1. Icinjo japi jiri kuitika mu nyika zinji?

MUKATI mo zviuru zvo makore, vandhu vazinji mu nyika yese vaienda ku gerejha. Asi, pa makore manganani akapera mbhera wari, zviro zviri kucinja. Uzinji wo vandhu avacaiti divi ro ciyara ciricese. Zvokadi kamare, mu nyika jimweni, uzinji wo vandhu vanonanga kuti avaiti divi ro ciyara ciricese. *—Mateu 24:12.

2. Zvicinyi zvinoitisa kuti vandhu vazinji varambe kunamata?

² Ngenyi vandhu vacikatendi Mwari vari kuwanda? Vamweni vangabararika hwiru kana kutothimwa-thimwa. (Luka 8:14) Vamweni vakatoguma pa kutama kutenda kuti Mwari ariyo. Vamweni vanotenda kuti Mwari ariyo asi vanorangarira kuti ciyara i ciro co kare maningi, cicikashandi zve cinohwisana no siensia no murangariro jedu. Ivona vangazwa shamwari, majipirisori, kana vandhu vanofambisa masoko, vecinanga kuti upenyu wakavha ku cinyama, asi avato vazwa ciricese cinovakhohwesa kuti Mwari ariyo. Vamweni avadi kuzwa ngo pamusoro po ciyara ngo ndava yo vatungamiriri vo zviyara. Ngokuti vatungamiriri ava, vanoita ndhamburiko iriyese kuti vawane dinyero no rukujo. Mu nyika jimweni utongi unorambisa basa rinoitwa ngo zviyara.

3. Ngo capi cinangwa cikuru co jijo ya nyamasi?

³ Jesu wakativhunja kuti: ‘Endanyi moita kuti vandhu vo majinja ese vave vajiji.’ (Mateu 28:19, Shanduro yeNyika Itsva) Tingabeseresa kudini vandhu vacikatendi Mwari kuti vajijire kuda Mwari no kuva vajiji va Kristu? Tinodikana kuziva kuti madavirire anoita mundhu masoko atinocumaera zvinofira kwaakakurira.  Inga muezaniso, vandhu vo Europa vano mavonero akasiyana no vandhu vo Azia. Ngenyi? Ngokuti vandhu vo Europa, vanoziva zvirizvese ngo pamusoro po Bhaibheri zve vanotenderana no murangariro wokuti Mwari wakarura zviro zvese. Asi vandhu vo Azia, vanoziva padoko kana avatozivi ciricese ngo pamusoro po Bhaibheri zve kangaije avatotendi kuti kuno Musiki. Cinangwa cikuru co jijo ya nyamasi ngo cokutibesera kuti tikwanise kubesera vandhu vatinosongana navo mu basa redu ro kucumaera, azvinenyi kovanovha kana zvovanotenda.

4. Ngenyi tinodikana kuva vandhu vano mavonero akanaka?

⁴ Ivanyi no Mavonero Akanaka. Ngokuti gore ngo gore, vandhu vacaitenda kuti Mwari ariyo vari kuva Zvapupu zva Jehovha. Vazinji vavo vaitoteveja ndhungamiro jakanaka ngo pamusoro po mufambiro zve vakatanga kusuruvara ngo manyepo aiitika mu ciyara co manyepo. Vamweni vaitoita zvese zvovaida asi vakadikana kusiya zvirovejeso zvondhozvo. Ngo besero ra Jehovha, tingava no cokwadi co kuti tinozowana vano ‘cido cakanaka co kuva no upenyu ucikaperi.’—Maitiro o Vapostori 13:48, Shanduro yeNyika Itsva; 1 Timoti 2:3, 4.

5. Zvicinyi kazinji zvinoitisa kuti vandhu vadakarire ushoni masoko edu?

⁵ Ivanyi Mundhu Wakanaka zve Anoreremeja Vamweni. Vandhu kazinji vanoashira ushoni masoko edu, haiwa ngo ndava yo zviya zvatinonanga, asi ngo manera atinozvinanga. Ivona vanobongesera maningi, pavanovona kuti tinokhombija kuva vandhu vakanaka no vanodakarira. Cimwenizve, itusu ativavangiriji kuti vapurukire masoko edu. Kusiyapo zvondhozvo, tinoeja kuzwisisa mavonero avanoita ciyara. Inga muezaniso, vamweni avadakariri kubhuya ngo pamusoro po ciyara no mundhu wovacikazivi. Vamweni vanovona inga kuti i kutama nderemejo kuvhunjisa mavonero o mundhu ngo pamusoro pa Mwari. Zve vamweni vanoita nyowa pavanovoneka ngo vandhu vamweni veciverenga Bhaibheri, maningi-ningi no umwe wo Zvapupu zva Jehovha. Azvinenyi ngo wapi mugariro wakona, tinodikana kuzwisisa mazwiro o mundhu umwe nga umwe.—2 Timoti 2:24.

