1. Ngenyi tese tinoda kuembejehwa?

TESE TINODA kuembejehwa. Kangaije upenyu hwedu wakazara ngo zvineso, kusuruvara no kuthimwa-kuthimwa. Kangaije tiri kutambujika ngo ndava yo ndhenda, kuita usharuka, kana kufihwa no mundhu wataida. Vamweni vedu vari kutajwa mu njira yakashata. Mukuengejera, vandhu vakatitendeneja vari kuguma pa kuva maphanga kamare. Zvokadi, ‘mukuvo uu wo kunesa’ unokhombija kuti tiri kupona mu “njiku jokupejisira,” zve padoko ngo padoko tiri kukhwedera ku nyika imbza. (2 Timoti 3:1) Kangaije, ticiri kuvetera ko mukuvo wakareba kuti zvigondiso zva Jehovha zvikwanirisike zve tiri kusongana no zvineso zvakawanda. Waro ngo kwapi kwatingawana tondhojo?

2, 3. (a) Tinozivenyi ngo pamusoro pa Habhakuki? (b) Ngenyi tinoda kupopora bhuku ra Habhakuki?

² Ngatipopore bhuku ra Habhakuki kuti tiwane mupinguro wo mubvunjo uwu. Pikija hazvo, Matahwa aanangi zvizinji  ngo pamusoro po upenyu hwa Habhakuki, bhuku rake rinopa vangiso yokadi-kadi. Zina rokuti Habhakuki ringareva ‘Kukumbatira ko Rudo.’ Izvi zvinganangira maembejere aanotiita Jehovha, Ecidari inga ari kumbatira ngo ndava yo rudo hwaanahwo nesu, ecishandisa nyara jake kamare. Kana zvingarevavo njira yatinoramba tiri phedo naye. Habhakuki wakabhuya na Mwari zve wakamuita mubvunjo munganani. Jehovha wakafemera Habhakuki kuti atare mabhuyo ondhoo, ngokuti waizviziva kuti taizobesereka.—Habakuki 2:2.

³ Mabhuyo a Jehovha no muporofita uwu waicamwa, ndiwona basi anonangwa mu Bhaibheri ngo pamusoro pa Habhakuki. Asi, bhuku rake i divi ro “bzese bzakatahwa kare” mu Soko ra Mwari, “ngo ndava yo kuvangirira no runyarajo bzinobva mu Matahwa.” (VaRoma 15:4) Bhuku ra Habhakuki ringabeseresa kudini umwe nga umwe wedu? Ringatibesera kuvona kuti zvinorevenyi kuthemba Jehovha. Zve ciporofita ca Habhakuki cinotigondesa kuti tingava no runyararo wo mu murangariro azvinenyi zvineso zvapi kana muejo japi jatinajo.

4. Ngenyi Habhakuki wainga wakacamwa?

⁴ Verenganyi Habakuki 1:2, 3. Habhakuki wakapona mu nguva jo kunesa maningi. Vandhu vaimutendeneja vainga vakashata zve vainga maphanga, zvondhozvo zvaimuiita kuti asuruvare maningi. Kwese kwaaisota, waivona vaIziraeri vaishaisha kutajana no vamweni no kutama kurungama. Habhakuki wakabvunjisa kudari: ‘Ushati uwu unozopera rini? Ngenyi Jehovha ari kutendera kuti izvi zviitike pa mukuvo wakareba?’ Wakajizwa wakaremba. Ngokudaro, wakadeketera kuti Jehovha aite ciri cese. Habhakuki wakatanga kurangarira kuti Jehovha aataji vandhu vake kana kuti iyena ari kunonoka kuita ciri cese. Makambojizwavo kudaro here?

5. Tingajijenyi kubvira mu bhuku ra Habhakuki? (Vonanyi pikica yo kutanga.)

⁵ Kureva kuti Habhakuki wakaita mubvunjo iji ngokuti wainga acikathembizve Jehovha no zvigondiso zvake here? Haiwa! Habhakuki wainga ecikumbira Jehovha kuti amubesere ngo pamusoro po kukana-kana no zvineso zvaainga nazvo, izvo, zvakakhombija kuti iyena aacaengepi waruza vetero, asi waindoramba ecimuthemba. Habhakuki wainga ecithimwa-thimwa zve waineseka kamare. Iyena aacaizwisisa kuti ngenyi Jehovha wainonoka kuti aite ciri cese zve ngenyi Iyena waimutendera kuti atambujike. Zvokadi kamare, kusiya kwakaita Jehovha kuti Habhakuki atare ngo pamusoro po kutambujika kwake, zvinotipa cijijo cinosisira maningi. Atidikani kuthya kubvunja Jehovha ngo pamusoro po kutambujika kwedu kana kuita mubvunjo jatinajo. Ngo iyo ndava, iyena ngo kunaka mwoyo anotikoka kuti tiite mukumbiro no kumubvunja kamare mazwiro edu. (Nduyo 50:15; 62:9) Mazwi Akangwara 3:5 inovangisa itusu tese, painoti: “Gondai Tenji  Mwari ngo mwoyo wako wese, ucagonda uzivi hwako.” Habhakuki wakashandisa magama aya mu upenyu hwake.

