Tiri va Jehovha
‘Rinodakara jinja rina Mwari anozwi Jehovha, vandhu vaakakheta inga ndhaka yake.’—NDUYO 33:12, Shanduro yeNyika Itsva.
1. Ngenyi tingananga kuti Jehovha ndi mune wo zvese? (Vonanyi pikica yo kutanga.)
ZVESE ngo zva Jehovha! Iyena ndi mune wo “denga rese, wo nyika no wo bzese bzo inabzo.” (Deuteronòmio 10:14; Apokalipsi 4:11) Zvecivoneka kuti Jehovha wakasika vandhu, tese tiri vake. (Nduyo 100:3) Asi kusiyapo vandhu vese vakambopona, Mwari wakakheta vamweni kuti vave vake ngo maitiro anosisira.
2. Mukuzwirana no Bhaibheri, ngo vapi vari va Jehovha ngo maitiro anosisira?
2 Inga Muezaniso, Nduyo 135 inosanangura vanamati vakagondeka va Jehovha vo Iziraeri yo kare, inga “upfumi hwake.” (Nduyo 135:4) Cimwenizve ngo cokuti Hoseya wakaporofita kuti vamweni avacaingaya vaIziraeri, vaizoguma pa kuva vandhu va Jehovha. (Hos. 2:25) Ciporofita condhoco, cakakwanirisika Jehovha paakatanga kusana vandhu vainga vaciripi vaIziraeri kuti vatonge mugore na Kristu. (Maitiro o Vapostori 10:45; VaRoma 9:23-26) Vaya vakazojwa ngo mujimu mucena vanodanijwa “jinja rakacena.” Ivona ndi “vandhu vakakhetwa” ndi Jehovha. (1 Pedru 2:9, 10) Asi tingati kudini ngo maKristu ese amweni akagondeka nyamasi uno anovetera kupona pasi pano kwenda no kwenda? Jehovha anovadanija kuti “vandhu vangu” zve “vasanwi vangu.”—Isaia 65:22.
3. (a) Nyamasi uno, ndiani ano ushamwari hunosisira na Jehovha? (b) Pa musoro uno tinozobhuisana ngenyi?
3 Nyamasi uno, “muxambi mudoko,” wiya unovetera kupona kwenda no kwenda mugore, pomwe no “mabvuta amwenibze,” ao anovetera kupona kwenda no kwenda pasi pano, ari kunamata Jehovha pamwepo inga “muxambi umwe.” (Luka 12:32; Johani 10:16) Tinoda kukhombija Jehovha mabongere atinomuita ngo kuva no ushamwari hunosisira naye. Pa musoro uno tinozobhuisana ngo pamusoro po makhombijire atingaita kubonga kwedu kuna Jehovha ngo kutikuja kwake.
TAKAPIRA UPENYU HWEDU KUNA JEHOVHA
4. Tingabongesa kudini Jehovha ngo kutitendera kuva no ushamwari naye zve Jesu wakaitisavo kudini zvondhozvo?
4 Tinokhombija kubonga kwedu kuna Jehovha patinojipira kwaari zve tobhabhatijwa. Pasure pazvo, vese vangavona kuti tiri va Jehovha zve takajipira kuti timuzwire. (Vaheberi 12:9, Shanduro yeNyika Itsva) Jesu wakaitavo zvondhozvo paakabhabhatijwa. Iyena wainga ari umwe wo jinja rainga rakajipira kuna Jehovha, asi pikija zvakadaro, wakajipira pacake kuna Jehovha. Zvaidari inga kuti iyena wainga ecinanga kudari: “Kuti ndiite kuda kwenyu; Mwari wangu, ndinoda kungwarira mupango wenyu.”—Nduyo 40:8, 9.
5, 6. (a) Jehovha wakanangenyi Jesu paainga ecibhabhatijwa? (b) Muezaniso wapi ungatibesera kuzwisisa mazwire a Jehovha ngo pamusoro po kujipira kwedu?
