1. Ngo japi mugariro jinosuruvarisa jiri kuhwisana no vashandiri vakagondeka va Jehovha?

KUTENDERERA pasi pese, vashandiri vazinji va Jehovha vari kuhwisana no mugariro jinovaita kuti vathimwe-thimwe kana kusuruvara. Mu ungano yenyu, makambozvivona izvi here? Makristu amweni ari kuhwisana no ndhenda jicikarapiki kana kufihwa. Vamweni vari kuhwajihwa maningi ngokuti ari wese wo pa mbhuri pavo kana shamwari yo vaida maningi, yasiya kushandira Jehovha. Vamweni vari kuwihwa ngo ngozi jinoitika jega. Hama no hambzaji jese iji, jinoda kuembezehwa. Tingavabeseresa kudini?

2. Ngenyi nguva jimweni mupostori Pauro waidavo kuembezehwa?

² Upenyu wo mupostori Pauro, kazinji wainga pa ngozi. (2 VaKorinto 11:23-28) Iyena waidikana kucijikira “muzwa mu muviri.” Muzwa wondhoo, kangaije yainga ndhenda. (2 VaKorinto 12:7) Iyena wakasuruvara ngo kusiiwa ngo shamwari yake Dhema, iyo yaaishanda nayo. Dhema wakasiya Pauro ngokuti ‘wakapsanga bzo nyika.’ (2 Timoti 4:10) Pauro wainga Mukristu wokuzojwa, wainga no cicunge zve waidakarira kubesera vamweni. Pikija zvakadaro, iyena waisuruvaravo nguva jimweni.—VaRoma 9:1, 2.

3. Ndiyani wakaembezera no kubesera Pauro?

³ Pauro wakaembezehwa no kubeswa. Kuitisa kudini? Jehovha wakashandisa mujimu mucena wake kuti amuvangise. (2 VaKorinto 4:7; VaFilipi 4:13) Jehovha wakashandisazve Makristu amweni kuti aembezere Pauro. Makristu ondhoo akamuembezera maningi zvokuti Pauro wakananga kuti ivona “vakandinyaraja kukuru.” (VaKolosi 4:11) Iyena wakatonanga mazina  o vanganani, inga muezaniso Aristarko, Tikiko na Marko. Ivona vakamuvangisa no kumubesera kuti acungirire. Ngojapi mugariro jakabesera hama ndhatu iji, kuti jikwanise kuembezera Pauro? Tingatevejeresa kudini muezaniso wavo patinoembezera no kuvangisa vamweni?

4. Aristarko wakakhombijisa kudini kuti wainga shamwari yakagondeka ya Pauro?

⁴ Aristarko wakava shamwari yakagondeka kamare ya Pauro. Iyena wainga wo Tesaronika, dhorobha ro Masedhoniya. Vhaza yo kutanga yo kuti Bhaibheri rinobhuya ngo pamusoro pake, i pa hwendo wo citatu wo umisionario wa Pauro, paakafamba ngo dhorobha ro Efeso. Paainga ecifamba na Pauro, Aristarko wakasungwa ngo mbungano huru yaiita bope. (Maitiro o Vapostori 19:29) Paakasujunuhwa, iyena aazivi kurangarira kujingwarira. Wakaenderera mberi ecifamba na Pauro. No pakhirira mweji jakati kuti, pavainga Gresiya, Aristarko wainga acindori na Pauro, pikija vavengi vaida kuuraya Pauro. (Maitiro o Vapostori 20:2-4) Mu gore ro 58 N.V.Y. Pauro paakatumwa kwenda Roma inga musungwi, Aristarko wainga naye, vakatambujika vese. (Maitiro o Vapostori 27:1, 2, 41) Povainga Roma, Aristarko wainga na Pauro mu kadheya. (VaKolosi 4:10) Pacina kukana-kana, Pauro wakaembezehwa maningi ngo kuva no shamwari yakagondeka inga ndi Aristarko!

5. Mukuzwirana na Mazwi Akangwara 17:17, tingakhombijisa kudini kuti tiri shamwari jakagondeka?

⁵ Kudari inga ndi Aristarko, tingavavo shamwari jakagondeka jo hama no hambzaji jedu. Tingazviitisa kudini? Ngo kuva naivona pikija pa mukuvo wo “bonezi.” (Verenganyi Mazwi Akangwara 17:17.) Kangaije tinotodikana kuita zvondhozvo, pikija tikavona kuti kuneseka ko hama yedu kwapera. Hambzaji Fransesi, * avo vakafihwa ndi baba wavo zve no papera mweji mutatu wofihwazve ndi mai wavo, vakananga kudari: “Ndinorangarira kuti tingahwisana no mugariro unonesa pikija pa mukuvo wakareba. Ndinodakara maningi ngo kuva no shamwari jakagondeka, ijo jinoceukija kuti ndiciri kuhwajihwa, pikija vabari vangu vafa no papera mukuvo wakareba maningi.”

