1-2. Ngoyapi vetero inoshamaisa ino vashandiri va Jehovha?

VETERO inosisira maningi. Vandhu vamweni vanovetera kuti vanozova no mucado unodakajisa, vanozorera vana vano uhomi hwaushoni. Cimwenizve vanovetera vana vavo vanozoita nane pavanonga vecihwaja. Itusu inga Makristu, tinovetero yakatojana na yondhoyo. Asi itusu tinovetera ciro cimweni cinopinda izvi. Tinovetera kuzopona kwenda no kwenda no kuvona vandhu vakafaya vecimuswa.

² Mupostori Pauro wakananga kudari: “Ndinovetera cigondiso ca Mwari . . . cokuti kunozowanika kumuka ko vakafa: vanasi no vacikanasi.” (Maitiro o Vapostori 24:15) Pauro asipi mundhu wo kutanga wakabhuya ngo pamusoro po rumuko. Teteguru Jobe wakaitavo zvodhozvo. Iyena wainga no cokwadi co kuti Mwari waizomuceujazve no kumumusa kovakafa.—Jobe 14:7-10, 12-15.

3. Tinobesereka kudini ngo 1 VaKorinto cipauko 15?

³ “Kumuka ko vakafa,” idivi ro “maambo o majijisiro,” kana kuti “majijisiro okutanga,” o zvinotendhwa ngo Makristu ese. (Vaheberi 6:1, 2) Hurukuro ya Pauro ngo pamusoro po rumuko, inowanika pana 1 VaKorinto cipauko 15. Zvaakatarari ngo pamusoro po rumuko zvakavangisa maningi Makristu okutanga. Cipauko ici, cingativangisavo no kuvangisa vetero yatinayo kuvhira kare.

4. Ngenyi tingava no cokwadi cokuti vaya vakafaya vanozomuswa?

⁴ Kumuswa ka Jesu Kristu kunotiita kuti tive no cokwadi cokuti tinovetera vadiwa vedu vakafaya. Rumuko hwa Jesu Kristu, idivi ro “vangeri” rakatokoteswa ndi Pauro ku Vakorintio. (1 VaKorinto 15:1, 2) Zvokadi iyena wakananga kuti kudari Mukristu wakatama kutenda kuti kunozova no rumuko, rutendo hwake hunozova hwa biresi. (1 VaKorinto 15:17) Kutenda kuti Jesu wakamuswa ndikona kunotikhohwesa kuti vamweni vanozomuswavo.

5-6. Magama anowanika pana 1 VaKorinto 15:3, 4, anorevenyi kwatiri?

 ⁵ Pauro paakatanga kutara ngo pamusoro po rumuko, iyena wakananga zvokadi zvinokwana kuita zvitatu: (1) “Kristu wakafa ngo ndava yo uxaixi hwedu.”(2) Iyena “wakavigwa.” (3) “Wozomuka ko vakafa pa njiku yocitatu, ngo kuteveja Matahwa.”—Verenganyi 1 VaKorinto 15:3, 4.

⁶ Waro kufa ka Jesu, kuvigwa kwake no kumuswa kwake zvinokurevenyi kwatiri? Muporofita Isaia wakananga kuti Mesiya ‘waizobviswa ku nyika yo vapenye’ no ‘kuvigwa pakati po vakaxata.’ Asi paidikanazve kuitika ciro cimweni. Isaia wakaengejera kuti Mesiya waizotambujwa ngo ndava yo “bzixaixi bzo vazinji.” Jesu wakaita zvondhozvo paakapira upenyu hwake inga muripo. (Isaia 53:8, 9, 12; Mateu 20:28; VaRoma 5:8) Ngokudaro, kufa ka Jesu, kuvigwa kwake no kumuka, kunotipa cokwadi cokuvetera kuzosujunuhwa kuushaishi no kurufu no kuvazve no vadiwa vedu vakafaya.

7-8. Ngozvapi zvinobesera Makristu kuti ave no cokwadi cokuti Jesu wakamuswa?

⁷ Vetero yedu yo rumuko yakabatana no kumuswa ka Jesu, ngo kudaro tinodikana kuva no cokwadi cokuti Jesu wakamuswa. Ngwenyi tingava no cokwadi cokuti Jehovha wakamusa Jesu mukufa?

