1, 2. Ngenyi Zvapupu zva Jehovha zvino ndhungamiriro jinofanera ngo pamusoro po masimirire? (Vonanyi pikica yo kutanga.)

JHORONARI rimweni ro ku Horanda rakasanangura masimirire o vatungamiriri vo ciara pa musongano javo. Irona rakati: ‘Waivona vandhu vakasimira ngo maitiro o kujiregejera, maningi-ningi mu nguva yo kupisa.’ Asi, Jhoronari rondhoro rakananga kuti andiopi masimirire aiita Zvapupu zva Jehovha pa gungano razvo ro Mutundhu. Irona rakaripota kuti majaha no vanarume vainga vakasimira kazako no kusunga mathai zve vasikane no vanakaji vainga vakasimira saya jakareba ushoni, pikija jiri jo mazuva ano. Zvapupu zva Jehovha kazinji zvinobongwa ngo masimirire azvo. Mupostori Pauro wakananga kuti nguvo jinodikana kusimihwa, ngo jinodikana kukhombija “kujibata no ureremejo,” zvinosisira ku vashandiri va Mwari. (1 Timoti 2:9, 10) Pikija kuti Pauro waibhuya ngo vanakaji, ndhungamiriro yake ndiyona yondhoyo kuitira vanarume.

² Inga vandhu va Jehovha, ndhungamiriro jo masimirire jinosisira maningi kotiri, zve jinosisiravo kuna Mwari watinonamata.  (Genesi 3:21) Bhaibheri rinojekesa kuti Jehovha, Mukuru-kuru wo kudenga no pasi, ano mutemo jo masimirire anodikana kuitwa ngo vashandiri vake. Ngo kudaro, zvatinokheta kusimira azvidikani kudakajisa itusu basi, asi pa kutanga, zvinodikana kudakajisa Tenji wedu Mukuru-kuru Jehovha.

3. Tingajijenyi mu Mutemo wa Mwari ngo pamusoro po masimirire o vaIziraeri?

³ Mu mutemo wa Mosi, mwainga no mutemo jaijivirira vaIziraeri ku mufambiro wakashata wo vatano jaikhombijwa ngo vandhu vo majinja aivatendeneja. Mutemo waivonesa kuti Jehovha wairamba kamare masimirire ainga acikakhombi musiyano wakajeka kuti uwu mwanarume zve uwu mwanakaji. Nyamasi uno, mushovo wo nguvo ucikanasi kukhombija kuti uwu i mwanakaji kana mwanarume unodanijwa kuti muthapa unoshanda ku mwanarume no mwanakaji. (Verenganyi Deuteronòmio 22:5.) Kubvira pa Mutemo uwu tingakwanisa kuziva kuti Jehovha aadakajihwi ngo masimirire anoita kuti mwanarume avoneke inga mwanakaji, mwanakaji avoneke inga mwanarume, kana kuti masimirire anoita kuti zvinese kuvona musiyano wo mwanarume no mwanakaji.

4. Zvicinyi zvingabesera maKristu kutema civaringo ngo pamusoro po masimirire?

⁴ Zviambi zvo Bhaibheri zvingatibesera kutema zvivaringo ngo pamusoro po masimirire. Izvona zvingatibesera zvicinenyi dangani mugariro wo kunja unonga wakadini kana ngo wapi mugariro wedu. Azvirevi kuti tinodikana kuva no rista yakareba yo nguvo jinotendehwa no nguva jicikatendehwi kusimira. Zvatinodikana kuita basi ngo zvo kutevera zviambi izvi, izvo zvinoramba zvecititendera kusimira nguvo jatinoda. Ngativone zviambi zvinganani zvo mu Bhaibheri zvingatibesera kuvona kuti “ngo kwapi kuda kwa Mwari, ngo capi cauxoni, cinodakaja no cakaperera” patinotema civaringo cokuti tinosimirenyi.—VaRoma 12:1, 2.

5, 6. Masimirire edu angapsasa kudini vamweni?

