1-3. (a) Tinodikana kuvona kudini cokwadi co Bhaibheri? Ezanisanyi. (Vonanyi pikica yo kutanga.) (b) Tinozobhuya ngenyi pa musoro uno?

NYAMASI UNO, zvinoitika maningi kuvona vandhu vecitenga zviro murojha perapo vozvihwirija. Zve izvi vanonyanya kuzviita maningi pavanozvitenga ngo mu interneti. Kangaije vanonga vacikadakariri zvovatengaro, inga zvovairangarira kana zviripo zvakashata no zvirozvo. Ngokudaro, vanokumbira kucinja no zvimweni kana kutokumbira kuti vahwirijihwe mare yavo.

² Narini atizoiti zvondhozvo no cokwadi co Bhaibheri. Kudari ‘tikacitenga’ narini atidi ‘kucitengesa,’ kana kuti, kudari tikajija cokwadi narini atizodi kucisiya. (Verenganyi Mazwi Akangwara 23:23, Shanduro yeNyika Itsva; 1 Timoti 2:4) Inga zvotakabhuya pa musoro waperari, takapeja nguva yakawanda kuti tijije cokwadi. Cimwenizve, takasiya basa raizotiitisa kuti tiwane mare yakawanda. Zve takaitisa nane ushamwari hwedu no vamweni, takacinja marangariro edu no manera o kuita zviro kana kunghwinira mu zvirovejeso no zviito zvicikadakajisi Jehovha. Asi, tinokhohwa kamare kuti pa  zvese zvotakasiya apana cinosisira maningi kupinda makomborero atiri kuashira ngo kuziva cokwadi.

³ Jesu wakapa mufananijo ngo pamusoro po mutengesi anoita hwendo kuti apsake usanga hwo mutengo mukuru. Mwanarume uwu paakawana usanga umwe unosisira maningi, ngo kukasika wakatengesa zvese kuti autenge. Usanga uwo unoimirira cokwadi ngo pamusoro po Umambo hwa Mwari. Mu njira yakafanana, Jesu wakakhombija kuti cokwadi cinosisira kwa vaya vanonga vecicipsaka. (Mateu 13:45, 46) Patakatanga kujija cokwadi, kuda kunanga kuti cokwadi ngo pamusoro po Umambo hwa Mwari no zvokadi zvimweni zvese zvinosisira kubvira mu Bhaibheri, itusu takaguma pa kuda kusiya zvese kuti tiwane cokwadi. Kudari tikaramba tecireremeja cokwadi, narini atizocisii. Asi zvinosuruvarisa ngo zvokuti, vandhu vamweni va Jehovha vakaguma pakutama kureremeja cokwadi zve vakatocisiya. Narini atizodi kuita zvondhozvo! Tinodikana kutevera ngwajo yo Bhaibheri yo ‘kuramba tecifamba mu cokwadi.’ (Verenganyi 3 Johani 2-4, Shanduro yeNyika Itsva.) Izvi zvinoda kureva, kudira cokwadi pakutanga no kuzvikhombija ngo manera atinopona. Asi, ngenyi zve kuitisa kudini vamweni ‘vanotengesa’ cokwadi? Tingava kudini no gwinyiso ro kuti atizoiti zvondhozvo? Zve tingaengejeresa kudini cisungo cedu co ‘kuramba tecifamba mu cokwadi’?

4. Mu nguva ja Jesu, ngenyi vamweni avazivi kwenderera mberi vecifamba mu cokwadi?

⁴ Mu nguva ja Jesu, vamweni vakatanga kuashira cokwadi, avazivi kwenderera mberi vecifamba mukuzwirana naco. Inga muezaniso, Jesu naapera kuita mushamaiso wo kuhisa mbungano yo vandhu, mbungano iyi yakamutevera ku divi rimweni ro Jombe ro Garireya. Asi Jesu wakananga zviro zvakavakahamaja, paakati: “Mukatama kuha muviri wo Mwana wo mundhu, no kutama kumwa ngazi yake, amuzovi no uhomi mukati menyu.” Kunja ko kukumbira kuti Jesu avasanangurire kuti zvaida kurevenyi, ivona vakati: “Mazwi aya anoremesesa! Ndiani anokwanisa kumapurukira?” Inga muviyo, “vajiji vazinji vakahwirira sure; avacaidepibze kufamba na yena.”—Johani 6:53-66.

5, 6. (a) Ngenyi vamweni vanosiya cokwadi mu njiku jedu jino? (b) Mundhu angasiisa kudini cokwadi?