5 Jehovha wakazwa kudini Jesu paakabhabhatijwa? Bhaibheri rinonanga kudari: “Naapera kubapatizwa, Jesu wakabuda mu kumwa. Gore rakazauka koari, wakavoneka [‘mujimu,’ Shanduro yeNyika Itsva] wa Mwari wecibjuka inga njiva, womata panyezuru pake. Kwakazika izwi ro mugore, reciti: ‘Nga uu mwana wangu anodikana, wiya anondidakajisa.’” (Mateu 3:16, 17) Jesu wainga ari wa Jehovha kubvira kare. Asi Jehovha wakadakara paakavona kuti Jesu wainga apira upenyu hwake kuti ashandire Iyena basi. Jehovha anodakajihwavo paanovona tecipira upenyu hwedu kwaari zve anozotikomborera.—Nduyo 149:4.
6 Jehovha ano zvese! Zvicinyi zvatingamupa? Inga Muezaniso, ngatiti baba vapekeja mwana wavo wokaji dosi. Perepo, mwana wondhowo wovagurirazve dosi riya. Dosi riyana aricainga ra baba vaya here? Zvingaitisa kudini kuti mwana wondhowo apekejezve babake ciro cavo? Baba vano rudo nee avacaizotoita mubvunjo iji. Dosi ravanopuwa ngo mwana wavo wokaji ngo rinosisira maningi kwavari kupinda amweni ese. Ngo maitiro akafanana, Jehovha anodakajihwa patinojipira kwaari ngo kuda kwedu.—Exodo 34:14.
7. Marakia anotibesera kudini kuzwisisa mazwire a Jehovha ngo pamusoro pa vaya vanomushandira ngo kuda kwavo?
7 Verenganyi Malakia 3:16. Ngenyi zvinosisira maningi kujipira kuna Jehovha zve tobhabhatijwa? I zvokadi kuti kubvira pa mukuvo wo makatanga kuvepo, imwimwi makava wo Musiki wenyu, Jehovha. Asi amborangariranyi basi madakarire anozoita Jehovha pamunotendera kuti iyena ave Mutongi wenyu zve mojipira kwaari. (Mazwi Akangwara 23:15) Jehovha anoziva vaya vanomushandira no cido cese zve anotarira mazina avo mu bhuku rake “ro bzicerecejo.”
8, 9. Jehovha anoveterenyi kuno vaya vano mazina avo akatahwa mu bhuku rake “ro bzicerecejo”?
8 Kudari tecida kuti zina redu rirambe riri mu “buku ro bzicerecejo” ra Jehovha, ciripo catinodikana kuita. Marakia wakananga kuti tinodikana kuthya Jehovha no kurangarijisisa ngo pamusoro po zina rake. Kudari tikanamata ari wese kana ciri cese, zina redu rinozobviswa mu bhuku ra Jehovha!—Exodo 32:33; Nduyo 69:28.
Patinonga tecipona tinodikana kutatija ngo zviito zvedu kuti tinozwira Jehovha
9 Ngo kudaro azvikwani kugondisa kuti tinoda kuita kuda ka Jehovha zve tobhabhatijwa. Izvi ndi zviro zvatinoita kamwe basi, asi kunamata Jehovha ndi mugariro wo upenyu hwedu hwese. Njiku ngo njiku patinonga tecipona, tinodikana kukhombija ngo zviito zvedu kuti tinozwira Jehovha.—1 Pedru 4:1, 2.
TINORAMBA ZVIDO ZVO NYIKA
10. Ngowapi musiano unodikana kuvepo ku vaya vanoshandira Jehovha no vacikamushandiri?
10 Pa musoro waperari, takajija kuti Kaini, Soromona pomwe no vaIziraeri vainanga kuti vainamata Jehovha, asi avacaigondeka kwaari. Muezaniso iji jinotijijisa kuti azvikwani basi kunanga kuti tinonamata Jehovha. Tinodikana kunyenya zvakashata zve toda zvakanaka. (VaRoma 12:9) Jehovha wakananga kuti kwaizova no musiyano wakajeka wo “varurami no vacikazivi kururama, vanoxandira Mwari no vanoramba kumuxandira.”—Malakia 3:18.