6. Ngenyi kuita mukumbiro kunosisira?

⁶ Habhakuki waithemba Jehovha, Shamwari yake zve Baba zve wakatema civaringo co kukhwedera phedo navo. Habhakuki aazivi basi kugara acithya ngo pamusoro po mugariro wake no kuramba eciubatisisa. Mukusiyana, wakaita mukumbiro ngo pamusoro po mazwiro ake no kuthya kwainga nako. Uwu, i muezaniso waushoni kwatiri. Jehovha, uwo anozivika inga Muzwi wo mukumbiro, anotikoka kuti tikhombije kuti tinomuthemba ngo kuita mukumbiro no kumubvunja zvineso zvedu. (Nduyo 65:3) Patinoita kudaro, tinozovona kuti Jehovha anodavirisa kudini mukumbiro jedu. Tinozozwa kukumbatihwa ndiyena paanotiembezera no kutitungamirira. (Nduyo 73:23, 24) Anozotibesera kuti tizwisise mavonero aanoita mugariro wedu, azvinenyi muejo japi jatiri kusongana najo. Kuita mukumbiro kuna Jehovha ndi imwe njira inovonesa kuti tinomuthemba.

7. Jehovha wakadavirisa kudini Habhakuki paakamubvuja ngo pamusoro po zvineso zvake?

⁷ Verenganyi Habakuki 1:5-7, Shanduro yeNyika Itsva. Habhakuki naapera kubvunja Jehovha ngo pamusoro po kuthya kwaainga nako, iyena kangaije waivetera kuti Jehovha waizoita ciri cese. Inga Baba vano rudo, Jehovha wakazwisisa mazwiro a Habhakuki. Waizviziva kuti Habhakuki wainga ecitambujika zve waikumbira besero. Ngokudaro, Jehovha aazivi kupangira Habhakuki asi wakamubvunja zvaaizoita ngo kukasika ku vaJudha vaya vaingaya vacikagondeki. Zvokadi kamare, Habhakuki wakava mundhu wo kutanga wakabvunjwa ndi Jehovha kuti kupanicwa kwavo kwainga kokwedera.

8. Ngenyi mupinguro wa Jehovha aucaengepi iwona waivetehwa ndi Habhakuki?

⁸ Jehovha wakasanangurira Habhakuki kuti iyena wainga wanasiririka kuti aite ciri cese. Iyena waizopanica magandanga no vandhu vaiita zvakashata vo ku Judha. Ngo kunanga kuti izvi zvaizoitika mu ‘njiku jenyu,’ Jehovha wakakhombija kuti rutongeso waizoviya mu mukuvo wokuti Habhakuki kana vaIziraeri vamweni pavanonga vecipona. Mupinguro wa Jehovha andiwopi waivetehwa ndi Habhakuki. VaKaradhia kana vaBhabhironi vainga vakashatisisa. Ivona vainga vakashatisisa maningi kupinda vaIziraeri, avo vaiziva ndhungamiro ja Jehovha. Waro, ngenyi Jehovha waizoshandisa jinja iri ro cihedheni raishatisisa kuti apanice vandhu vake? Izvi zvaizoengejera basi zvineso zvo vaJudha. * (Vonanyi masoko o pasi.) Maizojizwa kudini, kudari no mainga Habhakuki?

9. Ngojapi mubvunjo jimweni jakaitwa ndi Habhakuki?

⁹ Verenganyi Habakuki 1:12-14, 17. Pikija hazvo Habhakuki waizwisisa kuti Jehovha waida kushandisa vaBhabhironi kuti apanice vandhu vakashata vaimutendenejari, iyena waindoneseka basi. Asi, iyena waijidodokesa zve wakatema civaringo co kuthemba Jehovha. Zvokadi kamare, iyena wakananga kuti Jehovha acindori “Buwe” rake. (Deuteronòmio 32:4; Isaia 26:4) Habhakuki waikhohwa kuti Mwari ano rudo zve wakanaka mwoyo, ngokudaro, iyena aacaithya kuita mubvunjo munganani kuna  Jehovha, jakadari inga iji: Ngenyi Jehovha ari kutenderera kuti zviro zvienderere mberi zvecishatisisa ku vaJudha zve vandhu vake vagume pa kutambujika? Ngenyi aaiti ciri cese ngo kukasika? Ngenyi wo Masimba ese ‘anonyarara’ zve anotendera kuti kuve no ushati ku mativi ese? Pamusoro po zvese, Jehovha ‘wakacena’ zve ‘majiso ake akacenesesa, aacijikiri kuvona bzakaxata!’

