1-2. (a) Tinodikana kujizwa kudini patinorangarijisisa ngo upenyu no mushando wa Jesu? (b) Ngozvapi zvatinozovona mu cijijo ici?

 MUNDHU watinoda paanofa itusu tinomurangarira maningi. Pakutanga mungatorangarira zviya zvakaitika paainga acito afa, maningi-ningi kudari wakatambujika mamingi. Pakufamba ko nguva, imwimwi munodakara ngo kurangarira zviya zvaakamujijisa paainga acito afa no zvaakananga kana kuita zvinomusekesa kana kumuvangisa.

² Mukuezanavo, itusu tinonyangajwa maningi patinoverenga ngo zvakaitikihwa na Jesu painga acito afa. Maningi-ningi pamukuvo wo Cirangarijo, zvaushoni maningi kupsaka nguva yo kurangarijisisa kusisira ko muripo wa Jesu. (1 Vakorinte 11:24, 25) Kusiyapo zvondhozvo, itusu tinodakara maningi ngo kurangarira zviro zvese zvaakananga no kuita paainga pasi pano. Zvinovangisazve kurangarira ngo zviri kutiitira Jesu wari uno no zviya zvaanozotiitira kumbejiyo. Inga zvatinoda kuvona mu cijijo ici, kurangarijisisa ngo zviro izvi no rudo hwatinotatijihwa ndi Jesu zvinozotiita kuti tive no cido co kuvonesa kubongesera kwedu.

3. Ngozvapi zvinotiita kuti tibongesere ngo ndava yo muripo?

³ Patinorangarijisisa ngo upenyu wa Jesu no kufa kwake zvinotiita kuti tide kuva vandhu vanobongesera. Paainga pasi pano, Jesu wakajijisa vandhu kuti Umambo hwa Mwari hwaizoviisa makomborero akawanda. Itusu tinoreremeja maningi zvinojijiswa ngo Bhaibheri parinobhuya ngo pamusoro po muripo. Tinobongesera maningi ngo muripo wa Jesu ngo  kuti unotiita kuti tive no ushamwari hwo phedo na Jehovha na Jesu. Vaya vano vetero yo kuzopona kuenda no kuenda vanozovona vadiwa vavo vakafa vecimuswa. (Johani 5:28, 29; Varoma 6:23) Itusu atifaneri kuwana makomborero aya nee atikwanisi kupagari zvatakaitihwa ndi Jehovha na Jesu. (Varoma 5:8, 20, 21) Asi itusu tinokhombija kuti tinobongesera ngo ndava yo muripo. Kuitisa kudini?

4. Mariya Madharena wakakhombijisa kudini kubongesera kwake ngo zvaakaitihwa ndi Jesu? (Vonanyi foto.)

⁴ Vonanyi muezaniso wo mwanakaji umweni wo Cijudha anodaninjwa kuti Mariya Madharena. Iyena wainga ecitambujwa maningi ngo madhimoni anokwana kuita manomwe. Wakatoguma pakurangarira kuti iyena aacaizosujunukazve pa madhimoni aya. Pacina kukana-kana, iyena wakabongesera maningi Jesu paakapera kugogomera madhimoni aya. Kubongesera uku kwakamuita kuti iyena ave mujiji wa Jesu. Iyena wakashandisa nguva yake, simba no zvese zvaainga nazvo kuti amubesere mu basa raainga eciita. (Ruka 8:1-3) Mariya waireremeja maningi zvaakaitihwari ndi Jesu. Asi iyena aacairangarira zviro zvimweni zvikuru zvaaizoitihwa kumbejiyo. Jesu waizopira upenyu hwake kuna itusu tese, “kuti vese vanomutenda vatame kuparajwa, asi vawane upenyu hucikaperi.” (Johani 3:16) Pikija zvakadaro, Mariya wakatatija kubongesera kwake kuna Jesu ngo kuramba akagondeka kwaari. Jesu paaitambujika pa mutanda wokutambujikira, Mariya wainga phedopo, ecibesera Jesu no vamweni vaingavo pondhopo. (Johani 19:25) Jesu paakafa, Mariya no vanakaji vamweni vaviri vakatenga zviro zvaidiwa kuti vanasirire muviri wa Jesu. (Marko 16:1, 2) Mariya wakakomborehwa maningi ngo kugondeka kwake. Iyena wakava no makomborero o kubhuya na Jesu paainga amuswa, apanazve na umwe wo vajiji vake vakawana makomborero akadari. —Johani 20:11-18.

