ‘wakajijiswa kuvangisa muviri.’ Wari rangariranyi kuti zvicinyi zvinobatanijwa pa rovejo iyi.

¹² Potakabahwa, muviri wedu wainga ucizivi kurovejwa. Inga muezaniso, mwana mutete aakwanisi kutungamirira zvimukono no zvimurenje zvake zvidoko. Ngo iyo ndava, anomusa zvimukono zvake pikija kutozvitakazve ega mu meso, zvotomuthyisa no kumukahamaja. Padoko ngo padoko, ngo kushandisa muviri uu unova ucirovejeka. Mwana anotanga kukhwava, wotanga kufamba, akati kurire otanga kugogoma. * Asi tingati kudini kuno mundhu anoita mutambo unovangisa muviri? Patinovona mundhu anoita mutambo unovangisa muviri acigogoma, zve aciphuka mu mbhepo zvinodakajisa zve azvitikana-kanisi kuti muviri uu wakadari inga mucini wakanasa kurovejwa. Zvinoitwa  ngo vatambi vo zvokuvangisa muviri azvizivi kuitikavo zvega—zvakatora nguva zinji kuti rovejo iyi ikwanisike. Bhaibheri rinonanga kuti rovejo yo muviri “inobesa padoko.” Mutengo wakadini uripo ngo kuroveja simba redu ro zwisiso kuitira zviro zvo kumujimu!—1 Timoti 4:8.

13. Mungakwanisa kudini kuroveja simba renyu ro zwisiso?

¹³ Mu bhuku iri, takavona shwiro jakawanda jingamubesera kuroveja simba renyu ro zwisiso kuitira kuti murambe makagondeka kuna Jehovha inga mundhu wo kumujimu. Psakisisanyi no mukumbiro zviambi zvo umwari no mutemo pamunotema zvivaringo zvo njiku ngo njiku mu upenyu hwenyu. Pamunonga mecida kuita cisungo ciri cese, zvibvunjisenyi mwega kudari: ‘Mutemo no zviambi zvapi zvinobatanijwa pa shwiro iyi? Ndingazvishandisa kudini? Maitiro api angazodakajisa Baba wangu vo mugore?’ (Verenganyi Mazwi Akangwara 3:5, 6; Jakobo 1:5.) Mukaita cisungo cimwe nga cimwe ngo njira iyi munonga muri kuroveja simba renyu ro kuzwisisa. Kuroveja kondhoko kunozomubesera kuti muve zve murambe muri mundhu wo kumujimu kamare.

14. I njara yapi yatinodikana kuva nayo kuti tikure kumujimu, asi tinodikana kuramba tecingwarira cinyi?

¹⁴ Pikija zvecikwanisika kuva mundhu wakakura mu mujimu, pandori no mukana jokuenderera mberi mecikura. Kuitira kuti murambe mecikura, munodikana kuha. Ngo iyo ndava Pauro wakati: ‘Zvokuha zvakavanga ngo zvo vandhu vakuru.’ Ciro cikuru kuitira kuvaka gonda renyu ngo co kuramba meciha zvokuha zvo kumujimu. Ngo kushandisa zvakanaka zvamuri kujija, munonga muri kutatija ungwaru ngo kuti Bhaibheri rinoti: ‘Ungwaru ndicona ciro  cikuru.’ Ngo kudaro, tinodikana kuva no njara yo cokwadi catinopuwa ndi Baba wedu. (Mazwi Akangwara 4:5-7, Baiberi Mazwi Akacena aMwari; 1 Pedru 2:2) Zvokadi kamare, kuengejera uzivi no ungwaru hwo umwari asipi thangwe ro kuzvikuja kana kuzvitutumaja. Tinodikana kuzvipopora nguva jese kuitira kuti titame kusia kuti kuzvikuja kana kurembejeka kumweni kumere miji mu mwoyo mwedu. Pauro wakatara kudari: “Jisotesesenyi uxoni, mujivone kuti muno kutenda. Jiejenyi mega.”—2 VaKorinto 13:5.

