1. Ngorapi thangwe rakaita kuti Jesu aezanise vateveri vake no mavhuta?

JESU wakaezanisa ushamwari waanao no vajiji vake no ushamwari una muhavisi no mavhuta ake. (Johani 10:14) Kuezanisira uku kunofanera kamare. Mavhuta anoziva kamare muhavisi wao no kupurukira izwi rake. Mwanarume umweni wakanasa kuzvivona izvi. Iyena wakati: “Itusu taida kuvhisa foto mavhuta manganani. Ngo kudaro, takaeja kumadanija kuti iwona aviye ngo phedo. Iwona aazivi kuviya, ngo kuti aacainasa kuziva izwi redu. Asi cimujaha cainga muhavisi pocakamadanija iwona akazwira izwi raco.”

2-3. (a) Kuitisa kudini vateveri va Jesu vanokhombija kuti vari kupurukira izwi rake? (b) Zvicinyi zvatinozovona pa jijo iyi no pa jijo inotevera?

² Muezaniso wo mwanarume uwu unoticeukija magama a Jesu ngo pamusoro po mavhuta ake kana vajiji vake. Iyena wakati: “Iwona anozozwa izwi rangu.” (Johani 10:16) Asi Jesu ari kudenga. Waro tingapurukirisa kudini izwi rake? Tinopurukira izwi rake patinoita zviro zvaakatijijisa.—Mateu 7:24, 25.

³ Pa jijo iyi no pa jijo inotevera, tinozovona zviro zvinganani zvaakajijisa Jesu. Inga zvatinozovona, Jesu wakatijijisa kuti atidikani kuita zviro zvimweni asi tinodikana kuita zvimweni. Tinozovona zviro zviviri zvotakavhujwa ngo muhavisi wedu wakanaka kuti ativhiri kuita.

4. Mukuzwirana na Ruka 12:29, zvicinyi zvingatiita kuti ‘tithimwe-thimwe maningi’?

⁴ Verenganyi Ruka 12:29. Jesu wakangwaja vateveri vake kuti vatame ‘kuthimwa-thimwa maningi’ ngo pamusoro po zviro zvavo zvo kunyama. Itusu tinoziva kuti mazano a Jesu nguva jese akanaka no kutizve ngo o ungwaru. Itusu tinoda kushandisa zvakanangari Jesu, asi nguva jimweni zvinganesa kuzviita. Ngenyi?

5. Ngenyi vandhu vamweni vangathimwa-thimwa ngo pamusoro po zvinodiwa zvavo zvokunyama?

  ⁵ Vamweni vangathimwa-thimwa ngo pamusoro po kupsaka zvokuha, zvokusimira no ndau yokugara. Zvingaita kuti ivona vari kugara mu nyika ino vandhu vazinji varombo no inonesa maningi kuwana basa. Zvinganesa kwavari kuwana mare inokwana kuti vasapote mbhuri yavo. Zvingaitazve kuti mundhu waisapota mbhuri iyi watamika, mbhuriyo yosara icina mare kuti itenge zvainoda. Cimwenizve, mutungu uwu wo korona vhiru wakaita kuti vandhu vazinji varuze mabasa avo. (Mucumaeri 9:11) Kudari itusu takasongana no cineso cakadari inga ici kana no zvineso zvimweni, tingazwira kudini ndhungamiriro ya Jesu yo kutama kuthimwa-thimwa maningi?

6. Sananguranyi zvakaitika na Pedhru pa vhaza imweni.

⁶ Pa vhaza imweni, mupostori Pedhru no vapostori vamweni vainga mu ngarava mu jombe ro garireya painga peciitika dutu, ivona vakavona Jesu ecifamba ngo panyezuru po kumwa. Pedhru wakati: “Mambo, kudari ari imwimwi, ndivhunjenyi kuti ndiviye kwamuriwaro ndecifamba ngo panyezuru po kumwa.” Jesu paakapera kumuvhunja kuti “izai,” Pedhru wakabuda mungarava “wofamba ngo panyezuru po kumwa, ecienda kuna Jesu.” Vonanyi basi zvakaitika pasure pazvo. “Paakaringisisa zibepo, Pedhru wakathya, wotanga kundondomera, ecikhuwa kuti: “Mambo, ndiponesenyi!”” Jesu wakatambanuja nyara yake womubata no kumuponesa. Zvinosisira maningi kuceukija kuti Pedhru waikwanisa kufamba panyezuro po kumwa paainga akasotesesa Jesu. Asi paakasotesesa zibepo, iyena wakathya maningi wotanga kundondomera.—Mateu 14:24-31.