5. Tingatatijisa kudini kuti tiri kubongesera zvakatiitira Jehovha na Jesu?

 ⁵ Itusu tinotatijavo kuti tiri kubongesera ngo zvakatiitira Jehovha na Jesu, ngo kushandisa nguva yedu, simba no zvese zvatinazvo kuitira basa ro Umambo. Inga muezaniso, itusu tingatojipira kuti tibesere pa kunasirira-nasirira nyumba jinoshandiswa kuitira kunamata Jehovha.

6. Ngenyi tingananga kuti muripo icipo kuitira umwe nga umwe wedu?

⁶ Patinorangarira ngo manera anotida Jehovha na Jesu zvinotiita kuti itusu tivadevo. (1 Johani 4:10, 19) Patinozwisisa kuti Jesu wakafira itusu kamare, rudo hwedu hunovanga maningi. Mupostori Pauro wakakhombija kuti iyena waibongesera ngo muripo wa Jesu paakatara kuti: “Mwana wa Mwari, wakandida, wopira upenyu hwake ngo ndava yangu.” (Vagaratiya 2:20) Ngo ndava yo muripo, Jehovha anomukwevera kuti muve shamwari yake. (Johani 6:44) Azvimudakajisi kuziva kuti Jehovha wakavona zvaushoni kwamuri no kupagari mutengo wakakura kuti muve shamwari yake? Azviiti kuti rudo hwamunahwo kuna Jehovha na Jesu huvange? Tinodikana kujivhunjisa kudari: ‘Rudo hwondhohwo hunondindunda kuti ndiitenyi?’

7. Inga zvatiri kuvona pa foto tese tingakhombijisa kudini kuda kwatinoita Jehovha na Jesu? (2 Vakorinte 5:14, 15; 6:1, 2)

⁷ Rudo hwatinahwo kuna Jehovha na Jesu hunotiita kuti tide vamweni. (Verenganyi 2 Vakorinte 5:14, 15; 6:1, 2.) Njira imwe yatinotatijira rudo uhu ngo yo kuvangisira mu basa ro kucumaera. Itusu tinobhuya no vandhu vese vatinosongana navo. Azvinenyi kuti vanobhuya ndumi yapi, jinja ravo, vano mare dangani avana, nee no makurire avakaita.  Tikaita kudaro, tinonga teciita mukuzwirana no zvinoda Jehovha “kuti vandhu vese vaponeswe no kuwana zivo yakarungama yo cokwadi.”—1 Timoti 2:4.

8. Tinokhombijisa kudini kuti tinoda hama no hambzaji jedu?

⁸ Itusu tinotatijavo kuti tinodavo Jehovha na Jesu ngo kuda hama no hambzaji jedu. (1 Johani 4:21) Itusu tinokhombija kuti tinoneseka navo ngo kuvabesera pavanosongana no zvineso. Hama painofihwa ngo mundhu wainoda, itusu tinoitondhoja, painohwaja, tinoenda koivona no painonga yakasuruvara tinoita zvese zvatinokwanisa kuti tiivangise. (2 Vakorinte 1:3-7; 1 Vatesaronika 5:11, 14) Itusu tinoita mukumbiro kuno hama no hambzaji jedu ngokuti “mukumbiro wo mururami uno simba guru.”—Jakobo 5:16.

9. Ngoyapi njira imweni inokhombija kuti munoda hama no hambzaji jenyu?

⁹ Njira imweni yatinokhombija ndiyona kuti tinoda hama no hambzaji jedu ngo yo kuvangisira kuti tirambe tino runyararo navo. Jehovha ndi muezaniso wakanaka watingatevejera wo kuregerera vamweni. Kudari Jehovha wakatendera kuti Mwana wake afire zvishaishi zvedu, azvicaizova zvakanaka kuti tiregererevo hama no hambzaji jedu pajinotishaishira? Itusu atidi kuva inga muranda wakashata wo pa muezaniso wa Jesu. Pikija wakaregerehwa magava ainga akakura maningi, iyena aazivi kukwanisa kuregereravo mudoni wake wainga no magava mashoma basi. (Mateu 18:23-35) Kudari imwimwi amuripi kuzwana no hama iri yese mu ungano maizotanga kobhuya na iyona kuti muite runyararo mucito maenda ku Cirangarijo? (Mateu 5:23, 24) Mukaita kudaro imwimwi munokhombija kamare kuti munoda Jehovha na Jesu.

