1, 2. Kuitisa kudini zvakaitika na Tony, zvinokhombija kuti zvinokwanisika kuita cinjo mu upenyu?

TONY wakakura acina baba. Iyena wainga ecijija ku cikora sekundaria, asi aacaidakarira kujija. Zvokadi kamare, waida kusiya kujija acito apeja. Mu kupera ko sumana, waiyenda ku sinema kana waitopeja nguva no vadoni vake. Iyena aacaingepi phanga kana muranda wo mutombo jinodhakwisa asi upenyu hwake hwainga ucina cinangwa. Wainga ecikana-kana ngo kuda kuziva kuti Mwari ariyodi kana kuti haiwa. Pa njiku imweni, wakasongana no varovorani vari Zvapupu zva Jehovha zve wakavasanangurira kukana-kana kwaainga nako ngo pamusoro pa Mwari. Ivona vakamupa mabhurushura maviri kuti averenge, A Vida—Teve um Criador? no A Origem da Vida—Cinco Perguntas Que Merecem Resposta.

² Pa bvaza yakatevera, ivona vakamubvakacira, murangariro wake wainga wacinja kamare. Iyena wakaverenga mabhurushura ese zvokuti akapera kufonyana. Tony wakabvunja Zvapupu zviya kudari: “Mwari ariyodi kamare!” Wakatanga kujija Bhaibheri zve padoko ngo padoko mavonero aaita upenyu akacinja. Acito atanga kujija Bhaibheri, Tony aacaiziva kucikora, asi wakazoguma  pa kuva umwe wo mujiji anoziva maningi pa cikora cake! Atee dhorotori wo pa cikora wakashamaisikavo. Iyena wakamubvunja kudari: “Iwewe waitisa nane nota jako pomwe no mufambiro wako. I ndava yo kuti uri kujija no Zvapupu zva Jehovha nee?” Tony wakadavira kuti hina zve wakapa ucapupu kuno dhorotori wiya. Iyena wakapeja kujija cikora sekundaria, nyamasi uno ari kushanda inga piyona wo nguva jese zve ari kushandazve inga mubatiri anoshandira. Tony ari kudakara maningi ngokuti wari waano Baba vano rudo, Jehovha!—Nduyo 68:5.

3. Jehovha anopa ngwajo yapi ku majaha no vasikane?

³ Zvakaitikari na Tony zvinoticeukija kuti Jehovha anoda kamare majaha no vasikane. Iyena anoda kuti muve no upenyu unobudirira zve unodakajisa, ngokudaro ari kumupa ngwajo yo kuti ‘mucereceje Marure wenyu mu mazuva o ujaha hwenyu.’ (Mucumaeri 12:1) Izvi azvizivi kureruka nguva jese, asi zvinokwanisika. No besero ra Mwari, mungava munobudirira mu upenyu wari pamunonga muri mujaha kana musikane pomwe no kumbejiyo pamunonga makura. Kuitira kutibesera kuti tinase kuzwisisa, tinozobhuisana ngo zvakabesera vaIziraeri kuti vanghwine mu Nyika yo Cipikihwa pomwe no zvakapa simba Dhavhidhi kuti anyise Goriati.

4, 5. Tinojijenyi ngo zvakaita vaIziraeri kuti vanyise vaKanani pomwe no zvakabesera Dhavhidhi kuti anyise Goriati? (Vonanyi pikica yo kutanga.)

⁴ Zvicinyi zvakabvunjwa vaIziraeri ndi Jehovha, povainga vecida kunghwina mu Nyika yo Cipikihwa? Kureva kuti iyena wakavabvunja kuti vave masoca aushoni kana vajiroveje kuitira kwenda ku hondo here? Haiwa! (Deuteronòmio 28:1, 2) Iyena wakavabvunja kuti vamuzwire zve vamuthembe. (Joxwa 1:7-9) Ngwajo yakadari yaizovoneka inga kuti aitoshandi mu mavonero o vandhu, asi yakava ngwajo yakanakisisa yakava no vaIziraeri. Kuphinda no kuphinda, Jehovha wakabesera vandhu vake kuti vanyise vaKanani. (Joxwa 24:11-13) Kuti vaite zviro zvakadari vaidikana kuva no rutendo kuti vazwire Mwari, asi rutendo hwondhowo nguva jese waivaita kuti vabudirire. Izvi zvakaitikadi kareko asi zvinondoitikavo nyamasi uno.

