CIPAUKO 15
Wananyi Mudakaro ngo Kushanda ngo Simba
‘Mundhu wese . . . adakare ngo kunaka ko muxando wake.’—MUCUMAERI 3:13.
1-3. (a) Vandhu vazinji vanojizwa kudini ngo pamusoro po basa ravo? (b) Bhaibheri rinotivangisa kuti tive no mavonero api ngo pamusoro po basa, zve mubvunjo japi joticajija mu cipauko ici?
KU VAZINJI munyika yo nyamasi uno, basa asipi ciro cinodakajisa. Kushanda nguva jakawanda pa basa rovacikadakariri, zvinovaitisa kuti vafindhwe ngo kuenda ku basa njiku jese. Vandhu vanorangarira kudari, vangaitisa kudini kuti vadakarire basa ravo—zve vawane mudakaro ndirona?
2 Bhaibheri rinotivangisa kuti tive no mavonero aushoni ngo kushanda ngo simba. Irona rinonanga kuti kushanda no muviyo wako i makomborero. Soromona wakatara kuti: “Bze, kuti mundhu ahe no kumwira, ecidakara ngo kunaka ko muxando wake, ndicona cipuo ca Mwari.” (Mucumaeri 3:13) Jehovha, wiya anotida zve mukuvo wese anoda kugara ushoni kwedu, anoda kuti tiwane mudakaro ngo basa redu zve tidakare ngo mucero wo basa redu. Kuti tirambe tiri mu rudo hwake, tinodikana kurarama mu kuzwirana no mavonero no zviambi zvake ngo pamusoro po basa.—Verenganyi Mucumaeri 2:24; 5:18.
3 Mu cipauko ici, ticazojija mubvunjo murongomuna iji: Tingawanisa kudini mudakaro ngo kushanda ngo simba? I mufumbo wapi wo mabasa acikazwirani no maKristu o cokwadi? Tingaitisa kudini kuva vakaezanana ngo pamusoro po basa ro kunyika no mabasa o kumujimu? Ngorapi basa rinosisira maningi rotingaita? Ticikato, ngativone muezaniso muviri jo vashandi vakuru-kuru vo mudenga no pasi—Jehovha Mwari na Jesu Kristu.
MUSHANDI MUKURU-KURU NO MUZIVI WO MABASA
4, 5. Bhaibheri rinotatijisa kudini kuti Jehovha ndi mushandi anobudirira?
4 Jehovha i mushandi mukuru-kuru. Genesi 1:1 inoti: “Pakutungamira, Mwari wakarura nyezuru no pasi.” Mwari paakapeja basa rake ro kusika nyika no zvese zvirimo, iyena wakati “bzakanaka.” (Genesi 1:31) Ngo magama amweni, iyena wakadakara maningi ngo basa rake rese raakaita pa nyika. Jehovha, ‘Mwari anodakara’, pacina kukana-kana wakadakara maningi ngo kuva mushandi anobudirira.—1 Timoti 1:11, Shanduro yeNyika Itsva.
5 Mwari wedu anoshanda, aakami kushanda. Nopakhirira mukuvo wakareba nyika no yapera kusikwa, Jesu wakati: “Baba wangu vanobata basa njiku jese.” (Johani 5:17) Baba wake vari kuitenyi? Ngo kudenga, ivona vari kuenderera mberi vacitungamirira no kukorondha mufumbo wese wo vandhu. Vakaita kuti “mundhu mupsa” avepo, maKristu akazojwa ngo mujimu ao acazotonga na Jesu kudenga. (2 VaKorinto 5:17) Ivona vari kushanda kuitira kukwanirisa cidisiso cavo ku mufumbo wese wo vandhu—cokuti vaya vanomuda vazoraramezve kwenda no kwenda mu nyika impsa. (VaRoma 6:23) Jehovha anofanira kudakara maningi ngo muviyo wo basa iri. Zviuru no zviuru zvo vandhu zviri kudavira masoko o Umambo, vari kukwevehwa ndi Mwari no kucica upenyu hwavo kuti varambe vari mu rudo hwake.—Johani 6:44.