⁵ Zvinosuruvarisa ngo zvokuti, vamweni nyamasi uno, vanosiyavo cokwadi. Ngenyi? Vamweni vakakhugunyika ngo zwisiso imbza yo vhesi iri yese yo mu Bhaibheri kana kunyangajiswa ngo hama inozivikanwa. Vamweni avazivi kudakarira mbhangiro yavakapuwa kubvira mu Bhaibheri, kana vakava no kutama kuzwirana no ari wese mu ungano. Zve vamweni vakatevera majijisiro o kunyepa o vapanduki kana o vamweni vanonanga manyepo ngo pamusoro pedu. Aya ndi amwe o mathangwe anoita kuti vamweni vave no cido kamare co kusiya Jehovha pamwepo no ungano. (Vaheberi 3:12-14) Zvaizova zvakanaka maningi, kudari ivona vakathemba Jesu inga zvakaita Pedru! Vamweni vo pa mbungano povakashamaisika ngo magama a Jesu, iyena wakabvunjisa vapostori vake dangani vaidavo kumusiya. Pedru wakati: “Tingazoenda kwaani, Tenji? Imwimwi muno mazwi o uhomi hucingaperi.”—Johani 6:67-69.

⁶ Vamweni vanosiya cokwadi padoko ngo padoko, kangaije vacikatovoni kuti zvicinyi  zviri kuitika. Mundhu anosiya cokwadi padoko ngo padoko, wakadari inga ngarava inopepa padoko ngo padoko kwenda mu mubiripiri mo murambo. Bhaibheri rinotingwaja kuti tinase kungwarira kuti titame ‘kuruza gwanja rauxoni.’ (Vaheberi 2:1) Kazinji mundhu anosiya cokwadi azvirevi kuti anosiya zvondhozvo basi. Asi, iyena anotendera kuti ushamwari hwake na Jehovha ugume pa kuremba zve mu kufamba ko nguva ungatoruzika. Waro, tingava kudini no gwinyiso ro kuti izvo azvizoitikivo na itusu?

7. Zvicinyi zvinozotibesera kuti titame kutengesa cokwadi?

⁷ Kuti tirambe tecifamba mu cokwadi, tinodikana kuashira no kuzwira zvese zvinonangwa ndi Jehovha. Tinodikana kuita kuti cokwadi cive ciro cinosisira maningi mu upenyu hwedu no kuteverera zviambi zvo Bhaibheri mu zvese zvatinoita. Pa mukumbiro, Mambo Dhavhidhi wakagondisa Jehovha kudari: “Ndinozofamba ngokuteveja bzokadi bzenyu.” (Nduyo 86:11) Dhavhidhi wainga wakatema civaringo co kuramba ecifamba mu cokwadi zve itusu tinodikanavo kuita zvakafanana. Kudari tikatama kuita kudaro, tingatotanga kurangarira zviro zvotakasiya ngo ndava yo cokwadi, kangaije tototanga kudazve zviro zvondhozvo. Asi, atidikani kusana kuti zvokadi izvi zvo Bhaibheri ndinozvida zve izvoo andizvidi. Tinodikana kufamba mu “bzokadi bzese.” (Johani 16:13) Pa musoro wakaperari, takabhuisana ngo zviro zvishanu zvotakasiya kuti tijije cokwadi no kucishandisa. Wari, tinoda kuvona kuti tingava kudini no gwinyiso ro kuti narini atizohwiriri ku zviro zvotakasiyaweya sure.—Mateu 6:19.

8. Kuitisa kudini manera anoshandisa muKristu nguva yake zvingamuita kuti asiye cokwadi? Ipanyi muezaniso.

⁸ Nguva. Kuti tive no gwinyiso ro kuti atizosii cokwadi, tinodikana kushandisa nguva yedu ngo ungwaru. Kudari tikatama kungwarira, tinozopeja nguva yakawanda ngo mabungaijo, kuvaraija, kunghwina mu interneti kana kuvona terevhizau. Pikija zviro zvondhozvo azvizivi kushata maningi, taizopeja nguva yataizoda kushandisa kuti tijije no kwenda koocumaera. Zviro zvakafanana na izvo, zvakaitika na Emma. * (Vonanyi masoko o pasi.) Pikija wainga mwana mudoko, waidakarira maningi haci zve waigogoma najo pazvaikwanisika weya. Asi, wakatanga kuva no mazwiro o kujipa ndava ngo ndava yo nguva yaaipeja ngo kuvaraija kwaaita zve wakatema civaringo co kucinja zvaaida kuita. Emma wakajijavo ngo zvakaitika na Cory Wells, imwe hambzaji yaigogoma no haci pa mutambo umweni unozwi rodheyo. * (Vonanyi masoko o pasi.) Wari, Emma waakupeja nguva  yakawanda ecishandira Jehovha zve ari kutopejavo nguva no ukama pamwepo no shamwari jinoshandiravo Jehovha. Ari kujizwa phedo kamare na Jehovha zve ari kudakara ngo kuziva kuti ari kushandisa nguva yake ngo ungwaru.

