MUSORO WO KUJIJA WO 34
Mungavisa Kudini no Mudakaro Pamunoashira Basa Imbza?
“Mwari asipi acina ururami, kuti akanganwe mabasa enyu no unyaxa hwo makatatija ngo zina rake.”—VAHEBERI 6:10.
NDUMBO 38 Iyena Anozomuvangisa
ZVATICAJIJA *
1-3. Ngozvapi zviro zvimweni zvinoitisa kuti vashandiri vamweni vo mu nguva yakazara vacinje mabasa avo?
HAMA ROBERT na hambzaji Mary Jo, vakati: “No pakhirira makore anokwana kuita makumaviri na rimwe tecishanda inga mamisionario, takadikana kusiya basa rataiita ngokuti vabari vedu vaihwaja. Takadakara maningi ngo kuvabesera. Asi takasuruvara ngo kusiya ndau yataida.”
2 Hama William na hambzaji Terrie, vakananga kuti: “Potakaziva kuti uhomi hwedu aucaizotitendera kuhwirirazve ku basa rataiita, takacema maningi. Kuda kwedu kushandira Jehovha ku nyika jo kunja, kwainga kwapera.”
3 Hama Aleksey vaishanda pa Bheteri vakati: “Taizviziva kuti vavengi vedu vaida kufunga Bheteri rondaishandira. Asi pozvakaitika, tese takadikana kubuda pa Bheteri, zvakava zvinosuruvaja maningi.”
4. Ngojapi muvhunjo jatinozodavira pa musoro uno?
4 Kuitira kuengejera muezaniso iji, rangariranyi zviuru zvo mabheterita pomwe no hama jimweni jinoshanda mu nguva yakazara, pojinoashira basa imbza. * Zvinganesa maningi hama no hambzaji iji jinodiwa kusiya basa rojaida maningi. Zvicinyi zvingavabesera kuti vahwisane no cinjo iji? Mungavabeseresa kudini? Mupinguro jo muvhunjo iji, jingabesera tese kuti tihwisane no mugariro jinonesa mu upenyu.
MUNGAHWISANA KUDINI NO CINJO?
Ngenyi zvinganesa ku vashandiri vo mu nguva yakazara kusiya basa ravo? (Vonanyi ndima 5) *
5. Kucinjwa basa kungatipsasa kudini?
5 Azvinenyi dangani tiri kushanda pa Bheteri kana kutoita mabasa amweni o mu nguva yakazara, tingakwanisa kujijira kuda vandhu no kuda ndau yatinonga tecishandira. Ngokudaro, tingasuruvara maningi patinosiya basa redu. Tingatogara tecirangarira hama no hambzaji jedu no kuvazwira pena, maningi ningi kudari tikabuda kondhoyo ngo ndava yo kuteverehwa. (Mateu 10:23; 2 VaKorinto 11:28, 29) Cimwenizve, zvingatinesera maningi kwenda ku ndau imweni, ngokuti tinodikana kujijira zvirovejeso zvimweni. Hama Robert na hambzaji Mary Jo, vakati: “Takaguma pa kukanganwa zvirovejeso zvedu, zve zvaitinesera kucumaera tecishandisa ndumi yedu. Taijizwa inga kuti tiri vo nyikanja mu nyika yedu.” Vamweni vanoashira basa imbza, vanosongana no cineso co kumosha mare ngo zvimweni. Ivona vangatothimwa-thimwa, kugara vacina jiviriro zve vacina simba. Ngozvapi zvingabesera?
Zvinosisira maningi kukhwedera phedo na Jehovha no kumuthemba (Vonanyi ndima 6-7) *
6. Tingaramba kudini tiri phedo na Jehovha?
6 Rambanyi muri phedo na Jehovha. (Jakobo 4:8) Tingazviitisa kudini? Ngo kuthemba Jehovha inga ‘muzwi wo’ mukumbiro. (Nduyo 65:3) Nduyo 62:9 inoti: “Mubvunjenyi bzokuthimwathimwa bzese.” Jehovha anokwanisa kuita zvicina “mugano no kupindirija mukumbiro no murangariro yedu.” (VaEfeso 3:20) Mwari aaiti basi zviya zvatinokumbira mu mukumbiro jedu. Kudari tikava no cineso, iyena anokwanisa kucipeja mu njira yoticairangarira.
7. (a) Zvicinyi zvinozotibesera kuti tirambe tiri phedo na Jehovha? (b) Mukuzwirana no Vaheberi 6:10-12, ngowapi unozova muviyo wo kwenderera mberi tecishandira Jehovha makagondeka?