6. Mupostori Pauro wakakhombijisa kudini kuti waikwanisa kucinja mabhuire ake, mukuzwirana no ndau yaainga zve tingamutevejeresa kudini?

⁶ Tingaitenyi kudari mundhu watiri kubhuya naye aajizwi ushoni patinoshandisa magama akadari inga aya, “Bhaibheri,” “zvakasikwa,” “Mwari” kana “ciyara”? Tingatevejera muezaniso wo mupostori Pauro zve toeja kucinja manera atinoda kuvereketa. Paaibhuya no Vajudha, Pauro waishandisa Bhaibheri. Asi, paaibhuya no Vagerego ku Areopago, iyena aacaishandisa Bhaibheri kamare. (Maitiro o Vapostori 17:2, 3, 22-31) Tingatevejeresa kudini muezaniso wa Pauro? Kudari mukasongana no mundhu acikatendi zvinonanga Bhaibheri zvaizova zvo ungwaru kutama kurinanga pamunonga mucibhuya mwese. Mukavona kuti mundhu uwo aadakariri kuvoniwa ngo ariwese aciverenga Bhaibheri, ejanyi kumukhombija vhesi jo Bhaibheri ngo njira imweni, kangaije mu foni.

7. Kuti titevejere muezaniso wa Pauro unowanika pana 1 VaKorinto 9:20-23, kangaije zvicinyi zvatinodikana kuita?

⁷ Ivanyi Mundhu Anozwisisa zve Anopurukira. Tinodikana kueja kuzwisisa kuti ngenyi vandhu vatinosongana navo vanorangarira kudaro. (Mazwi Akangwara 20:5) Vonanyizve muezaniso wa Pauro. Iyena wakakura no Vajudha. Zvokadi kamare iyena waikwanisa kucinja manera ake, kuti acumaere vandhu vo majinja, vandhu vaiziva padoko kana vacaiziva kamare Jehovha no Matahwa. Mu njira yakafanana, kuti tizwisisie zvinorangarihwa no zvinozwa vandhu mu ndima yedu, kangaije tinodikana kupsakisisa kana kuvhunjisa vacumaeri  vamweni vaano ruzivo kuti vatibesere.—Verenganyi 1 VaKorinto 9:20-23.

8. Ngoyapi njira imwe yo kutangisa mabhuyo ngo pamusoro po Bhaibheri?

⁸ Cido cikuru cakatinaco, ngo co kuwana vaya ‘vakanakira.’ (Mateu 10:11) Kuti tibudirire, tinodikana kuita kuti vandhu vatinobhuya navo vanange zvovanorangarira zve tonasa kuvapurukira. Hama imweni yo Ingratera, inovhunjisa vandhu kuti ngozvapi zvinodiwa kuti mbhuri ive inodakara, vangareresa kudini vana zve vangahwisana kudini no kutama kurungama. Ikapera kuzwa mavonero avo, iyona inoti, “munovonavo kudini ngo ndhungamiro iyi yakatahwa ko zviuru 2000 zvo makore adarika?” Perapo, icizivi kunanga zina ro kuti “Bhaibheri,” iyona inokhombija vhesi nganani yecishandisa foni yavo.

9. Tingabeseresa kudini vandhu vacikadi kubhuya ngo pamusoro pa Mwari?

⁹ Tingakwanisa kubesera vandhu vacikadakariri kubhuya ngo pamusoro pa Mwari tecishandisa shwiro jinovapsasa. Inga muezaniso, vandhu vanoshamaisika maningi ngo zviro zvakasikwa. Ngokudaro, mungananga kudari: “Kangaije munovona kuti vandhu vazinji vari kuita zviro zvakawanda maningi vacitevejera zviro zvakasikwa kare. Inga muezaniso, vandhu vanoita mikrofoni, vanojija mashandire anoita njeve yo mundhu zve vanoita mucini wo kuvhisa foto, vanojija mashandire anoita jiso ro mundhu. Munorangarirenyi, mukavona zviro zvakasikwa? Munorangarira kuti i simba rinoshamaisa kana i ciro cimweni?” Mukapera kumupurukira ushoni, mungaengejera meciti: Vandhu vanojijari ngo mashandire anoita njeve no jiso, vanojija ndiyani? Ndakashamaisika maningi ngo zvakananga mutari umweni wo nduyo, paakati: ‘Wiya wakarura njeve aazozwi here? wiya wakarura jiso aavoni, here? . . . Yena anojijisa mundhu uzivi.’ Vajiji vamweni vakagumavo pa mbhejiso yondhoyo. (Nduyo 94:9, 10) Tinodikana kuvakhombija vhidhiyo jinowanika mu jw.org^® (nghwinanyi ngo panoti JIJISO JO BHAIBHERI > SIENSIA NO BHAIBHERI), pasi po cimusoro cinoti “Mavonero o Vamweni ngo Kwakabva Upenyu.” Kana kuvapekeja bhurushura rino musoro unoti, A Vida—Teve um Criador? kana, A Origem da Vida—Cinco Perguntas Que Merecem Resposta.

