1, 2. Umwe na umwe wedu anodikana kuva no gwinyiso renyi? (Vonanyi pikica yo kutanga.)

INGA zvotakabhuya pa musoro wakapera, Dhiabhu anonanga kuti Jehovha aafaneri kutonga vandhu. Anonangazve kuti Jehovha aatongi ushoni zve vandhu vanozodakara kudari vakajitonga vega. Waro zvaanonangaro Sathana ndizvona here? Rangariranyi kudari vandhu vaizojitonga vega, vopona kwenda no kwenda. Vaizodakara here kupinda mudakaro wo vaizova nao vacitongwa ndi Mwari? Imwimwi maizodakara kudari maipona kwenda no kwenda, mucina besero ra Mwari here?

² Apana anokwanisa kumudaviriranyi mubvunjo iji. Umwe na umwe wedu anodikana kunasa kujirangarira. Ngo kudaro zvinozojeka kuti matongero a Jehovha ngaiwona akanakisisa zve ngaanofanera kubesehwa ndisu ngo mwoyo wese. Izvi tinozvithemba ngo ndava yo zvotinoverenga mu Bhaibheri. Ngavone kuti Bhaibheri rinonangenyi ngo pamusoro po  kutendehwa ka Jehovha kutonga mugore no pasi.

3. Ngenyi Jehovha ngaanofanera kuva Mukuru-kuru?

³ Jehovha ndiena ega Mukuru-kuru wo mugore no pasi ngokuti ndi Mwari wo masimba-ese no Musiki. (1 Kronike 29:11; Maitiro o Vapostori 4:24) Pa civoniso co mugore, vatongi doni va Kristu vanokwana 144.000, vakati: “Mwari wedu, ndimwi munonakira kuaxira goja, nderemejo no simba; ngo kuti makarura bzese. Bzakaruhwa, ngo kuda kwenyu bziriyo, bzvorarama.” (Apokalipsi 4:11) Jehovha anotendehwa kutonga zviro zvese ngokuti ndiena wakazvisika, azvinenyi kuti zviri pasi pano kana zviri mugore.

4. Ngenyi rusujunuko hwo kujikhetera ahutipi citendehwa co kupandukira Mwari?

⁴ Sathana apana caakasika. Ngo iyo ndava kuti aatendehwi kutonga mugore no pasi. Sathana no varovorani vo kutanga vakaphwanya mutemo povakapandukira ukuru-kuru hwa Jehovha. (Jeremia 10:23) Kuda kureva kuti rusujunuko hwavo hwo kujikhetera hwaivapa citendehwa co kuramba ukuru-kuru hwa Jehovha here? Haiwa. Rusujunuko hwo kujikhetera hunopa vandhu vese citendehwa co kukheta no kutema zvivaringo, kuciripi citendhehwa co kupandukira Musiki, Jehovha. Zvakajeka kuti kupandhukira Mwari ndi kushaisha kushandisa rusujunuku hwo kujikhetera. Ngo kuva kwedu vandhu, tinodikana kutongwa no kutungamirihwa ndi Jehovha.

5. Ngenyi zvivaringo zva Mwari mukuvo wese zvakarurama?

⁵ Rangariranyi ngo thangwe rimweni rokuti ngenyi Jehovha ngaanotendehwa kutonga. Iyena anoshandisa simba rake ngo njira yo ururami hwakaperera. Iyena anotibvunja kudari: “Ndini Tenji, wiya ano rudo, anoita bzinodikana no kururama mu nyika. Ngokuti bzondinoda nga ibzi.” (Jeremia 9:23) Jehovha aadi besero ro mutemo jo vandhu kuti ateme civaringo cokuti zvakati zvakanaka. Mukusiyana, wakagaja ndhungamiriro jokuti zvakati zvakanaka. Zve wakapa vandhu mutemo naakacijikira pa ururami hwake kamare hwakaperera. Mutari wo nduyo wakati: “Ururami no kudikana bzinovangisa dendemaro renyu.” Ngokudaro, mutemo, zviambi no zvivaringo zvese zvinobva kuna Jehovha zvakanaka. (Nduyo 89:15; 119:128) Sathana anonanga kuti Jehovha asipi Mutongi wakarurama. Asi, Sathana aakwanisi kuviisa ururami mu nyika.

