1-2. (a) Ngocapi ciziviso cicazoitwa ngo vatungamiriri vo nyika sambiri pano? (b) Ticazodavira muvhunjo japi?

RANGARIRANYI kuti vatungamiriri vo nyika vapera kuita ciziviso caivetehwaya maningi, co ‘runyararo no rugarisiko.’ Ivona vangatonanga ngo kudada kwese kuti vazokwanisadi kuita kuti nyika ive ndau yakajiviririka. Ivona vanozoda kuti vandhu vese varangarire kuti nyika yazogajana. Asi vatungamiriri ava avazokwanisi kuvonerera zviro zvicada kuitika. Ngenyi? Mukuzwirana no ciporofita co Bhaibheri, “pondhopo apo, cipondhopondho, vanozopejwa, inga kuhwajihwa kwaanoita mwanakaji ano mimba. Avazokwanisi kutiza.”—1 VaTesalònika 5:3.

² Asi kuno muvhunjo munganani jinosisira maningi, jinoda mupinguro: Zvicinyi zvicazoitika pa “dambujiko guru”? Jehovha anozoda kuti tiitenyi pa mukuvo wondhowo? Zvicinyi zvatinodikana kuita wari uno, kuti tizoenderere mberi takagondeka pa dambujiko guru?—Mateu 24:21.

3. Mukuzwirana na Apokalipsi 17:5, 15-18, Mwari anozoitisa kudini kuti aparaje “Babilónia Guru”?

³ Verenganyi Apokalipsi 17:5, 15-18. “Babilónia Guru” rinozoparajwa! Inga zvanangwaya pakutanga, vatungamiriri vo nyika avazokwanisi kuvonerera zvicazoitika pa mukuvo uwu. Ngenyi? Ngokuti “Mwari [anozodira] mu musoro mayo murangariro wo kuita ibzo.” Kuita zvapi? Kuparaja mutongi wo pasi pese wo ciara co manyepo, kubatanijavo no zviyara zvese zvinonanga kuti ngo zvo Cikristu. Mwari anozodira murangariro  wake mu mwoyo wo “gumi ro munyanga” no “cikara cakapsuka.” “Cikara,” cinoimirira Nações Unidas zve gumi ro munyanga, rinomirira utongi hwese unobesera Nações Unidas. (Apokalipsi 17:3, 11-13; 18:8) Utongi paunohwisa ciyara co manyepo, tinozoziva kuti dambujiko guru roda kutanga. Uwo, unozova mukuvo unothyisa vandhu vese vo nyika.

4. (a) Ngorapi thangwe ringazoitisa kuti utongi uhwise ciyara co manyepo? (b) Vandhu vainga mu zviyara zvo manyepo vangaitenyi?

⁴ Atirizivi thangwe rinozoitisa kuti utongi uparaje Bhabhironi Guru. Kangaije iwona ungananga kuti zviyara zviri kuphingaija runyararo wo nyika yese zve zviri kungwinira maningi mu zvomatongehwe o nyika. Cimwenizve, vangatonanga kuti zviyara zvaunganija zviro zvakawanda kubatanijavo mare. (Apokalipsi 18:3, 7) Zvinovonekazve inga kuti, pa kuhwiswa ko Bhabhironi Guru, asipi vandhu vese vo zviyara zvo manyepo vanozoparajwa. Zvokadi kamare, zvinovoneka inga kuti vatungamiriri vo zviyara vanozosiya kuita divi razvo. Zviyara zvese pazvinongara-ngara, vandhu vaingaya mukatimo, vanozozwisisa kuti vatungamiriri vavo varembejeka. Zvingatoitazve kuti ivona vangananga kuti avacadi kutora rutivi ro ciyareco.

5. Jehovha wakagondesenyi ngo pamusoro po dambujiko guru zve ngenyi?

⁵ Bhaibheri arinangi kuti Bhabhironi Guru rinotora mukuvo wakadini kuti ripere kuparajwa. Zvatinoziva ngo zvokuti unozova mukuvo mushoma. (Apokalipsi 18:10, 21) Jehovha wakagondesa “kupungura njiku” jo dambujiko guru. Ngenyi? Ngo ndava yo “vakasanwa” pomwe no kutama kuzoparajwa ko ciyara cokadi. (Marco 13:19, 20) Waro, Jehovha anoda kuti tiitenyi, kutangira pa kutanga ko dambujiko guru mbhera kupera ko Armagedhoni?