⁵ Goriati wainga musoca ano simba. Iyena wainga no mametru matatu o urebu zve wainga no nvuti jakavanga maningi. (1 Samueli 17:4-7) Ngo divi rimweni, Dhavhidhi wainga no bvungamurara no rutendo hwake kuna Mwari. Mundhu acina rutendo waizotonanga kuti Dhavhidhi waizofa ngo kueja kuhwisana na Goriati. Asi, wakazofa ndi Goriati.—1 Samueli 17:48-51.

6. Pa musoro uno, tinozobhuisana ngenyi?

⁶ Pa musoro waperari, takabhuisana ngo zviro zvirongomuna zvingatiita kuti tidakare zve tibudirire mu upenyu. Takajija kuti tinodikana kungwarira zvinodiwa zvedu zvo kumujimu, kuva no ushamwari no vandhu vanoda Mwari, kugaja zvido zvo umwari pomwe no kureremeja rusujunuko hwotakapuwa ndi Mwari. Pa musoro uno, tinozobhuisana ngo pamusoro po besero ratinowana ngo kuita zviro zvondhozvo. Ngatende tibhuisane ngo ndhungamiro jatinowana muna Nduyo 16.

7. (a) Maizosanangurisa kudini mundhu ano murangariro wo umwari? (b) Icinyi “ndhaka” yakanangari Dhavhidhi zve yakamupsasa kudini?

⁷ Mundhu ano murangariro wo umwari ano rutendo kuna Mwari zve anoeja kuvona zviro inga anozvivona Mwari. Iyena anotendera  kuti Jehovha atungamirire upenyu hwake no kumuzwira. (1 VaKorinto 2:12, 13) Muezaniso waushoni wo mundhu wainga no murangariro wo umwari ndi Dhavhidhi. Iyena wakaimba kudari: “Tenji Mwari, ndimwi ndhaka yangu.” (Nduyo 16:5) Dhavhidhi waibongesera ngo kuva “ndhaka” ya Jehovha, kana ushamwari hwake hwo phedo na Mwari no kuva citiziro cake. (Nduyo 16:1) Inga muviyo, iyena wakazonanga kudari: “Ndinozara ngo kudakara.” Apana cimweni caiita kuti Dhavhidhi adakare kusiyapo ushamwari hwake na Jehovha.—Verenganyi Nduyo 16:9, 11.

8. Zvicinyi zvingaita kuti mudakare no kupa cinangwa upenyu hwenyu?

⁸ Vandhu vanopsakaya maningi mare no zvidakajiso zvo nyika ino, avazovi no mudakaro wakavari na Dhavhidhi. (1 Timoti 6:9, 10) Hama imweni yo ku Kanadhaa, yakananga kudari: “Mudakaro wokadi-kadi aubvi pa zviro zvatinowana mu upenyu, asi unobva pa kupa Mupi wo zviro zvese zvaushoni, Jehovha Mwari.” (Jakobo 1:17) Kudari mukava no rutendo kuna Jehovha no kumushandira, munozova no mudakaro wokadi-kadi no upenyu uno cinangwa. Waro, zvicinyi zvamungaita kuti muvangise rutendo hwenyu? Munodikana kupeja nguva na Jehovha ngo kuverenga Soko rake, kurangarijisisa zviro zvaakasika no kurangarira ngo pamusoro po mavara ake kubatanijavo rudo hwaanomukhombijira.—VaRoma 1:20; 5:8.

9. Zvicinyi zvamungaita kuti Soko ra Mwari rimuumbe?

⁹ Nguva jimweni, Jehovha anokhombija rudo hwake ngo kutipangira zvicidikana weya, inga zvinoita baba vano rudo. Dhavhidhi waidakarira kupangihwa kondhoko zve wakati: Ndinozomukuja “Tenji Mwari, mupangiri wangu, no usiku kamare, hwiru hwangu hunondijijisa.” (Nduyo 16:7) Dhavhidhi wairangarijisisa murangariro wa Mwari zve waiita kuti iwona uve divi ro murangariro wake. Iyena waitendera kuti murangariro wa Mwari umuumbe kana kuti waitendera kuti iwona umucinje kuti ave mundhu waushoni. Pamunoita zvakafanana, rudo hwenyu kuna Mwari no cido cenyu co kuda kumudakajisa cinozokura zve munozoguma pa kuva muKristu wakaibva. Imwe hambzaji inodanwa Christin yakananga kuti: “Painopsakisisa no kurangarijisisa zvainonga yaverenga, inozwa inga kuti Jehovha wakatara zviro zviya kuitira iyona kamare.”