10. Ngenyi nguva jimweni tingatojizwa inga Habhakuki?

¹⁰ Nguva jimweni tingajizwa inga Habhakuki. Itusu tinopurukira Jehovha. Tinomuthemba, tinoverenga no kujija Soko rake, izvo zvinovangisa vetero yedu. Tinozwavo zvigondiso zvake patinopurukira zvatinojijiswa ngo sangano rake. Asi, tingatorangarira kudari, ‘Matambujiko edu anozopera rini?’ Tingajija zvimweni kubvira ku zvakaita Habhakuki.

11. Habhakuki wainga watema civaringo co kuitenyi?

¹¹ Verenganyi Habakuki 2:1. Mabhuyo a Habhakuki na Jehovha akamupa runyararo wo mu murangariro. Akamuita kuti avetere kuti Jehovha aite ciri cese. Habhakuki wakaphinda cisungo cake paakananga kudari: ‘Ndinovetera njiku yo kutambujika ngo cinyararire.’ (Habakuki 3:16, Shanduro yeNyika Itsva) Vashandiri vamweni vakagondeka va Mwari, vakarambavo vacivetera kuti Jehovha aite ciri cese. Muezaniso wavo unotivangisa, ngokuti unovonesa kuti tingaitavo zvakafanana.—MIKEYA 7:7; Jakobo 5:7, 8.

12. Tingajijenyi kubvira ka Habhakuki?

¹² Tingajijenyi kubvira ku civaringo ca Habhakuki? Cokutanga, tinodikana kuita mukumbiro nguva jese kuna Jehovha azvinenyi zvineso zvapi zvatinavo. Cocipiri, tinodikana kupurukira zvatinobvunjwa ndi Jehovha ecishandisa Soko rake pomwe no sangano rake. Zve cocitatu, tinodikana kuvetera no kusengerera kwese kuti Jehovha anozoita ciri cese zve tothemba kuti anozotisujunura pa kusuruvara kwedu pa nguva kwayo kamare. Kudari tikatevejera Habhakuki, tinozova no runyararo wo mu murangariro zve tinozokwanisa kucungirira. Vetero yedu inozotibesera kusengerera no kuva no mudakaro azvinenyi zvineso zvatinazvo. Tinothemba kuti Baba wedu vo mugore vanozoita ciri cese.—VaRoma 12:12.

13. Jehovha wakaembejeresa kudini Habhakuki?

¹³ Verenganyi Habakuki 2:3. Tingava no cokwadi co kuti Jehovha wakadakara maningi Habhakuki paakasana kumuvetera kuti aite ciri cese. Wo Masimba ese waizviziva kuti zvicinyi zvaitambuja Habhakuki, ngokudaro, wakaembejera muporofita wake no kumugondisa ngo rudo kuti Iyena waizodavira mubvunjo jaainga aita jecibva pasi po mwoyo. Habhakuki waizosujunuhwa pa kuthya kwake kwese. Zvaitoita kuti Jehovha wakabvunja Habhakuki kudari: ‘Ivai anosengerera basi zve ndithembei. Ndinozodavira mukumbiro wako, pikija ukavona inga kuti zvatora nguva yakareba.’ Jehovha wakaceukija Habhakuki kuti iyena wainga  wakatema civaringo co kuti waizokwanirisa rini zvigondiso zvake. Ngokudaro, wakavangisa Habhakuki kuti avetere. Pejisire, muporofita uwu aacaizosuruvarazve.

14. Tinodikana kutema civaringo co kuitenyi patinotambujika?

¹⁴ Tinodikanavo kuvetera kuti Jehovha aite ciri cese. Tinodikanazve kunasa kupurukira zvaanotibvunja. Perapo, tinozothemba zve tinozova no runyararo wo mu murangariro, azvinenyi muejo watinonga tecisonanga nawo. Jesu wakativangisa kuti titame kubatikana ngo pamusoro po “nguva no mukuvo” zvoticikazivi kubvunjwa ndi Mwari ngo pamusoro pazvo. (Maitiro o Vapostori 1:7) Tinodikana kuthemba kuti Jehovha anonasa kuziva nguva kwayo yo kuita ciri cese. Ngokudaro, atidikani kuremba asi tinodikana kujidodokesa tova vanosengerera zve tova no rutendo kuna Mwari. Patinovetera, tinodikana kushandisa nguva yedu ngo ungwaru, toshandira Jehovha mbhera patinokwanisa.—Marco 13:35-37; VaGalàsia 6:9.

15, 16. (a) Ngocapi cigondiso catinowana mu bhuku ra Habhakuki? (b) Zvigondiso zvondhozvo zvinotijijisenyi?