9. Zviro zvokunyama zvingagumisa kudini pa kuva zvinosisira kwatiri?

⁹ Zviro zvo kunyama. Kuti tirambe tecifamba mu cokwadi, atidikani kutendera kuti zviro zvo kunyama zvigume pa kuva zvinosisira maningi kwatiri. Potakajija cokwadi, takazwisisa kuti kushandira Jehovha kunosisira kupinda zviro zvo kunyama zve takadakara ngo kusiya zvese izvi ngo ndava yo cokwadi. Asi, pa kufamba ko nguva, tinovona vandhu vacitenga zvimucini zvabva kubuda wari kana vecitodakajihwa ngo kutenga zviro zvimweni. Tingazotanga kujizwa kuti zviripo zviri kutifaratariri. Kangaije tinotama kudakara ngo zvatinazvo, totanga kubatikana maningi mu kuwana zviro zvo kunyama kupinda kushandira Jehovha. Izvi zvinoticeukija zvakaitika na Dhema. Iyena wakadisa maningi “nyika” zvokuti wakasiya basa raainga akagajwa ndi mupostori Pauro. (2 Timoti 4:10) Kangaije Dhema waidisisa zviro zvo kunyama kusiyapo kuda kushandira Mwari. Zvingaitazve kuti iyena aacaida kusiya zvimweni kuti ashande na Pauro. Tinojijenyi? Kangaije kare, taida maningi zviro zvo kunyama. Kudari tikatama kungwarira, rudo wondhowo ungakurazve zve woguma pa kuvanga zvotiita kuti tiruze rudo hwedu no cokwadi.

10. Tinodikana kuhwisana no kukwevejehwa kwapi?

¹⁰ Ushamwari no vamweni. Kuti tirambe tecifamba mu cokwadi, atidikani kutendera kuti vandhu vacikashandiri Jehovha vatikwevejere. Potakajija cokwadi, ushamwari hwedu no vaya vacikaripi Zvapupu no vandhu vo pa mbhuri yedu wakacinja. Kangaije vamweni vakareremeja zvitendhwa zvedu zvipsa, asi vamweni vakatizonda ngo ndava yazvo. (1 Pedru 4:4) Zvokadi kamare, tinoeja kuita zvatinokwanisa kuti tive pamwepo no mbhuri yedu zve tova vakanaka mwoyo navo. Asi, atiphurusi ndhungamiro ja Jehovha ngo kuda kuvadakajisa. Zve inga zvatinojija pana 1 VaKorinto 15:33, shamwari jedu jo phedo jinodikana kuva jiya jinoda Jehovha.

11. Tingatizisa kudini murangariro no zviito zvicikazivi kucena?

¹¹ Murangariro no zviito zvicikazivi kucena. Kuti tifambe mu cokwadi, tinodikana kuva takacena mu mavonero a Jehovha. (Isaia 35:8; verenganyi 1 Pedru 1:14-16.) Potakajija cokwadi, takaita cinjo mu upenyu hwedu kuti titevere ndhungamiro jo Bhaibheri. Vamweni vakaita cinjo huru kamare. Asi, tinodikana kunasa kungwarira kuti titame kucinja upenyu hwedu hwakacena no mufambiro wakashata. Zvicinyi zvingatibesera kuti tihwisane no muejo wo kuda kuita ciri cese cakashata? Rangariranyi ngo zvatakapuwa ndi Jehovha kuti tive vakacena. Iyena wakatipa upenyu hwo Mwana wake anodiwa, Jesu Kristu! (1 Pedru 1:18, 19) Kuitira kutibesera kuti tirambe takacena mu mavonero a Jehovha, nguva jese tinodikana kuceukija kusisira ko muripo wa Jesu.

12, 13. (a) Ngenyi tinodikana kuvona mafiriadho inga mavonero aanomaita Jehovha? (b) Tinoda kubhuisana ngo pamusoro penyi?

¹² Zvirovejeso no zviito zvicikadakajisi Mwari. Zvihwa zvo mbhuri, vadoni vo ku basa no vadoni vo ku cikora vangaeja kutiita  kuti tibatane navo pa zvicerecejo zvavo. Waro, zvicinyi zvingatibesera kuhwisana no kuvangirijwa kuti tinghwinirevo mu zvirovejeso no kucereceja mafiriadho acikadakajisi Jehovha? Tinodikana kurangarira kuti ngenyi Jehovha aatitenderi kuti ticereceje mafiriadho ondhoo. Tingatopsakisisa mu mabhuku edu no kujiceukija pacedu kuti mafiriadho amweni, akatangisa kudini. Patinorangarijisisa mathangwe o mu matahwa anotiitisa kuti titame kucereceja mafiriadho awo, tinozova no cokwadi co kuti tiri kufamba mu njira ‘inonakira Tenji.’ (VaEfeso 5:10) Kudari tikathemba Jehovha pomwe no Soko rake, atizothyi zvinorangarira vamweni.—Mazwi Akangwara 29:25.