⁸ Kwakava no vandhu vazinji vakavona Jesu pa kupera kumuswa, vovhunja vamweni ngo pamusoro pake. (1 VaKorinto 15:5-7) Mundhu wokutanga wakanangwa ndi Pauro, wakava mupostori Pedhru (Sefa). Cikwata co vajiji cakananga kuti Pedhru wakavona Jesu waingaya wamuswa. (Luka 24:33, 34) Tevere, Pauro wakananga kuti “gumi na vaviri,” vapostori, vakavona Jesu paakapera kumuswa. Sure kwazvo, wakavonekavo ngo “vandhu vaipinda mazana maxanu,” kangaije paciitiko cinodakajisa maningi ku Galileia cinonangwaya panana Mateu 28:16-20. Cimwenizve, Jesu “wakavonekavo kuna Jakobo.” Zvinovoneka inga kuti Jakobo uwu, yainga hama ya Jesu wakamurambaya inga Mesiya. (Johani 7:5) Jakobo pakupera kuvona kuti Jesu wamuswa, iyena wakava no rutendo. Mu gore ro 55 Kristu Aviya Pauro paakatara karata iyi, vazinji vakavona kumuka ka Jesu vainga vacapona. Izvo zvaizoita kuti ariwese anokana-kana ngo pamusoro po kumuka ka Jesu waizoenda ko bhuya navo.

9. Mukuzwirana no Maitiro o Vapostori 9:3-5, ngo zvapi zvakananga mupostori Pauro zvinovonesa kuti Jesu wakamuswa?

⁹ Pakufamaba ko nguva, Jesu wakajivonesa kuna Pauro. (1 VaKorinto 15:8) Pauro (Sauro) wainga mugwanja ecienda Dhamaseko paakazwa izwi ra Jesu, waingaya amuswa. Wakava no civoniso, pacivoniso, wakamuvona naari mugore. (Verenganyi Maitiro o Vapostori 9:3-5.) Zvakaitikirari Pauro zvinovonesa kamare kuti Jesu wakamuswa. —Maitiro o Vapostori 26:12-15.

10. Zvecivoneka kuti Pauro waitenda kuti Jesu wainga wamuswa ko vakafa zvicinyi zvaakaita?

¹⁰ Vandhu vamweni, vaidakarira zvainanga Pauro ngokuti Jesu acito amugumira, Pauro waiteverera Makristu. Pauro pakupera kuva no cokwadi cokuti Jesu wakamuswa, wakashanda ngo simba kuti akhohwesevo vamweni. Iyena wakatocungirira kutakwa, kufungihwa no kundondomera mujombe. Zvese izvi kuti acumaere masoko okuti Jesu wainga wakafa no kumuswa. (1 VaKorinto 15:9-11; 2 VaKorinto 11:23-27) Pauro wainga ano cokwadi cokuti Jesu wainga wamuswa kovakafa zvokuti iyena waizofa acijivirira cokwadi ici. Zvakanangwari ngo Makristu okutanga zvokuti Jesu wainga wamuswa ko vakafa zvinotibeseravo  kuti titende, andizvopi? Izvi azvivonesi kuti kumbejiyo kunozova no rumuko?

11. Ngenyi vamweni vo ku Korintio vakava no mavonero akashata ngo pamusoro po rumuko?

¹¹ Vagiriki vamweni vaigara ku dhorobha ro Korintio, vainga no mavonero akashata ngo pamusoro po rumuko. Vamweni vaitonanga kuti “akuna kumuka ko vakafa.” Ngenyi? (1 VaKorinto 15:12) Vandhu vamweni vo dhorobha ro atena vaiseka Pauro paaibhuya ngo pamusoro po rumuko. Murangariro uwu wakapsasavo vamweni vaigara ku Korintio. (Maitiro o Vapostori 17:18, 31, 32) Vamweni kangaije vairangarira kuti rumuko asipi wokadi. Kusiapo zvondhozvo, ivona vairangariara kuti mundhu anganangwa kuti wakafa ngo ndava yo ushaishi. Mundhu wondhowo paanova Mukristu anonangwa kuti aripenye ngokuti waregerehwa zvishaishi zvake. Azvinenyi hazvo zvinovaitisaro kuti ivona varangarire kudeya, vandhu vondhovo avatendi kuti rumuko hurio. Kudari Mwari aazivi kumusa Jesu, zvinovonesa kuti apazivi kuva no muripo, tese ticindori muushaishi. Ngo kudaro, vese vanoramba rumuko avana vetero yokadi.—1 VaKorinto 15:13-19; Vaheberi 9:12, 14.