7 Rambanyi muri phedo na Jehovha ngo kuverenga Bhaibheri njiku jese zve rangarijisisanyi zvamunoverengaro. Imwe hama yaishanda inga misionario, yakati: “Endereranyi mberi meciita kunamata ko mbhuri, mecinasirira musongano inga zvomaiita kare.” Cimwenizve, endereranyi mberi mecicumaera masoko akanaka mu ungano yenyu imbza. Jehovha aakanganwi vaya vanoramba mecimushandira vakagondeka, pikija vacikakwanisi kuita zvizinji inga kare.—Verenganyi Vaheberi 6:10-12.
8. Magama atinowana pana 1 Johani 2:15-17, angatibeseresa kudini kuti tipungure zvatinazvo mu upenyu?
8 Endereranyi mberi mecipungura zvamunazvo mu upenyu. Mucatendera kuti kuthimwa-thimwa ko nyika ino ya Sathana, ‘kupsinye’ kana kuphingaije basa renyu ro umwari. (Mateu 13:22) Mucapurutana vandhu vacikanamati Jehovha kana ukama unoeja kumuvhunja kuti munodikana kuva no mare yakawanda kuti mubudirire mu upenyu. (Verenganyi 1 Johani 2:15-17.) Thembanyi Jehovha, iyena anogondesa kutipa zvese zvatinoda ku divi ro umwari, mazwiro no zvokunyama pa “ngari yokudikana.”—Vaheberi 4:16; 13:5, 6.
9. Mukuzwirana no Mazwi Akangwara 22:3, 7, ngenyi zvinosisira kutama kuita magava pacina dikano zve zvicinyi zvingatibesera kuti titeme zvivaringo ngo ungwaru?
9 Mucagara meciita magava. (Verenganyi Mazwi Akangwara 22:3, 7.) Kucinja kwenda ku ndau imweni kungamosha maningi mare zve pa mukuvo wondhowo zvingareruka kuita magava. Kuti mutame kuita magava, ngwariranyi kuti mutame kutenga zviro zvamucikadi. Inga muezaniso, patinonga tecikorondha mundhu ari kuhwaja, zvakareruka maningi kumosha mare. Pa mugariro jakadari, ceujanyi kuti ‘kupota no kukumbira’ kungamubesera kuti muteme zvivaringo ngo ungwaru. Inga mupinguro wo mukumbiro wenyu, Jehovha anozomupa runyararo “hunozorinda mwoyo yenyu no murangariro yenyu.” Ngokudaro, munozokwanisa kuhwisana no mugarirowo no makathiva.—VaFilipi 4:6, 7; 1 Pedru 5:7.
10. Tingaitisa kudini kuti tive no shamwari imbza?
10 Ivanyi no ushamwari hwaushoni. Bhunyanyi no shamwari jenyu ngo pamusoro po mazwiro enyu pomwe no zvineso zvamunosongana nazvo. Kudari, mukaita zvondhozvo, munozojizwa ushoni kamare. (Mucumaeri 4:9, 10) Shamwari jomakaita kare jinozova shamwari jenyu kwenda no kwenda. Wari, pa basa renyu imbza, imwimwi munodikana kuva no shamwari imbza. Ceujanyi kuti muve no shamwari munodikana kukhombija kuva shamwari. Mungaitisa kudini kuti muve no shamwari jipsa? Vhunjanyi vamweni makomborero o makapuwa ngo kushandira kwenyu Jehovha, mukadaro vanozovona kuti makadakara. Zvingatoita kuti vamweni vakatama kudakara ngo kuva kwenyu mu nguva yakazara, asi vamweni vatodakarira muezaniso wenyu voda kuva shamwari yenyu. Ivanyi munongwarira kuti mutame kubhuya maningi ngo pamusoro penyu kana ngo pamusoro po zviro zvomakaita mu basa ra Jehovha kutobatanijavo mazwiro akashata o makava nawo.
11. Mungaitisa kudini kuti mucadho wenyu urambe wakadakara?
11 Kudari mukadikana kusiya basa renyu ngo ndava yo kuhwaja ko womakarovorana naye, mucajipa ndava kana kutopa ndava mudoni wenyu. Ngo divi rimweni, kudari ndimwi muri kuhwaja, mucajipa ndava zve mucadorangarira kuti manyangajisa mukaji kana mwamuna wenyu. Ceujanyi kuti muri “muviri umwe” zve makagondesana pamberi pa Jehovha kuti maizokorondhana azvinenyi zvaizoitika. (Mateu 19:5, 6) Zvingatoitazve kuti mungatodikana kusiya basa renyu ngo kuti mukaji wenyu waano mimba. Kudari zvikamuitikira itanyi kuti mwana wenyu azive kuti iyena anosisira maningi kupinda basa renyu. Vhunjanyi mwana wenyu kuti iyena i “mucero” kana cipo cinovha kuna Mwari. (Nduyo 127:3-5) Cimwenizve, muvhunjenyi zviro zvese zvaushoni zvomakava nazvo mu basa renyu. Mukaita kudaro, munozoita kuti mwana wenyu ashandise upenyu hwake kuti ashandire Jehovha mu nguva yakazara.