10. Inga zvotajija pana Isaia 26:3, Shanduro yenyika Itsva, kuitisa kudini kuva no murangariro wo umwari kunobesera?

¹⁰ Pamunova no murangariro wo umwari, munozokwanisa kuvona nyika no kumbeji inga Mwari anovona. Jehovha ari kumupa uzivi hwondhowo no zwisiso. Ngenyi? Iyena anoda kuti muzive zvinosisira mu upenyu, muteme zvivaringo zvaushoni zve musote zvokumbeji mucikathyi! (Verenganyi Isaia 26:3, Shanduro yeNyika Itsva.) Hama inodanwa Joshuwa, inogara ku Estadhus Unidhus, yakananga kuti, kudari mukava no ushamwari wo phedo na Jehovha, munozokwanisa kuvona zvinosisira no zvicikasisiri.

11. Dhavhidhi waisana shamwari jo mushovonyi?

¹¹ Verenganyi Nduyo 16:3, Shanduro yeNyika Itsva. Dhavhidhi waizviziva kuti waizojiwanisa kudini shamwari jaushoni. Iyena wakasana inga shamwari vandhu vaida Jehovha zve izvo ‘zvaimudakajisa maningi.’ Iyena wakadanija shamwari jake inga ‘vacena’ ngokuti ivona vaiita zvovaikwanisa kuti vatevere ndhungamiro jakacena ja Jehovha ngo pamusoro po mufambiro. Mutari umweni wo nduyo wakavavo no mazwiro amweni ngo pamusoro po kusana shamwari zve wakatara  kudari: “Ndinobatana na vaya vanomuthya, vanoteveja matongero enyu.” (Nduyo 119:63) Inga zvotakabhuya pa musoro waperari, imwimwi mungava no shamwari jaushoni pakati po vaya vanoda Jehovha no kumuzwira. Zve shamwari jenyu ajidikani kuva no ndanga yondhoyo nemwi.

12. Ngenyi ushamwari wa Dhavhidhi na Jonatani wainga waushoni?

¹² Dhavhidhi aazivi kusana basi vandhu vainga no ndanga yondhoyo kuti vave shamwari jake. Munoziva zina ro imwe shamwari ya Dhavhidhi here? Jonatani. Ushamwari hwa Dhavhidhi na Jonatani ndiwona unoshamaisa maningi unonangwa mu Bhaibheri. Asi, maizviziva kuti Jonatani wainga no 30 o makore kupinda a Dhavhidhi here? Waro, ngenyi vakava Shamwari yaushoni? Ushamwari hwavo waicijikira mu rutendo hwavainga nao na Mwari. Cimwenizve, ivona vaireremeja mavara aushoni ainga no umwe no umweni, akadari inga cicunge co kuhwisana no vavengi va Mwari.—1 Samueli 13:3; 14:13; 17:48-50; 18:1.

13. Mungaitenyi kuti muve no shamwari jakawanda? Ipanyi muezaniso?

¹³ Inga ndi Dhavhidhi na Jonatani, ‘tingadakajihwa maningi’ patinova no ushamwari na vaya vanoda Jehovha no kuva no rutendo naye. Kiera, imwe hambzaji iri kushandira Jehovha ko makore mazinji, yakati: “Ndakaita ushamwari no vandhu vazinji kutenderera nyika yese, vandhu vakakurira ku ndau jasiyana–siyana zve vano mugariro wakasiyana.” Pamunoita zvakafanana, munozovona mwega kuti Bhaibheri no mujimu mucena unotibatanija inga mbhuri imwe yo vanamati.