11. Ngenyi zvinodikana kujeka ku vese kuti tinonamata Jehovha basi?
11 Tinobonga maningi Jehovha ngo kutikheta kuti tive vandhu vake! Zvinodikana kujeka ku vese kuti tiri ku divi ra Jehovha. (Mateu 5:16; 1 Timoti 4:15) Zvibvunjisenyi kudari: ‘Kureva kuti vamweni vanokwanisa kuvona kuti ndiri wakagondeka ka Jehovha ngo maitiro akakwana here? Ndinodada ngo kubvunja vandhu kuti ndiri umwe wo Zvapupu zva Jehovha here?’ Rangariranyi kuti Jehovha waizocamwisa kudini kudari tikathya kubvunja vamweni kuti tiri vake.—Nduyo 119:46; Verenganyi Marco 8:38.
Maponero enyu anovonesa kuti muri umwe wo Zvapupu zva Jehovha here? (Vonanyi ndima 12, 13)
12, 13. Zvicinyi zviri kuita kuti vamweni vatame kuvoniwa inga Zvapupu zva Jehovha?
12 Zvinosuruvarisa ngo zvo kuti, Zvapupu zvimweni zvinotevejera ‘mujimu wo nyika.’ Inga muviyo, izvona azvizivi kusiyana na vayani vacikanamati Jehovha. (1 VaKorinto 2:12, Shanduyo yeNyika Itsva) ‘Mujimu wo nyika’ unoita kuti vandhu vasotesese maningi zvido zvavo zvo umbau. (VaEfeso 2:3) Inga muezaniso, pikija no mazano ese atinoashira, vamweni vanokheta kusimira ngo njira icikafaneri. Ivona vanosimira nguvo jinopsinya zve jinovonekera, pikija ku musongano jo ciKristu. Atee vanonyanyisa pa manasirire ovanoita bvunji ravo. (1 Timoti 2:9, 10) Inga muviyo, kangaije zvinganesera vamweni kuziva kuti tiri Zvapupu zva Jehovha kana kuti haiwa.—Jakobo 4:4.
13 Zvapupu zvimweni zvinokhombija kuti azvizivi kusiyana no nyika ngo njira jimweni. Inga muezaniso, mu mabuso, vamweni vanotamba no kukhombija mufambiro ucikatendehwi ku maKristu. Vamweni vanodira mafoto mu interneti perepo vodira masoko anovonesa murangariro javo jo kunyama. Vangava vandhu vo kuti avazivi kumbopangihwa mu ungano ngo kuti vakaita cishaishi cikuru, asi ivona vangakwevera ku divi rakashata hama no hambzaji javo jiri kuvangisiraya kuti jive jakasiana no nyika.—Verenganyi 1 Pedru 2:11, 12.
Mucakwevejehwa ngo vaya vacikaripi ku divi ra Jehovha mukuperera
14. Tinodikana kuitenyi kuti tijivirire ushamwari hwedu hunosisira na Jehovha?
14 Zvese zviri mu nyika zvakanasirihwa kuti zvititore kuti tisotesese “madisiro o muviri, ruyemuro hwo majiso no kujikuja ko upfumi.” (1 Johani 2:16) Itusu tiri va Jehovha, ngo kudaro, takasiyana no vamweni. Tinoramba ‘zviro zvinosiyana no zvinodiwa ndi Mwari zve zvido zvo nyika’ zve ‘tinopona no murangariro jakanaka zve jakarurama no kuzvipira kuna Mwari pakati po mugariro uno wo zviro.’ (Tito 2:12, Shanduyo yeNyika Itsva) Upenyu hwedu hwese, kubatanija no mavereketere edu, mahire, mamwire, masimirire no mashandire atinoita, anodikana kujekesa kamare kuno vese kuti tiri va Jehovha.—Verenganyi 1 VaKorinto 10:31, 32.
ITUSU ‘TINOVANGIRIRA KUDISANA’
15. Ngenyi tinodikana kuva vakanaka mwoyo no kuva no rudo no maKristu amweni?
15 Tinovonesa kuti tinoreremeja ushamwari hwedu na Jehovha ngo matajire atinoita hama no hambzaji jedu. Ijona ngo ja Jehovha, inga ndisuvo. Tikaceukija cokwadi ici, nguva jese tinozojitaja ngo kunaka mwoyo no rudo. (1 VaTesalònika 5:15) Ngenyi izvi zvinosisira maningi? Jesu wakabvunja vateveri vake kudari: “Mukaita kudaro vese vanozoziva kuti muri vajiji vangu: mukadisana ngo cenyu.”—Johani 13:35.