6. Kureva kuti kubuda mu ciyara co manyepo zvinokwana?

⁶ Inga zvotakavona pa cijijo cakapera, Jehovha anoda kuti vanamati vake vatame kubatana no Bhabhironi Guru. Asi, kubuda basi mu ciyareco azvikwani. Tinodikana kutema  civaringo co kuda kushandira Jehovha basi. Ngatende tivone njira mbiri jo kuzviita ndijona.

7. (a) Tingaitisa kudini kuti tibesere no kucunga kwese zvinonanga Jehovha kuti zvakanaka? (b) Mukuzwirana no Vaheberi 10:24, 25, ngenyi musongano jinosisira maningi wari uno?

⁷ Yokutanga, tinodikana kubesera no kucunga kwese zvese zvinonanga Jehovha kuti zvakanaka. Atidikani kutendera zvinoitwa ngo nyika ino. Inga muezaniso, atitenderi mushovo uri wese wo uhure. Izvi zvinobatanija mucadho yo vanarume basi kana vanakaji basi no kudakarira mufambiro wakadaro. (Mateu 19:4, 5; VaRoma 1:26, 27) Cocipiri, tinodikana kuenderera mberi tecinamata Jehovha pamwepo no hama Jedu jo Cikristu. Itusu tinoita izvi pese patinonga tiri, Kunyumba yo Umambo, pamuzi po hama pikija mucifise-fise. Apana cinozotiitisa kuti tiregere kuita musongano tecinamata Jehovha. Tinodikana kuungana ngo “kuti njiku yo kuvia kwa Tenji yaaphedo.”—Verenganyi Vaheberi 10:24, 25.

8. Masoko atinocumaera angazova no cinjo yapi kumbeji kwatiri kwendari?

⁸ Zvinovoneka inga kuti, pa dambujiko guru, masoko atinozocumaera angacinja. Wari uno, itusu tiri kucumaera masoko akanaka zve tiri kuita zvese zvatinokwanisa kuti vandhu vave vateveri va Jesu. Asi, pa dambujiko guru, masoko edu kangaije angava akavanga, kudari inga mapuwe akavanga. (Apokalipsi 16:21) kangaije tingatozivisa kuti nyika ya Sathana inozoparajwa sambiri pano. Mukuvo uwu paanoguma, tinozoziva kuti masoko api atinozocumaera zve tinozozviitisa kudini. Kureva kuti, tinozocumaera inga zvatinoitari kuvhira kare here? Kana kuti tinozoshandisa njira jimweni kuti ticumaere? Tinodikana kuvetera, kuti tizvivone. Ngo njira iri yese hayo, zvinovoneka inga kuti tinozova no cidakajiso co kuzivisa no kucunga kwese masoko o rutongeso a Jehovha!—Ezekieli 2:3-5.

9. Vandhu vangazoitenyi masoko edu akacinja? Asi tinodikana kuva no cokwadi cenyi?

⁹ Zvese zvinovonesa kuti masoko atinocumaera anozonyangaja utongi. Ngokudaro, ivona vangaita zvese zvavanokwanisa kuti vatinyaraje. Ngo iyo ndava, tinodikana kuthemba Jehovha. Wari uno, iyena ari kutibesera kuti ticumaere masoko akanaka. Tinova no cokwadi cokuti kumbejiyo, anozotipavo simba ro kuita zvese zvaanotituma kuita.—MIKEYA 3:8.

10. Mukuzwirana no ciporofita cinowanika pana Luka 21:25-28, vandhu vazinji vanozoitenyi pa dambujiko guru?

¹⁰ Verenganyi Luka 21:25-28. Pakati po dambujiko guru, vandhu vanozothya. Zvese zvavaivona inga zvakagajana, zvinozopera. Ivona vanozohwajihwa maningi vecithya kufa pa mukuvo unonesa wo upenyu. (Sofonia 1:14, 15) Pa mukuvo wondhowo, zvingaita kuti upenyu hunozonesa maningi pikija ku vandhu va Jehovha. Zvecivoneka kuti atiiti divi ro nyika, zvingaita kuti tisongane no zvineso. Tingatotama zvokuha, zvokusimira no pokuvata.

11. (a) Ngenyi vandhu vanozotizvukira meso? (b) Ngenyi atidikani kuthya dambujiko guru?