6. Shamwari jakagondeka jinoitenyi?

 ⁶ Shamwari jakagondeka jinopa simba no nguva yajo kuti jikwanise kubesera vamweni. Inga muezaniso, imwe hama inodanwa Pita yakavhunjwa ngo medhiko wayo kuti yainga no ndhenda yaizovauraya ngo kukasika. Mukaji wavo anozwi Katarina, wakati: “Varovorani vamweni vo ungano yedu, vakatiperekeja potakaenda koovonana na medhiko wa Pita. Povakazwa kuti Pita ano ndhenda yakadaro, ivona avazivi kutisiya tega. Nguva jese potaida besero ivona vaenga na itusu.” Zvokadi kamare, kuva no shamwari jakadaro patinosongana no zvineso, zvinoembezera maningi!

7-8. Mukuzwirana na VaKolosi 4:7-9, Tikiko wakakhombijisa kudini kuva shamwari inothembeka?

⁷ Tikiko wainga Mukristu waigara mu dhistiritu yo Roma, porovhinsiya yo Aziya. Iyena wakavavo shamwari yokagondeka ya Pauro. (Maitiro o Vapostori 20:4) Mu gore ro 55 N.V.Y., Pauro wakaronga muhengo kuti abesere Makristu o Judheya, ngokuti aitambujika. Zvingaita kuti Pauro wakasiya Tikiko kuti angwarire basa iri. (2 VaKorinto 8:18-20) Pa kufamba ko nguva, Pauro paakafungihwa mu kadheya yo Roma pa vhaza yokutanga, Tikiko wakashanda inga ndhumwa yake. Iyena waiendesa karata no masoko anovangisa a Pauro ku ungano jo Aziya.—VaKolosi 4:7-9.

⁸ Tikiko wakaenderera mberi eciva shamwari inothembeka. (Tito 3:12) Mukuvo wondhowo, asipi Makristu ese aithembeka inga ndi Tikiko. Mu gore ro 65 N.V.Y., Pauro paainga wafungihwa pa vhaza yo cipiri, wakatara kuti Makristu mazinji wo porovhinsiya yo Aziya, ainga aacashamwarijani naye ngo kuti aithya vavengi. (2 Timoti 1:15) Mukusiyana navo, Pauro waithemba Tikiko. Ngo iyo ndava, wakamupa basa rimweni. (2 Timoti 4:12) Pacina kukana-kana, Pauro waidakara ngo kuva no shamwari yaushoni yakadari inga Tikiko.

9. Tingatevejeresa kudini Tikiko?

⁹ Itusu tingavavo shamwari jinothembeka inga Tikiko. Inga muezaniso, itusu atigondesi basi hama jedu kuti tinozovabesera panguva yo nyatwa. Asi, tinoita ciri cese kuti tivabesere kamare. (Mateu 5:37; Luka 16:10) Vari kuhwisanaya no zvineso, vanoembezereka maningi pavanoziva kuti tiripo kuti tivabesere. Ngenyi?  Hambzaji imweni yakadavira kudari: “Mundhu paanojipira kuti akubesere, perapo okubeseradi, zvinokuita kuti ujizwe ushoni.”

10. Mukuzwirana no Mazwi Akangwara 18:24, ndiyani angakwanisa kuembezera vaya vari kuhwisana no zvineso kana kusuruvara?

¹⁰ Vaya vari kuhwisanaya no zvineso kana kusuruvara, vanoembezehwa ngo kuziva kuti vangava no shamwari yavanothemba. (Verenganyi Mazwi Akangwara 18:24.) Hama Bhijai, avo vakasuruvara maningi ngo kuvona mwana wavo worume ecijingwa, vakananga kudari: “Ndakavona kuti ndaidikana kuvhunja mundhu wandinothemba manera andaijizwa.” Karlos, hama imweni yakaita cishaishi, yoruza basa royaidakarira maningi kuita mu ungano, yakananga kudari: “Ndaida kubhuya no ‘mundhu waizokwanisa kundipurukira,’ acikanditongi.” Vakuru vakava ‘mundhu wondhowo’ kuna hama Karlos. Ivona vakabesera hama Karlos kuti vahwisane no mugariro uu unonesa. Ciro cimweni cakabesera hama iyi, cakava co kuziva kuti vakuru avacaizovhunja ari wese zvovainga vabhuya.

