1-3. (a) Kangaije Nduyo 147 yakatahwa rini? (b) Zvijijo zvapi zvotinowana ngo kujija Nduyo 147?

KAZINJI tinosimba mundhu paanonanga kana kuita ciro cinotidakajisa. Tinondundihwavo maningi kuti tisimbe Jehovha Mwari. Tinomusimba ngo kukura ko simba rake, kotinovona mu zvisikwa zvake zvinoshamaisa, tinomusimbazve ngo kukura ko rudo hwake kotiri, hwotinovona ngo mupiro wo kujipira wakaitwa ngo Mwana wake.

² Potinoverenga Nduyo 147, zvinotijekera kuti mutari wayo wainga no cido cakakura co kusimba Jehovha. Wakavangisavo vamweni kuti vasimbe Mwari nae.—Verenganyi Nduyo 147:1, 7, 12.

³ Atimuzivi kuti ndiyani wakatara Nduyo 147. Asi kangaije mutari wakona wakararama pa mukuvo wakahwirira vaIziraeri Jerusarema, Jehovha naavasujunura kubva Bhabhironi. (Nduyo 147:2) Mutari wo nduyo uu wakasimba Jehovha ngokuti vandhu Vake vakakwanisazve kunamata vari mu nyika yavo. Perepo, mutari wo nduyo wakapa mathangwe akawanda  o kuitira kusimba Jehovha. Ngoapi akona? Zve ngoapi mathangwe omunao kuti mumimire kuti “Aleluya!,” kana “Simbanyi” Jah?—Nduyo 147:1.

4. VaIziraeri vaidikana kujizwa kudini Mambo Siro paakavasujunura, zve ngenyi?

⁴ Rangaranyi kuti vaIziraeri vakajizwa kudini povaenga ku usungwi mu Bhabhironi. Vakavatoraro vaivaseka vacinanga kuti: “Tiimbirenyi ndumbo jo Sioni!” Asi avaicanga no cido co kuimba. Jerusarema, thangwe guru rinovadakajisa, rainga raparajwa. (Nduyo 137:1-3, 6) Mwoyo yavo yaenga yakhuvazika zve vaida kutondhojwa. Asi Jehovha wakabesera vandhu vake inga zvaakananga mu Soko rake. Wakazviitisa kudini? Siro Mambo wo Persia wakanyisa Bhabhironi zve wakananga kuti Jehovha “wakandituma kuti ndimuvakire Nyumba mu Jerusalema.” Siro wakabvunjazve vaIziraeri kuti “ariwese wenyu ari wo jinja rake, Mwari wake ngaave naye, ngaaendeyo.” (2 Kronike 36:23) Izvi zvaidikana kutondhoja maningi vaIziraeri mu Bhabhironi.

5. Mutari wo nduyo wakanangenyi ngo pamusoro po simba ra Jehovha ro kutirapa?

⁵ Jehovha aazivi kutondhoja jinja ro Iziraeri basi, asi wakatondhojavo muIziraeri umwe na umwe. Jehovha anotiitiravo zvondhozvo nyamasi uno. Mutari wo nduyo wakananga kuti Mwari “anorapa vano mwoyo yakaguhwaguhwa, anotaja maonje avo.” (Nduyo 147:3) Potinonga ticihwaja kana potakati khurududu, tinova no gwinyiso rokuti Jehovha anotitaja. Iyena anoda maningi kutitondhoja no kupeja mazwiro o kuhwajihwa atinonga nawo. (Nduyo 34:19; Isaia 57:15) Jehovha anotipa ungwaru no simba kuitira kuti tikwanise kuhwisana no zvineso zviri zvese zvotingawanana nazvo.—Jakobo 1:5.