6, 7. Ngoyapi nduma yakava na Jesu ngo pamusoro po kushanda ngo simba?
6 Kubvira kare, Jesu ana nduma yo kushanda ngo simba. Acito aviya pasi pano, iyena waishanda inga “mujijisi wo mabasa” wa Mwari pa kusika zviro zvese zvo “mugore no mu nyika.” (Mazwi Akangwara 8:22-31; VaKolosi 1:15-17) Naari pa nyika, wakaenderera mberi acishanda ngo simba. Iyena wakajija basa ro kuvaka, wozivika inga “muvezi.” *(Marco 6:3) Basa raibatanija kushanda nosimba no kukwanisa zvakawanda—maningi-ningi ngo kuti mukuvo uu kwaenga kucikana mucini jo kuceka, mabazari okutengesa mathurusi no zvimweni zvinoshanda ngo magezi. Mungarangarijira here kuvona Jesu ecienda koopsaka matanda, kangaije acitema mamiti, ondunda matanda eciendesa kwaaishandira? Mungarangarira mecimuvona ecivaka nyumba—kunasirira denga ro nyumba nokurikhwija, aciveza musuvo kana zviro zvimweni? Pacina kukana-kana Jesu waiziva mudakaro unoviya ngo kushanda ngo simba no uzivi.
7 Jesu waizivika ngo kushanda ngo simba mu basa rake ro kucumaira. Pa makore matatu no meya, wakabatikana maningi pa basa iri rinosisira. Ngo kuda kuwana vandhu vazinji mukuzwirana no zvinokwanisika, waishanda njiku yese, waifumirisa zve woshanda mbhera usiku. (Luka 21:37, 38; Johani 3:2) Iyena “waifamba mu maguta makuru no madoko, ecijijisa no kutokotesa masoko akanaka o umambo hwa Mwari.” (Luka 8:1) Jesu waifamba mazana no mazana o makiromita, acifamba ngo soka mu zvitaka zvakazara ngo bukuta kuitira kuti abvunje vandhu masoko akanaka.
8, 9. Jesu wakawanisa kudini mudakaro ngo kushanda kwake ngo simba?
8 Jesu wakawana mudakaro wo kushanda kwake ngo simba mu kucumaira here? Hina! Iyena wakapandira kana kuti kusima mbeu yo cokwadi co Umambo, wosiya minda jooda kukorohwa. Kuita basa ra Mwari kwakaviisira Jesu simba zve kukorondhwa zvokuti waijipira kuregera kuha kuti aite basa rondhoro. (Johani 4:31-38) Rangariranyi ngo pamusoro po mudakaro kangaije waakava nao paainga aaphedo no kupeja basa rake pasi pano, paakati: “Ndakamukoja pasi pano, ndecipeja basa ro makandituma kuriita.”—Johani 17:4.
9 Zvokadi kamare Jehovha na Jesu muezaniso jakapinda kunaka jo vandhu vanowana mudakaro wo kushanda ngo simba. Rudo hwedu na Jehovha hunotindunda kuti tive ‘vatevejeri va Mwari.’ (VaEfeso 5:1, Shanduro yeNyika Itsva) Rudo hwedu na Jesu hunotindunda kuti tive ‘tecitevejera gwanja rake.’ (1 Pedru 2:21) Wari ngatende tipopore zvatingaita kuti tiwanevo mudakaro ngo kushanda kwedu ngo simba.
MAWANIRO OTINGAITA MUDAKARO NGO KUSHANDA NGO SIMBA
Kushandisa zviambi zvo Bhaibheri kungamubesa kuti muwane mudakaro ngo kushanda kwenyu ngo simba
10, 11. Zvicinyi zvingamubesera kuti muve no mavonero akanaka ngo pamusoro po basa?