¹¹ Inozoguma nguva yokuti, vandhu vainga mu ciyara co manyepo vanozovona kuti Zvapupu zva Jehovha zviri kuenderera mberi zvecinamata. Vandhu ava vanozonyangajwa maningi ndizvona. Amborangariranyi jowe-yowe rinozoitika kubatanija mu interineti. Majinja pomwe na Sathana mutongi vawo, vanozotizonda ngo kuti tinonga tasara tega basi ticikazivi kuparajwa. Ngo kuti ivona vanonga vacizivi kukwanisa kuita cido cavo, cokupeja zviara zvese zvo pasi pano. Ngo ndava yazvo, ivona vanozotizvukira meso. Ndipona kamare majinja  ese paanozobara Gogi wo Magogi. * Ivona vanozobatana kuti vahwise vandhu va Jehovha. (Ezekieli 38:2, 14-16) Kuzwa masoko aya zvingatiita kuti tithimwe-thimwe ndizvona, ngo kuti atinasi kuziva kamare kuti hondo iyi inozoitisa kudini. Asi catinoziva ngo cokuti; atidikani kuthya dambujiko guru. Jehovha anozotipa mazano anozoponesa upenyu hwedu. (Nduyo 34:20) Tinozokwanisa ‘kuvangirira, no kumusa musoro,’ ngokuti tinoziva kuti “ruponeso [hwedu] huri kuguma.” *

12. Zvicinyi zviri kuithwa ngo “muranda wakagondeka no wakangwara” kuti anasirire kumbeji kwedu?

¹² Kuvhira kare “muranda wakagondeka no wakangwara,” ari kutinasirira kuti tirambe takagondeka pa dambujiko guru. (Mateu 24:45) Iyena ari kuita izvi ngo njira jakawanda, asi ambovonanyi muezaniso umwe wo magungano o gore ro 2016 mbhera 2018. Rimwe nga rimwe raigogomejera mugariro umwe watinodikana kuva nawo kuti tipone mu njiku ya Jehovha. Ngaticeukije padoko mugariro iji.

13. Zvicinyi zvinozovangisa kugondeka kwedu kuna Jehovha, zve ngenyi tinodikana kuzviita wari uno?

¹³ Ugondeki: Musoro wo gungano ro mutundhu ro gore ro 2016 waiti: “Rambanyi Makagondeka Kuna Jehovha!” Gungano iri, rakatijijisa kuti tinodikana kuva no ushamwari hwakavanga na Jehovha kuti tirambe takagondeka kwaari. Hurukuro jakona jakagogomejera kuti tingavangisa ushamwari hwedu na Jehovha ngo kuita mukumbiro ngo mwoyo wese no kunasa kujija Bhaibheri. Mukumbiro no jijo yo Bhaibheri zvinozotivangisa kuti tinyise zviphingo zvinonesa. Nyika ya Sathana painonga yeciguma kumbhiri, tingavetera kusongana no muejo wo kugondeka kwedu kuna Jehovha no Umambo hwake. Vandhu vanozoenderera mberi vecitishora. Izvi zvingaitika maningi ngokutama kwedu kwatakapeamira. (2 Pedru 3:3, 4) Kudari tikada kuramba takagondeka kuna Jehovha pa dambujiko guru, tinodikana kuvangisa kugondeka kwedu wari uno.

14. (a) Cinjo yapi inozoitika no hama jiri kungwarira vandhu va Mwari nyamasi uno pasi pano? (b) Ngenyi tinodikana kuzoramba takagondeka izvi zvikaitika?

¹⁴ Nyamasi uno, Mukhumbi Unotonga ndiwona unongwarira vandhu va Jehovha pasi pano. Asi pa dambujiko guru, vo Mukhumbi Unotonga vanonga vaciripizve pasi pano. Vokuzojwa vese vanonga vaunganijwa kumatenga. Anozotuma ngirozi jake; ijona ngo izwi guru no mbayapaya, jinozounganija vakasanwa vake vo mativi marongomuna o nyika, divi ngo divi ro mugore. (Mateu 24:31; Apokalipsi 2:26, 27) Asi uzinji hukuru, hunozoenderera mberi hwakarongeka. Hama jino uzivi, jiri pakati po uzinji hukuru, jinozongwarira vandhu va Mwari. Izvi pazvinozoitika tinodikana kutatija kugondeka kwedu. Tinodikana kuzobesera hama iji tecizwira ndhungamiro javanozopuwa ndi Mwari. Kuti tipone, zvinozofira pa kuzwira kwedu!

