Vhesi iyi andizvopi zvoinonangira. Inonangira mundhu anosongana no zvineso zvakawanda, wokwanisa kucungirira.

Ngatende tivone vhesi 15 mbhera 17 kuti tinase kuzwisisa basi: “Iwewe, mundhu wakaxata, ucambira nyumba yo mururami. Ucaphwanya-phwanya nyumba yake! Ngokuti vakarurama vanowa runomwe, vomuka; asi vakaxata, novawana khombo, vanozopera. Kudari muvengi wako akawa, ucadakara; mwoyo wako ucatamba, kudari akakhugunywa.”—Mazwi Akangwara 24:15-17.

Vamweni vanorangarira kuti vhesi 16 inobhuya ngo pamusoro po mundhu anoshaisha, wokhauya, wovazve no ushamwari na Mwari. Inga muezaniso, vatungamiriri vaviri vo gerejha vo Ingratera, vakatara kuti “vacumairi vazinji vokare no vonguva ino, vanosanangura vhesi iyi ngo njira iyoo kamare. Ivona vakanangazve kuti durujiro iyo, inovonesa kuti “zvinokwanisika ku mundhu waushoni woita . . . cishaishi cikuru, asi woenderera mberi ecida Mwari no kutendehwa ndiyena ngokuti wakhauya.” Mavonero awo angava no mundhu acingadi kunyisa cishaishi. Iyena angarangarira kuti pikija akashaisha kwakawanda, Mwari anozomuregerera basi.

Asi izvi asizvona zvinoda kureva vhesi 16.

Gama ro Cihebheru rokuti “vanowa” kana “akawa” pa vhesi 16 na 17, ringashandiswa mu njira jakawanda maningi. Zvinganangira kuwa ko cinyama, kuwa ko mundhu ari pa cicungwe kana denga, kana kuwa ko ciri cese. (Deuteronòmio 22:4, 8; Amosi 9:9) Gama iro ringashandihwa ngo njira yo kuezanisira, inga zvatinoda kuzovona pa vhesi: “Tenji Mwari anovangisa madanyu o mundhu: iwona anovanga, njira yake inomudakajisa. Nokunyati akakhugunywa, aawi ngokuti Tenji Mwari anomubata ngo nyara.”—Nduyo 37:23, 24; Mazwi Akangwara 11:5; 13:17; 17:20.

Vonanyi zvakanangwa ndi Pirisori Edhwardho: “Gama ro Cihebheru rokuti [“kuwa”] nakamwe, arishandiswi kuda kunangira kuwa ko zvishaishi.” Ngo kudaro, porosori umweni wakadurujira vhesi 16 ngo njira iyi: “Azvicaizova no shwiro kushaisha kutaja vandhu va Mwari, ngokuti ivona nguva jese vanobudirira, asi vandhu vakashata avabudiriri!”

Ngo kudaro, zvese izvi zvinokhombija kuti Mazwi Akangwara 24:16, airipi kunangira cishaishi asi iri kunangira kusongana no zvineso vhaza jakawanda. Munyika yakashata yatiri kuponari, mururami angasongana no zvineso zvakasiyana-siyana. Iyena angatoteverehwa ngo utongi ngo ndava yo rutendo hwake. Iyena angathemba kuti Mwari mubeseri wake, zvokuti angatomubesa kuti akwanise kuhwisana no mugarirowo, wotobudirira. Rangariranyi ngo mafambiro anoita zviro ku vashandiri va Mwari. Itusu tinothemba kuti “Tenji Mwari anothavira vese vanowa, no kurungamisa vakapeama.”—Nduyo 41:2-4; 145:14-19.

“Murungami” aadakari vamweni povanotambujika. Kusiyapo izvo, iyena anovangiswa ngokuti anoziva kuti “vaya vanothya Mwari, vanozoitihwa bzakanaka, ngokuti ivona vanomuthya.”—Mucumaeri 8:11-13; Jobe 31:3-6; Nduyo 27:5, 6.