Mu gore ro 2012, vajiji vo zvomathere vakawana zviviya zvo cijuvi kana cinvuko co muumbi caenga caana 3.000 zvo makore. Vajiji vo zvomathera vakadakajihwa maningi. Ngenyi? Avazivi kudakajihwa ngondava yo zviviya zvo cijuvi asi vakadakajihwa ngondava yo zvaitahwa pa zviviya izvo.

Vajiji vo zvomathere povakabatanijira zviviya zvese, vakakwanisa kuverenga retera jo vaKanani jaitahwa pa cijuvico. Paitahwa kudari: “Eshba’al Ben Beda,” zvinoreva kuti “Eshibaari, mwana wa Bhedha.” Uhu i hwendo hwo kutanga, vajiji vo zvomathere kuwana zina rakatahwa pa mujiyo wokare.

Mundhu umweni waidanijwa Eshibhaari, anonangwa mu Bhaibheri. Iyena waenga umwe wo vana va Mambo Sauri. (1 Kronike 8:33; 9:39, Shanduro yeNyika Itsva) Umwe wo vakawana cijuvi ico, ndi Mujijisi anozwi Yosef Garfinkel, iyena wakananga kudari: “Zvinodakajisa kuziva kuti zina ra Eshibhaari rinowanika mu Bhaibheri, zve wari tariwanazve rakatahwa pa zvatawana mu mathere, zvese zvecinangihwa basi mu mukuvo wo kutonga ka Mambo Dhavhidhi.” Uu i muezaniso umweni unovonesa kuti zvinowanika mu mathere zvinopa ucapupu wo zviri mu Bhaibheri.

Mu Bhaibheri, Eshibhaari mwana wa Sauri anodanijwazve kuti Ishibhosheti. (2 Samueli 2:10) Waro, ngenyi masirabha okuti “bhaari” akafakeiwa ngo okuti “bhosheti”? Vapsakisiri vanodurujira kuti mutari wo Bhuku ro mu Bhaibheri ra Samueri Wocipiri, kangaije wakaregera kushandisa zina rokuti Eshibhaari, ngokuti raiita kuti vaIziraeri varangarire Bhaari, cimwari co ma mubepo cainamatwa ngo vaKanani. Asi, ticawana zina ra Eshibhaari, mu bhuku ro Bhaibheri ro Kronike Wokutanga.