¹³ Tinovetera kuti tinozofamba mu cokwadi kwenda no kwenda. Zvicinyi zvingatibesera kuti tiengejere cisungo cedu co kuramba tecifamba mu cokwadi? Pano zviro zvitatu zvingatibesera.

14. (a) Kuitisa kudini kuramba tecijija Bhaibheri kunotibesera kuti titame kusiya cokwadi? (b) Ngenyi tinodikana kuva no ungwaru, kupangihwa no kuzwisisa?

¹⁴ Cokutanga, rambanyi mecijija Bhaibheri no kunasa kurangarira zvamunonga majija. Itanyi urongwa kuitira kujija. Pamunoengejera kujija kwenyu, kuda kwenyu cokwadi kunozoengejekavo zve narini amuzokusii. Mazwi Akangwara 23:23, Shanduro yeNyika Itsva, inotibvunja kudari ‘tenganyi cokwadi’ zve inotibvunjavo kuti titenge ‘ungwaru pomwe no kupangihwa no kuzwisisa.’ Azvikwani kujija cokwadi co Bhaibheri basi. Tinodikana kuzvishandisa mu upenyu hwedu. Patinozwisisa, tinobatanija zviro zvotakajija no zviro zvatinoziva. Ungwaru unotindundira kuti tiite ciri cese kubvira pa zvatinoziva. Nguva jimweni, cokwadi cinotipangira ngo kutikhombija kuti ngo japi cinjo jatinodikana kuita. Tinodikana kukasika kuita ciri cese mukuzwirana no kupangihwa kondhoko, Bhaibheri rinonanga kuti kupangihwa kunosisira maningi kupinda sirivha.—Mazwi Akangwara 8:10.

15. Waro, cokwadi cinotingwaririsa kudini inga bhande?

¹⁵ Cocipiri, temanyi civaringo co kushandisa cokwadi mu upenyu hwenyu. Bhaibheri rinoezanisa cokwadi no bhande ro musoca. (VaEfeso 6:14) Mu nguva jo Bhaibheri, bhande raibesera musoca no kumungwarira pa hondo, irona raidikana kunasa kusungwa. Kudari rikandhuza, aricaizomubesera. Waro, cokwadi cinotingwaririsa kudini inga bhande? Kudari tikashandisa cokwadi co Bhaibheri nguva jese, cinozotingwarira ku murangariro wakashata zve cinozotibesera kuti titeme civaringo caushoni. Patinosongana no zvineso zvikuru kana muejo wo kuita ciri cese cakashata, cokwadi co Bhaibheri cinozotibesera kuita zviya zvakanaka. Kudari inga musoca  aazoendi ku hondo acina bhande rake, narini atizodikani kusiya cokwadi. Tinodikana kuva no gwinyiso ro kuti tiri kushandisa cokwadi co Bhaibheri mu mativi ese o upenyu hwedu. Musoca anodikanazve kudira banga rake pa bhande. Ngativonenyi kuti tingaitavo kudini zviro zvakafanana.

16. Kuitisa kudini kujijisa cokwadi kunotibesera kuti tienderere mberi tecifamba mu cokwadi?

¹⁶ Cocitatu, kujijisa vamweni cokwadi co Bhaibheri mbhera patinokwanisa. Bhaibheri rinoezaniswa no banga. Inga musoca anonasa kusunga banga rake pa bhande, tinodikana kubatisisa Soko ra Mwari. (VaEfeso 6:17) Tese tingava vajijisi vaushoni ‘vanojijisa ngo urungami izwi ro bzokadi.’ (2 Timoti 2:15) Patinoshandisa Bhaibheri pa kujijisa vamweni, tinoguma pa kuriziva zve toda kamare cokwadi. Zve tinoenderera mberi tecifamba mu cokwadi.

17. Ngenyi cokwadi cinosisira kwamuri?

¹⁷ Cokwadi ndi cipo cinosisira cinobva kuna Jehovha. Cokwadi cinotiita kuti tive no ushamwari hwo phedo na Baba wedu vo mugore. Ici i ciro cinosisira maningi catingava naco. Jehovha ari kutijijisa zvakawanda maningi, asi aya i matangiro basi! Iyena wakatigondisa kuti anozotijijisa kwenda no kwenda. Ngokudaro, upfumi hwo cokwadi wakadari inga usanga unosisira. Rambanyi ‘mecitenga cokwadi zve mucadocitengesa.’ Perapo inga ndi Dhavhidhi, munozoramba mecigondisa Jehovha kuti: “Ndinozofamba ngo kuteveja bzokadi bzenyu.”—Nduyo 86:11.