VAMWENI VANGABESERESA KUDINI?
12. (a) Tingaitisa kudini kuti tibesere vaya vari mu nguva yakazara kuti vaenderere mberi veciita basa ravo? (b) Tingaitenyi kuti cinjo iyi ive icikanesi?
12 Ungano jakawanda jiri kuita zvese zvojinokwanisa kuti jibesere vese vanonga vecishandira mu nguva yakazara. Ivona vanoita zvondhozvo, ngo kuvavangisa kuti vaenderere mberi veciita basa ravo, ngo kuvapa mare no zviro zvimweni zvovanoda, kana kutovabesera pa kukorondha ukama hwavo uri ndhambo. (VaGalàsia 6:2) Kudari vaya vanoshandira mu nguva yakazara vakagajwa kuti vabesere ungano yenyu povanonga vacinjwa basa, mucadorangarira kuti vakashaisha kuita basa kana vakaita ciri cese cakashata. * Kusiyapo zvondhozvo, tinodikana kuvabesa kuti cinjo iya ive icikanesi. Nasanyi kuvaashira zve vasimbenyi ngo basa rovakaita, pikija wari avacakwanisi kuita zvizinji ngo ndava yo kuhwaja. Nasanyi kuvaziva. Mungatojija zvizinji ngo zvakavaitikira, ngo zivo yavo no jijiso yo vakaashira.
13. Tingabeseresa kudini vaya vanoashira basa imbza?
13 Pakutanga, hama jinoashirari basa imbza jinoda besero kuti jiwane pokugara, basa no zvimweni zvinodikana. Ivona kangaije vangada besero kuti vazwisise shwiro jo njiku no njiku, jakadari inga kushaba no zvimwenivo zvinokumbihwa ngo utongi. Asi, cikuru kamare covanoda asipi kuzwihwa pena asi kuzwisisa mugariro wavo. Kangaije vari kuhwisana no zvineso zvo uhomi hwavo kana umwe wo ukama hwavo ari kuhwaja kana vafihwa ngo mundhu wovanoda. * Cimwenizve, kangaije ticikazvizivi ivona vangatocema povanonga vari vega, kangaije ngo kutorangarira shamwari jovainga najo. Mazwiro akadaro angatora mukuvo wakatikuti.
14. Vacumaeri vamweni vakabesera kudini hambzaji yakaashira basa imbza?
14 Kudari mukacumaera navo no kuvavangisa ngo muezaniso wakanaka, mungavabesera kuti varovejane no cinjo. Hambzaji imweni yakashanda ko makore akawanda ku nyika imweni, yakati: “Pa basa rondaiita kare, ndaiitisa jijo jo Bhaibheri njiku jese. Pa basa imbza iri, zvakandinesa kuti ndive no mukana wo kuva no jijo yo Bhaibheri kana kukhombija vhidhiyo mu basa ro kucumaera. Asi hama no hambzaji jo ungano imbza yandiri wari, vakandikumbira kuti ndiende navo ku hwiririro javo no jijo javo jo Bhaibheri. Pondaivona kuvangisira no kucunga ko hama no hambzaji iji pa kuitisa jijo jo Bhaibheri jinobudirira, ndakatanga kuva no mavonero aushoni. Ndakajijira kutanga kubhuya no vandhu mu ndima yangu. Zvese izvi zvakandibesera kuti ndiwanezve mudakaro.”
ENDERERANYI MBERI MECIITA ZVAMUNOKWANISA!
Ejanyi kupsaka manera o kuengejera kucumaera kwenyu mu ndima yo ungano yenyu imbza (Vonanyi ndima 15-16) *
15. Mungaitenyi kuti mubudirire mu basa renyu imbza?
15 Mungaita kuti basa renyu imbza ribudirire. Mucadovona kuti makaposa zviri zvese pa basa renyu ro kare kana kuti imwimwi amucatosisiri. Rangariranyi ngo manera aari kumubesera ndiwona Jehovha zve endereranyi mberi mecicumaera. Tevejeranyi muezaniso wo Makristu akagondeka o muzana ro kutanga ro makore. Azvinenyi kuti ngo kwapi ko vainga, ivona “vaifamba ndau ngo ndau, vecitokotesa vangeri.” (Maitiro o Vapostori 8:1, 4) Kudari mukavangisira pa kucumaera, munozova no muviyo jaushoni. Inga muezaniso, mapiyona amweni aishandira ku nyika yakati kuti, akagogomehwa zve ocinja oenda koshanda ku nyika imweni, kondhoyo kwainga kuno dikano yo vacumaeri vaivereketa ndumi yo nyika yo vakavhaya.