14. (a) Mungagajisa kudini zvido zvo umwari mu upenyu hwenyu? (b) Ngozvapi zvakaita majaha amweni no vasikane kuti vakwanirise zvido zvavo?

¹⁴ Verenganyi Nduyo 16:8. Kuna Dhavhidhi, kushandira Mwari cainga ciro caisisira maningi. Kudari mukatevejera Dhavhidhi pamunogaja zvido zvo umwari zve nguva jese morangarira ngo pamusoro po zvinoda Jehovha, munozova no upenyu unodakajisa. Hama imweni inodanwa Steven yakananga kudari: “Kugaja zvido, kuzvikwanirisa zve ndosota sure ndovona kuti ndaitisa nane upenyu hwangu, zvinondidakajisa maningi.” Imwe hama iri mujaha yo ku Aremanya, wari  iri kushandira ku nyika imweni, yakananga kudari: “Pandinozokura andidi kusota sure ndovona kuti pa zvese zvondakaita ndakazviitira inini.” Munojizwavo kudeya here? Ngokudaro, itanyi zvese zvamunokwanisa kuti mukuje Mwari no kubesera vandhu vamweni. (VaGalàsia 6:10) Gajanyi zvido mu basa ra Jehovha zve kumbiranyi kuti Jehovha amubesere kukwanirisa zvido zvondhozvo. Ivanyi no cokwadi co kuti anozodavira mukumbiro wenyu!—1 Johani 3:22; 5:14, 15.

15. Ngozvapi zvido zvimweni zvamungaeja kukwanirisa? (Vonanyi bhokiso rinoti: “ Zvido Zvinganani Zvamungadadamira.”)

¹⁵ Ngozvapi zvido zvimweni zvamungagaja? Ngenyi amueji kupa mupinguro mecishandisa magama enyu pa musongano? Kana kuti, ngenyi amugaji cido co kuda kushanda inga piyona kana kutoshandira pa Bheteri? Mungatoejavo kujijira ndumi imbza kuti mukwanise kucumaera masoko akanaka ku vandhu vamweni. Barak, umwe mujaha anoshanda mu nguva yakazara, wakananga kudari: “Kumuka njiku jese ndecizviziva kuti ndinoda kupa Jehovha simba rangu rese, zvinondipa mudakaro wandicaizowana ngo kuita basa riri rese haro.”

16. Dhavhidhi waizwa kudini ngo pamusoro po mutemo no ndhungamiro ja Jehovha zve ngenyi?

¹⁶ Verenganyi Nduyo 16:2, 4, Shanduro yeNyika Itsva. Inga zvotakajija pa musoro waperari, patinopona mukuzwirana no mutemo pomwe no ndhungamiro ja Mwari, tinova takasujunuka kamare. Takajijazve kuda zvakanaka tonyenya zvakashata. (Amosi 5:15) Dhavhidhi wakananga kuti Jehovha wainga ‘Cinyuke cake co zviro zvakanaka.’ Jehovha wakanaka pa zviro zvese zve ciri cese cakanaka catinaco cinobva kwaari. Dhavhidhi wakashanda ngo simba kuti atevejere Mwari zve ade zviya zvinodiwa ndi Jehovha. Cimwenizve, wakajijira kunyenya zviya zvinonanga Mwari kuti zvakashata. Cimwe co zviro zvondozvo cainga co kunamata zvithombi, uko kunobatanija kunamata ari wese kana ciri cese kusiyapo Jehovha. Kunamata zvithombi kunoita kuti vandhu vatame kureremejana zve kunoita kuti rukujo hwaifanera kupuwa Jehovha upuwe ari wese kana ciri cese haco.—Isaia 2:8, 9; Apokalipsi 4:11.

17, 18. (a) Dhavhidhi wakanangenyi ngo pamusoro po muviyo wo kunamata ko manyepo? (b) Ngenyi vandhu nyamasi uno vari ‘kuengejera kusuruvara kwavo’?