⁵ Mupostori Pauro wakafemehwa kuti anange kusisira ko ciambi cinowanika pana 2 VaKorinto 6:4, Shanduro yeNyika Itsva. (Verenganyi.) Masimiriro edu anonanga zviri zvese ngo pamusoro pedu, zve vamweni vangaumba mavonero avo ngo pamusoro pedu. (1 Samueli 16:7) Zvecivoneka kuti tiri vashandiri va Mwari, atidikani basi kusimira zvinotidakajisa kana zvatinoda. Patinoshandisa zviambi zvo Bhaibheri, zvinodikana kutibesera kuti tisiye kusimira nguvo jakapsinya, jinovonekera, kana jinomusijira zvido zvo vatano. Izvi zvinoreva kuti tinodikana kusiya kamare nguvo jinovonesa magariro o mativi akafisika o muviri wedu. Akuna anodikana kujizwa ecipseruka kana kuvangijihwa kusota pa mutivi ngo kuvona masimiriro otakaita.

⁶ Patinonga takarongeka, takacena, takanema ushoni zve nguvo jedu jakaezanana, vandhu vangatireremeja maningi inga vashandiri va Tenji Mukuru-kuru Jehovha. Zve ivona  vangada kuziva ngo pamusoro pa Mwari watinonamata, kureremeja maningi sangano redu, zve vangazodakarira masoko edu anoponesa.

7, 8. Ndi rini patinodikana kusimira nguvo jinofanera?

⁷ Tinodikana kusimira ushoni ngo ndava yo zigava ratinaro na Mwari wedu wakacena, hama no hambzaji jedu jo ciKristu no vandhu vatinocumaera. Zigava iri ngo ro kusimira ngo maitiro anokuja Jehovha no masoko atinocumaera. (VaRoma 13:8-10) Zvatinosimira zvinosisira patinonga tecienda ku musongano jo ciKristu kana patinocumaera. Tinodikana kusimira ngo maitiro anofanera ku vandhu vanonamata Mwari. (1 Timoti 2:10) Zvokadi, nguvo jimweni jingafanera kusimihwa ku ndau imweni jotama kufanera ku ndau imweni. Asi azvinenyi ngo kwapi kwatinoraramira, inga Zvapupu zva Jehovha atidikani kukhugunya vamweni ngo masimiriro edu.

⁸ Verenganyi 1 Korinto 10:31. Patinoenda ku magungano o mutundhu no o ndharaundha, nguvo jedu jinodikana kuva jinofanera zve jakaezanana. Atidikani kutevejera masimiriro akashatisisa anowanikari maningi mu nyika ino. Pikija urongwa hwo gungano hucito hwatanga kana hwapera zve kudari tiri pa  hotera kana kuti kunja kwayo, tinodikana kuva no gwinyiso ro kuti atizivi kusimira ngo maitiro o kujiregejera. Tikasimira ushoni, atizopseruki kujizivisa kuno vamweni inga Zvapupu zva Jehovha, zve tinozova takasujunuka kuti tipe ucapupu pa nguva iri yese.

9, 10. Ngenyi VaFilipi 2:4 inodikana kutipsasa pa kukheta nguvo?

⁹ Verenganyi VaFilipi 2:4. Ngenyi tinodikana kurangarira kuti nguvo jedu jinopsasa kudini  hama no hambzaji jedu? Thangwe rimwe ngo ro kuti vandhu va Mwari vanovangisira maningi kuti vabatisise mbhangiro iyi: ‘Ngo kudaro urayanyi mativi o muviri jenyu jiri pa nyika ngo pamusoro po uhure, zviro zvicikazivi kucena, cido co kuvatana.’ (VaKolosi 3:2, 5, Shanduro yeNyika Itsva) Hama no hambzaji jedu jimweni jakasiya kare uhure, asi jiciri kuhwisana no zvido zvakashata. Kudari tikatama kubhasopa, masimirire edu anozoita kuti zvinyanye kuvanesera kutevejera mbhangiro yo Bhaibheri no kuhwisana no zvido zvakashata. (1 VaKorinto 6:9, 10) Itusu atidi kuti vakonehwe kuhwisana no zvido izvi, andizvopi?

¹⁰ Patinonga tiri no hama pomwe no hambzaji jedu tinonga takabvikirika ku vandhu vano mufambiro wakashata. Masimiriro edu anodikana kuita kuti kuva kwedu pamwepo inga hama kurambe kwakacena, patinonga tiri pa musongano jo ungano kana ciitiko cimweni. Pikija tino rusujunuko hwo kukheta zvatinoda kusimira, tinodikana kuziva kuti tinovetehwa kuti tisimire nguvo jinoitisa kuti vamweni vatame kunesehwa kuramba vano murangariro, magama, no mufambiro wavo wakacena pamberi pa Mwari. (1 Pedru 1:15, 16) Rudo hwo kadi-kadi “ahuiti bzicikadiki, ahupsangi kuda kwahwo.”—1 VaKorinto 13:4, 5.