6. Ngorapi thangwe rimwe rinoitisa kuti Jehovha atendehwe kutonga?

⁶ Thangwe rimweni rokuti ngenyi Jehovha ngaanotendehwa kutonga ngo rokuti ano uzivi no ungwaru kuti angwarire mugore no pasi. Izvo tinozvivona ngo njira yaakaita ndiyona kuti Mwanake akwanise kurapa ndhendha jokuti akuna medhiko waizokwanisa kujirapa. (Mateu 4:23, 24;  Marco 5:25-29) Pikija iji ndi mushamaiso kotiri, kuna Jehovha asipi mushamaiso. Anozwisisa kuti muviri wedu unoshanda kudini zve anokwanisa kurapa kukhuvazika kuri kwese kounako. Anokwanisazve kumusa vakafa no kuita kuti ngozi jo kuitika jega mu nyika jitame kuitika.

7. Kuitisa kudini ungwaru hwa Jehovha hunopinda hwo ari wese mu nyika ya Sathana?

⁷ Nyika yese iri kutongwari ndi Sathana aikwanisi kuviisa runyararo, nee mu nyika imwe kana mu nyika jakawanda. Jehovha basi ngaano ungwaru hwo kuviisa rungararo hwo nyika. (Isaia 2:3, 4; 54:13) Tina mazwiro akaezana no o mupostori Pauro paakati: “Upfumi, hwiru no uzivi hwa Mwari, kujika kwabzo! Hwiru hwake ahuziviki; makwanja ake aanghwiniki.”—VaRoma 11:33.

8. Imwimwi munojizwa kudini ngo pamusoro po matongero a Jehovha?

⁸ Inga zvotavona, Bhaibheri rinokhombija zvakajeka kuti Jehovha ngaanotendehwa kutonga. Rinokhombijazve kuti iyena ndi Mutongi wakanakisisa. Thangwe rimwe ngo rokuti anotonga ngo rudo. Tinojizwa kuva phedo nae potinorangarija kuti “anounyaxa no usizi, anononoka kuceneka, wakazara ngo rudo no ugondeki”. (Exodo 34:6) Mwari anotitaja ngo nderemejo. Iyena anotitaja ushoni kupinda zvotinojiita. Dhiabhu anonanga kuti Jehovha anonyima zvakanaka vashandiri Vake, asi uku i kunyepa. Mwari wakatopa Mwana wake kuitira kuti tikwanise kurarama mbhera narini.—Verenganyi Nduyo 84:12 VaRoma 8:32.

9. Tinozvizivisa kudini kuti Mwari ano haraka maningi ku mundhu umwe na umwe pacake?

⁹ Jehovha anoda vandhu vake vese inga cikwata. Asi, iyena ano haraka maningi ku mundhu umwe na umwe pacake. Rangariranyi basi zvakaitika mu nguva yo kare. Pa makore anokhwedera kuita mazana matatu, Jehovha wakashandisa vatongi kuti vatungamirire vandhu vake no kuita kuti vanyise vavengi vavo. Asi pa mukuvo wese uu, Jehovha waindongwariravo mundhu umwe na umwe pacake. Umwe wavo wainga mwanakaji waidanijwa Rute. Iyena aacainga muIziraeri, zve wakasiya zviro zvakawanda kuitira kuti ave munamati wa Jehovha. Wakapfupwa ndi Jehovha ngo kuwana mwamuna no mwana. Kusiyapo izvo, mwana wa Rute wakazova divi ro nda-nda-nda yo mbhuri yakabahwa Mesia. Jehovha wakaitazve kuti ndhorovondho yo upenyu hwa Rute itahwe mu Bhaibheri, mu bhuku rinodanijwa ngo zina rake. Munorangarira kuti Rute anozojizwa kudini paanozomuswa, wozwa zvese izvi?—Rute 4:13; Mateu 1:5, 16.

10. Ngenyi tinonanga kuti Jehovha aatongi ngo hasha?

¹⁰ Jehovha aatongi ngo hasha. Vaya vanomuzwira vanojizwa kusujunuka kamare no kudakara. (2 VaKorinto 3:17) Dhavhidhi wakananga kudari ngo pamusoro pa Jehovha: “Pambeji pake ruveneko no goja, mu  Nyumba yake simba no kudakara.” (1 Kronike 16:7, 27) Etani, mutari wo nduyo wakatara kudari: “Vanomucena vandhu vanoziva kusimba: vanofamba mu ruveneko hwo hope yenyu, Tenji Mwari, vanodakara njiku yese ngo zina renyu, vanokujwa ngo kurarama kwenyu.”—Nduyo 89:16, 17.

