1. Ngocapi ciro cimwe cinodakajisa pa zvizinji tikavona undhu hwa Jesu? Sananguranyi.

CIRO CIMWE cinodakajisa pa zvizinji pa undhu hwa Jesu i kukwanisa kwake kuzwisisa zvineso zvinosongana no vandhu vacikazivi kukwana. Paainga pasi pano, Jesu waikwanisa ‘kudakara no vanodakara’ pomwe no ‘kurira no vanorira.’ (VaRoma 12:15) Inga muezaniso, vajiji 70 povakahwirira vakadakara pakupera kuita basa ravo ro kucumaera, Jesu “wakadakara kukuru ngo simba ro mujimu mucena.” (Luka 10:17-21) Ngo divi rimweni, paakavona kusuruvara kwakava no vandhu ngo ndava yo kufa ka Razaro, “mwoyo wake wakahwajihwa, wocamwa.”—Johani 11:33.

2. Zvicinyi zvakabesera Jesu kuti akhombije usizi ku vandhu?

² Pikija Jesu wainga mundhu wakakwana, iyena wainga no unyasha no pena kuno vandhu vacikazivi kukwana. Zvicinyi zvakamubesera kuti ave mundhu wakadaro? Ciro cimwe cinosisira maningi cakamubesera, ngo co kuti wainga no rudo no vandhu. Inga zvakanangwa pa musoro waperari, iyena ‘waidakara no vandhu.’ (Mazwi Akangwara 8:31) Rudo wondhowo, wakamuita kuti anase kuziva marangaririre anoita vandhu. Mupostori Johani wakasanangura kudari: “Waibziziva bziri mu mwoyo mo mundhu.” (Johani 2:25) Jesu waizwira pena vandhu. Vandhu vaijizwa kuti vanodiwa zve vainasa kuashira masoko o Umambo. Kudari tikava takapfava no vandhu, tinozobudirira pa kuita basa redu ro kucumaera.—2 Timoti 4:5.

3-4. (a) Kudari tikava no usizi, tinozovona kudini basa redu ro kucumaera? (b) Tinozovonenyi pa musoro uno?

³ Mupostori Pauro waizviziva kuti waidikana kucumaera zve itusu tinodikana kuitavo kudaro. (1 VaKorinto 9:16) Asi, kudari tikava no usizi, tinozovona basa redu ro kucumaera inga ratinodikana kuita. Tinoda kutatija kuti tinoneseka ngo vandhu  zve tinoda kuvabesera. Tinozviziva kuti “anodakara anopa, kupinda wiya anopuwa.” (Maitiro o Vapostori 20:35) Patinocumaera ngo kuda kubesera vandhu, tinozodakara maningi ngo kuita basa redu.

⁴ Pa musoro uno, tinozovona manera atingakhombija ndiona usizi mu mushando wedu. Cokutanga, tinozovona kuti tingajijenyi ngo matajire akaita Jesu vandhu. Perapo, tinozovona njira murongomuna jingatibesera kuti titevejere muezaniso wake.—1 Pedru 2:21.

5-6. (a) Jesu waikhombija usizi kunaani? (b) Ngenyi Jesu wainga no pena no vandhu vaaicumaera inga zvinonangwa pana Isaia 61:1, 2?

⁵ Vonanyi muezaniso umwe unokhombija kuti Jesu waikhombija usizi. Pa bvaza imweni, Jesu no vajiji vake vakacumaera masoko akanaka novakaremba. Ivona “avacaiwanepi no mukuvo wo kuha.” Ngokudaro, Jesu wakatora vajiji vake kuti ‘vaende ku ndau icina vandhu’ kuti ‘vazorore padoko.’ Asi, uzinji wo vandhu vakagogoma kwenda kuna Jesu no kuno vajiji vake. Jesu paakaenda kondhoyo wovona vandhu, ngoapi mazwiro aakava nawo? Iyena wakavaitira “unyaxa, * ngokuti vaidari inga mabvuta acina muhavisi, woamba kuvajijisa bziro bzizinji.”—Marco 6:30-34.

⁶ Vonanyi thangwe rakaitisa kuti Jesu ave no pena no vandhu vondhovo. Iyena waivona kuti vandhu vondhovo “vaidari inga mabvuta acina muhavisi.” Kangaije Jesu wakavona kuti vamwe vavo vainga varombo zve vaishanda nguva jakawanda kuti vape zvinodiwa zvo mbhuri javo. Vamweni vaisuruvara ngo kufihwa ngo vadiwa vavo. Ngokudaro, Jesu waizwisisa mugariro wavo. Inga zvakabhuiwa pa musoro waperari, Jesu wakasonganavo no zvimwe zvo zvineso izvi. Jesu waineseka no vamweni, iyena waida kuvaembezera.—Verenganyi Isaia 61:1, 2.