11. Tinodikana kuitenyi kudari tinoda kuva shamwari inothembeka?

¹¹ Kuti tive shamwari inothembeka yo ari wese, tinodikana kuva vandhu vanosengerera. Hambzaji Zana, avo vakatizwa ngo mwamuna wavo, vakawana embezero ngo kusumura zvavaizwa ku shamwari javo jo phedo. Ivona vakati: “Ivona vakandipurukira ngo kusengerera kwese, pikija ndaigara ndecinanga zviro zvondhozvo-zvondhozvo.” Mukava mundhu anonasa kupurukira, munozokhombija kuva shamwari yaushoni.

12. Marko wainga ani zve wakakhombijisa kudini kuti waida kushandira vamweni?

¹² Marko wainga Mukristu wo Cijudha wo Jerusarema. Hama yake Bharnabha yainga misiyonariyo waizivika maningi. (VaKolosi 4:10) Zvinovoneka inga kuti Marko wakavha pa mbhuri yakakhupuka. Asi iyena aacaivona mare inga inosisira maningi mu upenyu hwake. Mu upenyu hwake hwese, wakakhombija kuti waida kushandira vamweni naakadakara. Inga muezaniso, iyena wakashandira kakawanda mupostori Pauro na Pedhru, kuti vakwanirise ushoni mabasa ovainga nawo no kuvabesera pa zviro zvavaida. (Maitiro o Vapostori 13:2-5; 1 Pedru 5:13) Pauro wakananga kuti Marko waingavo pa cikwata ca vaya vainga ‘vabatiri vake ku Umambo hwa Mwari’ zve ‘vakamunyaraja kukuru.’—VaKolosi 4:10, 11.

13. 2 Timoti 4:11, inokhombijisa kudini kuti Pauro waireremeja basa rese raiitwa ndi Marko?

¹³ Marko wakaguma pa kuva shamwari yo cike-ndi-cikevo ya Pauro. Inga muezaniso, mukati mo gore ro 65 N.V.Y., Pauro paainga akafungihwa ku Roma pa vhaza yo kupejisira, wakatara karata yake yo kupejisira kuna Timoti. Pa karata iyi, Pauro wakakumbira Timoti kuti apinde Roma kotora Marko aviye nae. (2 Timoti 4:11) Pacina kukana-kana, Pauro waireremeja maningi basa rese rakaita Marko. Ngaizvona zvakamuita kuti amukumbire kuti vave vese pa nguva iyo yaisisira. Marko wakabesa Pauro ngo kuita zviri zvese. Kangaije waimupekeja zvokuha kana muphukutu kuti atarire zviri zvese. Zvingaita kuti besero no vangiso ya Marko, yakabesera Pauro kuti acungirire njiku nganani acito auraiwa.

14-15. Mateu 7:12, inotijijisenyi ngo pamusoro po kubesera vamweni?

¹⁴ Verenganyi Mateu 7:12. Patinosongana no mugariro jo kunesa, zvaushoni maningi kuva pamwepo no shamwari jingakwanisa kutibesera! Hama Riyani, avo vakafihwa ndi babavo pa asidhente, vakati: “Paunonga wecitambujika, aukwanisi kuita zviro zvizinji  zvinodikana kuitwa njiku yese.” Ivona vakaengejera veciti: “Zvinoembezera maningi, mundhu paanoita ciri cese kuti akubesere, pikija no ciri cidoko haco.”

¹⁵ Kuva vandhu vanonasa kupurukira zve vanokwanisa kusotesesa zviri kuitika, kunozotibesera kuti tivone njira nyaushoni yo kubesera vamweni. Inga muezaniso, hambzaji imweni yakatema civaringo co kuda kubesera hama Pita no mukaji wavo Katarina, vanangwaya pa kutanga, ngo kwenda navo ka medhiko. Zvecivoneka kuti hama Pita no mukaji wavo avacainga pa mugariro waivatendera kufambisa karu, hambzaji iyi yakaita urongwa kuti hama jakasiyana-siyana jo ungano yavo, jipe bhureya hama Pita no mukaji wavo. Kureva kuti urongwa uwu, wakabesera here? Hambzaji Katarina vakati: “Zvaidari inga kuti ndavhisihwa muthwaro mukuru wainga pa musana pedu!” Mucadokanganwa kuti, ngo kuita kwenyu zviro zvidoko kuti mubesere vamweni, mungakwanisa kuvaembezera.