11. Tingaengejeresa kudini kukhohwa kwedu kuti matongero a Jehovha ngo akanakisisa?

¹¹ Patinoenderera mberi tecirangarijisisa unaki hwa Jehovha, tinoengejeravo kukhohwa kuti matongero ake akanakisisa. Tinojizwa inga mutari wo nduyo uwo wakabvunja Mwari kuti “kondiri, njiku imwe pa maberere enyu inomutengo kupinda ciuru co njiku ku ndau imweni.” (Nduyo 84:10) Jehovha wakatinasirira no kutisika, ngokudaro, anonasa kuziva zvinotidakajisa. Ngo kukova, anotipa kupinda zvotinoda. Ciri cese caanotibvunja kuti tiite, i kuitira kugara ushoni kwedu. Pikija titoruze zviri zvese, tinozova vakadara nguva jese kudari tikazwira Jehovha.—Verenganyi Isaia 48:17.

12. Ngorapi thangwe guru rinotiitisa kuti tibesere ukuru-kuru hwa Jehovha?

¹² Bhaibheri rinotibvunja kuti vamweni vanozopandukira ukuru-kuru hwa Jehovha pa kupera ko Ciuru co Makore o Kutonga kwa Kristu. (Apokalipsi 20:7, 8) Zvicinyi zvinozovaitisa kudaro? Pa mukuvo wondhowo, Dhiabhu anozoeja kukhohwesa vandhu kuti vave no umbau kana makaro. Zvondhozvo ngo zvaaindoita mukuvo wese. Angazoejazve kukhohwesa vandhu kuti vanozokwanisa kupona mbhera narini vacikazwiri Jehovha. Izvo azvizoitiki. Asi tingajibvunjisa kuti, ‘ndinozotenda manyepo akadaro here?’ Kudari tinonasa kuda Jehovha, tokhohwa kuti iyena wakanaka zve ngaanotendehwa kutonga mugore no pasi, manyepo akadaro anozotisembhusa. Tinozoda basi kupona pasi po ukuru-kuru hwa Jehovha, wiya anotonga ngo rudo.

13. Tinobesera kudini ukuru-kuru hwa Mwari potinomutevejera?

¹³ Inga zvotavona, Jehovha ngaanotendehwa kutonga zve matongero ake ngo akanakisisa. Ukuru-kuru hwake hunofanera kubesehwa ndisu zvakaperera. Tinohubesera potinova vakagondeka kuna Jehovha no kumutevejera. Potinoita zviro ngo njira ja Jehovha mbhera panoperera simba redu, tinokhombija kuti tinomuda zve tinobesera matongero ake.—Verenganyi VaEfeso 5:1, 2.

14. Vakuru vo ungano no musoro jo mbhuri vangatevejeresa kudini Jehovha?

¹⁴ Bhaibheri rinotijijisa kuti Jehovha anoshandisa simba rake ngo njira yo rudo mukuvo wese. Musoro jo mbhuri no vakuru vo ungano vanoda ukuru-kuru hwa Jehovha, vanozomutevejera zve avazovi no hasha kana kungwarira vamweni. Mupostori Pauro wakavangisira maningi kuti atevejere Mwari no Mwana wake. (1 VaKorinto 11:1) Aacaipseruja vamweni kana kuvavangijira kuti vaite zvakanaka. Mukusiyana, waivavangisa ngo kunaka mwoyo kuti vaite zvakanaka. (VaRoma 12:1; VaEfeso 4:1; Filemoni 8-10) Pauro waitevejera Jehovha ngo kuita kudaro. Potinotaja vamweni ngo rudo, tinobesera ukuru-kutu hwa Jehovha.

15. Tinobeseresa kudini ukuru-kuru hwa Mwari ngo kureremeja vaakapa mutoro?

 ¹⁵ Tinobeserazve ukuru-kuru hwa Jehovha ngo kureremeja no kushandira pamwe no vaakapa mutoro. Pikija atinasi kuzwisisa kana atizwirani no civaringo covatema, tinondhovabesera. Izvi andizvopi zvinoitavo nyika ino, asi itusu tinozviita ngo kuti tinotendera Jehovha inga Mutongi wedu. (VaEfeso 5:22, 23; 6:1-3; Vaheberi 13:17) Zve tinodakara, ngokuti Mwari anoda zvaushoni kotiri.

