Cido asipi ciro caungarangarira kuti zvaizova zvaushoni kudari caitika haco. Kuti cido cokadi cikwanirisike, tinodikana kuva no urongwa, kushanda ngo simba no kushandisa njira jakasiyana-siyana.

Zvido zvedu zvingava zvo njiku nganani, sumana, mweji kana makore. Kukwanirisa zvido zvo nguva shomani kunobesera kuti tikwanirise zvido zvo nguva yakareba.

Kukwanirisa zvido zvenyu kunoita kuti muve mundhu anojithemba, anovangisa ushamwari hwake no anoengejera mudakaro.

Kujithemba: Kudari makakwanirisa zvido zvidoko, munozothemba kuti munozokwanirisavo zvido zvikuru. Cimwenizve, munozokwanisa kucijikira zvineso zvo njiku no njiku, zvakadari inga kuvangirijwa ngo vadoni vo kushikora.

Ushamwari: Vandhu vanodakarira kutamba no vandhu vano zvido mu upenyu no vanoshanda ngo simba kuti vazvikwanirise. Inga muezaniso, kudari mukashanda no mundhu ano cido cakafanana no cenyu, zvinozovangisa maningi ushamwari hwenyu.

Mudakaro: Kudari imwimwi mukakwanirisa zvido zvenyu, munozodakara.

“Inini ndinodakarira maningi kuva no zvido. Izvona zvinoita kuti ndive no basa nguva jese. Paunokwanirisa cido cako, zvaushoni kumboima, wojivhunja kudari, ‘ndaita zvandainga ndecida.’”—Kristoferi.

BHAIBHERI RINOTI: “Ndiani anogara ecirinda mbhepo, aatongozokusi; ndiani anogara ecirinda makwiti, aatongozokotori.”—Mucumaeri 11:4.

Kuti muve no zvido no kuzvikwanirisa, itanyi zviro zvinotevera.

Sananyi zvido zvamunodaro. Itanyi rista yo zvido zvamunoda kukwanirisa. Perapo, sananyi kuti ngocapi camunoda kukwanirisa pakutanga.

Itanyi urongwa. Pa cido cimwe nga cimwe, itanyi zvinoteverari:

• Gajanyi njiku yamunoda kucikwanirisa.

• Itanyi urongwa wo manera amunodikana kuzvikwanirisa.

• Rangariranyi ngo zvineso zvingavepo no manera okuzvinyisa.

Tanganyi kuita ciri cese. Imwimwi amudikani kuita urongwa wo zvese zvinobatanijwepo mucito matanga kuita ciri cese. Jivhujisenyi kudari: ‘Ngocapi ciro cokutanga candinodikana kuita kuti ndikwanirise cido cangu?’ Tanganyi maita ciro cokutangeco, perapo moita zvinotevera.

BHAIBHERI RINOTI: “Murangariro yo mundhu ano hwiru, inozisa upfumi.”—Mazwi Akangwara 21:5.