15. Zvicinyi zvinozotibesera kuti tivangise kucungirira kwedu, zve ngenyi tinodikana kuzviita wari uno?

¹⁵ Kucungirira: Musoro wo gungano ro mutundhu ro 2017, waiti: “Mucadoremba!” Gungano iri, rakavangisa kukwanisa kwedu kucijikira muejo. Takajija kuti kucungirira akufiri kumugariro wakareruka. Tingavangisa kucungirira kwedu ngo kuthemba Jehovha.  (VaRoma 12:12) Atidikani kukanganwa cigondiso ca Jesu cokuti: “Ndiani anovangirira mbhera pakupejisira, ndiyena anozoponeswa.” (Mateu 24:13) Cigondiso ici, cinovonesa kuti tinodikana kuramba takagondeka pikija no zvineso zvatingasongana nazvo. Kudari tikacungirira muejo nyamasi uno, zvinozotivangisa kuti titame kuremba dambujiko guru rikatanga.

16. Tinodikana kuitenyi kuti tive no cicunge, zve tingavangisa kudini kuthemba kwedu Jehovha wari uno?

¹⁶ Cicunge: Musoro wo gungano ro mutundhu ro 2018, waiti: “Cungai!” Gungano iri, rakaticeukija kuti kuva no cicunge asipi kuti tinoziva maningi. Inga zvinoitika no kucungirira, itusu tingava no cicunge cokadi-kadi ngo kuthemba Jehovha. Tingavangisa kudini kuthemba kwedu Jehovha? Tinodikana kuverenga Bhaibheri njiku jese no kurangarijisisa njira jakashandiswa ndi Jehovha kuti aponese vandhu vake mu nguva jokare. (Nduyo 68:21; 2 Pedru 2:9) Majinja paanozotihwisa pa dambujiko guru, tinozodikana kuva no cicunge no kuthemba Jehovha munjira yaticizivi kumboitazve. (Nduyo 112:7, 8; Vaheberi 13:6) Tikathemba Jehovha wari uno, tinozova no cicunge catinoda kuti tihwisane na Goge. *

17. Ngenyi atidikani kuthya Armagedhoni? (Vonanyi pikica yo pakapa.)

¹⁷ Inga zvanangwaya pa jijo yaperari, uzinji hwedu tiri kurarama mu njiku jo kupejisira. Asi, itusu tino vetero yo kubuda pa dambujiko guru tiri penye. Hondo yo Armagedhoni inozova ciro cokupejisira kuti nyika ino iparajwe. Asi atidikani kuthya. Ngenyi? Ngokuti iyi, i hondo ya Mwari. (Mazwi Akangwara 1:33; Ezekieli 38:18-20; Zakaria 14:3) Jehovha akazopekeja citatijo, Jesu Kristu anozotungamirira masoca a Mwari kwenda ku hondo. Jesu anozova pamwepo no vokuzojwa vakamuswa pomwe no zviuru no zviuru zvo ngirozi. Vese ava, vanozohwisana na Sathana, madhimoni ake no masoca ake pasi pano.—Danieli 12:1; Apokalipsi 6:2; 17:14.

18. (a) Jehovha wakatigondesenyi? (b) Kuitisa kudini Apokalipsi 7:9, 13-17, inotipa cigondiso cakavanga kuitira kumbeji?

¹⁸ Jehovha wakatigondesa kudari: “Cokurhwa ndicona, cakanasirihwa kuambana nemwi,  acizobudiriri.” (Isaia 54:17) “Uzinji hukuru” wo vanamati vakagondeka va Jehovha vanozobuda pa ‘dambujiko guru’ vari penye! Vese vanozoenderera mberi vecishandira Jehovha. (Verenganyi Apokalipsi 7:9, 13-17.) Zvokadi kamare, zvinodakajisa kuziva kuti Bhaibheri rinotipa zvigondiso zvinothembeka ngo pamusoro po kumbeji! Tinoziva kuti Jehovha “anongwarira vandhu vakagondeka.” (Nduyo 31:24) Vese vanoda no kukuja Jehovha vanozodakara ngo kuvona kuti zina rake raceneswa pa manyepo ese.—Ezekieli 38:23.

19. Ngoyapi vetero inoshamaisa yatinayo kuitira kumbeji?

¹⁹ Rangariranyi kuti magama anowanika pana 2 Timoti 3:2-5, aizova akadini kudari naibhuya ngo pamusoro po nyika impsa, ndau yo kuti vandhu avazocengejwizve ndi Sathana. (Vonanyi bhokiso rinoti: “ Vandhu Vanozova Vakadini Kumbejiyo.”) Hama George Gangas, * avo vakashanda inga umwe wo vo Mukhumbi Unotonga, vakananga kudari: “Inozova nyika inoshamaisa, vese vakazova hama no hambzaji! Sambiri pano, cinozova cidakajiso co kurarama mu nyika imbza. Narini imwimwi amuzofi. Tinozopona kwenda no kwenda.” Pacina kukana-kana, iyi i vetero inoshamaisa kamare!