TIRI KUPONA mu nyika inocamwisa, ngo kudaro zvingatinesera kuwana runyararo. Pikija tingava no runyararo pa cimukuvo, azvinesi kuuruza. Zvicinyi zvarinonanga Bhaibheri zvingatibesera kuti tiwane runyararo hwokadi-kadi zve ucikaperi? Zve tingabeseresa kudini vamweni kuti vauwanevo?

Kuti tiwane runyararo hwokadi-kadi, tinodikana kujizwa takangwaririka zve takabvikirika. Tinodikana kuva no shamwari jaushoni zve cinosisira maningi, tinoda kukhwedera phedo na Jehovha. Tingazviitisa kudini?

Zviambi zva Jehovha pomwe no mupango jake, nguva jese jingatibesera. Patinojizwira, tinotatija kuti tinogonda Jehovha zve tinoda kuva no ushamwari hwo runyararo naye. (Jeremia 17:7, 8; Jakobo 2:22, 23) Perapo, Jehovha anozokhwedera phedo nesu, wotipa runyararo mu murangariro. Isaia 32:17, inoti: “Kururama kunozozisa kunyarara, no bzokadi bzinozozisa kugarisika no kubesehwa njiku jese.” Tingawana runyararo hwokadi-kadi potinozwira Jehovha ngo mwoyo wese.—Isaia 48:18, 19.

Jehovha wakatipazve cipo cinosisira maningi kuti citibesere kuwana runyararo ucikaperi. Cipo ici ndi mujimu mucena.—Maitiro o Vapostori 9:31.

Mupostori Pauro wakananga kuti runyararo i divi ro ‘mucero wo mujimu.’ (VaGalàsia 5:22, 23, Shanduro yeNyika Itsva) Zvecivoneka kuti mujimu wa Mwari unobara runyararo, tinodikana kutendera kuti mujimu wondhowo utitungamirire kudari tecida runyararo. Tingazviitisa kudini zvondhozvo?

Cokutanga, tinodikana kuverenga Mazwi a Mwari nguva jese. (Nduyo 1:2, 3) Patinorangarijisisa ngo zvatinoverenga, mujimu mucena unotibesera kuzwisisa murangariro wa Jehovha ngo pamusoro po shwiro jakasiana-siana. Inga muezaniso, tinojijira kuti anoitisa kudini kuti arambe ano runyararo zve ngenyi iwona unosisira maningi kwaari. Patinoshandisa zvatinojija mu Bhaibheri,  tinozova no runyararo wakakura mu upenyu hwedu.—Mazwi Akangwara 3:1, 2.

Cocipiri, tinodikana kukumbira mujimu mucena wa Mwari. (Luka 11:13) Jehovha wakagondesa vaya vanokumbira besero rake kuti: “[‘Runyararo,’ Shanduro yeNyika Itsva] hwa Mwari hunopinda uzivi hwese hunozorinda mwoyo yenyu no murangariro yenyu, mwa Kristu Jesu.” (VaFilipi 4:6, 7) Patinoramba tiri phedo na Jehovha zve tothemba mujimu wake, iyena anozotipa runyararo wokadi wo mu murangariro.—VaRoma 15:13.

Bhaibheri rakabesera vandhu vakawanda kuti vaite cinjo mu upenyu hwavo zve wari uno, ivona vari kubusa runyararo na Jehovha, runyararo wo mu murangariro, pomwe no runyararo no vamweni. Vakaitisa kudini cinjo iji?

Hama no hambzaji jimweni jicito janghwina mu cokwadi, jaikasika kunyangajwa zve jaiita zvo ugevenga. Asi ijona jakashanda ngo simba kuti jicinje zve wari uno ijona jakanaka mwoyo, jinosengerera zve jinoita runyararo no vamweni. * (Vonanyi masoko o pasi.) (Mazwi Akangwara 29:22) Vonanyi macinjire akaita hama inodanijwa David no hambzaji inodanijwa Rachel mu undhu hwavo.

Acito anghwina mu cokwadi, David waishora maningi vamweni zve waikharamusa vo pa mbhuri yake. Asi perepo, wakavona kuti waidikana kuita cinjo. Wakauwanisa kudini runyararo? David anoti: “Ndakatanga kushandisa zviambi zvo mu Bhaibheri mu upenyu hwangu, inga muviyo, kureremeja kondaiita mbhuri yangu kwakaengejeka zve iyona yakaengejeravo kundireremeja.”

Rachel wakapsaswa ngo magariro o paakakurira. Iyena wakasanangura kudari: “Pikija wari, ndiciri kuhwisana no mazwiro o kukasika kunyangajwa ngokuti ndakarehwa pa muzi painga no vandhu vaikharamusana.” Zvicinyi zvakabesera  Rachel kuti awane runyararo? Iyena wakati: “Mukumbiro no kugonda Jehovha.”

