1. Ngowapi mukoka wakaita Jesu kuno vatandi varongomuna zve ivona vakaitenyi?

PEDHRU, Andereya, Jakobo na Johani vainga vatengesi vo hove. Amborangariranyi kushamaisika ko vakava nako povakazwa mukoka wa Jesu wo kuti: “Nditeverenyi, ndinozomuita vatandi vo vandhu.” * Ngozvapi zvakaita vanarume ava? Bhaibheri rinoti: “Pondhopo vakasia majuya avo vomutevera.” (Mateu 4:18-22) Cisungo ici cakacinja upenyu hwavo kwenda no kwenda. Kusiyapo kupsaka hove kamare, ivona vaizova ‘vatandi vo vandhu.’ (Luka 5:10) Nyamasi uno, Jesu ari kuitavo mukoka wakafanana kuno vaya vano mwoyo wakanaka unoda cokwadi. (Mateu 28:19, 20) Makatendera mukoka wa Jesu wo kuva vatandi vo vandhu here?

2. Ngenyi civaringo co kuva vatandi vo vandhu cinosisira maningi zve zvicinyi zvinozotibesera kuti titeme civaringo ici?

² Kangaije muri kujija Bhaibheri ko mukuvo wakati kuti zve maita cinjo mu upenyu hwenyu. Asi wari i nguva yo kutema civaringo co kuti zvicinyi zvamunodikana kuita kuti muve mucumaeri wo masoko akanaka. Kudari amuna cokwadi ngo pamusoro po kutendera mukoka wa Jesu, mucadoremba. Kuthya kwenyu kunokhombija kuti imwimwi munoziva kuti shwiro iyi inosisira maningi. Ndizvona kuti Bhaibheri rinonanga kuti Pedhru no vadoni vake vakasiya majuya avo “pondhopo” povakakokwa ndi Jesu. Asi Pedhru no hama yake avazivi kutema civaringo ici vacizivi kunasa kurangarira pokutanga. Mweji jinodarika mutandhatu  vacito vaashira mukoka uwu, ivona vainga vatendera kuti Jesu ndi Mesiya. (Johani 1:35-42) Mukufananavo, kangaije matopeja mukuvo wakawanda mecijija ngo pamusoro pa Jehovha na Jesu. Pikija zvakadaro, munoda kwenderera mberi kuti muve phedo na Jehovha. Asi amudikani kutema civaringo ici mucizivi kuvona zvinobatanijwepo. Zvicinyi zvakabesera Pedhru, Andereya no vamweni kuti vateme civaringo cavo?

3. Ngojapi mugariro jingavangisa cido cenyu co kuda kutendera mukoka wa Jesu?

³ Vajiji vo kutanga va Jesu vakavangisa cido cavo co kucumaera, vaiziva kuti vangaitisa kudini basa ravo, vainga no cicunge zve vaivangisira. Pacina kukana-kana mugariro iji jakavabesera kuti vakwanise kuva vatandi vo vandhu. Musoro uwu, unozomubesera kuti mungaitisa kudini kuti muve no mugariro iji jingamubesera kuti mukwanise ushoni kuva mujiji wa Kristu.

4. Ngenyi Pedhru waida maningi kutanda?

⁴ Pedhru waitanda ngokuti waida kusapota mbhuri yake, asi aacairivona inga basa haro basi. Iyena waida maningi kutanda. (Johani 21:3, 9-15) Iyena wakatodakarirazve kuva mutandi wo vandhu. Ngo besero ra Jehovha, Pedhru wakakwanisa kubudirira ushoni pa basa rake iri.—Maitiro o Vapostori 2:14, 41.

5. Makacijikira pana Luka 5:8-11, ngenyi Pedhru waithya zve zvicinyi zvingatibesera kuti tikwanise kunyisa mazwiro ondhoo?

⁵ Thangwe guru rinotiitisa kuti ticumaere ngo ro kuti tinoda Jehovha. Rudo wondhowo kuna Jehovha unotibesera kuti tivhunje vamweni ngo pamusoro pake, pikija patinojivona kuti atikwanisi ushoni kuita basa rondhoro. Jesu paakakoka Pedhru kuti ave mutandi wo vandhu, iyena wakamuvhunja kudari: “Ucathya.” (Verenganyi Luka 5:8-11.) Pedhru aazivi kuthya  paairangarira ngo zvaizoitika ngo kuva kwake mujiji. Kusiyapo zvodhozvo, iyena waithya ngo ndava yo mushamaiso wakaitaya Jesu wobata hove jakawanda. Ngokudaro, Pedhru waijivona inga kuti aacaifanera kushanda na Jesu. Mukufananavo na Pedhru, itusu tingathya patinozwisisa basa rinobatanijwa pakuva vajiji va Kristu. Ngokudaro, vangisanyi rudo hwenyu kuna Jehovha, Jesu pomwe no vocigarisano venyu. Mukaita kudaro, munozovangisa cido cenyu co kuda kutendera mukoka wa Jesu wo kuva vatandi vo vandhu.—Mateu 22:37, 39; Johani 14:15.