6. Tinobesereka kudini ngo masoko ari pa Nduyo 147:4? (Vonanyi pikica yo kutanga.)

⁶ Tevere, mutari wo nduyo wakasota mugore zve wakananga kuti Jehovha “anoverenga uwandu hwo nyereji” zve “anojidanija imwe nga imwe ngo zina rayo.” (Nduyo 147:4) Mutari wo nduyo waikwanisa kuvona ndhondho, asi aaciziva kamare kuti kuna ndhondho ngana. Nyamasi uno, masientista anoziva kuti mu cikwata co ndhondho cotinovona cina mabhiriau ajo. Kangaije kumatenga kuna mabhiriau o zvikwata zvo ndhondho! Musiki anokwanisa kuverenga ndhondho jese, asi vandhu avazvikwanisi. Iyena anonasa kuziva ndhondho imwe na imwe zve wakajidura mazina. (1 VaKorinto 15:41) Mwari, anozivaya panowanika ndhondho imwe na imwe, anomuzivavo. Mukuvo wese anonasa kuziva kuti muri kwapi, muri kujizwa kudini zve ngozvapi zvomunotama.

7, 8. (a) Jehovha anozwisisenyi ngo pamusoro pedu? (b) Ipanyi muezaniso unokhombija kuti Jehovha anozwira pena.

⁷ Jehovha anozwisisa zvomuri kusongana  nazvo zve ana simba ro kumubesera pa zvineso zvenyu. (Verenganyi Nduyo 147:5.) Mungajizwa kuti mugariro wenyu unonesa maningi zve amukwanisi kuhwisana nao. Mwari anozwisisa zvoticikakwanisi zve “anocereceja kuti tiri bukuta.” (Nduyo 103:14) Tinondhoposa condhoco-condhoco ngokuti atizivi kukwana zve tingatocamwa. Tinojidemba maningi patinovona kuti tananga zvaticaidikana, tava no zvido zvakashata kana taita ushanje. Jehovha aana paripese paakarembera, asi anonasa kuzwisisa mazwiro otinao.—Isaia 40:28.

⁸ Makajizwavo kuti nyara yakavanga ya Jehovha yakamuvangisa pa zvineso zvenyu here? (Isaia 41:10, 13) Izvi ngo zvakaitikira Kyoko, imwe hambzaji iri piyona. Pakacinjwa kuenda ku ungano imweni, waicamwa maningi. Waro, Kyoko waizvizivisa kudini kuti Jehovha waizwisisa zvineso zvake? Mu ungano yaakaendaro, maenga no vandhu vakawanda vaizwisisa mazwiro ake. Iyena wakajizwa kuti Jehovha waimubvunja kudari: “Ndinokuda, kuciripi basi ngokuti uri piyona, asi ngokuti uri mwana wangu zve wakajipira kondiri. Ndinoda kuti ubuse upenyu hwako inga umwe wo zvapupu zvangu.” Jehovha wakatatijavo kudini komuri kuti “uzivi hwake ahupimiki”?

9, 10. Jehovha anozotibesa ngo njira yapi inosisira maningi? Ipanyi muezaniso.

⁹ Tese tinoda zvokuha, zvokusimira no pokugara. Kangaije mungathya kuti amuzowani zvokuha zvinokwana. Asi Jehovha wakaita nyika kuti ibudise zvokuha kuitira zviro zvese zvinopona, pikija no “maphwiphwi” o gunguhwe anorira zvokuha. (Verenganyi Nduyo 147:8, 9.) Kudari Jehovha anopa zvokuha magunguhwe, tinova no gwinyiso rokuti anozotipavo zvinodiwa zvedu zvokunyama.—Nduyo 37:25.