10. Tingatangisa kudini mabhuyo no mundhu acikadakariri kubhuya ngo pamusoro pa Mwari?

¹⁰ Uzinji wo vandhu vari kuimira kuva no kumbeji kwakanaka. Pikija zvakadaro, vazinji vanothya kuti nyika icazoparajwa kana kuti aizogahwizve.  Muvonereri wo ndharaundha wo Noruwega, wakananga kuti vandhu vacikadi kubhuya ngo pamusoro pa Mwari vanoda kuziva ngo pamusoro po mugariro wo nyika. Pakupera kucungamija mundhu, anovhunjisa kuti: “Munovonavo kudini, ndiyani anotipa soterero yakanaka? Kureva kuti i vandhu vo zvomatongehwe o nyika, masientista kana mundhu umweni hake?” Pakupera kumupurukira no kungwarira kwese, iyena anoverenga kana kutonanga vhesi iriyese inobhuya ngo pamusoro po kumbeji. Vamweni vanotokahamara ngo kuvona kuti Bhaibheri rinogondesa kuti nyika inozogara kwenda no kwenda zve vandhu vanoita zvakanaka vanozogaremo mbhera narini.—Nduyo 37:29; Mucumaeri 1:4.

11. Ngenyi tinodikana kushandisa manera akasiyana-siyana patinocumaera? Zve tingatevejeresa kudini muezaniso wa Pauro unowanika pana VaRoma 1:14-16?

¹¹ Zvaushoni maningi kushandisa manera akasiyana-siyana patinonga tecicumaera. Ngenyi? Ngokuti vandhu vakasiyana. Cinodakarihwa ngo umweni, cingatama kudakarihwa ngo umweni. Vamweni avadakariri kubhuya ngo pamusoro pa Mwari nee ngo pamusoro po Bhaibheri, asi vamweni vanodakarira patinobhuya ngo zviro zvimweni. Pa shwiro iri yese hayo, tinodikana kuita zvese zvatinokwanisa kuti tibhuye no vandhu vo mushovo wese. (Verenganyi VaRoma 1:14-16.) Zvokadi kamare, atidikani kukanganwa kuti Jehovha ndiyena anoita kuti cokwadi cikure mu mwoyo yo vandhu vanoda kuita zviro zvakarungama.—1 VaKorinto 3:6, 7.

12. Zvicinyi zvatingaita kuti tibesere vandhu vanovha Azia, avo vacina zivo iri yese ngo pamusoro po musiki?

¹² Kutenderera pasi pese, vacumaeri vazinji vari kusongana no vandhu vanovha Azia, kubatanijavo vaya vakavha ku nyika jo kuti vanorambiswa kunamata. Mu madhorobha mazinji o Azia, vandhu avatodi kupsaka mathangwe anokhombija kuti Musiki ariyo. Vamweni vano cidaka-daka co kuda kuziva zve vanotenda kujija Bhaibheri, asi vamweni avatodakariri kujija zviro zvipsa. Tingabeseresa kudini vandhu vondhovo? Vacumaeri vamweni vaano ruzivo vanobudirira pavanotanga mabhuyo mu njira yo ushamwari, kukhombija kudakarira mundhuwo zve zvikakwanisika weya, kutosumura besero ro makawana ngo kushandisa ndhungamiro jo Bhaibheri mu upenyu.

