1-2. Zvicinyi zvakavhunjwa vanakaji ngo ngirozi povainga pa guva ra Jesu zve Jesu wakavavhunjenyi?

NO PAPERA njiku mbiri Jesu naafa, mangwananyi fumi o njiku 16 ya Nisani yo gore ro 33 N.V.Y., vanakaji vamweni avo vainga vakasuruvara zve vaida Mwari, vakaenda ku guva ra Jesu. Povakaguma kondhoyo, vaida kumuzoja mutombo yo kunuhira no mafuta. Asi vakashamaisika ngo kuvona guva ricina mundhu! Ngirozi yakavavhunja kuti Jesu wainga wamuswa ko vakafa. Iyona yakaengejera yeciti: “Anozomutungamirira kuenda Galileya. Munozomuvona kondhoyo.”—Mateu 28:1-7; Luka 23:56; 24:10.

² Vanakaji vaya no vabudepo, Jesu wakasongana navo, wovavhunja kudari: “Endanyi mozivisa hama jangu kuti vaende Galileya; vanozondivoneyo.” (Mateu 28:10) Zvecivoneka kuti Jesu wainga wavha kumuswa, iyena wainga no ndhungamiro jakawanda maningi kuti ape vajiji vake, ngokuti wainga musongano wokutanga waakaronga kuita no vajiji vake.

3-4. Ngenyi tingananga kuti mupango unowanika pana Mateu 28:19, 20, auzivi kuvhunjwa vapostori basi? (Vonanyi pikica yo pa kapa.)

³ Verenganyi Mateu 28:16-20, Shanduro yeNyika Itsva. Pa musongano wakaita Jesu, iyena wakabhuya ngo pamusoro po basa rinosisira maningi raizoitwa ngo vajiji vake, kutangira mu zana ro kutanga ro makore mbhera nyamasi uno. Jesu wakati: ‘Endanyi moita kuti vandhu vo majinja ese vave vajiji, . . . zivanyivo kuti ndinemwi njiku jese mbhera kupejisira ko nyika.’

 ⁴ Jesu anoda kuti vateveri vake vese vave vacumaeri. Mupango uwu, auzivi kupuwa basi vapostori gumi na umwe. Tingavisa kudini no cokwadi nazvo? Vonanyi kuti Jesu aacaengepi basi no vapostori gumi na umwe pa dundhu ro Garireya, paakavavhunja kuti vaite kuti vandhu vave vajiji. Tinozviziviza kudini izvi? Ceujanyi kuti vanakaji vakaendaya ku guva ra Jesu, vakavhunjwa ngo ngirozi kudari: “Munozomuvona kondhoyo [Galileya].” Ngo iyo ndava, zvinovoneka inga kuti vanakaji ava vakagondeka, vaengepovo Jesu paakapa mupango wo kucumaera. Asi andizvopi zvega. Mupostori Pauro wakananga kuti Jesu wakavoneka “kamwe, [ngo] vandhu vaipinda mazana maxanu.” (1 VaKorinto 15:6) Vakawanana kwapi?

5. Ngenyi tingananga kuti ndau yakanangwaya pana 1 VaKorinto 15:6 ndiyona yondhoyo no inonangwa mu cipauko 28 ca Mateu?

⁵ Tino mathangwe akanaka anotiita kuti tigume pa mbhejiso yo kuti Pauro wainga ecinangira musongano wakaithwaya ku Garireya, unonangwaya mu cipauko 28 ca Mateu. Ngoapi mathagwe akona? Rokutanga, vajiji vazinji va Jesu vainga vo Garireya. Ngo iyo ndava, zvaizoreruka maningi kuita musongano wakadaro, pa dundhu ngokuti paizokwana vandhu vakawanda, kusiyapo kuita pa muzi pari pese ku Jerusarema. Rocipiri, naapera kumuswa, Jesu wakabudira vapostori vanokwana gumi na umwe pa muzi ku Jerusarema. Kudari naaida kupa mupango wo kucumaera no kuita kuti vandhu vave vajiji, waizozviita ku Jerusaremeyo. Azvicaizodikana kukumbira vapostori, vanakaji viya pomwe no vajiji vamweni kuti vasongane Garireya.—Luka 24:33, 36.