10 Basa ro kunyika rinoita divi ro upenyu hwo maKristu okadi-kadi. Tinoda kuwana mupocero no mudakaro pa basa redu, asi ici cingava cineso cikuru kamare kudari teciita basa ro kunyika raticikadakariri. Zvingaitika kudini kuti tiwane mudakaro pa basa redu patinonga tiri pa mugariro jakadari?
11 Ngo kusakurira mavonero akanaka. Asipi nguva jese tinokwanisa kucinja mugariro jedu, asi tingakwanisa kucinja mavonero edu. Kurangarijisisa mavonero anoita Mwari zvicatibesera kuva no mavonero akanaka ngo pamusoro po basa. Inga muezaniso, kudari muri musoro wo mbhuri, zivanyi kuti basa renyu, azvinenyi kuti rinovoniwa kuva ricikasisiri, irona rinoita kuti muwane zviro zvinodikana pa mbhuri yenyu. Ngo kudaro kukorondha mbhuri yenyu yamunoda asipi shwiro doko pa meso pa Mwari. Soko rake rinoti, wiya acikangwariri mbhuri yake “wakaxata mwoyo kupinda vacikatendi.” (1 Timoti 5:8) Kuziva kuti basa renyu i njira yo kuwana zvinodiwa—kukwanirisa muthwaro womakapuwa ndi Mwari, zvicamubesera kuva anodakara ngo basa renyu ngo kukwanirisa cinangwa cenyu, cidisiso co kuti kangaije vamweni vamunoshanda navo avacizivi.
12. Mu njira japi jotingakomborehwa ndijona ngo kuita basa mukuvangisira no kugondeka?
12 Ivanyi anovangisira zve anogondeka. Kushanda ngo simba no kujijira kuti tingaitisa kudini basa redu, zvingatipa makomborero akawanda. Vandhu vanoshanda ngo kuvangisira vanoreremejwa maningi ndi patarau wavo. (Mazwi Akangwara 12:24; 22:29) Inga maKristu okadi-kadi, tinodikanavo kuva takagondeka pa basa—ticikabi mare, zviro, kana nguva yo vatinoshandira. (VaEfeso 4:28) Inga zvatakavona mu cipauko cakapera, kugondeka kuna muviyo. Murekhi anogondeka kazinji anonyindhwa kana kugondhwa kamare. Pikija watinoshandira anovona muezaniso wedu wo kushanda ngo simba kana haiwa, zvingatipa mupocero wo kuva no ‘hana yakagondeka’ zve kuziva kuti tiri kudakajisa Mwari watinoda.—Vaheberi 13:18, Shanduro yeNyika Itsva; VaKolosi 3:22-24.
13. Muezaniso wedu wakanaka pa ndau yo basa nguva jimweni ungava no muviyo japi?
13 Ngo kuziva kuti mufambiro wedu ungakuja Mwari. Patinoramba tino mufambiro wakanaka wo ciKristu pa ndau yedu yo basa, vamweni vacazvivona. Ngo wapi ucazova muviyo? Mu njira iyi tinoita kuti “majijisiro a Mwari muponesi wedu akojwe.” (Tito 2:9, 10) Hina, mufambiro wedu wakanaka ungaita kuti vamweni vavone kudakaja ko kunamata kwedu, zve vacakwevejehwa ku manamatiro edu. Rangariranyi kuti maizozwa kudini kudari umwe wo munoshanda nae wotenda cokwadi ngo ndava yo mufambiro wenyu waushoni! Vonanyi izvi zvinosisira maningi: Ngo zvapi zvaizomupa mupfupo mukuru kupinda kuziva kuti mufambiro wenyu waushoni unokuja Jehovha zve unodakajisa mwoyo wake?—Verenganyi Mazwi Akangwara 27:11; 1 Pedru 2:12.