¹⁰ Cinosisira maningi ngo cokuti Jehovha anotipa zvotinoda kuti tirambe tina gonda rakavanga, zve anotipa “rugarisiko hwa Mwari hunopinda uzivi hwese.” (VaFilipi 4:6, 7) Hama imweni inodanijwa Mutsuo no mukaji wayo vakavona kuti Jehovha wakavabesa maningi. Pakaitika tsunami ku Jhapau mu gore ro 2011, ivona vakapona ngo kukhwira padenga ro nyumba yavo. Pa njiku yondhoyo vakaruza zvese zvovaenga nazvo. Vakapeja usiku hwese vari mu kwaratu ina cidima zve inotondhora yo andari yocipiri yo nyumba yavo. Comangwanani, vakapsaka ciri cese caizovavangisa. Wakawana basi Anuário das Testemunhas de Jeová de 2006. Mutsuo paaipetenyura, wakawana musoro wokuti “Os maiores tsunamis já registrados.” Divi iro raibhuya ngo pamusoro po kuzungunyika ko nyika kwakaitika Sumatra mu gore ro 2004. Mutsuo no mukaji wake vairira maningi povaiverenga zvakaitikari ku hama no hambzaji javo. Vakajizwa kuti Jehovha waivapa vangiso yovaida kamare. Jehovha wakavasapotazve ngo njira jimweni. Hama javo jo divi rimweni ro Jhapau jakavapa zvokuha no zvokusimira. Asi kufambihwa kwakaitwa ungano yavo ngo hama jatumwa ngo sangano ra Mwari ngo kwakavavangisa maningi. Mutsuo wakati: “Ndaijizwa kuti Jehovha ari pamutivi po umwe na umwe wedu zve waititaja. Izvo zvinotondhoja maningi kamare!” Mwari anotanga kutipa zvotinoda  kuti gonda redu rigare rakavanga, tevere wotiitira zvotinoda zvo kunyama.

11. Tinodikana kuitenyi kuti tibesereke ngo zvaanotiitira Mwari?

¹¹ Jehovha anongwarira varombo kana vakapfava. Anotida zve mukuvo wese wakanasiririka kuti atibesere. (Nduyo 147:6a) Waro tingabesereka kudini? Tinodika kuva no ushamwari hwakavanga nae. Kuti tive naho, tinodikana kuva vakapfava. (Sofonia 2:3) Vakapfava vanovetera Jehovha kuti apeje kutama kururama kurikwese no matambujiko ovanao. Jehovha anovatendera.

12, 13. (a) Tinodikana kunyenya cinyi kuti tibesereke ngo zvaanotiitira Mwari? (b) Mbaani vanodakajisa Jehovha?

¹² Ngo divi rimweni, Mwari “anododokesa pasi vakaxata.” (Nduyo 147:6b) Atidi kuti  izvi zviitike kotiri. Tinoda kuti Mwari atikombijire rudo hwake hwakagondeka. Ngokudaro, tinodikana kunyenya zvaanonyenya. (Nduyo 97:10) Inga muezaniso, tinodikana kunyenya uhure. Izvi zvinoreva kuti tinodikana kunyenya ciricese cinotikwevejera kuti tiite uhure, kubatanijavo no zvoumitu-umitu. (Nduyo 119:37; Mateu 5:28) Zvingatoita hondo yakakura, asi kuvangisira kunobesera ngokuti tikadaro tinozoashira makomborero a Jehovha.

¹³ Atikwanisi kuhwa pa hondo iyi tega. Tinodikana kuthemba Jehovha. Waro anozodakara kudari tikathemba simba ro vandhu here? Haiwa, Jehovha “aadakajihwi ngo simba ro haci.” Tinodikana kuthemba simba redu kana ro vamweni here? Jehovha “aadakajihwi ngo simba ro mundhu.” (Nduyo 147:10) Kusiapo izvo, tinodikana kuramba teciita mukumbiro kuna Jehovha no kumudeketerera kuti atisujunure mu marembo edu. Jehovha aazorembi kuzwa mukumbiro iji. “Mwari anodakajihwa ngo vanomuthya, vanovetera rudo hwake.” (Nduyo 147:11) Tinoziva kuti Jehovha anozoramba acitibesera kuti tinyise zvido zvedu zvakashata ngokuti wakagondeka zve anotida.