6. Mateu 28:20 inokhombijisa kudini kuti basa ro kuita vajiji rakapuwavo itusu? Zve tinozvizivisa kudini kuti vateveri va Jesu vari kuzwira mupango uwu?

⁶ Vonanyi thangwe rocitatu, rinosisira maningi. Mupango wo kuita kuti vandhu vave vajiji auzivi kupuwa basi Makristu o muzana ro kutanga ro makore. Tinozvizivisa kudini? Magama o kupejisira anowanika pa ndhungamiro yaakapa vateveri vake, Jesu wakati: “Zivanyivo kuti ndinemwi njiku jese mbhera kupejisira ko nyika.” (Mateu 28:20) Inga zvakanangwaya ndi Jesu, nyamasi uno vandhu vazinji vari kuita basa ro kuti vandhu vave vajiji. Vonanyi basi: Makore ese, vandhu vanokhwedera kuita 300.000 vanobhabhatijwa voguma pa kuva Zvapupu zva Jehovha zve pa nguva imweyo vova vajiji va Jesu Kristu!

7. Tinoda kubhuya ngo pamusoro penyi wari zve ngenyi?

⁷ Vandhu vakawanda vanojija Bhaibheri, vanoenderera mberi voguma pa kubhabhatijwa. Asi vamweni, ngo thangwe riri rese, vanothya kuzviita. Kudari imwimwi muri kuitisa jijo yo Bhaibheri, zvokadi kamare munoda kubesera mujiji wenyu wo Bhaibheri kuti ashandise zvaari kujija zve kuti agume pa kuva mujiji wa Kristu. Jijo iyi, inozokhombija kuti tingaitisa kudini kuti tibesere mujiji wedu wo Bhaibheri kuti ade Jehovha no kumubesera kuti aenderere mberi. Ngenyi tinoda kubhuya ngo pamusoro po shwiro iyi? Ngokuti nguva jimweni, tingatorangarira dangani tinodikana kwenderera mberi tecijija no mundhu wiya kana kuti haiwa.

8. Ngenyi zvinganesa nguva jimweni kubesera mujiji wedu wo Bhaibheri kuti ade Jehovha?

⁸ Jehovha aadi kuti vandhu vamushandire ngo kuvangirijwa, asi iyena anoda kuti vazviite ngo rudo wavanao naye. Ngo iyo ndava, tinodikana kubesera mujiji wedu wo Bhaibheri azwisise kuti Jehovha anomutaja zve anomuda maningi. Tinoda kuti mujiji uwu, avone Jehovha inga “Baba wo ndherera, mutongi wakarurama wo noni.” (Nduyo 68:6) Mujiji wedu  wo Bhaibheri paanozwisisa kuti Jehovha anomuda, zvingaita kuti rudo hwake naye ukure. Vajiji vamweni vo Bhaibheri vanovona zvecinesa kuvona Jehovha inga baba vano rudo, ngokuti vakakura pa mbhuri yo kuti avazivi kumboashira rudo wa baba wavo. (2 Timoti 3:1, 3) Ngokudaro, pamunonga mecijija, kohomejanyi maningi mugariro jinoshamaisa ja Jehovha. Mubeserenyi kuzwisisa kuti Mwari wedu ano rudo anoda kumupa upenyu ucingaperi zve anoda kumubesera kuti akwanise kuwana upenyu wondhowo. Zvicinyizve zvatingaita?

9-10. Mabhuku api atinodikana kushandisa kuti tiitise jijo yo Bhaibheri zve ngenyi?