SHANDISANYI UNGWARU PA KUSANA BASA
14-16. Patinonga tiri kutema zvivaringo ngo pamusoro po basa, mubvunjo japi jatinodikana kuzviita?
14 Bhaibheri arisananguri zvese ngo pamusoro po basa ro kunyika rinotendehwa no ricikatendehwi. Izvi azvirevi kuti munodikana kutendera mushovo wese wo basa mucikazivi shwiro jinobatanijwemo. Matahwa angamubesera kusana basa rinopa muviyo, rakagondeka no rinodakajisa Mwari teciramba ria rinomunyangaja. (Mazwi Akangwara 2:6) Patinonga tiri kuda kutema civaringo ngo pamusoro po basa, pano mubvunjo mutatu jatinoda kuvona.
15 Kureva kuti basa iri pacaro aribataniji zviito zvinorambijwa ngo Bhaibheri here? Soko ra Mwari rinonyenya kamare kuba, kunyepa, zve kuita zvithombe. (Exodo 20:4; Maitiro o Vapostori 15:29; VaEfeso 4:28; Apokalipsi (Cakapangijihwa) 21:8) Itusu taizoramba kamare basa ringakumbira kuti tiite zviro zvakadaro. Rudo hwedu kuna Jehovha ahuzotisii kuti titendere basa rinobatanija zviito zvinophwanya mupango ya Mwari.—Verenganyi 1 Johani 5:3.
16 Kureva kuti kuita basa iri ndinonga ndecibesera kana kuti ndinonga ndecikhwijirija zviito zvakashata here? Vonanyi muezaniso. Kushanda inga muashiri wo varendo azvizivi kushata. Pikija zvakadaro, kudari muKristu wakapuwa basa ro kushandira pa nyumba yo uhomi inobviswa mimba? I zvokadi kuti basa rake arimukumbiri kuti ave acibesera kubvisa mimba kamare. Kana zvakadaro, amutendi kuti kushanda kwake uku kwaizobesera kushanda ko nyumba ino cinangwa co kubvisa mimba—cimwe co ciito cinorambijwa mu Soko ra Mwari here? (Exodo 21:22-24) Inga vandhu vanoda Jehovha, atidi kuita zviro zvinotisvejanisa no zviri mu matahwa.
17. (a) Ngozvapi zvimweni zvatinodikana kuvona patinotema zvivaringo ngo pamusoro po basa? (Vonanyi bhokiso riri pa pheji 177.) (b) Nguva jimweni hana yedu ingatibesera kudini kutema zvivaringo zvinodakajisa Mwari?
17 Mupinguro jo mubvunjo muzinji ngo pamusoro po basa jingawanika ngo kupopora kamare mubvunjo muviri jiri pa ndima 15 no 16. Mu kuengejera, pano zvimweni zvatinodikana kupsakisisa patinonga tecitema zvivaringo ngo pamusoro po basa. * Atidikani kuvetera kuti muranda wakagondeka atipe mutemo icazotibesera patinozowanana no mugariro uri wese. Apo ndipona panodikana ungwaru ku divi redu. Inga zvatakajija mu Cipauko 2, tinodikana kujijisa no kuroveja hana yedu ngo kujija kushandisa Soko ra Mwari mu upenyu hwedu hwo njiku ngo njiku. Kudari ‘ngo kushandisa’ tinoroveja ‘simba redu ro zwisiso’ hana yedu icazotibesera kutema zvivaringo zvinodakajisa Mwari zve zvinotitendera kuti tirambe tiri mu rudo hwake.—Vaheberi 5:14, Shanduro yeNyika Itsva.