12. Mukuzwirana na 1 Pedru 3:18, 22, kumuswa ka Jesu kwakasiyana kwapi no kumuswa kumweni kwakaitika kareko?

¹² Pauro waizviziva kamare kuti “Kristu, bzakadi, wakamuka [ko vakafa].” Kumuswa ka Jesu kwainga kwakasiyana kamare no kumuswa ko vandhu vamweni kwakaitika ngo kuti vakazoguma pakufazve. Pauro wakananga kuti Jesu wainga “mutungamiriri wa vaya vanozorora.” Munjira yapi Jesu wainga wokutanga kumuswa? Iyena wainga mundhu wokutanga wakamuswa kuupenyu wokumujimu, waingazve mundhu wokutanga wakapinda kudenga.—1 VaKorinto 15:20; Maitiro o Vapostori 26:23; verenganyi 1 Pedru 3:18, 22.

13. Ngowapi musiano wakaita Pauro ngo pamusoro pa Adhamu na Jesu?

¹³ Kuitisa kudini rufu wo mundhu umwe hunoviisa upenyu kumamiriyoni o vandhu? Pauro wakadavira muvhunjo uwu ngo njira kwayo kamare. Iyena wakasanangura musiyano uripo ku zviro zvakasongana no vandhu ngo pamusoro po zviro zvakaithwa ndi Adhamu no zviro zvinozokwanirisika ngo pamusoro po kujipira ka Kristu. Ngo pamusoro pa Adhamu Pauro wakatara kudari: “Kufa kwakaguma, ngo mundhu umwe.” Adhamu paakashaisha, wakaita kuti iyena no mubarihwana wake vatambujike. Itusu tiri kuenderera mberi tecitambujika ngo kutama kuzwira kwake. Asi zvecivoneka kuti Mwari wakamusa mwanake, itusu tingava no kumbeji kwakanaka. Pauro wakati:“ Kunozogumavo kumuka ko vakafa, ngo mundhu umwe,” Jesu. Iyena wakaengejera eciti: “Ngokuti vese vanofa ngo ndava ya Adamu, vese vanozova no uhomi ngo ndava ya Kristu.”—1 VaKorinto 15:21, 22.

14. Kunanga kuti Adhamu anozomuswa here? Sananguranyi.

¹⁴ Waro Pauro, paakananga kuti “vese vanofa ngo ndava ya Adamu,” waida kunangenyi? Pauro wainga ecibhuya ngo pamusoro po vandhu vese vakava no utaka wo ushaishi no kutama kukwana ka Adhamu vogumira pa kufa. (VaRoma 5:12) Adhamu aaripi pakati pa vaya “vanozova no uhomi.” Adhamu aazobesereki ngo muripo wa Kristu. Ngo kuti iyena wainga wakakwana asi wakatema civaringo cokutama kuzwira Mwari. Zvakaitikira Adhamu ndizvona zvondhozvo zvinozoitikira vaya vanozotongwa inga “mbuji” ngo “Mwana wo Mundhu” kuda kunanga kutongehwa “nyatwa icingaperi.”—Mateu 25:31-33, 46; Vaheberi 5:9.

15. Mbhaani vanobatanijwa pa “vese vanozova no uhomi”?

 ¹⁵ Vonanyi kuti Pauro wakananga kuti “vese vanozova no uhomi ngo ndava ya Kristu.” (1 VaKorinto 15:22) Karata ya Pauro, yakatarihwa Makristu okuzojwa o ku Korintio vaizomuswa kwenda kudenga. Makristu iya, ainga ‘akanaswa mwa Kristu Jesu, odanijwa kuti aite vacena mwoyo.’ Iyena wakanangavo kuti ndi vaya ‘vakazorora [mu rufu] mwa Kristu.’ (1 VaKorinto 1:2; 15:18; 2 VaKorinto 5:17) Pa karata imweni yakafemehwa, Pauro wakananga kudari: “Takaita ciro cimwe na [Jesu] ngo ndava yo kufa kwakaezana no kufa kwake, tinozomukavo ngo kumuka kwakaezana no kumuka kwake.” (VaRoma 6:3-5) Jesu wakamuswa inga mundhu wokumujimu woenda mugore. Izvi ndizvona zvinozoitika ku vese vakabatana “mwa Kristu,” kuda kunangira Makristu okuzojwa.