10-11. Vakuru vangakhombijisa kudini kuti vanoda Jehovha na Jesu? (1 Pedhru 5:1, 2)

¹⁰ Vakuru vangakhombijisa kudini kuti vanoda Jehovha na Jesu? Njira imwe inosisira maningi ngo yo kutaja ushoni mavhuta a Jesu. (Verenganyi 1 Pedhru 5:1, 2.) Jesu wakanasa kujekesa izvi kuno mupostori Pedhru. Pasure pokuramba Jesu katatu kwese, Pedhru waida kuvonesa kuti waida maningi Jesu. Jesu paakandopera kumuswa wakavhunjisa Pedhru kudari: “Simoni mwana wa Johani, unondida here?” Pacina kukana-kana, Pedhru waizoita zviri zvese zvaizokhombija kuti iyena waida maningi Mujijisi wake. Jesu wakavhunja Pedhru kudari: “Havisai zvimavhuta zvangu.” (Johani 21:15-17) Mbhera pakufa kwake, Pedhru waitaja mavhuta a Mambo wake ngo rudo ecivonesa kuti waidadi kamare Jesu.

¹¹ Vakuru, Cirangarijo cicito catanga no pacinopera kuithwa mungakhombijisa kudini kuti magama a Jesu kuna Pedhru anosisira maningi? Imwimwi mungakhombija kuti munoda maningi Jehovha na Jesu ngo kuwana cimukuvo co kuvangisa hama no kubesera vaya vakaima kucumaera kuti vahwirire kuna Jehovha. (Ezekieli 34:11, 12) Imwimwi mungavangisavo vajiji venyu vo Bhaibheri na vaya vanoviya ku Cirangarijo ngo kuvaashira ushoni ivonavo vangazogumavo pa kuva vajiji va Jesu.

12. Ngenyi magama akananga Jesu pa usiku acito afa anotipa cigunge? (Johani 16:32, 33)

¹² Pausiku acito afa, Jesu wakavhunja vajiji vake kudari: “Munozotambujika mu nyika, asi cunganyi! Inini ndanyisa nyika.” (Verenganyi Johani 16:32, 33.) Zvicinyi zvakabesera Jesu kuti arambe ano cicunge pambeji  po vavengi vake no kuramba akagondeka mbhera kufa? Iyena wakanasa kuthemba Jehovha. Jesu waizviziva kuti vateveri vake vaizosongana no zvineso zvakafanana, ndiyo ndava Jesu wakakumbira kuti avangwarire. (Johani 17:11) Ngenyi izvi zvinotipa cicunge? Ngokuti Jehovha wakavanga maningi kupinda vavengi vese. (1 Johani 4:4) Jehovha arikuvona zvese zviri kuitika. Ndiyo ndava, tingava no cokwadi cokuti kudari tikathemba Jehovha tinozokwanisa kunyisa kuthya kwedu tova no cicunge.

13. Josefa o ku Arimateya wakakhombijisa kudini cicunge?

¹³ Vonanyi muezaniso wa Josefa o ku Arimateya. Iyena wainga mwanarume umweni waireremejwa maningi ngo Vajudha. Iyena waishandira mu banje ro Sinedhriyo ku Judha. Pamukuvo wakapeja Jesu pasi pano ecicumaera, Josefa aazivi kumbovoniwa inga mundhu wainga no cicunge. Johani wakananga kuti iyena “wainga mujiji wa Jesu ngo cifise-fise ngo ndava yo kuthya Vajudha.” (Johani 19:38) Josefa wainga no rutendo kuna Jesu asi iyena aacaizvibudisa pambhene. Iyena waizviziva kuti kudari vandhu vakamuziva kuti wainga mujiji wa Jesu avacaizomureremejazve. Bhaibheri rinonanga kuti pakupera kufa ka Jesu, Josefa “wakacungisira, woenda pamberi pa Pirato womukumbira muviri wa Jesu.” (Marko 15:42, 43) Kuvhira pondhopo vandhu vese vakazoziva kuti wainga mujiji wa Jesu, iyena acaaithyazve.