15. Ngenyi rudo hunodikana pa kukura kumujimu?

¹⁵ Kuvakwa ko nyumba kungapera hako, asi basa rakona ariperi. Kuvakisa no kunasirira-nasirira ndi zviro zvinodikana zve kuengejera kudari zvecidikana ngo kuti mugariro jingacinja. Zvicinyi zvatinodikana kuita kuti tive vakakura zve vanoramba vano umujimu? Ciro cokutanga ndi rudo. Tinodikana kuramba teciengejera rudo kuna Jehovha no kuno vatendi doni vedu. Kudari ticina rudo, uzivi hwedu hwese no mabasa azvizovi no mutengo—inga musindo mukuru ucikabeseri ciro. (1 VaKorinto 13:1-3) Kudari tino rudo, tinokwanisa kuva maKristu akaibva zve toramba tecikura kumujimu.

16. Sathana anomusijira mushovo wapi wo marangaririro zve ciro capi catinopuwa ndi Jehovha kuitira kutibvikira?

¹⁶ Ngatende tivone divi rimwe rinosisira pa basa rokuvaka. Kuitira kuzvivaka inga vateveri vo cokwadi va Kristu, munodikana kungwarira njira yamunorangarira ndiyona. Sathana, mutongi wo nyika ino, ndi mutungamiriri anotora vandhu kuti vave no murangariro jakashata, jicingagajanisi, jicikathembeki zve jicikapi vetero. (VaEfeso 2:2) Marangaririro akadaro ngo o ngozi ku muKristu inga kuvaka nyumba ngo matabwa akafundhwa. Zvinodakajisa kuti Jehovha anotipa ciro cimwe cinosisira kuitira kutibvikira—vetero.

17. Soko ra Mwari rinofananijira kudini kusisira ko vetero?

¹⁷ Bhaibheri rinonanga mativi akasiana-siana o zvo kurhwa nazvo zvo kumujimu zvatinoda kuitira kuhwisana na Sathana  no nyika yake. Cinodikana maningi pa zvijito zvese ndi cigoko co “kuvetera ruponeso.” (1 VaTesalònika 5:8) Musoca mu nguva jo Bhaibheri waiziva kuti aacaizorarama pa hondo kudari acina cigoko cake. Kazinji caiitwa ngo simbi codihwa kepisi yo jira kana yo dovo ngo mukati, yaiitisa kuti munji no mupasha zvitame koofura mu musoro kuti zvitame kukhuvaza maningi. Kudari inga cigoko cinobvikira musoro, vetero inokwanisa kubvikira ndangariro yenyu no zvamunorangarira.

18, 19. Jesu wakapa muezaniso wapi mu kuramba ano vetero zve tingamutevejeresa kudini?

¹⁸ Jesu wakapa muezaniso wo kutanga wo kuramba no vetero. Munoceukija zvaakacungirira pa usiku hwake hwo kupejisira naari pa nyika pano. Shamwari yo phedo yakamutengesa ngo ndava yo mare. Umweni wakamuramba pikija acitomuziva. Vamweni vakamusia vomutiza. Vandhu vo mu nyika yake vakamumukira, vecida kuti aurawe no kutambujwa mu nyara jo masoca o ku Roma. Uzinji hwedu hunotenda kuti Jesu wakasongana no muejo jaticikazomboveterizve kusongana najo. Zvicinyi zvakamubesera? Vaheberi 12:2 inodavira kudari: “Yena, eciziva rudakaro hwaizomuviira, wakadavira kufa pa [mutanda], acikanyoejeki. Wogara pa mukono muho wo dendemaro ra Mwari.” Jesu aazivi kukanganwa “rudakaro hwaizomuviira.”