16. Pauro waida kunangenyi paakadanija Jesu inga ‘wokutungamira’?

¹⁶ Pauro wakatara kuti Kristu wainga wamuswa inga “mutungamiriri wa vaya vanozorora.” Ceujanyi kuti vamweni inga ndi Razaro, vakamuswa kuti vapone pasi pano asi Jesu wakava wokutanga wakamuswa inga mujimu woashira upenyu wo kwenda no kwenda. Iyena anoezaniswa no mucero wokutanga waikotohwa ngo vaiziraeri kuti vapire Mwari. Pauro ngo kudanija Jesu kuti ‘wokutungamira,’ waida kuvonesa kuti kwaizova no vamweni vaizomuswavo kuti vave no upenyu kudenga. Vapostori no vamweni vakabatana “mwa Kristu,” vanozotevera Jesu. Izvo zvinoda kunanga kuti ivona vanodomuswa ngo njira yakamuswa Jesu.

17. Vaya vakabatana “mwa Kristu” vanozoashira rini mupfupo wavo wokwenda kudenga?

¹⁷ Rumuko hwo vandhu vanoenda kudenga vakabatana “mwa Kristu,” auzivi kutanga Pauro paakatara karata iyi ku Vakorintio. Mukusiyana, Pauro wainangira mukuvo wokumbeji, paakati: “Mundhu no mundhu pa nguva yake: Anotungamira Kristu . . . Sure kwake, yena akavia, vandhu va Kristu.” (1 VaKorinto 15:23; 1 VaTesalònika 4:15, 16) Nyamasi tiri kupona pa mukuvo wakanangwaya wo ‘kuviya’ ka Kristu. Hina, vapostori no Makristu amweni okuzojwa akafa kareko, akadikana kuvetera mukuvo uwu kuti ugume kuti vaashire mupfupo wavo wo kwenda mugore no kubatanijwa Mwakristu “ngo kumuka kwakaezana no kumuka kwake.”

18. (a) Ngenyi tingaguma pa mbhejiso yo kuti kunozova no rumuko umweni kuciripi kudenga basi? (b) 1 VaKorinto 15:24-26, inotijijisenyi ngo zvinozoitika kudenga?

¹⁸ Ngozvapi zvinozoitikira ku Makristu ese akagondeka acikana vetero yo kwenda kudenga na Kristu? Ivona vanayovo vetero yokuzomuswa. Bhaibheri rinonanga kuti Pauro no vamweni vanopinda kudenga, ‘vaizomuswa pa rumuko hwokutanga.’ (VaFilipi 3:11, Shanduro yeNyika Itsva) Waro izvi azvirevi kuti kunozova no rumuko umweni? Izvi zvinozwirana kamare no zvakananga Jobe ngo pamusoro po kumbeji. (Jobe 14:15) “Yena akavia, vandhu va Kristu” vanozova vari kudenga na Jesu pavanozoparaja utongi hwese no vese vano simba. Pikija “mukorore wokupejisira . . . rufu” unozopfujuhwavo. Zvokadi kamare vese vanozomuswa kwenda kudenga avazofizve. Tingativo kudini ngo vamweni?—Verenganyi 1 VaKorinto 15:24-26.

19. Tingativo kudini ngo vaya vacina vetero yokuzorarama mugore?

¹⁹ Tingativo kudini ngo vaya vacina vetero yokuzorarama mugore? Ivona vangabatisisa magama akanangwa ndi Pauro okuti: ‘Ndinovetera . . . kuti kunozowanika kumuka ko vakafa: vanasi no vacikanasi.’ (Maitiro o Vapostori 24:15) Ngo kudaro, akuna mundhu acizivi kurungama anozoenda kudenga, zvakajeka kuti magama ese awo anovonesa kuti kumbejiyo kunozova no rumuko pasi pano.

20. Vetero yenyu inomuvangisa kudini?

²⁰ Pacina kukana-kana “kunozowanika kumuka ko vakafa.” Vese vanozomuswa kuti vapone pasi pano, vanozogara kwenda no kwenda. Ivanyi no cokwadi cokuti cigondiso ici cinozokwanirisika. Vetero iyi ingamuembezera ngo kuziva kuti vadiwa vedu vakafaya vanozomuka. Ivona vanozomuka pamukuvo wokuti Kristu no vamweni vanozova “majimambo . . . , pa ciuru co makore.” (Apokalipsi 20:6) Mungava no cokwadi co kuti kudari mukafa Kristu acito atanga kutonga pa ciuru co makore, imwimwi munozomuswa. “Ruvetero [uhu] ahucengeji.” (VaRoma 5:5) Vetero iyi ingamuvangisa wari no kuengejera mudakaro wenyu pamunonga mecishandira Jehovha. Asi tingajija zvizinji kuvhira ku 1 VaKorinto cipauko 15, inga zvatinozovona pamusoro unotevera.