14. Mutari wo ndhuyo waenga no gwinyiso renyi?

¹⁴ Jehovha anotigondesa kuti anozotibesera potinowanana no zvineso. VaIziraeri povakahwirira Jerusarema, mutari wo nduyo wakarangarira ngo pamusoro pokuti Jehovha wakavabesa zvakadini. Iyena wakaimba kudari: Anovangisa “mugogo yo musuvo yako,” anokomborera ‘vana vako vari mukati mako; anopa kunyarara ku mugano yako.’ (Nduyo 147:13, 14) Mutari wo nduyo wakajizwa kungwaririka ngo kuziva kuti Jehovha anozovangisa mugogo yo musuvo wo dhorobha. Izvo zvakamuthembesa kuti Jehovha anozojivirira vandhu vake.

15-17. (a) Tingajizwa kudini ngo pamusoro po zvineso zvedu pa kufamba ko nguva, asi Jehovha anoshandisa kudini Soko rake kuti atibesere? (b) Ipanyi muezaniso unokhombija Soko ra Mwari “rinogogomesesa” kudini kuti ritibesere.

¹⁵ Mungathimwa-thimwa ngo ndava yo zvineso zvenyu, asi Jehovha anotipa  ungwaru hwo kuhwisana nazvo. Mutari wo nduyo wakananga kuti Mwari “anotumira muthetho yake mu nyika, izwi rake rinogogomesesa.” Wakanangazve cando, veto no mapuwe o nvura, wobvunjisa kudari: ‘Pambeji po kutondhora kwazvo ndiani anopacijikira?’ Tevere wakananga kuti Jehovha “Anotumira izwi rake, kutondora kunopera.” (Nduyo 147:15-18) Mwari wedu anoziva no kukwanisa zvese, kuvonerera nvura yo mapuwe no cando, anokwanisa kamare kunyisa cineso cedu.

¹⁶ Nyamasi Jehovha anotitungamirira ngo Soko rake, Bhaibheri. Mutari wo nduyo wakananga kuti soko ra Jehovha “rinogogomesesa” kuti ritibesere. Mwari anotitungamirira ngo kukasika zve panguva kwayo kamare. Rangariranyi kuti makabesereka kudini ngo Bhaibheri, mabhuku anobudiswa ngo “muranda wakagondeka no wakangwara,” JW Broadcasting, jw.org, vakuru vo ungano no hama no hambzaji jenyu. (Mateu 24:45) Makavona mu upenyu hwenyu kuti Jehovha anokasikira kumutungamirira here?

¹⁷ Hambzaji imweni inodanijwa Simona wakazvivona kamare kuti Soko ra Mwari rakamubesera kudini. Hambzaji iyi yaijizwa icikashandi, zve yaikarangarira kuti Jehovha aacaiikarira. Asi yakaramba icikumbira kuna Jehovha, icimudeketerera kuti imubesere poyaicamwa. Wakarambazve acijija Bhaibheri. Simona wakananga kuti “andito ndava pa mugariro wondicikavoni Jehovha acindivangisa no kunditungamira.” Izvi zvakamubesera kuti ave no mavonero aushoni.

18. Ngenyi munojizwa kuti Jehovha ari phedo na imwimwi, zve mathangwe api omunao kuti Musimbe Jah?

¹⁸ Mutari wo nduyo waizviziva kuti Jehovha wakasana vaIziraeri vokare kuti vave vandhu vake pa majinja ese aigara panyika. Vaenga vega basi vakaashira “izwi” kana soko ra Mwari no “matongero” ake. (Verenganyi Nduyo 147:19, 20.) Nyamasi uno tina rukujo hukuru hwo kudanijwa ngo zina ra Mwari. Tinodakara maningi ngokuti tinomuziva, tina Soko rake kuti rititungamirire zve tina ushamwari hwo cika ndicikevo nae. Mukuezana no mutari wo Nduyo 147, muna mathangwe akawanda okuti Musimbe Jah! no kuvangisa vamweni kuti vazviitevo.