6. Ngorapi thangwe rimwe rinotiita kuti tide kucumaera?

⁶ Vonanyi mathangwe manganani anotiita kuti tide kucumaera. Rimwe rakona ngo rokuti, tinoda kuzwira mupango wa Jesu wokuti: “Endanyi, jijisanyi vandhu vese.” (Mateu 28:19, 20) Cimwenizve, tinocumaera ngokuti vandhu ‘vari kutajwa mu njira icikazivi kunaka zve vanonga vakaparajika,’ zve vanonga vano cido co kuda kujijira ngo pamusoro po cokwadi co Umambo. (Mateu 9:36, Shanduro yeNyika Itsva) Jehovha anoda kuti mushovo wese wo vandhu vazive cokwadi zve vapone.—1 Timoti 2:4.

7. VaRoma 10:13-15, inokhombijisa kudini kuti basa ro kucumaera rinosisira?

⁷ Ciro cimweni cinotiita kuti tide kucumaera, ngo co kuziva kuti basa redu ringakwanisa kuponesa vandhu. Mukusiyana no mutandi anoha kana kutengesa hove jaabata, itusu tiri ‘vatandi’ vo vandhu kuti tiponese upenyu hwavo.—Verenganyi VaRoma 10:13-15; 1 Timoti 4:16.

8-9. Mutandi anodikana kuzivenyi zve ngenyi?

⁸ Mu njiku ja Jesu, mutandi wo Iziraeri waidikana kuziva kuti mushovonyi wo hove yaaida kubata. (VaLevi 11:9-12) Cimwenizve, waidikana kuziva kuti waizowanira kwapi mushovo uwu wo hove. Kazinji hove jinogara pa ndau inokumwa iri ushoni zve panonga pano zvokuha zvakawanda. Waro, kunanga kuti nguva inoenda mutandi kuti atande inosisiravo here? Vonanyi basi zvakaitika ku cirundu co Pasifiko. Imwe hama yakakoka misionario wainga mu nyikemo kuti vaende kootanda. Misionario uwu wakati: “Zvakanaka, ndinozowanana na imwimwi mangwana pa nguva 9 jo mangwanani.” Hama iya yakadavira kudari: “Amuzivi kuzwisisa kani, tinoenda pa nguva yatingakwanisa kuwana hove haiwa pa nguva yakatinakira.”

⁹ Ndizvona zvaitwavo ngo vatandi vo vandhu vo muzana ro rokutanga ro makore. Ivona vaiienda ku ndau jo vaizowana “hove” no kuziva nguva kwayo yo kujiwana. Inga muezaniso, vajiji va Jesu vaicumaera mu themberi, mu sinagoga, nyumba ngo nyumba no mu ndau jaitengesehwa zviro. (Maitiro o Vapostori 5:42; 17:17; 18:4) Itusu tinodikanavo kuziva nguva kwayo yatingawana vandhu mu ndima yotakagajwa. Tinodikanavo kuva vandhu vacikanesi kucinja urongwa hwedu, kuti tikwanise kucumaera no kuziva kuti ngokwapi kwatingakasika kuwana vandhu.—1 VaKorinto 9:19-23.

10. Ngoapi mathurusi atiri kupuwa ngo sangano ra Jehovha?

¹⁰ Mutandi anodikana kuva no mathurusi kwao no kuziva kumashandisa. Itusu tinodikanavo kuva no mathurusi kwao kuti tikwanise kucumaera. Zve tinodikanazve kuziva kuti tingamashandisa kudini. Jesu wakapa ndhungamiro jakajeka ku vajiji vake kuti vakwanise kuva vatandi vo vandhu kana kuti vakwanise kucumaera masoko akanaka. Iyena wakavavhunja zvicinyi zvavaidikana kwenda nazvo, ngokwapi kwavaizoenda koocumaera no kuvavhunja zvavaizonanga. (Mateu 10:5-7; Luka 10:1-11) Nyamasi uno, sangano ra Jehovha riri kutipa Bhokiso Redu ro Mathurusi ro Kujijisa rino mathurusi akawanda anotibesera kuti tiitise nane basa redu ro kucumaera. * Irona riri kutijijisa manera atingashandisa  mathurusi ondhoo. Besero ratiri kuashirari rinothembeka zve rinotibesera kuitisa nane pa basa redu ro kucumaera.—2 Timoti 2:15.