7. Zvicinyi zvatingajija ngo muezaniso wo mupostori Pedhru?

⁷ Tingajija zviri zvese ngo muezaniso wa  Pedhru. Pedhru paakabuda mu ngarava woima mu jombe, iyena aacaivetera kuti waizoguma pakuthya wotanga kundondomera. Waida kuramba akaima mukumwa wofamba woguma kuna Jesu. Asi kusiyapo kusotesesa Jesu iyena wakathya maningi no kusotesesa zibepo. Nyamasi uno itusu tinoda rutendo kuti tikwanise kucungirira zvineso, kudari inga Pedhru waida rutendo kuti akwanise kufamba panyezuru po kumwa. Kudari tikatama kuthemba Jehovha no zvigondiso zvake, rutendo hwedu hunozoremba toguma pakundondomera kudivi ro umwari. Pikija tiri kusongana no zvineso zvakakura maningi, tinodikana kuenderera mberi tecithemba kuti Jehovha anokwanisa kutibesera. Asi tingazviitisa kudini?

8. Ngozvapi zvingatibesera kuti titame kuthimwa-thimwa ngo pamusoro po zvinodiwa zvedu zvo kunyama?

⁸ Kusiyapo kuthimwa-thimwa ngo pamusoro po zvineso zvedu, tinodikana kuthemba Jehovha. Ceukijanyi kuti Baba wedu vano rudo Jehovha, vanogondesa kuti vanozotipa zvinodiwa zvedu zvokunyama, kudari tikadira pakutanga zvinodiwa zvo umwari. (Mateu 6:32, 33) Nguva jese iyena anokwanirisa zvigondiso zvake. (Deuteronòmio 8:4, 15, 16; Nduyo 37:25) Kudari Jehovha anokorondha shiri no mafirori, atidikani kuthimwa-thimwa ngo pamusoro po zvatinozoha no zvatinozosimira. (Mateu 6:26-30; Vafiripi 4:6, 7) Kudari inga rudo unoita kuti vabari vape zvinodiwa kuno vana vavo, rudo unoitavo kuti Baba wedu vo kudenga vatipevo zvatinoda. Hina, tingava no cokwadi cokuti Jehovha anozotitaja.

9. Zvicinyi zvamungajija ngo muezaniso wo varovorani vanangwari?

⁹ Ngativone umwe muezaniso unovonesa kuti Jehovha anotaja zvinodiwa zvedu zvo kunyama. Varovorani vamweni vari munguva yakazara, vakaita hwendo ko nguva imwe mu karu yavo yokare, kuti vaende kotora hambzaji nganani jaigara kundau kunogara vatizi vo hondo kuti vaende najo kumusongano. Hama iyi yakati: “Pakupera ko musongano itusu takakoka hambzaji iji kuti jiende koha zviri zvese na itusu. Asi panguva yondhoyo takaceukija kuti aticainga no zviri zvese kuti tivape.” Varovorani ava vaizoitenyi? Hama iyi yakaenderera mberi yeciti: “Patakaguma pamuzi takakhanda pasta mbiri huru jainga no zvokuha zvakawanda pa musuvo wedu. Atimuzivi kuti ndiyani wakajisiyaro pondhopo. Asi Jehovha wakatikorondha.” No papera mukuvo mushomani, karu yo varovorani ava yakagujuka. Ivona vaida kuishandisa mu basa ravo rokucumaera, asi avacainga no mare kuti vainasiririse. Ivona vakatora karu iyi, voenda nayo ka mekaniko kuti vazive mutengo wavaizopagari kuti vainasiririse. Perapo mwanarume umweni wakaguma wovhunjisa kudari: “Karu iyi njaani?” Hama iyi yakananga kuti njangu, iyona inoda kunasirihwa. Mwanarume wiya wakadavira kuti: “Apana cakashata, mukaji wangu anoda karu yakadari kamare yo kori yondhoyi kamare. Unganditengesera ngo mutengonyi?” Hama iyi yakatengesa karu kuno mwanarume wiya, yopuwa mare inokwana kotenga imweni. Iyona yakapejisa yecinanga kudari: “Andikwanisi kusanangura manera andakajizwa pakupera ko njiku iyi. Itusu taizviziva kuti izvi azvizivi kuitika ngo kuitikavo hazvo. Asi Jehovha wainga ecitibesera.”