⁹ Shandisanyi bhuku Bhaibheri Ringatijijisenyi? pomwe no Rambanyi Muri mu “Rudo hwa Mwari.” Mabhuku aya, akaitwa kuti mukwanise kubesera mujiji wenyu wo Bhaibheri. Inga muezaniso, cipauko co kutanga co bhuku Ringatijijisenyi cinodavira muvhunjo iji: Mwari anotitaja kana kuti wakashata?, Mwari anozwa kudini paanovona vandhu vecitambujika?, Mungava shamwari ya Jehovha here? Waro tingati kudini ngo pamusoro po bhuku rinozwi Rudo  hwa Mwari? Bhuku iri, rinokwanisa kubesera mujiji wo Bhaibheri kuti angashandisa kudini ndhungamiro jo Bhaibheri mu upenyu hwake no kumubesera kuti akhwedere phedo na Jehovha. Kangaije makamboshandisa mabhuku aya kuti muitise jijo yo Bhaibheri. Pikija zvakadaro, nasanyi kunasirira kuti muitise jijo imwe nga imwe. Cimwenizve, beseranyi mujijiwo mukuzwirana no zvaanoda.

¹⁰ Wari, amborangariranyi kuti mujiji wenyu anoda kuziva shwiro iri yese inowanika mu mabhuku acikawaniki mu Bhokiso Redu ro Mathurusi o Kujijisa. Maizoitenyi? Kangaije mungavhunja mujiji wenyu kuti averenge ega mabhuku edu. Mukadaro, munozokwanisa kwenderera mberi meciita jijo, mecishandisa bhuku Ringatijijisenyi kana Rudo hwa Mwari.

11. Ndirini patinodikana kutanga no kupejisa jijo yo Bhaibheri ngo mukumbiro? Zve tingasanangurisa kudini ku mujiji wedu wo Bhaibheri dikano yo kuita mukumbiro?

¹¹ Tanganyi jijo yenyu ngo kuita mukumbiro. Kunasa kunanga, kudari jijo yedu yaano sumana nganani no yatanga, zviri nane kutanga no kupejisa jijo yedu ngo mukumbiro, zvecikwanisika weya. Tinodikana kukhombija ku mujiji wedu wo Bhaibheri kuti tinokwanisa kuzwisisa Soko ra Mwari ngo besero ro mujimu mucena. Vacumaeri vamweni, vanosanangura dikano yo kuita mukumbiro vacito vatanga jijo yo Bhaibheri, ngo kuverenga Jakobo 1:5, iyo inoti: “Ndiani wenyu anotama uzivi, ngaakumbire Mwari.” Tevere vanovhunjisa kudari: “Tingakumbirisa kudini uzivi kuna Mwari?” Zvingaita kuti mujiji wenyu wo Bhaibheri angananga kuti tinodikana kuita mukumbiro.

12. Nduyo 139:2-4 ingabesera kudini mujiji wenyu wo Bhaibheri, kuti aitise nane manera ake o kuita mukumbiro?

¹² Jijisanyi mujiji wenyu wo Bhaibheri kuita mukumbiro. Musanangurirenyi kuti Jehovha anoda maningi kuzwa mukumbiro jake jinovha mukati mo mwoyo. Muvhunjenyi kuti mu mukumbiro jedu tingatovhunja Jehovha zvese zvatinazvo, kubatanijavo zviya zvaticikakwanisi kuvhunja mundhu umweni. Ngokuti Jehovha anoziva zviya zvatiri ngo mukati. (Verenganyi Nduyo 139:2-4.) Kudari ari kunesehwa kuti anyise murangariro wakashata kana cirovejeso cakashata, muvhunjenyi kuti aite mukumbiro ecikumbira besero ra Mwari. Inga muezaniso, ngatiti mujiji wenyu wo Bhaibheri anodakarira feriyadho icikadikani kunghwinihwa ngo Makristu. Iyena anozviziva kuti zvakashata, pikija zvakadaro, anondozviita basi. Ngokudaro, muvangisenyi kuti avhunje Jehovha zvondhozvo kamare zve amudeketerere kuti akwanise kuda zviya zvaanoda.—Nduyo 97:10.

13. (a) Ngenyi tinodikana kukoka mujiji wo Bhaibheri kuti aviye kumusongano zvecikwanisika weya? (b) Tingaitisa kudini kuti mujiji wo Bhaibheri ajizwe akasujunuka pa Nyumba yo Umambo?