7. Tingatevejeresa kudini muezaniso wa Jesu?

⁷ Tinojijenyi ngo muezaniso wa Jesu? Inga  ndi Jesu, takatendenejwa ngo vandhu vakadari “inga mabvuta acina muhavisi.” Ivona vano zvineso zvizinji. Itusu tino zviro zvovanoda, masoko o Umambo. (Apokalipsi 14:6) Ngokudaro, mu kutevejera Mujijisi wedu, tinocumaera masoko akanaka ngokuti tinoitira “unyaxa murembi no mutami.” (Nduyo 72:13) Tinozwira pena vandhu zve tinoda kuita ciri cese kuti tivabesere.

8. Ngoyapi njira imwe ingatibesera kukhombija usizi mu mushando? Ezanisanyi.

⁸ Zvicinyi zvingatibesera kuti tikhombije usizi kuno vaya vatinocumaera? Tinodikana kujidira pa ndau yo vaya vatinosongana navo mu mushando zve tinodikana kuvataja mu njira yotaida kutajwa ndiyona. * (Mateu 7:12) Ngatende tibhuisane ngo njira murongomuna, jatingazviita ndijona. Yokutanga, rangariranyi zvinodiwa zvo vamweni. Patinocumaera masoko akanaka, basa redu rakadari inga ra medhiko. Medhiko waushoni, anopsaka kuziva zvinodiwa zvo mundhu ari kuhwaja. Iyena anoita mubvunjo zve anonasa kupurukira mundhu wiya paanonga ecinanga zvaari kuzwa. Kusiyapo kukasika kupa mundhu wiya mutombo, medhiko anoamba kupsakisisa zviri kuzwa mundhuvo perapo anozovona kuti mutombo wapi unodhari kamare. Mukufananavo, tinodikana kueja kuita zviro zvakafanana patinoda kutanga mabhuyo no ari wese watinosongana naye mu mushando. Zvokadi kamare, tinodikana kueja kuzwisisa mugariro no mavonero o vandhu vatinocumaera.

9. Zvicinyi zvomucikadikani kunanga pamunonga mecicumaera? Sananguranyi.

⁹ Pamunosongana no ari wese mu mushando, amudikani kunanga kuti munoziva mugariro wake kana kuti munoziva zvaanotenda zve ngenyi anozvitenda. (Mazwi Akangwara 18:13) Mukusiyana na izvi, itanyi kuti mundhuwo ave wakasujunuka ngo kumuita mubvunjo mu njira inoreremejeka. (Mazwi Akangwara 20:5) Kudari zvecitendehwa mu maponero enyu, itanyi mubvunjo ngo pamusoro po basa rake, mbhuri yake, zvakamuitikira mu upenyu pomwe no mavonero ake ngo pamusoro po shwiro yakati kuti. Patinovaita mubvunjo, tinovaita kuti vave vakasujunuka zve vatibvunje ngenyi ivona vanoda masoko akanaka. Patinoziva zvondhozvo, tingakhombija usizi, tovabesera pa zviya zvovanoda, inga zvakaita Jesu.—Ezanisanyi no 1 VaKorinto 9:19-23.

10-11. Mukuzwirana no 2 VaKorinto 4:7, 8, ngoyapi njira yo cipiri yotingakhombija ndiyona usizi? Ipanyi muezaniso.

¹⁰ Yocipiri, ejanyi kuvona kuti upenyu hwavo hwakadini. Mu njira jimweni, tingazwisisa mugariro wavo. Perapo, tinozovona kuti isusu tinosonganavo no zvineso zvinosongana  no vandhu vese vacikazivi kukwana. (1 VaKorinto 10:13) Tinozviziva kuti upenyu mu njiku jino jo kupejisira unganesa maningi. Tinokwanisa kucungirira basi ngo besero ra Jehovha. (Verenganyi 2 VaKorinto 4:7, 8.) Asi, amborangariranyi ngo vese vari kupona vacina ushamwari wo phedo na Jehovha. Zviri kuvanesera maningi kupona mu nyika yakadari vacina besero rake. Inga ndi Jesu, tinovazwira pena zve tinoda ‘kuvatokotesera masoko akanaka.’—Isaia 52:7.