10. Kuitisa kudini Nduyo 37:5, inotivangisa kuti titame kuthimwa-thimwa ngo pamusoro po zvinodiwa zvedu zvo kunyama?

¹⁰ Patinopurukira izwi ro muhavisi wakanaka totama kuthimwa-thimwa maningi ngo pamusoro po zvinodiwa zvedu zvo kunyama, tingava no cokwadi cokuti Jehovha anozotikorondha. (Verenganyi Nduyo 37:5; 1 Pedhru 5:7) Amborangariranyi ngo zvineso zvanangwaya  pa  ndima yo cishanu. Zvingaita kuti mbhera wari Jehovha ari kushandisa musoro wo mbhuri kana mundhu umweni hake anobata basa wopamuzi kuti akwanise kutipekeja zviro zvatinoda. Kudari musoro wo mbhuri akatama kukwanisazve kupa zvinodiwa zvo mbhuri yake kana itusu tikaruza basa, Jehovha anozotikorondha ecishandisa njira jimweni. Iyena anozotikorondha. Ngatende tivone ciro cimweni catinovhunjwa ngo muhavisi wakanaka kuti titame kuita.

11. Mukuzwirana na Mateu 7:1, 2, ngenyi Jesu wakativhunja kuti tinodikana kuima kutonga, ngenyi zvondhozvo zvinganesa?

¹¹ Verenganyi Mateu 7:1, 2. Jesu waizviziva kuti vandhu vacizivi kukwana vanodakarira maningi kutonga vamweni. Izvi ndizvona zvakamuitisa kuti iyena anange kudari: “Mucadotonga.” Tinodikana kushanda ngo simba kuti titame kutonga hama jedu. Asi tese atizivi kukwana. Kudari tikavona kuti itusu nguva jimweni tinoda maningi kutonga, ngo zvapi zvatinodikana kuita? Purukiranyi zvakananga Jesu, moshanda ngo simba kuti mutame kutonga.

12-13. Kuitisa kudini kurangarijisisa ngo manera aivona Jehovha Mambo Dhavhidhi, kungatibesera kuti titame kutonga vamweni?

¹² Tingabesereka maningi ngo kurangarijisisa ngo muezaniso wa Jehovha. Iyena anosotesesa maningi zviro zvakanaka zvinoitwa ngo vandhu. Tinokwanisa kuvona izvi ngo manera aakataja Mambo Dhavhidhi, uwo wainga akaita zvishaishi zvakakura maningi. Inga muezaniso, iyena wakaita uhure na Bhatishebha, perapo wouraya mwamuna wa Bhatishebha. (2 Samueli 11:2-4, 14, 15, 24) Inga muviyo, iyena azivi kujikhuvaza ega basi asi wakakhuvaza mbhuri yake yese, kubatanijavo no vakaji vake vamweni. (2 Samueli 12:10, 11) Pavhaza imweni, Dhavhidhi wakakhombija kutama kugonda Jehovha mukuperera, paakaverenga masoca o Vaiziraeri, zviro zvaainga acizivi kuvhunjwa ndi Jehovha. Dhavhidhi wakaita izvi ngokuti wainga ecijikuja ngo masoca akawanda aainga nawo no kuthemba kuti iwona aizomujivirira. Ngo wapi wakava muviyo? Mutengo unokwana kuita 70.000 o Vaiziraeri wakafa ngo ndhendha.—2 Samueli 24:1-4, 10-15.

¹³ Kudari maipona ku Iziraeri pa mukuvo uwu, maizovonesa kudini Dhavhidhi? Kureva kuti imwimwi maizomutonga mecirangarira kuti iyena aafaneri kuregerehwa ndi Jehovha? Asi andizvopi zvakaita Jehovha. Iyena wakasotesesa maningi kugondeka ka Dhavhidhi no kukhauya ngo mwoyo wese kwaainga akaita. Ngo kudaro, Jehovha wakaregerera zvishaishi zvakakura zvakaitwa ndi Dhavhidhi. Jehovha waizviziva kuti Dhavhidhi wainasa kumuda no kuda kuita zviro zvaushoni. Amubongeseri ngo kuziva kuti Mwari wedu anosotesesa zviro zvakanaka zvatinoita.—1 Majimambo 9:4; 1 Kronike 29:10, 17.

14. Zvicinyi zvinobesera Makristu kuti atame kutonga vamweni?

¹⁴ Zvecivoneka kuti Jehovha aaveteri kuti itusu tive vandhu vakakwana, itusu atidikani kuvetera kuti vamweni vavevo vakakwana. Asi tinodikana kusotesesa zviro zvaushoni zvavanoita. Kazinji zvakareruka maningi kuvona kutama kukwana ko vamweni no kuvatonga. Asi mundhu anotevejera Jehovha anoshanda ushoni no vamweni pikija ecivona kuposa kovanoita. Buwe rino mutengo mukuru, ringavoneka inga kuti rakashata ricito ranasirihwa. Mundhu anoriziva, aasoti kushata kwaroko asi anosota mutengo warinonga rinawo parinopera kunasirihwa. Inga ndi Jehovha na Jesu, atidikani kutaja vandhu ngo mavonekero avo o kunja asi tinodikana kusotesesa mugariro javo jaushoni.