16. Tinojijenyi kubvira ku Mutemo wa Mosi ngo pamusoro po rudo hwa Jehovha no vandhu vake?
16 Muezaniso umweni uri mu Mutemo wa Mosi, ungatibesera kuzwisisa kuti tinodikana kutajisa kudini vamweni mu ungano. Mu temberi ya Jehovha, mwainga no mujiyo jaishandiswa basi pa kunamata. Mutemo waisanangura ngo maitiro akajeka kuti vaRevhi vaidikana kutajisa kudini mujiyo jondhojo zve ari wese acaiteverera ndhungamiriro jondhojo waizourawa. (Bziverengo 1:50, 51) Jehovha waisotesesa matajire aiita vandhu mujiyo jondhojo jaishandiswa pa kumanata, waro rangariranyi basi matajire aizoita vandhu vakatojipira kwaari zve vanomunamata vakagondeka! Iyena wakatizivisa kuti tinosisira maningi kwaari, paakati: ‘Wia anomupsasa, anopsasa mboni yo jiso rangu.’—Zakaria 2:8, Shanduro yeNyika Itsva.
Jehovha anovona patinoashira vamweni patinokova, patinova vanoregerera zve vakanaka mwoyo
17. Jehovha ‘anopurukira no kuzwa’ cinyi?
17 Marakia wakananga kuti Jehovha ‘anopurukira no kuzwa’ manera ovanotajana vandhu vake. (Malakia 3:16) Jehovha “anoziva vandhu vake.” (2 Timoti 2:19) Iyena anonasa kuziva zvese zvatinoita no kunanga. (Vaheberi 4:13) Tikatama kuva vakanaka mwoyo no hama zve hambzaji jedu, Jehovha anozvivona. Asi tingava no cokwadi co kuti Jehovha anovonavo patinojiashira, kujipekeja zviro, kujiregerera no kujikhombijira kunaka mwoyo.—Vaheberi 13:16, Shanduro yeNyika Itsva; 1 Pedru 4:8, 9.
JEHOVHA ‘AAZORAMBI VANDHU VAKE’
18. Tingabongesa kudini Jehovha ngo kutikheta kwake kuti tive vandhu vake?
18 Tinoda kukhombija Jehovha kuti tinobonga maningi ngo kuva vandhu vake. Tinozviziva kuti patakajipira kwaari, cakava civaringo co ungwaru maningi kupinda zvese. Pikija tiri kupona “pakati po mubarihwana wakapeama no wakaxata,” itusu tingaramba ‘ticina uposi’ zve ‘tecimonikira inga nyereji mu nyika.’ (VaFilipi 2:15) Ngo kudaro, takatema civaringo co kutiza kuita ciri cese cinonyenywa ndi Jehovha. (Jakobo 4:7) Tinoda zve tinoreremeja hama no hambzaji jedu ngo kuti ijona ngo ja Jehovha.—VaRoma 12:10.
19. Jehovha anozopfupisa kudini vandhu vake?
19 Bhaibheri rinogondisa kudari: ‘Tenji Mwari aazorambi vandhu vake.’ (Nduyo 94:14) Ici i cigondiso. Azvinenyi zvicinyi zvinozoitika, Jehovha anozova nesu. Pikija tikafa, iyena aazotikanganwi. (VaRoma 8:38, 39) “Tikapona, tinoponera Tenji; tikafa, tinofira Tenji. Ndibzo, kudari tikapona nokuti tikafa, tiri va Tenji.” (VaRoma 14:8) Tiri kuvetera nguva yo kuti Jehovha anozoviisa mu upenyu shamwari jake jese jakagondeka jaingaya jakafa. (Mateu 22:32) Zve pikija wari, tiri kubusa makomborero akawanda anobva ka Baba wedu. Inga zvinonanga Bhaibheri, ‘rinodakara jinja rina Mwari anozwi Jehovha, vandhu vaakakheta inga ndhaka yake.’—Nduyo 33:12, Shanduro yeNyika Itsva.