11, 12. Mucumaeri 3:1, 17 inotibesera kudini kuva vakaezanana pa kukheta nguvo?

¹¹ Vashandiri va Mwari pavanotema civaringo co kuti vanosimirenyi, vanoziva kuti “mixando yese ino ngari yayo.” (Mucumaeri 3:1, 17) Kusiyana ko mugariro wo kunja, ko mukuvo, mararamiro, zve mugariro zvingapsasa masimirire edu. Asi ndhungamiriro ja Jehovha ajicinji.—Malakia 3:6.

¹² Mu nguva yo cirimo, zvinganesa maningi kuramba tino nguvo jinoreremejeka zve jakaezanana. Hama no hambzaji jedu jinodakara maningi tikatama kusimira nguvo jicikapsinyi kana jakashama maningi jinovonesa zvicikadikani kuvoniwa. (Jobe 31:1) Zve, kudari tiri kwenda kobumira ku paraia kana ku pisina, nguvo jatinobumwira najo jinodikana kuva jakanaka. (Mazwi Akangwara 11:2, 20) Pikija vazinji mu nyika vanokheta kusimira nguvo jo kubumwira najo jinovonekera, itusu tinodikana kuva no cokwadi co kuti kukheta kwedu kunodikana kukuja Mwari wedu wakacena, Jehovha.

13. Ngenyi mbhangiro inowanika pana 1 Corinthians 10:32, 33 inodikana kubatanijwa pa makhetero edu o nguvo?

¹³ Kuno ciambi cimweni cinosisira maningi cotinodikana kubatanija pakukheta nguvo. Tinodikana kungwarira maningi kuti titame kukhugunya hana jo vamweni. (Verenganyi 1 VaKorinto 10:32, 33.) Zvinovetehwa kuti itusu kamare tikhete nguvo jicikakhungunyi hama no hambzaji jedu pomwe no vaya vacishandiri Jehovha. Mupostori Pauro wakatara kudari: “Umwe nga umwe ngaapsake kudakajira vadoni ngo bzauxoni, kuti vavange.” Iyena wakaengejera thangwe rakona: “Kristu aazivi kupsakavo bzo kujidakajira.” (VaRoma 15:2, 3) Inga ndi Jesu, tinodikana kuvona kuita kuda Mwari no kubesera vamweni inga zviro zvinosisira maningi kupinda zvido zvedu. Ngo kudaro, itusu atizosimiri mushovo wo nguvo watinoda asi unoita kuti vandhu vatame kupurutana masoko edu.

14. Vabari vangarovejesa kudini vana vavo kuti vakuje Mwari ngo masimiriro avo?

¹⁴ Vabari vo ciKristu vano mutoro wo kujijisa vana vavo kutevera zviambi zvo mu Bhaibheri. Izvi zvinobatanija kuva no cokwadi co kuti ivona no vana vavo vari kudakajisa Mwari ngo masimiriro no manemero avo. (Mazwi Akangwara 22:6; 27:11) Vabari vangarovejesa kudini vana vavo kuti vareremeje Mwari wedu wakacena no zviambi zvake? Ngo kugaja muezaniso wakanaka kuno vana vavo. Zve ivona vanodikana kujijisa vana vavo ngo rudo hwese kuziva kuti vangaitisa kudini kuti vawane nguvo jakanaka zve vangajiwanira kwapi. Vana avadikani kukheta nguvo jinodakajisa ivona pacavo basi, asi vanodikana kukheta nguvo maningi-ningi ngo kuti jinokuja Jehovha, Mwari wovanoimirira.

15. Cicinyi cinodikana kutibesera kutema zvivaringo zvo ungwaru?

¹⁵ Bhaibheri rino ndhungamiriro jinoshanda jingatibesera kutema zvivaringo zvo ungwaru zvinozokuja Mwari. Pikija zvakadaro, zvatinosimira zvinovonesa kuti ngo zvapi zvatinodakarira. Mukhaindi wo nguvo jatinokwanisa kutenga ungava wakasiyana no wo vamweni. Asi nguva jese, nguvo jedu jinodikana kuva jakarongeka, jakacena, jakaezanana, jinozwirana no patinonga tiri zve jinotendehwa kwatinogararo.