¹⁷ Mu nguva jo Bhaibheri, uhure waiita divi ro kunamata ko manyepo. (Hoseya 4:13, 14) Vandhu vazinji vaidakarira kunamata ko manyepo ngo kuti vaiita zvo uhure, asi kunamata kondhoko kwaivaita kuti vadakare here? Haiwa! Dhavhidhi wakananga kuti vese vaya vainamata zvimwari zvo manyepo ‘vaiengejera kusuruvara kwavo.’ Vandhu vondhovo vaipira vana vavo ku zvimwari zvo manyepo! (Isaia 57:5) Jehovha wainyenya kamare ushati hondhowo. (Jeremia 7:31) Kudari nomaipona mu njiku jondhojo, maizobongesera ngo kuva no vabari vanonamata Jehovha!

¹⁸ Nyamasi uno, zviara zvizinji zvo manyepo zvinotendera kuita uhure, kubatanijavo ruvatano hwo mwanarume no mwanarume kana mwanakaji no mwanakaji. Upenyu wakadaro ungaita kuti vandhu vajizwe inga kuti vakasujunuka, asi cokwadi ngo co kuti vari ‘kuengejera kusuruvara kwavo.’ (1 VaKorinto 6:18, 19) Makambozvivona here? Ngokudaro, majaha no vasikane, purukiranyi Baba wenyu vo mugore. Vonanyi mwega kuti kuzwira Mwari kwakanaka. Nasanyi kurangarira ngo muviyo unovepo ngo kuita uhure. Vonanyi kuti rudakajiso wamunova nawo pa nguva  shomani unopindwa ngo muviyo wakashata wamunova nawo. (VaGalàsia 6:8) Joshuwa wanangwaya pakutanga, wakati: “Tingaita hedu zvatinoda no rusujunuko hwedu, asi kushaisha kuushandisa akuviisi mudakaro.”

19, 20. Makomborero api amunozowana kudari mukaramba muno rutendo kuna Jehovha no kumuzwira?

¹⁹ Jesu wakati: “Kudari mukavangirira meciteveja mazwi angu, munozoita vajiji vangu vokadi, munozoziva bzokadi, no bzokadi bzinozomusujunura.” (Johani 8:31, 32) Tinobonga Jehovha ngokuti tasujunuhwa ku zviara zvo manyepo, mazano akashata pomwe no zvizinji zvinoithwa ngo nyika ino. Kumbejiyo, tinozovona kuti taano “rusujunuko no goja ro vana va Mwari.” (VaRoma 8:21) Mungatodakara wari ngo rusujunuko hwamunahwo pamunotevera jijiso ja Kristu. Mu njira iyi, “munozoziva bzokadi” haiwa basi ngo kujija ngo pamusoro pazvo asi ngo kupona mukuzwirana nazvo!

²⁰ Majaha no vasikane, reremejanyi rusujunuko hwomakapuwa ndi Mwari. Ushandisenyi ngo ungwaru. Unozomubesera wari kuti muteme zvivaringo zvaushoni zvinozomupa kumbeji kwaushoni. Imwe hama iri mujaha yakati: “Kudari mukakwanisa kushandisa rusujunuko hwenyu ngo ungwaru pamunonga muri mujaha kana musikane, zvinozomubesera kumbejiyo pamunozoda kutema zvivaringo zvikuru kamare, zvakadari inga, ndingawanisa kudini basa raushoni, ndinoda kucadha kana kuti ndinombogara ndakadari.”

21. Munodikana kuitenyi kuti muwane “uhomi hwokadi-kadi”?

²¹ Mu nyika ino, pikija vamweni vanovona upenyu kuva wakanaka, iwona wakafupika maningi. Apana mundhu anoziva zvinozoitika mangwana. (Jakobo 4:13, 14) Ngokudaro, ciro cikuru camungaita ngo co kuita ciri cese cinozomubesera kuti muwane “uhomi hwokadi-kadi”—upenyu ucingaperi mu nyika impsa inoshamaisa ya Mwari. (1 Timoti 6:19) Jehovha aavangiriji ari wese kuti amushandire. Ndisu tinodikana kusana zvatinoda kuita. Ngokudaro, itanyi kuti Jehovha ave “ndhaka” yenyu ngo kushanda ngo simba kuti mukwedere phedo naye no kureremeja zvese ‘zvaushoni’ zvaanomupa. (Nduyo 103:5, Shanduro yeNyika Itsva) Ivanyi no cokwadi co kuti Jehovha angamupa mudakaro mukuru wo kwenda no kwenda!—Nduyo 16:11.