¹¹ Vonanyi muezaniso wo imwe hama inodanwa Sergey. Vacito vajija cokwadi, hama Sergey vainga vakanyararisa maningi zve vainga no nyowa. Zvaivanesera maningi kubhuya no vandhu vamweni. Pa kufamba ko nguva, vakajija Bhaibheri. Ivona vakati: “Inga mujiji wo Bhaibheri, ndakajijira kuti muKristu anodikana kubvunja vamweni zvitendwa zvake. Zvokadi kamare ndakavona kuti andicaizokwanisa kuzviita.” Asi, ivona vakarangarira ngo pamusoro po vandhu vaya vacito vazwa cokwadi zve vakazwisisa kuti upenyu hwavo hwainga hwakadini povainga vacina ushamwari na Jehovha. Hama Sergey vakati: “Zviro zvese zvondakajija zvakandipa mudakaro mukuru no runyararo hwo mukati. Ndakaziva kuti vamweni vanodikanavo kuziva zvokadi izvi.” Ivona vakavona kuti cicunge cavo kuitira kucumaera cakaengejeka. Ivona vakati: “Zvinoshamaisa ngo zvo kuti, kubvunja vamweni ngo pamusoro po Bhaibheri, kwakakurisa kujithemba kwangu. Zve kubvunja vamweni ngo pamusoro po zvitendwa zvangu zvipsa, kwakavangisa rutendo hwangu.” *

12-13. Ngenyi tinodikana kuva tinosengerera no vaya vatinojijisa mu mushando? Ezanisanyi.

¹² Yocitatu, ivanyi vanosengeserera no vaya vamunojijisa. Ceukijanyi kuti, ivona kangaije apana covanoziva ngo pamusoro po zvokadi zvo Bhaibheri zvamunonasa kuziva. Kangaije vamweni vakatobatikana maningi pa zvitendewa zvavo. Ivona vangatovona inga kuti zviara zvavo i ciro cinosisira  maningi, cinovabatanija pamwepo no mbhuri yavo, zvirovejeso zvavo pomwe no vandhu vavanopona navo mu ndharaundhemo. Tingavabeseresa kudini?

¹³ Amborangariranyi ngo kuezanisira uku basi: Zvicinyi zvaizoitika no bhiriji rasakara recida kucinjwa? Kazinji, panoitwa bhiriji imbza, ro kare parinonga recishandiswa basi. Bhiriji imbza parinonga rapera, ro kare ringaphwanywa. Mukufananavo, ticito tabvunja vandhu kuti vasiye zvitendhwa zvavo “zvokare” kangaije tinodikana kuvabesera kuti vajijire kubongesera ngo zvokadi “zvipsa” kana jijiso jo Bhaibheri jovacikato vaziva. Tikadaro, ivona vanozokwanisa kusiya zvitendwa zvavo. Zvingatora nguva kuti tikwanise kubesera vandhu kuti vacinje upenyu hwavo.—VaRoma 12:2.

14-15. Tingabeseresa kudini vaya vano uzivi ushoma kana avana no cavanoziva ngo pamusoro po soterero yo kupona kwenda no kwenda pasi pano mu Paradhiso? Ipanyi muezaniso.

¹⁴ Kudari tikava vanosengerera no vandhu mu mushando wedu, atizoimiri kuti ivona vazwisise kana vatende cokwadi co Bhaibheri pa bvaza yo kutanga yovanocizwa. Kusiyapo izvo, usizi ungatindundira kuti tivabesere kuti vazwisise zvinonangwa mu Bhaibheri, padoko ngo padoko. Inga muezaniso, rangariranyi kuti mungabeseresa kudini ari wese kuti azwisise ngo pamusoro po soterero yo kupona no kucingaperi mu paradhiso pasi pano. Vazinji apana cavanoziva ngo pamusoro pazvo. Kangaije ivona vanotenda kuti kufa i kupera ko zvese. Kana kuti ivona vanotenda kuti vandhu vese vanoita zviro zvakanaka vanoenda mugore. Tingavabeseresa kudini?