RAMBANYI MUNA MAVONERO AKAEZANANA NGO PAMUSORO PO BASA
18. Ngenyi azvizivi kureruka kuramba takaezanana kumujimu?
18 Kuramba takaezanana kumujimu azvizivi kureruka mu ‘njiku jokupejisira’ jino jo kuti “kunozowanika mukuvo wokunesa.” (2 Timoti 3:1) Kuwana basa zve kuramba uripo cingava cineso cikuro. Inga maKristu okadi-kadi, tinoceuja kusisira ko kushanda ngo simba kuitira kusapota mbhuri yedu. Asi kudari itusu tikatama kungwarira, kuvangirijwa kwatinoitwa ku ndau yatinoshandira kana uvori unonangwa mu nyika ngo pamusoro po zvo kunyama zvingaghwinira mu kuvangisira kwedu kumujimu. (1 Timoti 6:9, 10) Waro ngatende tivone kuti tingaramba kudini takaezanana, ngo “kusana ibzo bzinodikana.”—VaFilipi 1:10.
19. Ngenyi Jehovha anofanira kuthemba kwedu kwakakwana, zve kuthemba uku kunotibesera kuti titize cinyi?
19 Thembanyi Jehovha zvakakwana. (Verenganyi Mazwi Akangwara 3:5, 6.) Amutendi kuti tinofanira kuthemba Jehovha here? Kunja kwa izvi, iyena anotikorondha. (1 Pedru 5:7) Iyena anoziva zvatinoda kupinda itusu pacedu, zve nyara yake aizivi kufupika. (Nduyo 37:25) Ngo iyo ndava tinodikana kuzwisisa Soko rake pa ciceukijo co kuti: “Mucatenda kukweviwa mecidisisa upfumi. Dakaranyi ngo bzo munabzo. Mwari wakati: ‘Andicakuregeri wega nokuti kukusia.’” (Vaheberi 13:5) Vazinji vari kushanda mu nguva yakazara vanokwanisa kunanga kuti Mwari anopa zvinodikana mu upenyu hwavo. Kudari tikathemba zvakakwana Jehovha acazotingwarira, tozotiza kuthimwa-thimwa kwese ngo pamusoro po kungwarira mbhuri yedu. (Mateu 6:25-32) Atizotenderi kuti basa ro munyika ritiitise kuti tive tecirerusa mabasa o kumujimu, akadari inga o kucumaera masoko akanaka no kwenda ku musongano.—Mateu 24:14; Vaheberi 10:24, 25.
20. Zvinonangenyi kuramba tino jiso rakanaka, zve mungazviitisa kudini?
20 Rambanyi muno jiso rakanaka. (Verenganyi Mateu 6:22, 23.) Kuva no jiso rakanaka zvinoreva kuramba ticikaremesi upenyu hwedu. Jiso ro muKristu rakanaka rino cinangwa cimwe basi—kuita zvinodiwa ndi Mwari. Kudari jiso redu rakanaka, atizotambujiki ngo kupsaka basa rinopa mare zinji zve upenyu hwo mutambarare. Nopadoko hapo atizotohwi mwoyo ngo zviro zvabva kubudiswa wari zve zviro zvokunyama zvakadakaja maningi zvatingarangarira kuti tinozvida kuti tive no mudakaro. Mungaitisa kudini kuti muve no jiso rakanaka? Rambanyi kuremesa upenyu hwenyu ngo magava acina basa. Regeranyi kuzviwanjira zviro zvingamupejera maningi nguva zve zvinoda kundovoniwa-voniwa nguva jese. Purutananyi mbhangiro yo Bhaibheri kuti muve no mudakaro ngo kuva no ‘zvokuha no zvokusimira’. (1 Timoti 6:8) Ejanyi kurerusa upenyu hwenyu kudari ngo zvomunokwanisa.