13. Zvicinyi zvinoita kuti vandhu vadakarire Bhaibheri? (Vonanyi pikica yokutanga.)

¹³ Vandhu vazinji vanodakarira zvinonangwa mu Bhaibheri ngo ndava yo ndhungamiro jinobesera jinowanika mukatimo. (Mucumaeri 7:12) Hambzaji imweni yo Novha Yorki, inoanja kucumaera vandhu vanovereketa Cimandarin, yakati: “Ndinoeja kukhombija kudakarira vandhu no kupurukira zvovanonga vecinanga. Kudari ivona vavha nyika imweni, ndinovavhunjisa kudari: ‘Muri kukwanisa kurovejana no kuno here? Waro, makawana basa here? Vandhu vo kuno vari kumutaja ushoni here?’” Nguva jimweni, izvo zvinobesera hambzaji iyi kuti ishandise Bhaibheri. Zvecikwanisika weya, iyona inoti: “Mukuvona kwenyu, zvicinyi zvinodikana kuti muzwirane no vandhu? Ndingamukhombijavo mazwi akangwara anowanika mu Bhaibheri here? Iwona anoti: ‘Kuambira kuvereketesana kwakadari inga kufunungura kumwa; kupejei kucito kukareba.’ Pasure pazvo ndinoita muvhunjo uwu, munorangarira kuti masoko aya angatibesera kuti tizwirane no vamweni here?” (Mazwi Akangwara 17:14) Mabhuyo akadari angatibesera kuvona dangani mundhuwo anoda kuti tiviyezve kana kuti haiwa.

14. Hama imweni yo Extremo Oriente inobeseresa kudini vandhu vacikatendi kuti Mwari ariyo?

¹⁴ Asi tingati kudini no vaya vacikatendi Mwari? Hama imweni iri mucumaeri ko makore akawanda, inocumaera Extremo Oriente yakati: “Kazinji, mundhu paanonanga kuti, ‘anditendi  kuti Mwari ariyo,’ iyena anonga ecinanga kuti aatendi zvimwari zvinonamatwa ngo vazinji mu ndharaundhemo. Kazinji ndinotenderana navo zve ndinonanga kuti zvimwari zvizinji zvakaitwa ngo vandhu zve asipi zvokadi. Ngokudaro, ndinoverenga Jeremia 16:20, iyo inoti: ‘Mundhu anokwanisa here kujiitira bzimwari? Ibzona asipi Mwari.’ Tevere, ndinovhunjisa kudari: ‘Tingazvizivisa kudini kuti mwari uwu ngo wo kadi kana wakaitwa ngo vandhu?’ Ndinonasa kupurukira mupinguro wake zve ndoverenga Isaia 41:23, iyo inoti: ‘Tizivisenyi bzinozoza sure kwabzo: tinozoziva kuti muri Mwari.’ Tevere, ndinokhombija ciporofita ciri cese co mu Bhaibheri cakakwanirisika.”

15. Tingajijenyi ngo muezaniso wo hama yo Azia Orientari?

¹⁵ Hama imweni yo Azia Orientari inoshandisa mazano anoteverari kuti iite hwiririro. Iyona yakati: “Ndinovakhombija muezaniso jaushoni jo mu Bhaibheri, zviporofita zvo mu Bhaibheri zvakakwanirisika no zviro zvinongwarira mudenga no pasi. Perapo, ndinonanga kuti zvese izvi, i citatijo co kuti kuno Musiki ano ungwaru. Mundhu paanotendera kuti Mwari ariyo, ndinotanga ngo kumutatija kuti Bhaibheri rinonangenyi ngo pamusoro pa Jehovha.”

16. Mukuzwirana no Vaheberi 11:6, ngenyi vajiji vo Bhaibheri vanodikana kutenda kuti Mwari ariyo no kutenda zvinonanga Bhaibheri zve tingavabeseresa kudini kuti vazvikwanise?

¹⁶ Patinoita jijo yo Bhaibheri no vandhu vacikanamati, tinodikana kuvabesera kuti vatende kuti Mwari ariyo. (Verenganyi Vaheberi 11:6.) Zve tinodikana kuvabesera kuti vatende zvinonanga Bhaibheri. Kuti izvi zviitike, kangaije tinodikana kuhwirijira mafundo amweni vhaza jakawanda. Pa vhaza imwe nga imwe yo tinonga tecijija, tingatodikana kukhombija zviri zvese zvinovonesa kuti Bhaibheri i Soko ra Mwari. Izvo kangaije zvingatobatanija, kubhuya ngo pamusoro po zviporofita zvakakwanirisika no ndhungamiro jingatibesera pa upenyu hwedu hwo njiku no njiku.

17. Ngowapi unova muviyo patinokhombija rudo ku vandhu?

¹⁷ Tinobesera vandhu kuti vave vajiji va Kristu ngo kukhombija kuti tinovada pikija avaripi mu ciyara ciricese. (1 VaKorinto 13:1) Patinovajijisa, cido cedu ngo co kuvakhombija kuti Mwari anotida zve anoda kuti timudevo. Gore ngo gore, zviuru no zviuru zvo vandhu vacainga no haraka no ciyara vari kujijira kuda Mwari zve vari kubhabhatijwa. Ngokudaro, ivanyi no mavonero akanaka zve khombijanyi rudo ku vandhu vese. Nasanyi kuvapurukira. Ejanyi kuvazwisisa. Inga muezaniso, vajijisenyi kuti vave vajiji va Kristu.