¹⁵ Jehovha wakagondisa kudari: “Wakarurama anozopona ngo kutenda kwake,” zve “nyika inozozara ngo kuziva goja ra Tenji.” (Habakuki 2:4, 14) Hina, Jehovha wakagondisa kuti anopa upenyu ucikaperi ku vaya vanosengerera zve vanomuthemba.

¹⁶ Cigondiso ico cinowanika pana Habakuki 2:4, zvinosisira maningi kuvona kuti  mupostori Pauro wakanokora cigondiso condhoco katatu mu karata jake! (VaRoma 1:17; VaGalàsia 3:11, 12a; Vaheberi 10:38) Tingava no cokwadi co kuti azvinenyi zvineso zvatinosongana nazvo, tinozovona kukwanirisika ko zvigondiso zva Jehovha kudari tikamuthemba. Jehovha anoda kuti tisotesese pa vetero yedu yo kumbeji.

17. Ngozvapi zvakagondesa Jehovha kwatiri kudari tikamuthemba?

¹⁷ Bhuku ra Habhakuki rino cijijo cikuru maningi kwatiri tese tiri kuponari mu njiku jino jo kupejisira. Jehovha wakagondisa upenyu ucikaperi ku vandhu vese vakarungama zve vanomuthemba. Ngokudaro, ngatirambe tecivangisa kuthemba kwedu Mwari, azvinenyi zvineso kana kuthimwa-thimwa kwatinako. Cigondiso cakapa Jehovha kuna Habhakuki cinotigondisavo kuti Iyena anozotibesera no kutiponesa. Ngo kunaka mwoyo anotikumbira kuti timuthembe zve no kusengerera tivetere nguva kwayo, apo Umambo hwake unozotonga nyika. Pa nguva yondhoyo, nyika inonga yakazara ngo vandhu vakadakara zve vano runyararo, avo vanonamata Jehovha.—Mateu 5:5, Shanduro yeNyika Itsva; Vaheberi 10:36-39.

18. Kuitisa kudini magama a Jehovha akapsasa Habhakuki?

¹⁸ Verenganyi Habakuki 3:16-19. Zvakananga Jehovha kuna Habhakuki zvakamupsasa maningi. Habhakuki wakarangarijisisa zviro zvinoshamaisa zvakaithwa ndi Jehovha kare, kuitira vandhu vake. Mbhera apa, kuthemba kwake Jehovha kwainga kwavangiswa. Wakava no cokwadi co kuti Jehovha waizoita ciri cese ngo kukasika! Izvi zvakavangisa maningi muporofita uwu, pikija hake waizviziva kuti waizoramba ecitambujika pa mukuvo wakati kuti. Habhakuki aacaikanakanazve. Mukusiyana, iyena wakathemba kuti Jehovha waizomuponesa. Zvokadi kamare, zvaakananga pa vhesi yo 18 ndi amwe o magama anosisira maningi o rutendo atinoverenga mu Bhaibheri. Vajiji vamweni vanotenda kuti vhesi iyi ingarevavo kudari: “Ndinozophuka ngo kudakara ndi Tenji; ndinozotamba ngo rudakaro hwa Mwari.” Cijijo cakakura zvakadini kwatiri tese! Jehovha aatipekeji basi zvigondiso zvinoshamaisa kuitira kumbeji, asi anotigondesa kuti sasambi wari, iyena, anozokwanirisa zvigondiso zvondhozvo.

19. Tingaembejehwa kudini ndi Jehovha, inga wakaembejehwa Habhakuki?

¹⁹ Cijijo cinosisira maningi cotajija kubvira mu bhuku ra Habhakuki ngo co kuthemba Jehovha. (Habakuki 2:4) Kuti tirambe tecithemba Jehovha tinodikana kuvangisa ushamwari hwedu naye. Ngokudaro, tinodikana kuita izvi. (1) Kuramba teciita mukumbiro kuna Jehovha, kumubvunja ngo pamusoro po zvineso no kuthimwa-thimwa kwedu. (2) Kunasa kupurukira zvatinobvunjwa ndi Jehovha ecishandisa Soko rake zve kutevera ndhungamiro jatinopuwa ngo sangano rake. (3) Kuva takagondeka zve tinosengerera patinonga tecivetera kuti Jehovha akwanirise zvigondiso zvake. Izvo ndizvona zvakaithwa ndi Habhakuki. Pikija wainga wakasuruvara maningi paakatanga mabhuyo ake na Jehovha, paakapejisira, wainga wavangiswa zve ano mudakaro! Kudari tikatevejera Habhakuki, tinozoembejehwa ngo kuva tinokumbatihwa ndi Baba wedu vo mugore Jehovha. Ngoyapi embezero huru yatingawana mu nyika ino yakashata?