15. Ngenyi kusotesesa mugariro wo vandhu kungatibesera kuti titame kuvatonga ngo hasha?

 ¹⁵ Waro kusiyapo kusotesesa zviro zvaushoni zvinoitwa ngo vamweni, ngozvapi zvingatibesera kuti titame kuvatonga ngo hasha? Ejanyi kuvona kuti upenyu hwavo hwakadini. Vonanyi muezaniso uwu basi. Njiku imweni muthemberi, Jesu wakavona noni iri murombo yecidira zvimacereni zviviri zvo mutengo mushoma. Jesu aazivi kunanga kuti: “Ngenyi iyona aizivi kudira mare yakawanda?” Kusiyapo kusotesesa mare yoyakapa, Jesu wakasota kuti ngenyi iyona yakaita zvondhozvo no mugariro wo upenyu hwayo, perapo woisimba ngo zvaingari yaita.—Ruka 21:1-4.

16. Zvicinyi zvamajija ngo muezaniso wa hambzaji Vheronika?

¹⁶ Muezaniso wo hambzaji inodanwa Vheronika unokhombija kusisira ko kurangarira mugariro wo vamweni ticito tavatonga. Mu ungano movainga, mainga no hambzaji yairera yega mwana wayo icina mwamuna. Hambzaji Vheronika vakati: “Zvaivoneka inga kuti ivona avacaiviya kumusongano jese no kuenda kocumaera mukuvo wese. Ndaivavona inga kuti vakarembejeka ngozvavaiitaro. Asi njiku imweni ndakaenda kocumaera na mai wakona. Ivona vakandivhunja kuti mwana wavo wainga no ndhendha yo kupenga. Ivona vaivangisira maningi kuti vakwanise kuwana zvavaida kudivi ro kunyama no kuvangisa  ushamwari hwavo na Jehovha. Ngo ndava yo zvineso zvo mwana wavo, nguva jimweni ivona vaiitira musongano ku ungano imweni.” Hambzaji Vheronika vakapejisira veciti: “Andicaizviziva kuti ivona vaisongana no cineso cakadari mu upenyu hwavo. Wari uno ndinoda no kureremeja maningi hambzaji iyi, ngo zvese zvainoita kuti ishandire Jehovha.”

17. Jakobo 2:8 inotivhunja kuti tiitenyi, tingazviitisa kudini zvondhozvo?

¹⁷ Ngozvapi zvatinodikana kuita kudari tikavona kuti tina mushambo wo kutonga hama jimweni? Tinodika kuceukija kuti itusu tinodikana kuda hama jedu. (Verenganyi Jakobo 2:8.) Itusu tinodikanazve kuita mukumbiro ngo mwoyo wese kuna Jehovha, kuti atibesere kuima kutonga vamweni. Tinodikana kushanda mukuzwirana no mukumbiro jedu, totema civaringo cokuenda kobhuya no mundhu watashaishaya kutonga. Izvo zvingaita kuti itusu tinase kumuziva. Tingamukumbirazve kuti tishande tese mu basa ro kucumaera kana kuenda koha naye zviri zvese. Patinonasa kuziva hama yedu, tinozokwanisa kutevejera muezaniso wa Jehovha na Jesu ngo kusotesesa zviro zvaushoni zvinoitwa ngo mundhuwo. Patinoita kudaro, tinokhombija kuti itusu tiri kupurukira mupango wo muhavisi wedu wakanaka wo kutama kutonga vamweni.

18. Tingakhombijisa kudini kuti itusu tiri kupurukira izwi ro muhavisi wakanaka?

¹⁸ Kudari inga mavhuta kamare anopurukira izwi ro muhavisi wao, vateveri va Jesu vanopurukiravo izwi rake. Patinovangisira kuti titame kuthimwa-thimwa ngo pamusoro po zvinodiwa zvedu zvokunyama no kutama kutonga vamweni, Jehovha na Jesu vanozokomborera kuvangisira kwedu. Azvinenyi kuti itusu tiri “mushambi mudoko” kana wo “mavhuta amweni,” ngatienderere mberi tecipurukira izwi ro muhavisi wedu wakanaka. (Ruka 12:32; Johani 10:11, 14, 16) Pa musoro unotevera, tinozovona zviro zviviri zvakananga Jesu kuti zvaidikana kuitwa ngo vateveri vake.