¹⁹ Mudakaro wenyi waizomuviira? Hina, iyena waiziva kuti akacungirira waizobesera pa kucenesa zina rakacenesesa ra Jehovha. Iyena waizopa civoniso cikuru co kuti Sathana ndi Munyepi. Akuna vetero imweni yaizopa mudakaro mukuru kuna Jesu. Waizivavo kuti, Jehovha waizomupa mupocero ngo kuva kwake wakagondeka—zvokuti yaizoguma nguva inodakajisa kuti ahwirirezve koogara na Baba wake. Jesu wakaramba ecisotesesa vetero yake no mudakaro pikija mu nguva yokunesa. Tinodikanavo kuita zvondhozvo. Itusu tino mudakaro pambeji pedu. Jehovha anotireremeja ngo kupa umwe na umwe wedu rudakajiso hwo kubesera kucenesa zina rake guru. Itusu tinokwanisa kutatija kuti Sathana  i munyepi ngo kusana Jehovha inga Mukuru-kuru zve toramba takangwaririka mu rudo hwa Baba wedu, azvinenyi muejo jakadini jatinosongana najo.

20. Zvicinyi zvingamubesera kuti murambe muno murangariro wakanaka no vetero?

²⁰ Jehovha aadi basi kupa vetero kuno vashandiri vake vakagondeka—iyena anoda kuzviita. (Isaia 30:18; verenganyi Malakia 3:10.) Anodakara ngo kupa vashandiri vake zvakarurama zvovanoda mu mwoyo mavo. (Nduyo 37:4) Ngo kudaro, rambanyi makasotesesa zvakavanga murangariro wo vetero yo kuvona kukwanirisika ko zvigondiso zva Mwari. Narini mucava no marangaririro akashata, anonyangajisa, acikazivi kunaka o nyika ino ya Sathana. Kudari mukavona kuti mujimu wo nyika uri kutanga kunghwina mu murangariro kana mu mwoyo wenyu, itanyi mukumbiro wakavanga kuna Jehovha mwecikumbira: “Rugarisiko hwa Mwari hunopinda uzivi hwese.” Rugarisiko hwondhohwo hunobva kuna Mwari hunozongwarira mwoyo wenyu no simba ro kurangarira kwenyu.—VaFilipi 4:6, 7.

21, 22. (a) Ndi vetero yapi inodakajisa ino reremejwa ngo “uzinji hukuru”? (b) Pa vetero jese jo maKristu, ngoyapi yamunosoterera maningi?

²¹ Vetero inodakajisa zvakadini yamunodikana kurangarijisisa! Kudari munoita divi ro “uzinji hukuru,” avo “vanobva  ku dambujiko guru,” rangariranyi upenyu hwomucazova nahwo sambi-sambi. (Apokalipsi [Cakapangijihwa] 7:9, 14) Sathana no madhimoni ake avacipo, munozova no rusujunuko hwokuti kangaije hunganesa kuhuzwisisa wari. Ndiani wedu wakambovona upenyu ucina kuvangirijwa ngo kukhwindijihwa ngo uvori hwa Sathana? Pacicinazve kuvangirijwa uku, mudakaro wakadini ucazovepo wo kushanda kuitira kucinja nyika ino kuva paradhiso pasi po kutungamirihwa ndi Jesu no 144.000 vacatonga nae kumatenga! Kudakara kwakadini kwatinozova nako patinozovona kuti akucinazve ndhendha jese no kuremara, no kupa kwaviya wakanaka kuno vadiwa vedu vokumuswa kovakafa no kurarama kudari inga zvaidiwa ndi Mwari. Patinonga tecikhwedera ku kukwana, mupfupo mukuru maningi ucakhwederavo maningi phedo, cigondiso cakavoneswa pana VaRoma 8:21—“rusujunuko no . . . goja ro vana va Mwari.”

²² Jehovha anoda kuti muve no rusujunuko hwo mucikakwanisi kurangarira. Gwanja rinotitora kwenda ku rusujunuko hwondhohwo ndi kuzwira. Amutendi kuti zvino mutengo kushanda ngo simba wari kuitira kuzwira Jehovha njiku no njiku here? Mu njira iri yese, itanyi no pamunokwanisa kuti muenderere mberi mucijivaka pakutenda kwenyu kwakacenesesa, kuti murambe muri mu rudo hwa Mwari no kucingaperi!