David na Rachel ndi muezaniso muviri basi pa vandhu vakawanda vokuti vano runyararo wari, ngokuti vakashandisa zviambi zvo mu Bhaibheri zve vakathemba mujimu mucena. Pikija tiri kupona mu nyika ino ushungu, tingaramba tino runyararo wo mu murangariro. Izvi zvinozoita kuti titame kunesehwa kupona no ukama hwedu zve hama pomwe no hambzaji jo mu ungano. Jehovha anotibvunja kuti tive no runyararo “no vandhu vese.” (VaRoma 12:18) Zvingakwanisika izvi here? Zve ngenyi tinodikana kuvangisira kuti tive no runyararo no vamweni?

Mu mushando wedu, tinocumaera masoko o runyararo ngo pamusoro po Umambo hwa Mwari. (Isaia 9:6, 7; Mateu 24:14) Vazinji vanodakarira maningi masoko aya zve vanomadavira. Inga muviyo, ivona avajizwi inga avazivi kujiviririka kana kunyangajwa ngo ndava yo zviri kuitika mu nyika. Wari, ivona vaano vetero yokadi yo kumbeji, zve izvi zviri kuvaita kuti vade kupsaka ‘runyararo.’—Nduyo 34:15.

Pikija zvakadaro, asipi vese vanodakarira masoko atinocumaera, pa bvaza yo kutanga. (Johani 3:19) Azvinenyi mapingurire anoita vandhu, Mwari anotipa mujimu wake. Iwona unotibesera kuti tive vano runyararo no nderemejo patinocumaera. Mu njira iyi, tinoteverera mbhangiro ya Jesu yokuti: ‘Pamunonghwina mu nyumba cungamijanyi mbhuriyo. Kudari mbhuriyo inofanera, runyararo hwenyu ngahuve nayo, asi kudari icikafaneri, runyararo hwenyu ngauhwirire kwamuri.’ (Mateu 10:11-13, Shanduro yeNyika Itsva) Patinova no murangariro uu, tinoramba tino runyararo azvinenyi zvinonangwa ngo vamweni kana zvavanoita. Tinoceukija kuti tingazova no mukana wo kubesazve vandhu avo kumbejiyo.

Tingabeserazve kuti pave no runyararo ngo kukhombija nderemejo patinobhuya no vatungamiriri vo utongi, pikija ivona vakarambisa basa redu. Inga muezaniso, mu nyika imweni yo ku Afrika, utongi aucaitendera kuti tivake Nyumba jo Umambo. Hama jedu jaizviziva kuti jaidikana kueja kutonga ndhango iyi ngo njira yo runyararo. Vakatumira hama imweni yakamboshanda inga misionario ku nyika yondhoyo kuti iende kodavijana no muimiriri wo nyikeyo waishanda ku Rondoni, Ingratera, kuitira koomubvunja ngo pamusoro po basa ro runyararo rinoitwa ngo Zvapupu zva Jehovha.

Hama yakati: ‘Pandakaguma panogara vaashiri, ndakavona ngo masimirire aiita muashiri kuti wainga wo jinja raibhuya ndumi yondainga ndakajijira. Ngo kudaro, ndakamucungamija ngo ndumi yake kamare. Ngo kukahamara, wakandibvunjisa kudari: ‘Cicinyi camuita kuti mutigumire pano?’ No nderemejo yese, ndakamubvunja kuti ndaida kubhuya no muimiriri wo nyika yake. Iyena wakamufonera, woviya kuzosongana neni, naaguma wakandicungamija ngo ndumi yo mu ndharaundhemo. Pasure pazvo, iyena wakanasa kundipurutana pandaimusanangurira mabasa o runyararo anoitwa ngo Zvapupu.’

Mutungamiriri wo mu nyikeyo naapera kuzwa zvainanga hama iyi, iyena wakanasa kuzwisisa basa ratinoita zve wakasia kutinyenya inga zvaiita. Papera cimukuvo, mutungamiriri wakatendera kuti Zvapupu zva Jehovha zvivake Nyumba jo Umambo. Hama jakadakara maningi! Zvakajeka kuti, kudari tikataja vandhu no nderemejo tinokhwijirija runyararo.

Nyamasi uno, vandhu va Jehovha vari kubusa paradhiso yo kumujimu, pavanonga vecimunamata mu mugariro wo runyararo. Umwe nga umwe wedu, angaengejera runyararo ngo kushanda ngo simba kuti tikhwijirije runyararo mu upenyu hwedu. Perapo, tingava no gwinyiso kuti Jehovha anodakajihwa ndisu. Zve mu nyika imbza iyena anozotipa runyararo unozogara kwenda no kwenda.—2 Pedru 3:13, 14.