MUTEMO wa Mosi waitendera kuti vandhu vaite mbhiko nganani vecinanga magama akadari inga nga aya, “Ndinopika kwauri na Mwari,” kana “Ndinopika ngo zina ra Jehovha.” Asi, mbhiko jaiitwa maningi mu njiku ja Jesu, zvoitisa kuti vaJudha vapike kwaze pa ciricese covainanga. Vaiita izvi kuitira kuti zvovainangaro zvive zvinothembeka maningi, asi Jesu wakashora muitiro uwu ucikashandi bvaza mbiri. Iyena wakati: “Mavereketero enyu ngaadari: Hina, hina; andibzopi, andibzopi.”—Mateu 5:33-37; 23:16-22.

Mukuzwirana no Theological Dictionary of the New Testament (Disionario ro Teorojhia ro Testamento Imbza), mutemo jo Cijudha jinozwi Tarimudhe jinotibesera kuvona kuti cainga cirovejeso co vaJudha kuita mbhiko, kana kupika kuti magama ovanangaro ngo okadi kamare. Ngo iyo ndava kuti Tarimudhe yainasa kudurujira kuti i mbhiko japi jaidikana kukwaniriswa zve ngojapi jaizophwanywa.

Asipi Jesu basi waishora ciito co kushata ici. Inga muezaniso, mutari wo ndhorondho jo ciJudha anozwi Flavius Josephus, wakatara ngo pamusoro po cikwata co ciJudha cicaitepi mbhiko. Vandhu vo mucikwata ici vaitenda kuti kuita mbhiko kwakashata maningi kupinda kunyepa. Vaijizwa kuti, kudari mundhu anoita mbhiko kuti vamweni vatende zvaanonanga, mundhuwo anodikana kuva munyepi. Matahwa o ciJudha o ci apokrifo o Ungwaru hwa Siraki, kana Uzivi, (23:11) unonangavo zvakafanana: “Mundhu anorovejesesa kupika anozozara ngo bzixaixi.” Jesu wakashora vandhu vanoita mbhiko ngo pamusoro po shwiro jicikasisiri. Kudari tecinanga cokwadi nguva jese, atidikani kupika pa zvatinonanga kuti zvitendhwe.