14. Ngozvapi zvamunodikana kuita kuti munyise kuthya kwamunonga meciita vandhu?

¹⁴ Imwimwi makambothya mundhu inga ndi Josefa o ku Arimateya? Imwimwi makambothya kunanga kuti muri Capupu ca Jehovha kushikora kana ku basa? Kudari muri kuda kuva mucumaeri acizivi kubhabhatijwa, muri kuthya here ngo zvinozonangwa ngo vandhu? Mucatendera kuti kuthya uku kumuimise kuda kuita zviro zvamunoziva kuti zvakanaka. Fununguranyi mwoyo wenyu kuna Jehovha ngo kuita mukumbiro. Mukumbirenyi kuti amupe cicunge kuti mukwanise kuita zviya zvaanoda. Pamunozwisisa kuti Jehovha ari kudavira mukumbiro jenyu, munozova no simba no cicunge.—Isaia 41:10, 13.

15. Jesu paakandogumira vajiji vake mudakaro wavo wakavandundira kuti vaitenyi? (Ruka 24:52, 53)

¹⁵ Vajiji vainga vakasuruvara maningi Jesu paakafa. Ambojidirenyi pa mugariro wavo. Ivona avazivi kuruza basi shamwari yavo asi vaingavo varuza vetero. (Ruka 24:17-21)  Apazivi kupera mukuvo wakawanda Jesu wakavagumira, wopeja mukuvo ecibhuya navo ecivaverengera kuti kufa kwake kwakakwanirisa zviporofita zvo mu Bhaibheri. Iyena wakavapa basa rinosisira maningi. (Ruka 24:26, 27, 45-48) Nopapera makumarongomuna o njiku naahwirira kudenga, kusuruvara kwavo kwakacinja kova mudakaro mukuru. Ivona vainga vakadakara maningi ngo kuziva kuti Jesu wainga wamuswa no kuzivazve kuti iyena waizovabesera kuti vakwanirise basa rovainga vagajwa. Mudakaro wavainga nawo wakavabesera kuti vakwanise kushandira Jehovha vacikarembi.—Verenganyi Ruka 24:52, 53; Mabasa o Vapostori 5:42.

16. Tingatevejeresa kudini vajiji va Jesu?

¹⁶ Tingatevejeresa kudini vajiji va Jesu? Imwimwi mungatova no mudakaro wo kunamata Jehovha haiwa basi pa mukuvo o Cirangarijo asi pa gore rese. Kuti mukwanise izvi, munodikana kudira Umambo hwa Mwari pa kutanga mu upenyu hwenyu. Hama zinji jiri kuita zvonazvo. Vamweni vakacinja nguva yovaishanda kuti vabatikane mu basa ro kucumaera, kwenda kumusongano no kuita kunamata ko mbhuri mukuvo wese. Vamweni vakatosiya zviro zvimweni zvokunyama zvokuti ku vandhu vamweni zvinosisira maningi. Ivona vakaita zvondhozvo kuti vanase kushandiswa ndi Jehovha ngo kwenda kunodiwa maningi vacumaeri. Ngo zvokadi kuti tinodikana kucungirira kuti tienderere mberi tecishandira Jehovha, iyena anotigondesa makomborero akawanda kudari tikadira Umambo hwake pakutanga mu upenyu hwedu.—Mazwi Akangwara 10:22; Mateu 6:32, 33.

17. Ngozvapi zvamasunga kuita pa mukuvo wo Cirangarijo? (Vonanyi foto.)

¹⁷ Tiri kuvetera no cidaka-daka cese njiku yo Cirangarijo cinozoithwa Mucipiri njiku 4 ya abril. Asi atidikani kuvetera kuti njiku iyi igume kuti tizorangarijisisa ngo upenyu no rufu hwa Jesu pamwepo no rudo hwakatikhombijira Jehovha na Jesu. Rangarijisisanyi ngo pamusoro po zviro zvese izvi pamukuvo o Cirangarijo. Wananyi mukuvo kuti muverenge no kurangarijisisa zvakaitika mu upenyu hwa Jesu pa bhokiso rinoti: “Sumana Yokupejisira yo Upenyu hwa Jesu mu Nyika” Rinowanika pa Co Kutarira zvo Musongano Upenyu Hwedu hwo Cikristu no Mushando co mweji wa abril 2019 pheji 4. Pamunonga meciverenga zviitiko izvi, psakanyi mavhesi anomuita kuti muvangisa kubogesera kwenyu, rudo, cicunge no mudakaro. Perapo psakanyi njira jinovonesa kubongesera kwenyu. Jesu anozobongesera maningi kuvangisira kwenyu kuti mujije ngo zvakamuitikira pa mukuvo wo Cirangarijo.—Apokaripsi 2:19.