16. Ngenyi kuvangisira kwese kwatinoita kuti tisimire ushoni asipi kwabiresi?

¹⁶ Azvizivi kureruka nguva jese kuwana nguvo jakaezanana zve jakanaka. Rojha zinji jinotengesa mushovo wo nguvo unoshandiswa ngo vazinji ku nyika basi. Ngo iyo ndava, zvingada nguva no kuvangisira kuti tiwane saya, vhistidu zve mabhuruza kana kukheta suthu no karasau zvicikapsinyi maningi. Asi hama no hambzaji jedu jinozodakajihwa maningi ngo kuvangisira kwatinoita pa kuda kusimira nguvo jinoemuja no jinofanera. Zve mudakaro unoviiswa ngo kukuja Baba wedu vano rudo vo mugore wakakura kupinda kuvangisira kwatingaita kuti tive no masimirire anovakuja.

17. Ngozvapi zvimweni zvingaita kuti hama irere kana kutama kurera ndebvu?

¹⁷ Hama jinodikana kurera ndebvu here? Mutemo wa Mosi waikumbira kuti vanarume varere ndebvu. Asi, maKristu aaciripizve pasi po mutemo wa Mosi kana aakumbihwizve kuti autevere. (VaLevi 19:27; 21:5; VaGalàcia 3:24, 25) Ku ndharaundha jimweni, ndebvu jakanasa kugundhwa jingatendehwa no kureremejwa, zve ajiiti kuti vandhu vatame kupurutana masoko edu. Zvokadi, hama jimweni jakagajwa jino ndebvu. Pikija zvakadaro, hama jimweni jingakheta kutama kurera ndebvu. (1 VaKorinto 8:9, 13; 10:32) Mu ndau jimweni, asipi cirovejeso kurera ndebvu zve ajitendehwi kuno vashandiri vo ciKristu. Zvokadi, hama ikava najo, aicaizoviisa rukujo kuna Mwari nee aicaizovoniwa inga ‘icina uposi.’—1 Timoti 3:2, 7; VaRoma 15:1-3.

18, 19. Mikeiya 6:8 inotibesesa kudini?

 ¹⁸ Tinobonga maningi ngo kuti Jehovha aazivi kutipa rista yakareba yo zvinotendehwa no zvicikatendehwi kusimira no zvotinodikana kushandisa kuitira kujinemesa. Kusiyapo izvo, iyena wakatipa rusujunuko hwo kutema zvivaringo zvakanaka zvakacijikira mu zviambi zvo mu Bhaibheri. Ngo kudaro, pikija patinotema zvivaringo ngo pamusoro po zvatinoda kusimira no patinoda kujinemesa, tinodikana kukhombija kuti tinoda kuva vakaezanana patinonga tecishandira Mwari.—MIKEYA 6:8.

¹⁹ Tinotendera ngo kujidodokesa kwese kuti Jehovha aana uposi huri hwese, wakacena zve mupango jake ndijona jingatitungamirira kamare. Kudari tecida kuva vanojidodokesa, tinozotevera mbhangiro jake mu upenyu hwedu. Kujidodokesa kunotibeserazve kuti tireremeje mazwiro no mavonero o vamweni.

20. Zvokusimira zvedu no kujinemesa kwedu zvinodikana kupsasa kudini vamweni?

²⁰ Zvotinosimira zvinodikana kutatija zvakajeka kuti tiri vashandiri va Jehovha. Jehovha ana ndhungamiriro jakakhwirira, zve tiri kudakara ngo kujiteveja. Hama jedu jese no hambzaji jiri kubongwa maningi ngo mavonekero ajo no mufambiro wajo, ijona jiri kukwevejera vandhu vakanaka mwoyo ku masoko anoponesa upenyu o Bhaibheri no kuviisa mudakaro no goja kuna Jehovha. Potinotema zvivaringo zvo ungwaru ngo pamusoro po zvotinosimira, tinozoramba ticiviisira goja kuna Wiya ‘wakasimijwa ngo goja no ukuru.’—Nduyo 104:1, 2.