¹⁵ Apa, pano muezaniso wo hama imweni inobesera vandhu kuti vazwisise soterero yo kupona pasi pano kwenda no kwenda. Cokutanga, iyona inoverenga Genesi 1:28. Perapo, inobvunjisa mune wo muzi kuti, i kwapi zve mu mugariro wakadini wo kuti Mwari anoda kuti vandhu vapone. Vandhu vazinji vanoti: “Pasi pano, mu mugariro waushoni.” Tevere, hama iyi inoverenga Isaia 55:11 zve inobvunjisa kuti, kureva kuti cidisiso ca Mwari cacinja here? Kazinji, mune wo muzi anodavira kuti, haiwa. Pejisire, hama iyi inoverenga Nduyo 37:10, 11 zve yobvunjisa kuti, vandhu vo mushovonyi vanozopona kumbejiyo? Ngo kushandisa Bhaibheri, hama iyi yakakwanisa kubesera vandhu vazinji kuti vazwisise kuti Mwari aciri kuda kuti vandhu vakanaka vapone kwenda no kwenda mu Paradhiso pasi pano.

16-17. Tikada kurangarira zviri pana Mazwi Akangwara 3:27, ngoyapi njira jinoshanda jo kukhombija usizi? Ezanisanyi.

¹⁶ Yocirongomuna, psakanyi njira yaushoni yo kukhombija kuti munoneseka ndivona. Inga muezaniso, kudari tikaguma pa muzi wo mundhu pa nguva iciripi iyona, taizopinda zve tonanga kuti tinozoviya pa nguva kwayo here? Tingakumbira kuregerehwa zve tokumbira kuviya pa nguva imweni. Maizoitenyi kudari mune wo muzi akada kubeswa kuita ciri cese? Kana kudari mundhuwo ari kuhwaja,  mungamubesa kootenga ciri cese here? Pa mugariro jakadari, tingaita ciri cese kuti tibesere mundhu wondhowo.—Verenganyi Mazwi Akangwara 3:27.

¹⁷ Imwe hambzaji yakava no muviyo waushoni maningi ngo kuita ciro mu njira yo usizi. Icindundihwa ngo usizi, iyona yakatara karata ku mbhuri imweni yainga yafihwa ngo mwana. Karateyo yaibatanijavo vhesi nganani jo mu Bhaibheri jinoembejera. Karata iyi yakapsasa kudini mbhuri iyi? Mai vakafihwaya vakadavira kudari: “Zuro yakava njiku inosuruvarisa maningi. Asi karata yenyu yakatibesera. Ndinobonga, iyona yativangisa maningi. Zuro ndakaiverenga pa bvaza jinodarika 20. Ndakakahamara ngo usizi hwenyu, kutaja komakatiita, pomwe no vangiso yo makatipa. Tinobonga kamare zvecibva pasi po mwoyo jedu.” Pacina kukana-kana, tingavavo no muviyo waushoni patinojidira pa ndau yo vaya vari kutambujika perapo toita ciri cese kuti tivabesere.

18. Mukuzwirana no 1 VaKorinto 3:6, 7, tinodikana kuramba tino mavonero api akaezanana ngo pamusoro po mushando wedu?

¹⁸ Zvokadi kamare, tinoda kuva no mavonero akaezanana mu mushando. Takabatikana pa kuda kubesera vamweni kuti vajije ngo pamusoro pa Mwari, asi atikwanisi kuita divi guru ro basa iri. (Verenganyi 1 VaKorinto 3:6, 7.) Ndi Jehovha basi anokwanisa kuita kuti vandhu vaende kwaari. (Johani 6:44) Pejisire, azvinenyi mundhuwo anozoashira kana anozoramba masoko akanaka, zvinofira pa zviya zvaari ngo mukati. (Mateu 13:4-8) Ceujanyi kuti vandhu vazinji avazivi kutendera masoko a Jesu, pikija iyena wainga Mujijisi mukuru wakambopona! Ngokudaro, atidikani kurembejeka kudari vandhu vazinji vatinoeja kubesera votama kupurukira masoko edu.

19. Ngojapi muviyo jinovepo ngo kukhombija usizi mu mushando wedu?

¹⁹ Tinozovavo no muviyo waushoni, patinokhombija kuva no usizi mu mushando wedu. Mudakaro wedu mu basa ro kucumaera unozoengejeka. Tinozovona tega kamare, kuti tinowana mudakaro patinopa. Zve tinozoita kuti zvireruke kuno vaya ‘vano cido co kuti vaponeswe’ vaashire masoko akanaka. (Maitiro o Vapostori 13:48, Shanduro yeNyika Itsva) “Ngokudaro, tino nguva, ngatiitire uxoni vandhu vese.” (VaGalàsia 6:10) Perapo, tinozodakara ngo kukuja Baba wedu vo mugore.—Mateu 5:16.