11. Ngenyi vatandi vo vandhu vanodikana kuva no cicunge?

¹¹ Vatengesi vo hove vanodikana kuva no cicunge. Nguva jimweni ivona vanosongana no mugariro jinonesa mu jombe. Kazinji vanoshanda co usiku zve mu kumwa zvokuti mugariro wo kunja unocinja ngo civhumbu, mavimbi otanga kuvanga. Mukufananavo, vatandi vo vandhu vanodikana kuva no cicunge. Patinotanga kucumaera no kuzivika inga Zvapupu zva Jehovha, tingatosongana no “mavimbi” akadari inga kuteverehwa ngo vo pa mbhuri, kushohwa ngo shamwari no vandhu vamweni vanoramba kupurukira zvatinocumaera. Asi izvo azvitikahamaji. Jesu wakananga kuti iyena waizotuma vateveri vake ku vandhu vaizovanyenya.—Mateu 10:16.

12. Mukuzwirana na Joxwa 1:7-9, zvicinyi zvingatibesera kuti tiengejere cicunge cedu?

¹² Mungavangisa kudini cicunge cenyu? Cokutanga, thembanyi kuti Jesu aciri kutungamirira basa ro kucumaera kuvhira mugore. (Johani 16:33; Apokalipsi 14:14-16) Tevere, vangisanyi rutendo hwenyu ku cigondiso co kuti Jehovha anozomukorondha. (Mateu 6:32-34) Rutendo hwenyu paunovanga, cicunge cenyu cinozoengejekavo. Pedhru no vadoni vake vakakhombija rutendo hwakakura maningi, povakasiya zvese kuti vatevere Jesu. Mukufananavo, imwimwi makakhombija rutendo pomakavhunja shamwari jenyu no vo pa mbhuri yenyu kuti,  mainga matanga kujija Bhaibheri no Zvapupu zva Jehovha no kwenda ku musongano javo! Pacina kukana-kana makaita cinjo huru maningi mu upenyu hwenyu kuti mukwanise kupona mukuzwirana no ndhungamiro jakarungama ja Jehovha. Kuti muite izvo, zvakadikana kuva no cicunge pomwe no rutendo. Ngo iyo ndava, endereranyi mberi meciengejera cicunge cenyu. Mukaita zvondhozvo, munozothemba kuti ‘Tenji Mwari wenyu anozova nemwi, kwese ko munozoenda.’—Verenganyi Joxwa 1:7-9.

13. Kuitisa kudini kurangarijisisa no kuita mukumbiro kungamubesera kuti muengejere cicunge cenyu?

¹³ Tingaengejeresazve kudini cicunge cedu? Itanyi mukumbiro mecikumbira cicunge. (Maitiro o Vapostori 4:29, 31) Jehovha anozodavira mukumbiro jenyu zve narini aazomusii. Iyena nguva jese aripo kuti amubesere. Cimwenizve, rangarijisisanyi ngo manera akaponesa Jehovha vandhu vamweni vo kare. Rangariranyizve ngo pamusoro po manera aakamubesera kuti mukwanise kuita cinjo no simba raakamupa kuti mukwanise kunyisa zvineso. Zvokadi kamare, Wiya wakatungamirira vandhu vake kuti vabude pa Jombe ro Kupsuka angamubeseravo kuti muve mujiji wa Kristu. (Exodo 14:13) Ivanyi no kuthemba kondhoko no kwakava no mutari wo nduyo paakati: “Tenji Mwari ana inini: andizothi narini! Mundhu angandiitira cinyi?”—Nduyo 118:6.

14. Zvicinyi zvatingajija ngo muezaniso wa hambzaji Masae na Hambzaji Tomoyo?

¹⁴ Njira imweni yo kuvangisa cicunge cedu ngo yo kujijira ngo manera akabesera Jehovha vandhu vaivoneka inga kuti vano nyowa, asi vojijira kuva no cicunge. Vonanyi muezaniso wo hambzaji inodanwa Masae. Iyona yainga maningi no nyowa zvokuti aicaikwanisa kubhuya ngo rutendo hwayo pakawanda vandhu. Iyona yaizwa kuti kubhuya no vandhu voicikazivi zvainesa maningi, zvaitodari inga iri kukhwira mufimbiji wakareba maningi zviro zvokuti aicaizokwanisa kuita. Asi yakaita zvese zvoyaikwanisa kuti ikwanise kuengejera rudo hwayo kuna Mwari no ku vocigarisano vayo. Iyona yakarangarira kuti mu nguva yatiri kuraramari masoko akanaka anodikana kucumaehwa ngo kukasika zve yakaita mukumbiro kuti ivangise cido cayo co kuda kucumaera. Yakazokwanisa kunyisa kuthya kwayo zve wari iri kushanda inga piyona wo nguva jese. Jehovha angabeseravo vacumaeri vapsa kuti “vave no cicunge.” Vonanyi zvakaitika no hambzaji inodanwa Tomoyo. Poyakatanga kucumaera muzi ngo muzi, samuzi wokutanga woyakabhuya nayo wakati: “Apana candinoda no Zvapupu zva Jehovha!” Zve wofunga musuvo. Hambzaji Tomoyo no kucunga kwese vakavhunja mudoni wavo kudari: “Mazvizwa zvovanangari? Iyena wakwanisa kudiziva inga capupu ca Jehovha. Ndadakara maningi!” Hambzaji Tomoyo wari vari kushanda inga piyona wo nguva jese.