21. Ngenyi tinodikana kuva no zvotinodira pakutanga, zve cicinyi cinodikana kuva pakutanga mu upenyu hwedu?
21 Diranyi pokutanga zvo kumujimu no kuzvibatisisa. Zvecivoneka kuti simba redu no zvotinokwanisa zvina pozvinogumira, tina zvotinodikana kudira pokutanga. Ngo divi rimweni, taizoruza mukuvo una mutengo mukuru ngo zviro zvicikasisiri maningi, ticisiya pamutivi zviro zvinosisira maningi. Ngocapi cinodikana kuva pokutanga mu upenyu hwedu? Vazinji mu nyika ino, vanodira po kutanga kujija maningi kuitira kuti vawane basa rinovawanisa mare yakawanda mu mugariro uno. Asi, Jesu wakakohomeja vateveri vake kuti “ambanyi kupsanga Umambo.” (Mateu 6:33) Hina, inga maKristu o cokwadi, tinodira Umambo hwa Mwari pokutanga mu upenyu hwedu. Mararamiro edu—zvotinokheta, zvivaringo zvotinotema no mabasa otinoita—zvinodikana kutatija kuti zvinodiwa zvo Umambo no kuda kwa Mwari zvinosisira maningi kotiri kupinda kukaya-kaya ngo zvokunyama no zviro zviri mu nyika.
KUSHANDA NGO SIMBA MU MUSHANDO
Tingatatija rudo hwedu kuna Jehovha ngo kudira basa ro kucumaira pakutanga mu upenyu hwedu
22, 23. (a) Ngorapi basa guru ro maKristu o cokwadi, zve tingatatijisa kudini kuti basa iri rinosisira maningi kotiri? (Vonanyi bhokiso riri pa pheji 180.) (b) Ngocapi civaringo cenyu ngo pamusoro po basa ro kunyika?
22 Kuziva kuti tiri kurarama mu mukuvo wo kupejisira, zvinotiitisa kuti tisotesese basa guru ro maKristu o cokwadi—kucumaira no kuita vajiji. (Mateu 24:14; 28:19, 20) Inga Muezaniso wedu, Jesu, tinoda kuva takabatikana pa basa rinoponesa upenyu. Tingatatijisa kudini kuti basa iri rinosisira maningi kotiri? Vazinji vo vandhu va Mwari vanojipira kuti vacumaire ngo mwoyo wese inga vacumairi vo ungano. Vamweni vakanasirira zviro zvavo kuti vashande inga mapiyona kana mamisionario. Vaciziva kusisira ko zvido zvo kumujimu, vabari vazinji vanovangisa vana vavo kuti vanghwine mu basa ro nguva yakazara. Vatokotesi vo Umambo vanovangisira, vanowana mudakaro ngo kushanda kwavo ngo simba mu kucumaira here? Ndizvona, vanodakara! Kushandira Jehovha ngo mwiha wese zvokadi i njira yo kubusa upenyu, mudakaro no makomborero acikaverengeki.—Verenganyi Mazwi Akangwara 10:22.
23 Vazinji vedu vanopeja nguva yakareba mu mabasa o kunyika kuitira kupa zvinodiwa ku mbhuri yedu. Rangariranyi kuti Jehovha anoda kuti tiwane mudakaro ngo kushanda kwedu ngo simba. Ngo kuzwiranisa murangariro no zviito zvedu no mavonero no zviambi zvake, tingawana mudakaro mu basa redu. Waro, ngative no cisungo co kutama kutendera kuti basa redu ro kunyika ricatiphinga pa basa redu guru—ro kutokotesa masoko akanaka o Umambo hwa Mwari. Ngo kudira pakutanga basa iri mu upenyu hwedu, tinotatija rudo hwedu kuna Jehovha zve ngo kudaro tinoramba tiri mu rudo hwake.
^ ndim. 6 Gama ro ciGiriki rakasandujwa kuti “muvezi” rinonangwa kuti “i manangiro anonangira mundhu anoceca matabwa, kuvaka nyumba no zvimweni zvinoitwa ngo matabwa.”
^ ndim. 17 Kuitira kuwana zvizinji zvinobhuya ngo zviro zvimweni ngo pamusoro po basa, vonanyi Murindiri wo 15 ya Nyahwiriri , 1999 (mu ciShona) pa mapheji 28-30, zve 15 ya Khunguru, 1982, pheji 26.