16. Zvicinyi zvinozomubesera kuti muwane mudakaro pa basa imbza?
16 “Kudakara kwa Tenji Mwari i simba renyu!” (Neemia 8:10) Mudakaro wedu unovha ka Jehovha haiwa ku basa redu, azvinenyi dangani tinorida zvakadini. Ngokudaro, endereranyi mberi mucivangisa ushamwari hwenyu na Jehovha, kupsaka uzivi, ndhungamiro pomwe no besero. Ceujanyi kuti imwimwi makajijira kuda basa renyu, ngokuti makariita ngo mwoyo wese zve makabesera vandhu kondhoyo. Mu basa renyu imbza itanyi zvese zvamunokwanisa pa kuriita, mukadaro munovona kuti Jehovha anozomubesera kudavo basa rondhoro.—Mucumaeri 7:10.
17. Tinodikana kuceujenyi ngo basa ratiri kuita wari?
17 Atidikani kukanganwa kuti kushandira Jehovha i ciro cinoitwa kwenda no kwenda, asi basa ratiri kuita wari ringapera. Mu nyika imbza, kangaije zvingatoita kuti tese tizocinje mabasa atinoita. Aleksey wanangwaya pakutanga, anotenda kuti zvese zvakamuitikira, zviri kumunasirira kuitira cinjo jo kumbeji. Iyena wakati: “Ndaizviziva kuti Jehovha ariyodi kamare zve nyika imbza ngo yokadi. Asi zvainga ndhambo na inini. Wari, ndiri kukwanisa kuvona Jehovha pamberi pangu no kuvona nyika imbza kuti iri phedo kamare.” (Maitiro o Vapostori 2:25, 26a) Ngokudaro, basa ramunoita rikacinja, vangisanyi ushamwari hwenyu na Jehovha. Iyena aazomusii. Asi, acamubesera kuti muve no mudakaro mu basa rake, azvinenyi ngo papi pamuri zve basa rapi ramuri kuita.—Isaia 41:13.
NDUMBO 90 Vangisananyi Umwe no Umweni
^ ndim. 5 Nguva jimweni, hama no hambzaji jiri mu nguva yakazara kangaije jigadikana kusiya basa rajo kana jingaashira basa imbza. Pa jijo ya nyamasi, ticazobhuya ngo pamusoro po zvineso zvovanosongana nazvo no zvavanodikana kuita kuti vabudirire. Ticabhuyazve ngo pamusoro po zvinodikana kuita vamweni kuti vavavangise no kuvabesera. Zve ticavona kuti Bhaibheri ringatibeseresa kudini patinova no cinjo mu upenyu.
^ ndim. 4 Mukufananavo, hama jimweni pojakavona kuti jaavasharuka, jakapa basa rojaiita ku hama jiciri majaha. Vonanyi musoro unoti: “Vakristu Vakura—Jehovha Anokoshesa Kuvimbika Kwenyu,” mu Murindiri wa Setembro wo 2018, Cishona, pomwe no umweni unoti: “Rambanyi Muno Runyararo mu Murangariro pikija Mugariro Paunocinja,” mu Murindiri wa Outubro wo 2018.
^ ndim. 12 Hama jo mu nguva yakazara pajinoashira basa imbza, vakuru vanodikana kutumira karata kuti vakasike kuziviswa ku ungano imbza yovanoendaro. Vakadaro ivona vanoenderera mberi vecishanda inga mapiyona, vakuru kana vabatiri vanoshandira vacikanonoki.
^ ndim. 13 Vonanyi mutevejwana unoti: “Mazano Ekubatsira Vakafirwa,” wo 2018 pa Despertai! yo 3, Cishona.
^ ndim. 57 KUDURUJIHWA KO PIKICA: Varovorani vamweni vakadikana kusiya basa ravo ro umisionariro ku nyika imweni zve vanoeneka ungano no vakasuruvara.
^ ndim. 59 KUDURUJIHWA KO PIKICA: No vari ku nyika yo vakabarihwa, varovorani ava vanoita mukumbiro nguva jese kuti Jehovha avabesere kuhwisana no zvineso zvovanosongana nazvo.
^ ndim. 61 KUDURUJIHWA KO PIKICA: Ngo besero ra Jehovha, varovorani ava vanohwirira kooshanda mu nguva yakazara. Ivona vanoshandisa ndumi yovakajija ngari yovainga mamisionario, kuti vacumaere vatizi vo hondo, vanowanika mu ndima inocumaihwa ngo ungano imbza yavo.