16. Tinojijenyi ngo muezaniso wa Marko ngo pamusoro po kuembezera vamweni?

¹⁶ Pacina kukana-kana, mujiji Marko wainga no zviro zvizinji zvo kuita. Wainga no zviro zvinosisira maningi kuti aitire Jehovha, cimwe cakona cainga kutara bhuku rinotora zina rake. Pikija zvakadaro, iyena wakapsaka nguva kuti aembezere Pauro. Zvondhozvo zvakaita kuti Pauro azwe akasujunuka kuti akumbire kubeswa ndi Marko. Hambzaji Angela, avo vakauraihwa mbiya vakabara mai wavo, vakajizwa ushoni ngo kuva no shamwari jakanaka inga ndi Marko. Ivona vakati: “Shamwari inoda kamare kubesera, inokhwederereka. Iyona inonasa kujekesa kuti inoda kuita ciri cese kuti ibesere, icikatori mukuvo wakawanda.” Tingajivhujisa kudari: “Kureva kuti hama jinondivona inga mundhu anoda kuembezera vamweni no kuvabesera here?”

17. Ngenyi kurangarijisisa zvakatahwa pana 2 VaKorinto 1:3, 4, zvingatiita kuti tiembezere vamweni?

¹⁷ Zvakareruka maningi kuvona hama kana hambzaji inoda kuembezehwa. Kangaije tingatoshandisa embezero yotakaashira kuti tiembezerevo vamweni. Nina, imwe hambzaji yakafihwa ndi mbiya vakabara mai wavo, vakati:  “Jehovha angatishandisa kuti tiembezere vamweni, asi kuti iyena azviite, tinodikana kutendera kushandiswa ndiyena.” (Verenganyi 2 VaKorinto 1:3, 4.) Hambzaji Fransesi, vanangwaya pakutanga, vakati: “Zvinonangwaya pa 2 VaKorinto 1:4, ndizvona kamare. Itusu tingakwanisa kushandisa embezero yotakaashira kuti tiembezerevo vamweni.”

18. (a) Ngenyi vamweni vangathya kuembezera vamweni? (b) Zvicinyi zvinozotibesera kuti tikwanise ushoni kupa embezero? Ipanyi muezaniso.

¹⁸ Tinodikana kuita ciri cese kuti tiembezere vamweni pikija patinovona kuti atina ciri cese co kunanga kana kuita. Hama Pauro, umwe mukuru wakafihwa ndi baba. Vakati: “Ndakazwisisa kuti azvicairerukepi kuti hama jiviye koobhuya na inini. Ijona ajicaiziva zvokunanga. Asi tinodakara maningi ngokuti ijona jaida kundiembezera no kundibesera.” Izvo zvakadofanana no zvakaitika na hama Tajoni, avo vakatambujika ngo ndava yo kuzungunyika ko nyika. Ivona vakati: “Kunasa kunanga, andiripi kuceukija masoko ondakatumihwa ngo hama pasure po kuzungunyika ko nyika. Asi, ndinoceukija kuti hama jakaneseka maningi ndini zve jaida kuziva manera ondainga.” Mu njira yakafanana, kudari tikakhombija kuno hama jedu kuti tinoneseka ndivona, tinozokwanisa ushoni kupa embezero yo vanoda.

19. Ngenyi tinodikana kutema civaringo co kuembezera vamweni?

¹⁹ Mugumo wo nyika ino paunonga wecikhwedera, mugariro wo nyika unozoshatisisa zve upenyu unozonesa maningi. (2 Timoti 3:13) Ticikanangi hedu ngo zvineso zvatinowana ngo ndava yo kutama kukwana no ushaishi wotakaashira. No zvineso zvese izvi, tese tinoda kuembezehwa basi. Mupostori Pauro wakakwanisa kuva akagondeka mbhera kufa kwake, ngo ndava yo embezero yaakaashira kuvhira ku hama jake jo Cikristu. Ngo iyo ndava, tese tinodikana kutema civaringo co kuva vandhu vakagondeka inga ndi Aristarko, vanothembeka inga ndi Tikiko, vanoda kushandira vamweni inga ndi Marko. Tikadaro, tinozokwanisa kubesera hama no hambzaji jedu kuti jirambe jakagondeka.—1 VaTesalònika 3:2, 3.