16. Zvivaringo zvotinotema zvinokhombijisa kudini kuti tinobesera ukuru-kuru hwa Mwari?

¹⁶ Tingabeserazve ukuru-kuru hwa Mwari ngo zvivaringo zvotinotema. Jehovha aatipi mupango kamare kuitira mugariro umwe na umwe. Kunja kwa izvo, anotibvunja mavonero ake. Inga muezaniso, Jehovha aatipi nda-nda-nda yo zvotinodikana no zvaticikadikani kusimira. Kunja kwa izvo, anotibvunja kuti njira yo kujibata no inoreremejeka inga Zvapupu zvake. (1 Timoti 2:9, 10) Anoda tirangarire kuti zvivaringo zvedu zvinopsasa kudini vamweni. (1 VaKorinto 10:31-33) Potinotema zvivaringo takacijikira pa murangariro ja Jehovha, tinokhombija kuti tinomuda zve tinobesera matongero ake.

17, 18. Vakacadha vangakhombija kudini kuti vanobesera ukuru-kuru hwa Jehovha?

¹⁷ Vonanyi nyira imwe maKristu akacadha yaangabesera ndiyona ukuru-kuru hwa  Mwari. Mukaji kana mwamuna angavona kuti waakarovorana naye aaripi kuva zvaairangarira kuti waizova. Vangatova no zvineso zvikuru. Kudari zvikaitika, vanobesereka ngo kurangarira kuti Jehovha wakatajisa kudini jinja ro Iziraeri ro kare. Jehovha wakajisanangura kuva mwamuna kuno jinja ro Iziraeri. (Isaia 54:5; 62:4) Jinja iri rakacamwisa Jehovha uzinji. Mugariro uwo waiezaniswa no mucadhu uri pa zvineso. Asi Jehovha aacaikasika kuramwija vaIziraeri. Kunja kwa izvo, waivaregerera no kundovarengerera zve wakakwanirisa zvipikihwa zvake kovari.—Verenganyi Nduyo 106:43-45.

¹⁸ MaKristu akacadha ano rudo na Jehovha, anovangisira kuti amutevejere. Pikija pa mucadho wavo pana zvineso, avapsaki kuzvipeja ngo njira iciripi mu matahwa. Vanoziva kuti Jehovha anovona mbhiko yo mucadho kuva yakakura zve anoda kuti mukaji no mwamuna ‘vabatane’. Thangwe ro matahwa rinotendera kuti mundhu arambane, wova wakasujunuka kuti acadhezve ngo ro kuhura basi. (Mateu 19:5, 6, 9) MaKristu paanoita zvese zvaanokwanisa kuti mucadho wao ubudirire, vanobesera ukuru-kuru hwa Jehovha.

19. Tinodikana kuitenyi potinoposa?

¹⁹ Tese atizivi kukwana, zve pa kufamba ko nguva tinoita zvinocamwisa Jehovha. Iyena anozviziva, zve ngo zvakamuitisa kuti ape muripo wa Kristu. Ngokudaro, tinodikana kukumbira Jehovha kuti atiregerere ponotiposa. (1 Johani 2:1, 2) Kunja ko kuva no mazwiro akashata ngo kuposa kwedu, tinodikana kuvangisira kuti tijije ndikona. Tinoda kuramba tiri phedo na Jehovha, wiya anozotiregerera no kutibesera kuti tikurape zve tirambe ticimushandira.—Nduyo 103:3.

20. Ngenyi tinodikana kubesera ukuru-kuru hwa Jehovha wari?

²⁰ Mu nyika imbza, vandhu vese vanozotongwa ndi Jehovha no kujijira njira jake jakarurama. (Isaia 11:9) Pikija wari, tingaziva zvakawanda ngo pamusoro po murangariro wa Jehovha no manera aanoda kuti tiite zviro. Sambiripano, akunazve anozophikiza matongero a Mwari. Ngokudaro, ngatiite zvese zvotinokwanisa wari kuti tibesere ukuru-kuru hwa Jehovha ngo kumuzwira, kumushandira takagondeka no kuvangisira mbhera panoperera simba redu kuti timutevejere pa zvese zvotinoita.