¹³ Kokanyi mujiji wenyu wo Bhaibheri kuti aviye kumusongano, ngo kukasika. Zviro zvaanozwa no zvaanovona ku musongano zvingamubesera maningi kuti aenderere mberi. Mukhombijenyi vhidhiyo izwi Zvicinyi Zvinoitwa mu Nyumba yo Umambo? zve mukokenyi kuti aviye kumusongano. Zvecikwanisika weya mungatomupekeja bhureya. Ciro cimweni caushoni, ngo co kukoka vacumaeri vakawanda kuti vamuperekeje kooitisa jijo yenyu. Izvo zvinozobesera mujiji wenyu kuti azive vandhu vamweni vo ungano. Mukaita kudaro, anozojizwa akasujunuka paanozoenda ku Nyumba yo Umambo.

14. Ngozvapi zvingabesera mujiji wenyu kuti aenderere mbheri?

¹⁴ Cido cedu ngo co kubesera mujiji wedu wo Bhaibheri, kuti aenderere mberi ku divi ro  umwari. (VaEfeso 4:13) Mundhu paanotenda kujija Bhaibheri, kangaije angabatikana ngo manera aanozobesehwa ngo jijoyo. Asi rudo hwake kuna Jehovha paunokura, iyena anoenderera mberi, wototanga kurangarira manera okubesera vamweni, kubatanijavo no vese vatori mu ungano. (Ezanisanyi na Mateu 22:37-39) Kudari zvecikwanisika, mucadothya kubhuya no mujiji wenyu ngo cidakajiso cokuita mupiro wokubesera basa ro umwari.

15. Tingabeseresa kudini mujiji wedu wo Bhaibheri kuti azive zvokuita panobuda zvineso?

¹⁵ Jijisanyi mujiji wenyu wo Bhaibheri zvaanodikana kuita pakabuda zvineso. Inga muezaniso, ngatiti mujiji wenyu i mucumaeri acizivi kubhabhatijwa, womuvhunja kuti wakasuruvara ngokuti ariwese mu ungano wamunyangajisa. Mucadomuvhunja kuti ndi ngana anorazawe, asi muvhunjenyi kuti ngozvapi zvinonangwa ngo Bhaibheri kuti aite. Iyena angatoregerera hameyo. Kudari zvicikakwanisiki, angapinda kobhuya nayo ngo nderemejo no rudo hwese no cinangwa co ‘kuponesa hameyo.’ (Ezanisanyi na Mateu 18:15) Beseranyi mujiji wenyu kuti anasirire zvaanoda kubhuya. Mubeserenyi kuti azive kushandisa JW Library^®, Bhuku ro Kupsakisisa ro Zvapupu zva Jehovha no jw.org^® kuti azokwanise kuhwisana no zvineso. Mujiji paanonasa kujijiswa acito abhabhatijwa, anozokwanisa kutaja ushoni vamweni mu ungano pakupera kubhabhatijwa.

16. Ngenyi zvinosisira maningi kukoka mucumaeri umweni kuti amuperekeje koitisa jijo yenyu?

¹⁶ Kokanyi vamweni mu ungano kana kukoka muvonereri wo ndharaundha paanofambira ungano kuti mupinde navo koitisa jijo yenyu. Ngenyi munodikana kuita kudaro? Kusiyapo zvaperari kunangwa, vacumaeri vamweni kangaije vangada kubesera mujiji wenyu mu njira yamucikakwanisi. Inga muezaniso, ngatiti mujiji wenyu wakatoeja kakawanda kusiya kubhema asi aazivi kukwanisa. Kokanyi hama yakahwisana no cineso ici, yakatoejavo kakawanda icikakwanisi kusiya, kuti iwanikevo pa jijo yenyu. Kangaije ingakwanisa kupa mazano mujiji wenyu. Kudari amujizwi ushoni kuitisa jijo yo Bhaibheri pamberi po hama ino zivo, mungaikumbira kuti iitise jijo yenyu. Pa zvese izvo, mucasiya kuti mujiji wenyu aruze mukana wo kujija ngo vandhu vano ruzivo. Ceujanyi kuti cido cedu ngo co kubesera mujiji wedu kuti aenderere mberi ku divi ro umwari.