15. Kuvangisira icinyi zve ngenyi kunosisira kuno Makristu?

¹⁵ Mutandi anobudirira, anovangisira. Kuvangisira kungasananguhwa inga “kukwanisa kujiita kuti muite zviro zvinodikana kuitwa.” Vatengesi vo hove vanodikana kuvangisira kuti vamukise, vakwanise kushanda mbhera vapeje basa ravo no kucungirira pikija mugariro paunocinja. Itusuvo tinodikana kuvangisira kudari tecida kucungirira no kupejisa basa redu.—Mateu 10:22.

16. Tingaitisa kudini kuti tive vandhu vanovangisira?

¹⁶ Kuvangisira asipi ciro cinogahwa utaka. Ngo cibarihwe cedu, itusu kazinji tinoda kuita ciro ticikapeji maningi simba redu. Kuti tikwanise kuvangisira tinodikana kujibata. Ngokudaro, tinoda besero kuti tikwanise kujiroveja kuti tiite zviro zvatinovona inga zvinonesa kuita.  Jehovha anotipa besero rondhoro ecishandisa mujimu mucena wake.—VaGalàsia 5:22, 23.

17. Inga zvakatahwa pana 1 VaKorinto 9:25-27, mupostori Pauro wakananga kuti waidikana kuitenyi kuti avangisire?

¹⁷ Mupostori Pauro wainga mundhu waivangisira. Asi iyena wakatoguma pa kunanga kuti “ndinotambuja” muviri wangu kuti ndiite zvakanaka. (Verenganyi 1 VaKorinto 9:25-27.) Iyena wakatongwajavo vamweni kuti vavangisire kuti vaite zvese ngo “kureremejana no kuzwirana.” (1 VaKorinto 14:40) Tinodikana kuvangisira kuti tienderere mberi tecinamata Jehovha, kubatanijavo kwenda koocumaera masoko akanaka.—Maitiro o Vapostori 2:46.

18. Tinodikana kuitenyi kuti Jehovha ativone inga tiri kubudirira mu basa ro kucumaera?

¹⁸ Mutandi anonanga kuti wabudirira pa basa rake kudari akabata hove jakawanda. Mukusiyana, itusu atinangi kuti tabudirira pa basa redu kudari tikaviisa vandhu vakawanda mu sangano ra Mwari. (Luka 8:11-15) Kudari tikavangisira pa kucumaera masoko akanaka no kujijisa vamweni, Jehovha anozotivona inga tiri kubudirira. Ngenyi? Ngokuti itusu tinonga tecizwira iyena pamwepo no Mwana wake.—Marco 13:10; Maitiro o Vapostori 5:28, 29.

19-20. Ngorapi thangwe rinosisira rinotiita kuti tide kucumaera wari uno?

¹⁹ Mu nyika jimweni, vatandi vanotendehwa kutanda basi mu mweji jakati kuti. Mu nyika jondhojo, vatandi vanozvivona inga kuti zvinodikana kukasika kamare kubata hove jakawanda jicito japera mweji jakatemehwa. Inga vatandi vo vandhu, itusu tinovangiswa kuti tiitevo zvondhozvo, ticumaere masoko akanaka wari, mugumo wo nyika ino paunonga wecikhwedera! Yasara nguva shoma basi kuti ticumaere masoko akanaka angaponesa upenyu hwo vandhu. Mucadovetera kuti zviro mu upenyu hwenyu zvimufambire ushoni kamare kuti muzotange kuita basa iri rinosisira.—Mucumaeri 11:4.

²⁰ Itanyi zvese zvamunokwanisa wari kuti muvangise cido cenyu co kuda kucumaera, kuengejera zivo yenyu ngo pamusoro po Bhaibheri, kuengejera cicunge cenyu no kuvangisira. Shandanyi pamwepo no makumasere o mamirioni o vatandi vo vandhu no kuva no mudakaro wamunozopuwa ndi Jehovha. (Neemia 8:10) Itanyi zvese zvamunokwanisa wari, kuti mucumaere masoko akanaka mbhera Jehovha anange kuti zvakwana. Musoro unotevera, unozobhuya zviro zvitatu zvingatibesera kuti tivangise cisungo cedu co kwenderera mberi tecicumaera inga vatandi vo vandhu.