17-18. Zvicinyi zvamunodikana kuvona mucito maimisa jijo yo Bhaibheri?

¹⁷ Kudari mujiji wenyu aaripi kuita cinjo kuti aenderere mberi, mungajivhunjisa kudari: ‘Ndinodikana kuimisa jijo ii here?’ Mucito maimisa jijo yo Bhaibheri, munodikana kuvona zvaanokwanisa kuita. Ngokuti vamweni vanotora mukuvo wakareba kuti vaenderere mberi, kuveni vamweni haiwa. Ngokudaro, jivhunjisenyi kudari: ‘Mujiji wangu arikuenderera mberi mukuzwirana no mugariro wake here?’ ‘Arikutanga  “kuteveja” kana kushandisa zvaari kujija here?’ (Mateu 28:20) Kuenderera mberi ko mujiji kunganonoka, asi anodikana kuita cinjo padoko ngo padoko.

¹⁸ Zvicinyi zvamunodikana kuita, kudari muri kujija no ariwese ko nguva yakareba, movona kuti aaripi kureremeja zvaari kujija? Vonanyi muezaniso uu basi: Mujiji wenyu wapeja kujija bhuku Bhaibheri Ringatijijisenyi? zve watanga kujija Rambanyi Muri mu Rudo hwa Mwari, asi aato waviya kumusongano no ku Cirangarijo! Pacina thangwe rinozika, anonanga kuti aana nguva yo kujija kana kuti wakabatikana. Pa mugariro uu, zviri nane kubhuya naye ngo pamusoro pazvo. *

19. Mungavhunjenyi mujiji wo Bhaibheri acikareremeji zvaanojija zve zvicinyi zvamunodikana kurangarira?

¹⁹ Mungatanga mabhuyo ngo kumuvhunjisa kudari: ‘Mu mavonero enyu, cicinyi ciri kumuphingaija kuti mutame kuva Capupu ca Jehovha?’ Kangaije mujijiwo angadavira kudari: ‘Ndinoda kujija Bhaibheri. Asi, andizoiti Capupu ca Jehovha.’ Kudari muna nguva yakareba mecijija naye, kunanga kuti zvina shwiro kuenderera mberi mecijija naye here? Ngo divi rimweni, mujiji wenyu angamuvhunja ciri kumuphinga kuti atame kwenderera mberi. Inga muezaniso, angavona inga kuti aazokwanisi kucumaera muzi ngo muzi. Mukaziva cineso cake, azvizonesi kumubesa.

20. Maitiro o Vapostori 13:48, ingatibesera kudini kutema civaringo co kusiya kana kuenderera mberi tecijija no mundhu?

²⁰ Zvinosuruvarisa ngozvokuti, vajiji vamweni vo Bhaibheri, vakadari inga Vaiziraeri vo munjiku ja Ezekieri. Ecibhuya ngo pamusoro pavo, Jehovha wakavhunja Ezekieri kudari: “Iwewe, kovari, uri ndumbo yakaseja, yakaimbwa uxoni, yakatetembwa ngo mbira: ivona vanozwa mazwi ako, asi avamateveji.” (Ezekieli 33:32) Zvinganesa kuvhunja mundhu kuti aticajijizve naye Bhaibheri. Asi “nguva [yasara] i doko.” (1 VaKorinto 7:29) Kusiyapo kupeja nguva no vajiji vacikaendereri mberi, tinodikana kupsaka vaya vano ‘cido cakanaka co kuva no upenyu ucikaperi.’—Verenganyi Maitiro o Vapostori 13:48, Shanduro yeNyika Itsva.

21. Ngoyapi vhesi yo gore rino zve inozotibesera kuti tiitenyi?

²¹ Mugore rino ro 2020, vhesi yedu yo gore inozotibesera kuti tiitise nani kukwanisa kwedu kuita kuti vandhu vave vajiji. Iyona ino magama amweni akanangwa ndi Jesu pa musongano unosisira wakaitwaya pa dundhu ro Garireya, okuti: ‘Endanyi moita kuti vandhu . . . , vave vajiji no kuvabhabhatija.’—Mateu 28:19, Shanduro yeNyika Itsva.